1 Pwa 13

1Jeroboam ta na zege bimbini dem teiŋa ne se o ke kaanem to mo Wɛ tontoŋeno wodwoŋi tu o yi da. Baŋa Wɛ ya toŋe kotu se o zege Judah teo ne mo o vo Bɛtel. 2O ma ta kaanem bimbini dem taane, ne Baŋa Wɛ na pɛ‑o ni se o ke tei to. O ma bage de kwor-dɛa ye o we, “Bimbini, bimbini, nam cheigi! Baŋa Wɛ na tage kolo to mo tento: Ba wó lo bakeira kalo na nwoŋi David dwi dem wone o yere na ye Josia to. Nmo baŋa ne mo o lage o go kaanem tiina balo na ke kaanem ywo-seeni to. O maa wó zwɛ nabiina kwi nmo baŋa ne.”

3Dɛ dem konto ne, Wɛ tontoŋeno wom ta ma maŋe taane dem ye o we, “Bimbini dem wó bɔke belei ye tentwarem na wo de baŋa ne to wó jage. Konto baŋa ne mo á wó lɔre we Baŋa Wɛ mo seene o tɔge amo baŋa ne o ŋɔɔne.”

4Pɛ Jeroboam na nigi Wɛ tontoŋeno wom na tage tei o chɔge Bɛtel bimbini dem to, o ma twe o jeŋa o jeeri‑o, ye o bage de kwor-dɛa o we, “Ja-o-na”. Pɛ wom na tage konto to mo bedwe baŋa ne o jeŋa kam koge ka maŋe wɛɛne. O ma ware o de-ka tega ne. 5Bimbini dem de ma bɔke belei pa se tentwarem dem jage jei maama, ko maŋe de Wɛ tontoŋeno wom na tage Baŋa Wɛ kwora tei to.

6Pɛ Jeroboam ma ta de nɔɔno wom o we, “Lwoori n Tu Baŋa Wɛ tei ne se o duri a yibwona o daare o yɔɔre a jeŋa kam.” Wɛ tontoŋeno wom ma seene o lwoori Baŋa Wɛ pa se pɛ wom jeŋa kam jwoori ka lana, ne ka ya na ye tei to. 7Pɛ wom ma ta de Wɛ tontoŋeno wom o we, “Nam pa se dé vo a sɔŋɔ se n di wodiu. A nam ta jege pɛɛre se a woli da a pa‑m.” 8Nɔɔno wom ma leiri pɛ wom o we, “Nmo ná maŋe n kwei n jejegero tem chichworo mo se n pa-ne, a bá sɛ a vo n sɔŋɔ. A ta ná wo ywo-seeni, a bá di wodiu naa a nyɔ na. 9Kokuri to, Baŋa Wɛ pɛ-ne o ni dento mo o we, ‘Yé di kolokolo naa n nyɔ na. Nam yé tɔge chwoŋa kalo nmo ya na tɔge to n jwoori Judah teo.’ ” 10Wɛ tontoŋeno wom ma zege Bɛtel ne o tɔge chwo-gaa o viiri.

Wɛ sampwora kadwoŋi na tusi tei to

11Maŋa kam konto ne, Wɛ sampwora kadwoŋi ya zoore Bɛtel ne ye o tiini o kwe. O bia bam ma pa se o maane Wɛ tontoŋeno wolo na nwoŋi Judah teo to na ke tei maama Bɛtel ne to. Ba ta ma ta o na tage taane delo o bere pɛ wom to. 12Bia bam kwo ma bwei-ba o we, “O dɛ yei ne mo o viiri?” Ba ma bere‑o Wɛ tontoŋeno wom na dɛ chwoŋa kalo o viiri to. 13Nɔn-kwea kam ma ta de o bia bam o we, “Ke-na lela á ti bonaga kam yiga á pa-ne.” Ba na ti ka yiga to, o ma faŋe o lei-ka 14ye o duri se o yi Wɛ tontoŋeno wom. O ma vo o na o na jei tei-zɔŋɔ kuri ne ye o bwei‑o o we, “Nmo mo ye Wɛ tontoŋeno wom na nwoŋi Judah teo n ba to na?” O ma leiri o we, “Ɛɛ, ko ye amo mo.”

15Sampwora kalo na nwoŋi Bɛtel to ma ta‑o o we, “Pa dé vo sɔŋɔ se n di wodiu.”

