1 Pwa 15

Judah teo Pɛ Abija taane

1Isarele teo pɛ Jeroboam paare dim bena fuga-nana bene dem wone mo Abija déem di Judah teo paare. 2O déem jeini Jerusalem ne o di paare dem bena yatɔ mo. O nu yere mo ye Maaka wolo na ye Abisalom bukɔ to.#2 Tigisim 11:20-22

3Abija déem ke wɛleera yalo maama o kwo Rehoboam na ke to mo. O maa wo sɛ o Tu Baŋa Wɛ de o bochare maama nenɛɛne o nabaaro David déem na sɛ tei to. 4De ko de, David ŋwaane mo Baŋa Wɛ duri o yibwona. O ma pa se Abija lo bakeira se wonto leiri o yuu ne o twoŋi paare dem Jerusalem ne. 5Baŋa Wɛ ke konto bɛŋwaane David kikia déem su o yi lanyerane, de o na sɛ o nia yam o ŋwea maama wone tei to, ko ná dae o na ke o chɔge Hiti tu Yuria seeni to yerane.

6Abija ŋwea maama maŋa ne to, tigura kalo ya na maŋe ka tigi Rehoboam de Jeroboam tetare ne to wo fɔge ka kwori. 7Abija déem na di paare ye o ke wonnu telo maama to, de o totoŋa yam maama ba popone-te ba tiŋi Judah Teo Pwa Seina tɔnɔ kom wone. 8Abija ma te ye o vo o kwoa tei. Ba ma kwei‑o ba suli David teo Jerusalem ne. O toone dem kwaga ne o bu Asa ma leiri o di paare.

Judah teo Pɛ Asa taane

9Isarele teo pɛ Jeroboam paare dim bena finlei bene dem wone mo Asa déem di Judah teo paare. 10O ma jeini Jerusalem ne o di paare dem bena finna-dedwe (41). O nu nakwe yere déem mo ye Maaka wolo na ye Abisalom bukɔ to.

11Asa totoŋa déem su Baŋa Wɛ yi lanyerane ne o nabaaro David na ke tei to. 12O zeili baara balo na bwoori wara-jei sem ne to. O ta ma daare o chɔge jwona yalo o nabaara bam na mɔɔne ba jege ba zuli to. 13O nu nakwe Maaka ya chwi Asera nyenyego daa pa ba jege ba kaana. Asa ma gwoni-de o de tega ne o daare o kwei-de o zwɛ Kidoron nabara kam ne. O ta ma le Maaka se o daa yé taa jege dam pɛ sɔŋɔ ne. 14Asa déem wo wane o chɔge wara-jei bimbina yalo ba na ke kaanem da to. De ko de, o ŋwea maama wone o yɔɔre o kwei o chega o pa Baŋa Wɛ mo. 15O déem ta ma kwei pɛɛra yalo o de o kwo wom na kwei ba pa Baŋa Wɛ to o ja o vo o tiŋi Wɛ diga kam wone. Pɛɛra yam déem ye lu-nyenno wonnu, de sabu-seŋa wonnu, de zela dwi dwi mo.

16Tigura déem mo wo Judah teo pɛ Asa de Isarele teo pɛ Baasa tetare ne maŋa kalo maama ba na jege ba paara yam ba di to. 17Dɛ dedwe Pɛ Baasa ma nwoŋi o vo o kwaare jara de Judah tiina bam. O ma wane o jwoŋi Rama teo o daare o fɔge o lɔ-ko o che. O ma yere jei sem se nɔɔna yé wane ba lɛɛne ba vo Asa laŋa kam naa ba nwoŋi da ba kɛ.

18Asa déem ma kwei lu-nyenno wonnu de sabu-seŋa wonnu telo ta na wo Baŋa Wɛ diga kam wone to, dedaane jejegero telo na wo o tete sɔŋɔ ne to o ke o tontoŋena jeŋa ne. O ma toŋe-ba se ba ja kwora ba vo Siria pɛ Ben-hadadi tei Damasika ne. Ben-hadadi mo ye Tabirimon bu. O ta maa ye Hezion naa. 19O kwora kam mo tento: “Pa se dé gwoni ni daane, nenɛɛne ko déem na ye tei nmo kwo de amo kwo laŋa ne to. Nii mo, a jege pɛɛra na ye lu-nyenno de sabu-seŋa to mo se a pa‑m. Nam sɛ se n yiri ni delo n déem na ke de Isarele teo pɛ Baasa to, se ko pa o viiri o daare a laŋa kam.”

