1 Jɔn 5
5
Wɛ Bu wom taane
1Wolo maama ná ke o wo-dedoa o sɛ we Yezu ye Wɛ Dam Tu wom, konto tu ye Wɛ bu mo. Wolo maama nam na swoi kwo to swoi kwo wom na loge bu wolo to de mo. 2Konto mo dé yei we, dé ná swoi Wɛ ye dé kwori dé tɔge o nia yam, dé jege se dé taa swoi o bia de mo. 3Dé na wó taa jege Wɛ swono tei to mo ye se dé taa tɔge o nia yam. O nia yam tɔgem bá taa chana ya pae debam, 4kolo ŋwaane Wɛ bia maama jege dam se ba chɔge logo baŋa wo-lwanno chwei sem. Ko ye debam na ke dé wo-dedoa de Yezu tei to mo wó pa dé na dam dé wane wo-lwanno tem konto. 5Nɔɔn-nɔɔno tera o na wó wane o chɔge logo baŋa wo-lwanno tem, ko ná dae wolo yerane na sɛ we Yezu ye Wɛ Bu wom to.
6Yezu Krista mo ye wolo déem na tu logo baŋa, ye Baŋa Wɛ yɔɔre o bere we o ye omo Bu to. Yezu ma tɔge na baŋa o jwoŋi sɛɛm, ye o daare o tɔge jana baŋa ne o te. Ko maa dae na bam jei yerane mo o dɛ da. Wɛ nam tɔge na bam baŋa dedaane jana bam baŋa mo o bere Yezu chega kam. Wɛ Jworo kom de ma woli da ko bere jaja we, Yezu seene o ye Wɛ Bu wom, Wɛ Jworo kom na ye chega tu to ŋwaane.#Jɔn 15:26 7Mo kokuri Wɛ dɛ wonnu tetɔ ŋwaane o zege o Bu wom chega kam kwaga ne. 8Te ye Wɛ Jworo kom, de na bam, de jana bam, ye te maama jege ni dedwe. 9Nabiina ná zege keim dedwoŋi kwaga ne, dé yeini dé sɛ ba na tɛ kolo to. Ko nam ná ye Wɛ na zege chega kalo kwaga ne to, ka tiini ka jege kuri ka dwoi nabiina na tɛ kalo to. Wonto nam mo ye wolo na zege Yezu kwaga ne o bere we, o ye omo Bu to. 10Konto ŋwaane, wolo maama ná ke o wo-dedoa de Wɛ Bu wom, konto tu jege Wɛ chega kam o bochare ne. Ko daare wolo maama ná wo sɛ Wɛ, konto tu lage o bere we Wɛ ye vwa-nyem mo, kolo ŋwaane o wo sɛ chega kalo Wɛ na tage o Bu wom ŋwaane to. 11Chega kam konto mo ye Wɛ na seene o pa debam ŋwea kalo na ba jege kweelim o tei ne to. Ŋwea kam konto nam ye o Bu wom ŋwaane mo. 12Wolo maama ná me de Wɛ Bu wom, konto tu mo jege Wɛ ŋwea kam konto. Wolo nam ná ba jege meem de Wɛ Bu wom, konto tu ta wo nɛ ŋwea Wɛ tei ne.#Jɔn 3:36
13Amo popone wonnu tento maama a pa abam balo na ke á wo-dedoa de Wɛ Bu wom to, se á lɔre we á seene á na ŋwea kalo na ba jege kweelim Wɛ tei ne to.#Jɔn 20:31 14Dé wó taa jege baare Wɛ yiga ne, kokuri dé yei we, dé ná lwoori woŋo o tei ne ye ko tɔge o boboŋa, o wó cheigi dé wɛ-lworo kom. 15Dé yei we Wɛ yeini o sɛ debam wɛ-lworo kom, ne ko ná ye tei maama. Konto ŋwaane dé yei we dé wó jwoŋi woŋo kolo dé na lwoori o tei ne to.
16Nmo ná nɛ n dwoŋi na wora o toŋe tusim, ye ko dae tusim delo na wó pa toone chɔge‑o to, ko maŋe se n lwoori Wɛ mo n pa‑o. N ná lwoori Wɛ konto, o laam wó sɛ se o pa n dwoŋi wom na ŋwea. Ko daare, tusim dedwoŋi wora de na wó pa se toone chɔge de keiru to. Ko nam ná ye wolo na ke tusim dem konto dwoŋi, amo ba tɛ se n lwoori Wɛ n pa konto tu. 17Keim delo maama na ba tɔge chega to ye tusim mo. Tusim nam wora de na ba pae se toone chɔge nɔɔno. Ko ye dento taane mo a tɛa. 18Dé yei we wolo maama na ye Wɛ bu to ba yeini o ke wɛleera, kolo ŋwaane Wɛ Bu wom tete mo nii wonto baŋa ne pa se wo-lwanno tu setaane bá wane‑o o chɔge. 19Debam yei we de ye Wɛ nyem mo, ye balo kugu jei na wo logo baŋa ne to maama nam wo wo-lwanno tu setaane jeŋa ne mo. 20Dé kwori dé yei we, Wɛ Bu wom mo tu logo baŋa. O ma pa se dé yi poore, se dé wane dé lɔre Baŋa Wɛ wom na ye chega chega to. Dé nam me de wonto, ye dé kwori dé me de o Bu Yezu Krista. Wonto mo ye Wɛ chega chega, ye dé tɔge wonto ŋwaane mo dé jege ŋwea kalo na ba jege kweelim Wɛ tei ne to.
21A bia bam, ta‑á cho-na á tete se á yé tɔge jwona.
Currently Selected:
1 Jɔn 5: KBG
Highlight
Copy
Compare
Share
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
