1 Pwa 17

Baŋa Wɛ na ke tei o pa Elija o ni-wodiu to

1Wɛ sampwora kadwoŋi déem mo wora, o yere mo Elija. O déem nwoŋi Gilead teo Tisibi mo. Dɛ dedwe o ma vo o ta de Pɛ Ahab o we, “Amo toŋe a pa Baŋa Wɛ wom na ye Isarele tiina Wɛ to mo. Wonto na ye Ŋwea Tu chekke to, a ná wo jwoori a ta taane, nyɔnɔ daa bá to, doa de nam daa bá ne tega kanto baŋa ne, se ko taa nii bena yalei naa yatɔ wɛɛne.”

2 Baŋa Wɛ kwora ma yi Elija we, 3“Zaŋe n yɔɔre wɛ-puli seeni n vo n seigi n tete Kerifi nabara kam na wo Jɔdan buga kam wɛ-puli seeni to ni ne. 4Nabara kam konto na mo n jege se n ta‑n nyɔa. A nam pɛ bachangaaro ni se te taa tui te pa‑m wodiu dáane.”

5Elija ma ke kolo Baŋa Wɛ na pɛ‑o ni se o ke to. O ma seene o vo Kerifi nabara kam na wo Jɔdan buga kam wɛ-puli seeni to o maŋe da o zoora. 6Bachangaaro tem ma jaane bworobworo de nɔna te tui te pa‑o tetete de dedaan-ni maama. O ma nyɔ nabara kam na bam.

Elija de kadeim wodwoŋi taane

7Ko na wora ko wora to, nabara kam ma we, doa daa na ba nena tega kam maama ne to ŋwaane. 8Baŋa Wɛ ma ta de Elija o we, 9“Zaŋe lela n vo Zarefate na wo Sidon teo kom seeni to n ta‑n zoore da. A nam maŋe a ta de kadeim wodwoŋi se o pa‑m n ni-wodiu.”

10Elija ma zaŋe o vo Zarefate. O na yi teo kom manchwoŋo ni dem to mo o nɛ kadeim na wora o beeri o da-dwa. O ma bwoŋi kadeim wom o lwoori‑o o we, “Jan ja! Mɔ na n pa-ne se a nyɔ.” 11Kadeim wom na maa vei se o ja na bam o ba o pa‑o to mo Elija daa we, “Jan ja! Kwei bworobworo fee n woli da n ja n ba.” 12Kadeim wom ma leiri o we, “Nmo Tu Baŋa Wɛ na ye Ŋwea Tu chekke to, a dugi o yere ŋwaane we, a ba jege bworobworo. Muni fee yerane mo a jega mun-duru wone, a daare a jege nuga de fee kabɔɔ wone. A zege a puuri da-dwa balei se a jwoori sɔŋɔ a ma a saŋe wodiu mo, se a de a bu wom di dé kweeli se dé laam te.”

13Elija ma ta de kadeim wom o we, “Yé ta‑n kɔre foone. Véi sɔŋɔ n ke n na taga tei to. Da yiga n kwei muni delo n na jege to fee n ma n fɔge maase n pa-ne. Se n kwei kolo na daare to n ma n ke wodiu se n de n bu wom di. 14Baŋa Wɛ wom na ye Isarele tiina Wɛ to na tage kolo to mo tento: ‘Mun-duru kom bá fɔge ko kwɛ muni. Kabɔɔ kom de maa bá kwɛ nuga se ko taa nii maŋa kalo Baŋa Wɛ na wó pa se doa jwoori ka ne tega kam baŋa ne to.’ ”

15Kadeim wom ma seene o jwoori sɔŋɔ o ke kolo maama Elija na taga to. Ko ma seene ko ke we, Elija tete, de kadeim wom, de o bu wom wolowolo wo gɛ wodiu se ba di da dedɛ wone. 16Ba déem ná maŋe ba kwoori nuga kam de muni dem tei maama, ko ba tia, ne Baŋa Wɛ na tɔge Elija baŋa o ta we ko wó ke tei to.

17Konto kwaga ne mo kadeim wom bu-baaro wom weele. Jaweo kom ma tiini ko zo‑o ye o momwɛ ti. 18Kadeim wom ma ta de Elija o we, “Wɛ tontoŋeno, bɛ mo ye n ke amo tento? N tu amo tei se n pa a wɛleera lɔre ja, se n daare n pa a bu wom te mo na?” 19Elija ma leiri‑o o we, “Ja n bu wom n ba n pa-ne.” O ma jwoŋi bu wom kaane wom jeŋa ne o ja‑o o di nayuu diga kalo o na zoore da to. O ma tiŋi bu wom o kadwogo baŋa ne. 20O ma keeri o jare Baŋa Wɛ de kwor-dɛa o we, “A Tu Baŋa Wɛ, bɛ mo ye n pa se lɛɛro tento yi kadeim wom pa se o bu wom te, ye wonto mo jwoŋi-ne o sɔŋɔ ne?” 21O ma twe o tete bu wom baŋa ne kuni betɔ o keeri o jare Baŋa Wɛ o we, “A Tu Baŋa Wɛ, nam pa se bakeira kam jwoori ka na ŋwea.” 22Baŋa Wɛ ma sɛ Elija lworo kom ye bu wom jwoori o na ŋwea. 23O na wori to, Elija ma kwei‑o o tu konkɔlɔ kom ne o pa o nu. O maa we, “Nii, n bu wom jwoori o ŋwe.” 24Kadeim wom ma ta de Elija o we, “Leile konto a laam tu a lɔre chekke we n ye Wɛ tontoŋeno. N ma‑n na tage kolo to seene ko ye Baŋa Wɛ kwora chekke mo.”

Currently Selected:

1 Pwa 17: KBG

Highlight

Copy

Compare