20Ben-hadadi ma sɛ Pɛ Asa na tage tei to. O ma toŋe o jar-keira de ba yiga tiina se ba vo ba kwaare jara de Isarele tiina. Jara yam wone, ba ma wane ba jwoŋi Yijon, de Dan, de Abel Bɛte-Maaka, de Galili jei sem, dedaane Nafitali laŋa kam maama. 21Isarele teo pɛ Baasa na yɔɔre o ni konto to, o ma yage Rama teo lɔɔm o daare o tutwoni o jwoori Tiraza se o taa zoore da. 22O na viiri to, Pɛ Asa ma pa ni yi Judah tiina maama se ba zeŋe kandwa yam, de da-kwollu tem Baasa nɔɔna bam ya na jege ba lɔ teo kom to ba ja ba kɛ. Pɛ Asa déem kwei wonnu tento mo o ma o lɔ Geba na wo Benjamin laŋa kam ne to, de Mizipa.

23Asa déem na di paare ye o ke wonnu telo maama to, de o bembɛɛne dem, de o totoŋa yam maama, de o na fɔge o lɔ teene delo to maama ba popone-te ba tiŋi Judah Teo Pwa Seina tɔnɔ kom wone. O kokweero maŋa ne mo jaweo to o nɛ ne pa se o gwarege. 24Pɛ Asa ma te ye o vo o kwoa tei. Ba ma kwei‑o ba suli o nabaara yibeeli ne o kwo nakwe David teo wone. O toone dem kwaga ne o bu Jehosafate ma leiri o ji pɛ.

Isarele teo Pɛ Nadab taane

25Judah teo pɛ Asa paare dim bena yalei bene dem ne mo Jeroboam bu Nadab di Isarele teo paare. O ma di paare dem Isarele tiina bam baŋa ne bena yalei. 26Nadab déem ke lwarem o chɔge Baŋa Wɛ yiga nenɛɛne o kwo Jeroboam déem na ke tei pa se Isarele tiina bam de tusi to.

27Baasa wolo kwo na ye Ahija ye o nwoŋi Isakara dwi dem wone to déem ma ke chichuŋu de Nadab. Maŋa kalo Nadab de Isarele tiina bam na gilimi Gibefon teo ba pu se ba wane teo kom ba jwoŋi Filisi tiina jeŋa ne to, mo Baasa zaŋe o baŋa ne o go‑o. 28Judah teo pɛ Asa paare dim bena yatɔ maŋa ne mo Baasa déem go Nadab o daare o leiri o yuu ne o di Isarele teo paare dem. 29O na yɔɔre o jeini paare dem baŋa ne to mo o go Jeroboam dwi tiina bam maama nyɔ, ye nɔɔn-nɔɔno wo daare. Konto nam pɛ se Baŋa Wɛ kwora kalo o na pɛ o sampwora Ahija na nwoŋi Siloo to mo ji chega. 30Ko déem ke konto, bɛŋwaane Jeroboam ke wɛleera o daare o pa se Isarele tiina de lwoni ba ke-ya. O ta ma chuchugi ba Tu Baŋa Wɛ wom bane lanyerane.

31Nadab déem na di paare ye o ke wonnu telo maama to, de o totoŋa yam maama ba popone-te ba tiŋi Isarele Teo Pwa Seina tɔnɔ kom wone. 32Tigura déem mo wo Judah teo pɛ Asa de Isarele teo pɛ Baasa tetare ne maŋa kalo maama ba na di ba paara yam to.

Isarele teo Pɛ Baasa taane

33Judah teo pɛ Asa paare dim bena yatɔ maŋa ne mo Ahija bu Baasa di Isarele teo paare Tiraza ne. O ma di paare dem bena finlei-yana (24). 34O déem ke lwarem o chɔge Baŋa Wɛ yiga, ne Pɛ Jeroboam ya na ke tei ye o pa se Isarele tiina de tusi to.

Currently Selected:

1 Pwa 15: KBG

Highlight

Copy

Compare