16Wɛ tontoŋeno wom ma leiri o we, “A bá wane a da de nmo a jwoori. A maa bá wane a zo n diga, naa a di wodiu, naa a nyɔ na de nmo. 17Baŋa Wɛ pɛ-ne ni o we, a yé di wodiu naa a nyɔ na ywo-seeni. A nam yé tɔge chwoŋa kalo a na dɛ to a jwoori Judah teo.”

18Nɔn-kwea kam ma leiri o we, “Amo de ye nmo dwoŋi sampwora mo. Wɛ maleka nam mo tage Baŋa Wɛ kwora de amo o we, a ja‑m a jwoori a sɔŋɔ se n di wodiu n daare n nyɔ na.” Tento maama nam ye vwa yerane mo o fɔga. 19Wɛ tontoŋeno wom ma seene o da de Wɛ sampwora kam o vo o di wodiu ye o nyɔ na o sɔŋɔ ne.

20Maŋa kalo ba na jei ba di to mo Baŋa Wɛ kwora tu o sampwora kalo na kwe ye o ja wodwoŋi wom o jwoori o sɔŋɔ to tei. 21O ma bage Wɛ tontoŋeno wom na nwoŋi Judah to de kwor-dɛa o we, “Baŋa Wɛ na tage kolo to mo tento: N ve ni delo n Tu Baŋa Wɛ na pɛ‑m se n tɔge to. 22N nam sɛ se n jwoori n ba n di wodiu mɛ o na taga o we n yé di to. Konto ŋwaane, ba bá suli‑m n kwoa yibeeli dem ne.”

23Wɛ tontoŋeno wom na di o ti to, nɔn-kwea kalo na jaane‑o o jwoori to ma ti o bonaga yiga o pa‑o se o viiri. 24Wɛ tontoŋeno wom na maa viiri to mo nywoŋo jeeri‑o chwoŋa ne ko go. O yera yam na tigi chwoŋa ni ne to, nywoŋo kom de bonaga kam ma daare te maŋe ya baŋa ne te zega. 25Nɔɔna balo na dɛ chwoŋa kam konto ba maa kɛa to ma na o na tiga ye nywoŋo kom maŋe o baŋa ne ko zega. Ba ma duri ba vo Bɛtel teo mɛ nɔn-kwea kam na zoore to ba ta kolo na ke to ba bere nɔɔna.

26Wɛ sampwora kalo na chege‑o o ja o jwoori to na nigi to, o ma ta o we, “Wɛ tontoŋeno wom tete mo tento! O ve Baŋa Wɛ ni dem o na pɛ‑o se o tɔge to. Baŋa Wɛ ma kwei‑o o pa nywoŋo kom se ko kaare‑o ko go, se ko pa o na tage tei to ji chega.” 27O ma ta de o bia bam o we, “Ti-na bonaga kam yiga á pa-ne.” Ba ma seene ba ke konto. 28O ma nwoŋi o vo o na Wɛ sampwora kam na tigi chwoŋa kam ni ne ye bonaga kam de nywoŋo kom maŋe o baŋa ne te zega. Nywoŋo kom ya wo di‑o. Ko maa wo daane bonaga kam de. 29Nɔn-kwea kam ma kwei Wɛ tontoŋeno wom yera yam o daŋe o bonaga kam baŋa ne o ja o jwoori o tete teo. O ma keeri o lua o daare o suli‑o. 30O déem suli‑o o tete yibeeli wone mo. O de o bia bam ma keeri ba we, “Woo, a choro ywoo.”

31O na kwei‑o o suli o ti to, o ma ta de o bia bam o we, “Amo tete ná tega, kwei-na amo á suli Wɛ tontoŋeno wonto yibeeli dem wone. Pɛ-na a kwi sem á tiŋi o kwi sem teiŋa ne. 32Kokuri to, wonto na tage Wɛ kwora kalo o ma o chɔge bimbini dem na wo Bɛtel ne to, dedaane wara-jei selo na wo Samaria teene dem wone to wó seene ko ji chega.”

33Tento maama kwaga ne, Jeroboam déem ta wo sɛ se o yage o keim-balwaaro tem. O ta yeini o le wolo de wolo maama o na yi to mo se ba taa ke kaanem wara-jei sem ne. Wolo maama ná lage se o ji kaanem tu, o yeini o sɛ kotu mo se o ke konto. 34Jeroboam de o dwi dem na ke wɛleera yanto dwoŋi to mo pɛ se o dwi dem maama saare logo baŋa ne.

Currently Selected:

1 Pwa 13: KBG

Highlight

Copy

Compare