1 Pwa 12

Isarele tiina ve Rehoboam

1Rehoboam déem ma vo Sɛkɛm, Isarele tiina bam maama na jeeri da se ba tiŋi‑o pɛ to ŋwaane. 2Nebat bu Jeroboam déem ya duri o vo Ejipti mo se o lu Pɛ Solomon jeŋa ne. O ta na wo dáane to mo o nigi Solomon toone ŋwa. O ma jwoori sɔŋɔ. 3Ba ma toŋe ba bwoŋi Jeroboam se o de Isarele kɔgɔ kom maama tɔge daane ba vo Rehoboam tei. Ba ma ta ded‑o ba we, 4“Nmo kwo Solomon déem tiini o yaare debam de totoŋ-chɛɛra. Konto to, nam kwaane se n pa ko taa bwona ko pa debam, se dé wane dé sii dé yaara yam wone. N ná ke konto, dé wó sɛ dé pa‑m.” 5Rehoboam ma leiri-ba o we, “Nam véi-na se da yatɔ kwaga ne á laam jwoori á ba se dé nii.” Nɔɔna bam ma viiri.

6Pɛ Rehoboam ma bwɛ taane dem de nɔn-kwe selo déem ya na ye o kwo Solomon nakwa to. O ma bwei-ba o we, “Bɛ boboŋa mo abam jega se á ma á woli-ne se a leiri a pa nɔɔna banto?” 7Nakwa bam ma leiri ba we, “Nmo ná tu n tete se n sɛ nɔɔna bam zem na lwoori kolo to, ye n to n pa-ba, ba de wó yɔɔre ba sɛ ba pa‑m wuu.”

8Rehoboam ma ve nɔn-kwe sem boboŋe dem ye o daare o vo o bane de nɔn-donno telo na ye o yuudwonna pa ba wo o tei ne to. 9O ma bwei-ba o we, “Nɔɔna banto na we, a kwo wom na yaare-ba dedɛ to, a laam pa se ba sii de ba yaara yam to, bɛ boboŋa mo abam jega se á ma á woli-ne se a ma a leiri a pa-ba?” 10Nɔn-donno tem na ye o yuudwonna to ma leiri ba we, “Ko ná ye balo na lwoori‑m konto to, ta n bere-ba we, ‘Amo noa kam tete kula ka dwoi a kwo wom teiŋa! 11A kwo keim déem seene ko chana á baŋa ne. Ko nam ná ye amo, ko wó dwoni dáane. A kwo wom déem mɛ kafene mo o fere abam. Amo nam laga a ma kafene selo nia na chana ne nɔŋɔ donem to mo a ma a fere abam.’ ”

12Da yatɔ yam dɛ ne mo Jeroboam de nɔɔna bam maama daa jwoori ba vo Pɛ Rehoboam tei, ne o na maŋe o ta se ba ke tei to. 13Ba na tu to, Pɛ Rehoboam ma zage-ba ni-chɛɛre, o na dole nɔn-kwe sem taane dem o yage to ŋwaane. 14O nam yɔɔre o ke o tɔge nɔn-donno tem boboŋa yam mo. O ma ta o we, “A kwo keim déem seene ko chana á baŋa ne. Ko nam ná ye amo, ko wó dwoni dáane. A kwo wom déem mɛ kafene mo o fere abam. Amo nam lage a ma kafene selo nia na chana ne nɔŋɔ donem to mo a ma a fere abam.”

15Pɛ Rehoboam na wo sɛ nɔɔna bam taane dem to déem tɔge Baŋa Wɛ boboŋa na jaane tei to mo. Ko pɛ Baŋa Wɛ na dɛ o sampwora Ahija baŋa o ta tei de Nebat bu Jeroboam to mo ji chega.

16Isarele tiina bam maama na maane we pɛ wom ve se o ke o tɔge ba boboŋa yam to, ba ma chɛ sɔɔ ye ba leiri‑o ba we, “Isarele tiina bam, debam dedaane Jesse bu David dae daane. Dé yiga tera o dwi dem paare wone! Pa-na dé jwoori-na sam. David dwi tu, ta‑n nii n tete sɔ-yuu kom baŋa ne!” Ba maama ma seene ba jwoori ba sam. 17Ko nam ná ye Isarele dwi tiina balo na zoore Judah teene dem ne to yerane, Pɛ Rehoboam déem ta mo di paare ba baŋa ne.

