1 Pwa 18

Elija de Ahab taane

1Da-kore sem déem zege ko yi bena yatɔ mo. Baŋa Wɛ laam ma ta de Elija o we, “Zaŋe n vo Pɛ Ahab tei se o na‑m, se a lage a pa doa jwoori ka ne tega kam ne mo.”#Jemsi 5:17-18 2Elija ma seene o vo se o jeeri Ahab.

Kana déem tiini ka chana Samaria teo ne. 3Pɛ Ahab ma bwoŋi o tontoŋeno Obadia. Wonto déem mo nii pɛ sɔŋɔ kom baŋa ne. O maa yɔɔre o kɔre Baŋa Wɛ lanyerane. 4Jezebele déem na wora o goe Baŋa Wɛ sampwori sem to mo Obadia kwei sampwori sem bi o seigi peo bɔɔna yalei wone.#2 Pwa 9:7 O seigi-ba bɔɔna yalei wone, nɔɔna finnu bɔɔne maama wone. O maa jaane wodiu de na o vei o pa-ba. 5Pɛ Ahab tage de Obadia o we, “Véi n beeri buli-yia yam de nabare sem ni maama dé tega kam baŋa ne se dé nii, dé wó na ga-zuru dé pa sisei sem de bona-sisei sem se se di na. Konto wó woli se dé yé go-se.” 6Ba ma pɔɔre tega kam ba pa daane se ba beeri ga-zuru jei. Ahab ma kwei tega kam daa dedoa, ye Obadia de kwei daa kadwoŋi kam, ye ba to beira ne.

7Obadia na wo veiŋa ne konto to mo o jeeri Elija chwoŋa ne. O na lɔre we ko ye Elija to, o ma tiiri o zuli‑o ye o we, “Amo tu Elija, ko ye nmo mo konto na?” 8Elija ma leiri o we, “Ɛɛ! Ko ye amo mo. Nam véi n ta n bere n yuu tu wom we Elija mo wo ywo-seeni.”

9Obadia ma bwei‑o o we, “A tu, a ke bɛ tete mo a chɔge n yiga pa se n boŋe se a ke keim delo na wó pa Ahab ti a ŋwea to? 10N Tu Baŋa Wɛ na ye Ŋwea Tu chekke to, ko yɔɔre ko ye chega mo we, teo de ko teo tera ye pɛ wom wo toŋe nɔɔna da se ba beeri nmo jeiga. Teo kolo nɔɔna ná we, n tere ba tei ne, Ahab yeini o pa se ba du duuri mo we ba wo nɛ‑m. 11De konto maama, n laam nam boŋe se a vo a ta a bere a tu Ahab mo we, Elija wo ywo-seeni na? 12A ná yage‑m ye a viiri leile konto, a yeiri Baŋa Wɛ Jworo daa na wó kwei‑m o ja o vo mɛ. A nam ná vei a ta a bere Ahab ye o wo nɛ‑m, o laam wó go-ne mo. Ko nam na maŋe ko zege amo biini ne to mo a kɔre Baŋa Wɛ. 13A tu, nmo wo nigi a déem na ke tei maŋa kalo Jezebele na wora o goe Baŋa Wɛ sampwori sem to na? Amo déem mo kwei Wɛ sampwori sem nɔɔna bi a pɔɔre-ba finnu finnu a seigi peo bɔɔna yalei wone. A ma daare a jaane wodiu a vei a pa-ba. 14Bɛŋwaane mo n laga se a vo a ta de a tu wom we, Elija wo ywo-seeni? Nmo yɔɔre n lage a momwɛ-tiu mo!”

15Elija ma leiri o we, “Paŋwa Tu Baŋa Wɛ ye Ŋwea Tu mo chekke, ye a toŋe a pa‑o. A nam dugi wonto yere ŋwaane we, a zem wó ja a tete a vo a bere Ahab.”

16Obadia ma seene o jwoori Pɛ Ahab tei o ta o bere‑o we Elija wora. Pɛ wom ma vo o jeeri Elija. 17O na nɛ Elija to mo o we, “Nmo wolo na pae Isarele teo kom na ko lɛɛro to mo konto na?” 18Elija ma leiri o we, “Ko dae amo mo pɛ se lɛɛro yi Isarele tiina bam. Ko nam ye nmo de n kwo dwi dem mo ke konto, abam na ve Baŋa Wɛ nia yam ye á daare á zuli Baal jwona yam to ŋwaane. 19Nam ta n bere Isarele tiina bam maama se ba ba ba jeeri-ne Kamele peo kom yuu ne. Ko ta ná ye Baal sampwori bia yana de finnu (450) bam, de Asera#18:19 Asera = jwoni dedwoŋi Kanaan tiina na jege ba zuli to sampwori bia yana (400) bam, balo Jezebele na yeini o pa-ba ba ni-wodiu to, bwoŋi-ba se ba de da ba jeeri.”

