1 Pwa 11

Solomon kaana bam taane

1Pɛ Solomon déem swoi se o taa lage kaana dedɛ na ye veira to mo o woli o kaane wolo na ye Ejipti Pa-faro bukɔ wom to ne. O kaana bam konto nwoŋi Moaba tiina, de Amon tiina, de Edom tiina, de Sidon tiina, de Hiti tiina bam wone mo. 2Se ko lwoori o na di kaana bam konto to, Baŋa Wɛ ya maŋe o kaane Isarele dwi tiina bam we, ba yé zaŋe ba di bukwa balo na nwoŋi teene dem konto ne to, naa ba sɛ se ba bukwa zo banto de baara. Baŋa Wɛ tage o we, “Á ná ke konto, banto wó soge á bia bam boboŋa se ba taa zuli ba jwona yam mo.” De konto maama, Solomon déem ta lage teene dem konto bukwa mo. 3Solomon déem di kaana na ye pwa bukwa to bia yarepɛ (700) mo. O maa jege ka-bi bia yatɔ (300) o woli da. Kaana bam konto ma pa se Solomon ywori Wɛ chwoŋa wone. 4Solomon na yi o kokweero maŋa to, mo o kaana bam pɛ se o zuli ba wa-yɔɔro tem. Konto ma pa se o daa ba jege chega de o Tu Baŋa Wɛ se ko yi o kwo David ya na yɔɔre o ke o chega de Wɛ tei to. 5O déem zuli Asetare jwoni dem Sidon tiina na zuli to, de Moleka jwoni dem na ye wo-zɔɔne delo Amon tiina na zuli to mo. 6Solomon déem toŋe lwarem o chɔge Baŋa Wɛ yiga. O maa wo kwei o bochare maama o ma o tɔge Baŋa Wɛ nenɛɛne o kwo David na ke tei to.

7Solomon déem lɔge wara-jei bimbini mo peo kolo na wo Jerusalem wɛ-puli seeni to yuu ne, se o taa zuli Chemosi na ye Moaba tiina jwoni to, de Moleka na ye Amon tiina jwoni to da. 8O daa ta ke konto dwoŋi mo o pa o kaana bam maama, se ba de taa zwɛ wonnu ba daare ba taa ke kaanem ba pa ba tete wa-yɔɔro tem.

9 Baŋa Wɛ bane déem zaŋe Solomon baŋa ne, de o na ywori o chwoŋa kam wone to. Baŋa Wɛ wom na ye Isarele tiina Wɛ to déem ya veere o tete o bere Solomon kuni belei mo. 10O ma yɔɔre o kaane‑o se o yé zuli wa-yɔɔro. Solomon ma ve Wɛ ni dem. 11Mo kokuri Baŋa Wɛ tage de Solomon o we, “Nmo na paale n ke n boboŋa na laga tei, ye n ve a ni dem, de a bera yam to ŋwaane, a laam lage a jwoŋi paare dem nmo jeŋa ne mo a kwei a pa nmo tontoŋena bam dedoa se o taa tei. 12David nam na ye nmo kwo to ŋwaane, amo bá ke konto nmo ŋwea maŋa ne. Nmo bu nam ná leiri n yuu ne, a laam wó jwoŋi paare dem wonto jeŋa ne mo. 13De konto maama, a bá jwoŋi paare dem maama o jeŋa ne. A nam wó pa se dwi dedoa daare se o di paare banto baŋa ne, a tontoŋeno Pɛ David ŋwaane, dedaane a tete teo Jerusalem ŋwaane.”#2 Tigisim 11:4