18Pɛ Rehoboam ma toŋe Adoniram wolo na nii totoŋ-chɛɛra yam baŋa ne to se o vo Isarele dwia yalo na wo baŋa seeni to tei o kwɛ taane dem. O na yi da to, nɔɔna bam maama ma dole‑o de kandwa ba go.#2 Samuwel 20:24 Konto baŋa ne Pɛ Rehoboam ma faŋe o lei o toroko o duri o lu o vo Jerusalem. 19De zem maama Isarele tiina na wo baŋa seeni to ve mo se David dwi dem taa di paare ba baŋa ne.

20Isarele tiina bam na maane we Jeroboam tu o wora to, ba ma toŋe ba bwoŋi‑o se o ba ba kɔgɔ kom na gilimi mɛ to. Ba ma pa se o ji Isarele tiina pɛ. Judah dwi dem yerane mo sɛ ba pa David diga kam.

Semaya na pworisi tei to

21Rehoboam na yi Jerusalem to mo o bwoŋi Judah de Benjamin dwia yam nɔɔna balo na yei jara keim chekke to. Ba déem ye jar-keira morro bi de funɔnɔ (180,000) mo. O ma boŋe se o kwaare jara de Isarele dwi tiina badaara bam, se o wane o pa ba maama jwoori ba ke daane se o taa tei-ba, o na ye Solomon bu to ŋwaane. 22Wɛ ma pa o tontoŋeno Semaya ni ye o we, 23“Nam pa amo taane dento yi Judah teo Pɛ Solomon bu Rehoboam, de Judah dwi tiina bam maama, de Benjamin dwi tiina bam, de nɔɔna badaara bam maama we, 24‘Baŋa Wɛ kwora mo tento: Yé zaŋe-na á ke jara de á chorro Isarele tiina bam. Á maama véi-na sɔŋɔ, se amo mo pɛ se konto maama ke.’ ” Ba maama ma sɛ Baŋa Wɛ ni dem ye ba jwoori ba sam.

Jeroboam nwoŋi Baŋa Wɛ kwaga ne

25Jeroboam ma fɔge o lɔ Sɛkɛm teo na wo Efrayim zwonnu laŋa kam ne to o zoore da. O ma zaŋe dáane o vo o lɔ Peneli teo. 26Dɛ dedwe o ma boŋe o tete ne o we, “Keim dem na ye tei to, paare dem wó wane de jwoori David diga kam. 27Amo nɔɔna bam ta ná lage ba taa vei Jerusalem Wɛ diga kam ba ke kaanem ba pa Baŋa Wɛ, ba laam wó jwoori ba sɛ ba pa ba tu Rehoboam wolo na ye Judah teo pɛ to mo. Ko maa ná ke konto, ba wó go-ne mo se ba laam taa zuli wonto.”

28O na boŋe de wone o ti to, o ma kwei sabu-seŋa o mɔ na-mɔre selei o daare o ta de o nɔɔna bam o we, “Isarele tiina bam, á daa yé daane á tete de á na vei Jerusalem yiga yiga á zuli Wɛ tei to. Nii-na! Wa yalo déem na jaane abam ya ja nwoŋi Ejipti teo ne to mo tento.”#Nwoŋim 32:4 29O ma kwei kamɔgɔ kom dedoa o zege Bɛtel ne, o daare dedoa o zege Dan ne. 30Keim dem konto ma pa se Isarele tiina bam ke wɛleere, ba na yeini ba vei Bɛtel de Dan ba zuli kamwaro tem to ŋwaane. 31Jeroboam déem ta lɔge wara-jei bimbina zwonnu tem yuu ne, ye o daare o kuri kaanem tiina balo na wo nwoŋi Levi dwi dem wone to se ba taa ke kaanem jei sem konto ne.

32Jeroboam ta ma zege chulu se nɔɔna bam taa vei ba kaane kamwaro tem chane nana chana kam da fuga-yanu dɛ ne, ne ba déem na yeini ba ke kuri tei Judah teo ne to. Jeroboam maa yeini o vei Bɛtel o ke kaanem o pa na-mɔre kamwaro telo o na mɔɔne to. O déem pɛ se kaanem tiina bam zoore Bɛtel ne, se ba taa nii wara-jei selo o na lɔge to baŋa ne mo.

Wɛ sampwora na tu Bɛtel ye o ta taane delo to

33Chane nana chana kam da fuga-yanu dɛ dem na yi to, Jeroboam ma vo Bɛtel o ke kaanem bimbini delo o na mɔɔne to baŋa ne, se o di kuri delo o na dɛ o tete boboŋa ŋwaane o tiŋi o pa Isarele tiina bam to.

Currently Selected:

1 Pwa 12: KBG

Highlight

Copy

Compare