1 Pwa 14

Ahija pworisi o chɔge Jeroboam

1Maŋa kam konto ne Jeroboam bu Abija weela ko chana. 2Pɛ Jeroboam ma ta de o kaane o we, “Paale n leiri n tete se ba yé lɔre we n ye a kaane, se n zaŋe n vo Siloo. Wɛ sampwora Ahija wo dáane. Wonto ya mo taga a taane we amo wó ji pɛ to. 3Nam kwei bworobwooru fuga, de maasa, de tooro kunkwolo dedoa n ja n vo n pa‑o n daare n bwei‑o n nii kolo na lage ko ke bakeira kam to. O laam wó ta o bere‑m.”

4Jeroboam kaane wom ma sɛ. O ma zaŋe o vo Siloo ye o kɛ o yi Ahija sɔŋɔ. Kanto maŋa ne to, Ahija yia mo dwei, o na tiini o kwe to ŋwaane. 5Baŋa Wɛ nam tage de Ahija o we, “Jeroboam kaane wó ba n tei ye o bwei o bakeira kam jaweo kom bwia, o na tiini o weele to ŋwaane. A lage a bere‑m n na jege se n leiri‑o tei de tei to. O nam wó ke nenɛɛne o dae pɛ kaane mo tei.”

6Ahija na nigi kaane wom napera dɔnne o diga ni ne to, o ma ta o we, “Zo n ba, se a yei we nmo mo ye Jeroboam kaane wom. Bɛŋwaane mo n paale n ke se ba yé lɔre‑m? A nam jege ta-lɔŋɔ mo se a ta a bere‑m. 7Jwoori sɔŋɔ n ta taane dento n bere n baro Jeroboam we, ‘Baŋa Wɛ na tage kolo to mo tento: Amo mo le nmo a nɔɔna Isarele tiina bam wone se n ji ba yiga tu. 8A déem mo jaane paare dem a jwoŋi David dwi dem jeŋa ne a kwei a pa‑m. De ko de, n wo ke ne a tontoŋeno David na toŋe tei to. Wonto déem sɛ a nia yam ye o tɔge a chwei sem de o wo maama pa se o kikia pwoli a wo. Nmo nam wo ke konto. 9N tiini n toŋe lwarem n dwoni balo maama ya na dɛ yiga ba ba to. Nmo tiini n zaŋe a bane mo de n na mɔɔne wa-yɔɔro n pa n tete to. Ya maa ye jwona yalo ba na mɛ sabu-seŋa ba mɔ to. Konto to n mɛ n kwaga n ya amo. 10Keim dem konto ŋwaane a lage a pa se lɛɛro yi Jeroboam sɔ-yuu kom mo. A nam wó go n dwi bakeiri sem maama Isarele teo ne, ko ná ye balo ta na wo ba kwo sɔŋɔ ne to, de balo na tei ba tete to de. Amo wó yɔɔre a chɔge Jeroboam dwi dem, ne mini na di na-beinnu kula tei to. 11Nmo dwi dem nɔɔno wolo maama na wó te teo kolo wone to wó ji kukuri ni-wodiu mo. Wolo na wó te pwola ne to maa wó taa ye duura ni-wodiu. Amo Baŋa Wɛ na tage tei to mo konto.’ ”

12Ahija ta ma ta de Pɛ Jeroboam kaane wom o we, “Nam jwoori sɔŋɔ. N ná yɔɔre n nɔne n naga teo kom wone, n bu wom wó te. 13Isarele tiina maama maa wó keeri o lua ye ba kwei‑o ba suli. Jeroboam dwi dem maama wone, ko ye bu wom konto yerane mo ba wó kwei ba suli. Kokuri to, Jeroboam dwi dem maama wone wonto yerane kikia mo su Baŋa Wɛ wom na ye Isarele tiina Wɛ to yi. 14Baŋa Wɛ tete mo lage o tiŋi pɛ wolo na wó di paare Isarele tiina bam baŋa ne, se wonto saare Jeroboam kwaga kam maama. Ko bá dáane ye ko ke. 15Baŋa Wɛ wó waare Isarele tiina bam nenɛɛne vo-dɛɔ na fuli nanchan-gullu ye te vuvugi tei to. O ta wó gɔ Isarele tiina bam te-ywoŋa kanto o na kwei o pa ba nabaara bam to ne, o daare o pa se ba jage ba kɛ yiga yiga ba gaale Yuferata buga kam. Kokuri to, ba pɛ se Baŋa Wɛ bane zaŋe de-ba, ba na zuli Asera nyenyego dɛ sem to ŋwaane. 16Wɛ wó ve Isarele tiina bam, Jeroboam na ke wɛleera o daare o pa se banto de lwoni ba ke-ya to ŋwaane.”