Solomon dono Hadad taane

14 Baŋa Wɛ déem pɛ se dono wodwoŋi mo zaŋe o ke chichuŋu de Solomon. Wonto ye Edom tu Hadad na ye Edom pɛ sɔŋɔ bu to mo. 15Faŋa faŋa mo David déem ya vei o kwaare jara de Edom teo tiina ye o wane-ba. Joaba wolo na ye o jar-keira bam yiga tu to ma tɔge o vo teo kom konto se o kwei twa bam o ke. O na wora to mo o go Edom tiina baara bam maama. 16O de Isarele jar-keira bam maama déem ma maŋe Edom teo kom ne ba ke chane seredo, ye ba go baara bam maama ba ti. 17Hadad ta na ye bu to, o ma tɔge de o kwo wom tontoŋena balo ya na ye Edom tiina to se ba duri ba lu ba vo Ejipti teo. 18Ba déem zege Midian ne mo ba vo Paran. Ba ta ma zege Paran ne ba kwei nɔɔna ba woli da ba vo Ejipti. Ba na yi da to, Ejipti Pa-faro wom ma kwei sɔŋɔ, de tega, de ba dɛ wone ni-wodiu o pa Hadad. 19Pɛ wom yi na su Hadad kikia to, o ma kwei o tete kaane nyaane o pa Hadad se o di o ma o ke kaane. Pɛ kaane Tapenesi nyaane wom mo konto. 20Wonto ma lo bakeira o pa Hadad, ye ba pa o yere we Genubafe. Tapenesi maa jege‑o o kɔna pɛ sɔŋɔ kom ne. Bu wom de Pa-faro wom bia bam maama maa me daane.

21Hadad déem nigi we David de o jar-keira bam yiga tu Joaba mo tega. O ma ta de Ejipti Pa-faro wom o we, “Pɛ, ja! Pa-ne chwoŋa se a jwoori a kwo sɔŋɔ.” 22Pɛ wom ma leiri o we, “Bɛŋwaane mo? Nmo laga woŋo mo ye n ga amo tei ne na?” Hadad ma leiri o we, “Ko dae konto. Nam yage se a jwoori sɔŋɔ.” O ma seene o jwoori o tete teo.

Solomon dono Rezon taane

23Wɛ ta ma pa se dono wodwoŋi ke chichuŋu de Solomon. Wonto maa ye Eliada bu Rezon. Rezon déem duri mo o yage o tu Hadadezere na ye Zoba teo pɛ to. 24David na wane Hadadezere jar-keira bam to, konto kwaga ne mo Rezon kuri baara balo na ye pawe-nyena to o ke daane ye o ji ba yiga tu. Ba ma vo Damasika ba zoore da. Ba na wora to mo ba pɛ Rezon di paare Damasika ne. 25Rezon déem ye Isarele tiina dono mo maŋa kalo maama Solomon ta na wo o ŋwea wone to. O pɛ se lɛɛro yi Isarele tiina bam, ne Hadad de na ke tei to mo. O déem di paare Siria tiina maama baŋa ne ye o chuli Isarele tiina bam.

Solomon dono Jeroboam taane

26Nɔɔno wolo de daa na zaŋe o ke chichuŋu de Pɛ Solomon to ye o tontoŋena bam dedoa, o yere na ye Jeroboam to mo. Wonto déem ye Efrayim tu Nebat bu mo, ye o nwoŋi Zereda. O nu mo ye Zerua. O maa ye kadeim. 27Ko na ke tei ye o chuli Solomon to mo tento: Solomon ya pɛ se ba fɔge ba lɔ Millo jeiga kam Jerusalem teo ne. O ta ma pa ba kwɛ teo kom kabira kam. 28Jeroboam déem jege baare ye Solomon maane we o seene o yia totoŋa yam baŋa ne mo. Mo kokuri o pɛ se Jeroboam nii Josɛf dwi tiina#11:28 Josɛf dwi tiina ye Efrayim tiina de Manasɛ tiina. balo na toŋe totoŋa yam to baŋa ne.