Elija na ke tei Kamele peo kom yuu ne to

20Pɛ Ahab ma pa ni yi Isarele tiina bam maama pa se ba de sampwori sem maama jeeri Kamele peo kom yuu ne. 21Elija ma fɔɔre o zege ba kɔgɔ kom yiga ne o ta o we, “Á ta wó ta‑á jege boboŋa yalei taa se á vo á maŋe yei ne mo? Nam kuri-na á na wó ke tei. Baŋa Wɛ mo ná seene o ye Wɛ, ta‑á zuli-na wonto. Á nam daa ná we Baal mo ye wɛ chekke, se á ta‑á zuli wonto.” Nɔn-kɔgɔ kom maa wo leiri kolokolo.

22Elija ta ma ta o we, “Amo yerane mo daare a na ye Baŋa Wɛ sampwora. Ko nam ná ye Baal, wonto jege sampwori bia yana de finnu (450) mo. 23Ja-na nabɛ selei á ba á pa debam. Baal sampwori sem wó kuri nabɛ sem dedoa se ba ma ba ke kaanem. Ba laam wó go-ka ba cha ka nɔna yam yera yera ba kwei ba daŋe dɛ sem baŋa ne. Ba nam ba jege se ba de mini da. Amo de maa wó cha nabea kadwoŋi kam a daŋe dɛ sem baŋa ne, ye a bá de mini da. 24Abam laam wó bwoŋi á wɛ dem yere, se amo de bwoŋi Baŋa Wɛ wom yere. Wɛ delo na wó leiri ye o de mini kaanem dem ne to mo wó seene o taa ye Wɛ chekke.”

Nɔn-kɔgɔ kom maama ma sɛ ye ba we, “N na tage kolo to jege kuri.” 25Elija daa ta ma ta de Baal sampwori sem o we, “Abam kɔgɔ kom na daga to, da-na yiga á kuri nabea dedoa á go se á ti ka nɔna yiga. Á ná ti, se á laam lwoori á wɛ dem se de de mini da, ye ko dae abam mo wó de mini da.” 26Ba ma ja nabea kalo ba na pɛ-ba to ba go ba ti ka nɔna yiga. Ba ma bwoŋi Baal yere dem taa, ko zege tetete se ko yi we-bere maŋa. Ba ma sa ba kaare bimbini delo ba na lɔge to ye ba bage de kwor-dɛa ba we, “Baal, zaŋe n cheigi dé lworo kom!” Nɔɔn-nɔɔno maa wo leiri-ba de fenfee de. Ko maa ye yirititi.

27We-bere maŋa ne Elija ma zaŋe o jege Baal sampwori sem o mɔna ye o we, “Tiini á bage de kwor-dɛa, se Baal ye wɛ mo! O ga wo boboŋa wone mo, naa o nwoŋi mo, naa o vei chwoŋa mo. Dɛ delo o tigi o dɔa mo, ye ko maŋe se á pa o zaŋe.” 28Baal sampwori sem ma tiini ba keeri wɛ-wɛ, ye ba daare ba ma ba fane de se-zɔɔro ba gwoni ba yera pa se ba jana lwo ba ke ba yera ne, ne ba chullu tem na bere se ba ke tei to. 29Ba zege wea ne ba bore Baal yiga ne konto mo taa se ko taa nii dedaan-ni kaanem dem maŋa. Nɔɔn-nɔɔno maa wo leiri kolokolo ye ko ye yirititi.

30Elija déem ma ta de nɔn-kɔgɔ kom maama o we, “Fɔɔre-na á ba amo tei ywo-seeni.” Ba ma zaŋe ba yi o tei. O ma fɔge o kwɛ Baŋa Wɛ kaanem bimbini dem ya na chɔge to. 31O ma daare o kwei kandwa-pelɛ fuga-yalei se ya taa zege ya pae Jakob dwia fuga-yalei yam. Ko ye wonto mo Baŋa Wɛ déem pɛ o yere leiri de ji Isarele to. 32O ma kwei kandwa yam konto o ma o lɔ bimbini Baŋa Wɛ yere zula ŋwaane. O ta ma daare o ko gwoŋo o kaare bimbini dem. Kuriwa-zwanno telei wo-dwa mo wó wane ba zo gwoŋo kom. 33O na ke konto o ti to, o ma tigisi dɛ sem bimbini dem baŋa ne o daare o cha nabea kam nɔna yam muga-muga o daŋe dɛ sem baŋa. O ma ta o we, “Véi-na á mɔ na á su kɔɔra bana á ja á ba á lwo zwɛɛm kaanem dem de dɛ sem baŋa ne.”