17Jeroboam kaane wom ma zaŋe o jwoori Tiraza teo. O na yɔɔre o nɔne o naga o diga ni ne to mo bu wom tega. 18Isarele tiina maama ma keeri o lua ye ba kwei‑o ba suli, ne Wɛ sampwora Ahija na maŋe o ta Wɛ kwora we ko wó ke tei to.

Pɛ Jeroboam toone

19Jeroboam déem na di paare ye o toŋe wonnu telo maama to ba popone-te ba tiŋi Isarele Teo Pwa Seina tɔnɔ kom wone, ne ko ná ye o tigura keim de o na tei o nɔɔna tei to. 20Jeroboam di paare Isarele teo ne bena finlei-yalei (22) mo ye o daare o te. O toone dem kwaga ne o bu Nadab ma leiri o ji pɛ.

Judah teo Pɛ Rehoboam taane

21Solomon bu Rehoboam déem jege bena finna-dedwe (41) mo ye o ji Judah teo pɛ. O ma di paare bena fuga-yarepɛ (17) Jerusalem ne, mɛ Baŋa Wɛ tete na kuri Isarele teene maama wone se ba taa zuli o yere da to. O nu yere mo ye Naama. O maa ye Amon tu.

22Judah tiina bam déem tiini ba toŋe lwarem ba chɔge Baŋa Wɛ yiga. Ba na tiini ba ke wɛleera tei to chuchugi Wɛ bane ko dwoni ba nabaara bam na ke tei to. 23Ba déem lɔge bimbina mo se ba taa kaane ba jwona zwonnu maama baŋa ne, de teeni maama kuri ne. Ba ta ma chwi kandwa de Asera nyenyego dɛ ba zege se ba taa zuli-ya. 24Baara déem ta bwoori mo jei sem konto ne. Konto to Judah tiina bam ke ba lwoni wo-zɔɔna yalo dwi-gɛ tiina na yeini ba ke ye Wɛ zeili-ba tega kam ne o daare o pa Isarele tiina bam jeini to mo.

25Pɛ Rehoboam paare dim bena yanu maŋa ne mo Ejipti Pɛ Sisake déem tu o kwaare jara de Jerusalem teo kom. 26O ma wane o vere jejegero telo maama na wo Baŋa Wɛ diga kam wone to, de telo maama na wo pɛ sɔŋɔ kom wone to, ko woli de jara-keim nantane selo Solomon déem na mɛ sabu-seŋa o ke to. 27Pɛ Rehoboam ma kwei channa o ma o jwoori o ke nantane sedwonna o zege da. O ma kwei-se o ke babɛ selo na yere pɛ sɔŋɔ manchwoŋo ni dem to jeŋa ne. 28Maŋa kalo maama pɛ wom na wó zo Baŋa Wɛ diga kam wone to, babɛ sem mo jege se ba zeŋe nantane sem ba tɔge o kwaga. Ba daa ná ti, banto ta mo wó zeŋe-se ba jwoori ba tiŋi pɛ sɔŋɔ yerena diga kam ne.

29Rehoboam déem na di paare ye o ke wonnu telo maama to, de o totoŋa yam maama ba popone-te ba tiŋi Judah Teo Pwa Seina tɔnɔ kom wone. 30Maŋa kam konto maama ne tigura déem mo tigi Pɛ Rehoboam de Pɛ Jeroboam tetare ne. 31Rehoboam ma te ye o vo o kwoa tei. Ba ma kwei‑o ba suli o kwoa bam yibeeli ne David teo Jerusalem ne. O toone dem kwaga ne o bu Abija#14:31 Abija: Hiburu = Abijam ma leiri o yuu ne o ji pɛ.

Currently Selected:

1 Pwa 14: KBG

Highlight

Copy

Compare