29Dɛ dedwe mo Jeroboam nwoŋi Jerusalem ne o maa vei chwoŋa. Wɛ sampwora Ahija na ye Siloo tu to ma jeeri‑o chwoŋa yuu ne. Ba balei bam maa wo pwooni ne ba yerane, ye Ahija zo gare-daŋɔ kolo na ye nadoŋo to. 30O ma le o gare-daŋɔ kom, o ja o tore tore se ko ji gare-bia fuga-telei. 31O ma ta de Jeroboam o we, “Kwei gare-bia fuga n ta‑n jega, bɛŋwaane Baŋa Wɛ wolo na ye Isarele tiina Wɛ to mo we, ‘A lage a ja paare dem mo a jwoŋi Solomon jeŋa ne, a daare a kwei dwia fuga a pa‑m se n ta‑n tei. 32A nam wó pa se Solomon ta taa tei dwi dedoa mo, a tontoŋeno David ŋwaane, dedaane Jerusalem teo kolo a na kuri Isarele dwia yam maama wone se ko taa ye amo tete nyem to ŋwaane. 33Solomon de o dwi dem ve amo ye ba zuli Asetare jwoni dem Sidon tiina na zuli to, de Chemosi jwoni na ye Moaba tiina wɛ to, de Moleka na ye Amon tiina wɛ to. Ba maa wo tɔge amo chwei sem se ba taa ke kolo na pwoli a wo to. Ba nam ve a chullu tem de a bera yam mo. Ba maa wo tɔge chwoŋa kalo Solomon kwo David na tɔge to. 34De ko de, a bá le paare dem maama Solomon jeŋa ne. O ta ná ŋwe, o daa ta wó di paare dem, a tontoŋeno David ŋwaane, de wonto na toŋe o tɔge a bera yam de a nia yam to ŋwaane. 35Solomon bu nam ná leiri o yuu ne, a laam wó jwoŋi paare dem o tei ne, ye a daare a kwei Isarele dwia fuga a pa‑m se n ta‑n tei. 36A nam wó pa se Solomon bu wom taa tei dwi dedoa mo. Konto mo wó pa se Pɛ David dwi dem nɔɔno ta taa di paare Jerusalem teo kolo wone amo na kuri se nɔɔna taa zuli-ne da to. 37Ko daare, ko ná ye nmo Jeroboam, amo wó tiŋi‑m se n ta‑n tei Isarele tega kam mɛ maama n boboŋa na lage to. N laam wó di paare Isarele tiina baŋa ne. 38N nam jege se n ke kolo maama a na wó pa‑m ni se n ke to, ye n tɔge a chwei sem n ke kolo na wó pwoli a wo to. Nmo ná toŋe n tɔge a bera yam de a ni-kaana yam, nenɛɛne a tontoŋeno David déem na ke tei to, amo wó taa wora n tei ne. A ta wó pa se n dwi dem taa wora taa, nenɛɛne a na pɛ se David dwi dem ke tei to. N wó ta‑n nii Isarele dwi tiina bam baŋa ne. 39Solomon wɛleera yam ŋwaane, a lage a waare David kwaga kam mo. Ko nam bá taa ye taa wuu.’ ”

40Konto ŋwaane Solomon déem beeri chwoŋa se o go Jeroboam. Jeroboam ma duri o lu o vo Ejipti. O ma maŋe Ejipti teo Pɛ Sisake tei ne se ko taa nii maŋa kalo Solomon na tege to.#2 Tigisim 12:2

Solomon toone

41Solomon déem na di paare ye o ke wonnu telo maama to, de o totoŋa yam, de o yi-poro kom maama ba popone-te ba tiŋi Solomon Kikia Seina tɔnɔ kom wone. 42Solomon jeini Jerusalem ne o di paare Isarele teo maama ne o ke bena finna mo. 43O laam ma te ye o vo o kwoa tei. Ba ma kwei‑o ba suli o kwo David teo kom ne. O bu Rehoboam ma leiri o yuu ne o di paare.

Currently Selected:

1 Pwa 11: KBG

Highlight

Copy

Compare