34Ba na ke konto ba ti to, Elija ta ma ta o we, “Jwoori-na á mɔ á lwo-da.” Ba ma seene ba ke konto. O ta ma ta-ba o we, “Jwoori á mɔ á lwo-da á ke betɔ.” Ba ma seene ba lwo ba ke kuni betɔ. 35Na bam tagele bimbini dem maama mo ba tu ba su gwoŋo kom de.

36Ko na yi dedaan-ni kaanem maŋa to, Wɛ sampwora Elija ma fɔɔre o yi bimbini dem o lwoori Baŋa Wɛ o we, “Baŋa Wɛ, nmo mo ye dé nabaaro Abaraham Wɛ, de Izaak Wɛ, dedaane Isarele Wɛ. Nam toŋe zem se ko bere jaja we nmo mo ye Isarele teo kom maama Wɛ wom, se n daare n pa se nɔɔna bam lɔre we a ye n tontoŋeno mo ye n pa-ne ni se a ke tento maama. 37Baŋa Wɛ, leiri a wɛ-lworo kom! Yɔɔre n leiri-ne se nɔɔna banto lɔre we nmo Baŋa Wɛ yerane mo ye Wɛ chekke, ye n daare n pa se ba boboŋa jwoori se ba tɔge nmo.”

38Elija na ŋɔɔne o ti to mo Baŋa Wɛ toŋe mini pa se de zege wɛyuu ne de ba de zwɛ kaanem dem nɔna yam, de dɛ sem, de kandwa yam, de teero tem maama.#Chullu 9:24 Mini dem ta ma deilimi na bam maama wegesege. 39Nɔn-kɔgɔ kom na nɛ kolo na ke to, ba maama ma vwi ba yibia tega ne ye ba laare ba we, “Baŋa Wɛ seene o ye Wɛ mo! Baŋa Wɛ yerane mo ye Wɛ!”

40Elija ma pa ni o we, “Ja-na Baal sampwori sem maama! Yé pa-na se ba dedoa lu.” Ba ma seene ba ja ba maama. Elija ma pa se ba ja-ba ba tu Kison nabara kam ni ne ba gwoni ba maama ba go.

Doa jwoori ka ne

41Elija déem ma ta de Pɛ Ahab o we, “Nam véi sɔŋɔ n lage wodiu n di, se a nigi do-fɔrɔ na mumuna se ka ne.” 42Ahab ma seene o kwei chwoŋa se o jwoori sɔŋɔ o lage wodiu o di. Elija ma vo o di Kamele peo kom yuu o tiiri tega ne pa se o yuu maŋe de o nadwoona. 43O ma ta de o tontoŋeno wom o we, “Véi n zege n leesi n nii naneo kom seeni.” Tontoŋeno wom ma seene o vo o jwoori o ba o we, “A wo nɛ kolokolo.” Kuni berepɛ maama mo Elija toŋe tontoŋeno wom pa o vei o nia ye o jwoora.

44Tontoŋeno wom na vei o ke kuni berepɛ kom to, o ma ta o we, “Amo nɛ kunkwoŋ-balaŋa na mae de nɔɔno jataale to mo zege naneo kom baŋa ne ko beene.” Elija ma ta ded‑o o we, “Véi Pɛ Ahab tei n ta n bere‑o we, o ke lela o di o toroko kom o duri o vo sɔŋɔ, se doa kam lage ka li‑o mo.”

45Ko wo dáane mo kunkwoŋo kom tene ligi-ligi pa se do-vio de zaŋe. Doa ma bobo se ka tiini ka ne chaa-chaa. Ahab ma ke lela o kwei chwoŋa o maa kɛ Jezerele. 46Baŋa Wɛ dam dem ma ba Elija baŋa. O ma fɔge o vɔ o gare-kura kiri-kiri, ye o duri o lwoori Ahab yiga taa o vo o yi Jezerele.

Currently Selected:

1 Pwa 18: KBG

Highlight

Copy

Compare