1 Korinti 9

Pɔɔl kwaane se o jwoŋi nɔɔna o ke-ba Wɛ jeŋa ne

1Amo ba jege chwoŋa se a kuri a na lage kolo to na? Amo dae Yezu Krista totoŋa nakwe mo na? A wo nɛ dé Teiru Yezu Krista tete mo na? Abam na me dedaane dé Teiru Yezu tei to, ko dae amo na toŋe a pa‑o to ŋwaane mo na? 2Nɔɔna badaara ná maŋe ba boŋe we, amo dae Yezu Krista totoŋa nakwe chekke, abam bá wane á ve we, amo dae konto. Abam na me dedaane dé Teiru Yezu tei to mo seene ko bere we, amo ye o tontoŋeno chekke.

3Nɔɔna ná lage ba bwei amo ba nii, amo na wó leiri-ba tei to mo tento: 4Amo ba jege chwoŋa se a jwoŋi a ni-wodiu a totoŋa yam baŋa ne na? 5Amo ba jege chwoŋa se a ke nenɛɛne dé Teiru Yezu totoŋa nakwa babam bam, de o nyaana, de Piita na yeini ba ke tei, ye ba jege ba kaana balo de na sɛ Yezu pa ba tɔge daane ba toŋe Wɛ totoŋa to na? 6Amo de Banabas yerane nam mo jege se dé taa toŋa dé lage dé tete ni-wodiu na? 7Nɔɔno ná ye soja tu, o bá wane o jwoori o ŋwe o tete. Nɔɔno ná jege o kara, o ba di ka wonnu na? Nɔɔno ná jege naane o tɔga, o ba di de nayela na?

8A nam tɔge logo baŋa memaŋa yanto yerane baŋa ne mo a ŋɔɔne konto dwoŋi na? Wɛ tɔn-dwoŋo kom de maŋe ko bere bedwe mo. 9Ko popone Wɛ nia yalo o na pɛ Moses to tɔnɔ kom wone we, “Nmo ná jege nabea n ma n toŋe n faao, yé vɔ ka ni se ka yé di men-bia bam.”#Nia Gulim 25:4 Wɛ bera yam konto zege nabɛ yerane ŋwaane mo na? 10Ko na ye chega to, o tage konto se ko woli debam mo. Ko bere we nɔɔno wolo na vare to de wolo na fere mena o le to maama teene we ba wó na ba teiri mo. 11Debam na toŋe abam tei ne to, ko nye de dé dugi Wɛ chega kam mo á bochara ne. Ko nam wo maŋe se dé jwoŋi dé ni-wodiu abam tei ne na?#Rom 15:27 12Abam na sɛ se á ta‑á pae nɔɔna badwonna ba ni-wodiu to, ko ya wo maŋe se debam ta dwoi konto na? De ko de, debam nam wo bwei se dé jwoŋi dé ni-wodiu abam tei ne, ne ko ya na jege chwoŋa se dé ke tei to. Dé nam vɔge dé wo woŋo maama baŋa ne, se ko yé wane ko kweele Yezu Krista kwor-ywoŋa kam ko yage tega ne.

13Ko ná ye balo na toŋe Wɛ totoŋa o diga kam ne to, ba yeini ba jwoŋi ba ni-wodiu dáane mo. Balo de na jwoŋi vara ba kaane ba pa Wɛ to de jwoŋi ba teiri ko wone mo.#Chullu 6:18 Á yeiri konto na? 14Ko nam ye bedwe mo de balo de na tɔɔle Wɛ kwor-ywoŋa kam to. Dé Teiru Yezu pɛ ni we, ba de jwoŋi ba ni-wodiu dáane.#Matiyu 10:10

15De ko de, amo nam wo bwei se a jwoŋi kolokolo abam tei ne. Ko nam ta dae we a popone tento se a bobo a taa jwoŋi-te leile mo. Amo nam wó te mo, se a bá za a na ye tei to. A bá sɛ a pa nɔɔn-nɔɔno chwoŋa se o chɔge woŋo kolo a na jege teera ko ŋwaane to. 16A nam bá wane a mage a nyɔɔne a na tɔɔle Wɛ kwor-ywoŋa kam to ŋwaane. Konto ye fefeo mo se a ke. Amo ya ná yage Wɛ kwor-ywoŋa kam tɔɔlem, ko wó taa ye lɛɛro mo a tei ne. 17A nam ya ná tɔɔle-ka a tete fera ŋwaane, a ya wó taa teene se a jwoŋi ŋweero ka baŋa ne. Ko nam dae a tete boboŋa mo a ke, se ko ye Wɛ mo kwei-de o ke amo jeŋa ne. 18Ko na ye konto to, bɛ ŋweero mo amo wó jwoŋi? Amo nyɔɔre mo ye we, a yeini a tɔɔle Wɛ kwor-ywoŋa kam zɛɛra, ye a ba bwei se a jwoŋi kolokolo ko ŋwaane, ne a ya na jege chwoŋa se a ke tei to.

19A tei a tete mo ye a dae nɔɔn-nɔɔno kabaa. Amo tete nam mo pɛ a ji kabaa a pa nɔɔna maama, se a wane a na chwoŋa a jwoŋi nɔɔna dedɛ a ke Wɛ jeŋa ne. 20Amo na wo Juu tiina bam tei ne to, a de tɔge a zoore ne Juu tu mo tei, se a wane a na chwoŋa a jwoŋi-ba a ke Wɛ jeŋa ne. Wɛ nia yalo o na tɔge Moses baŋa ne o pa Juu tiina bam to daa ba tei amo. Amo nam na zoore de Juu tiina to, a dɛ a sɛ-ya mo, se a wane a na chwoŋa a jwoŋi ya na tei balo to a ke Wɛ jeŋa ne. 21Ko daare ko ná ye dwi-gɛ tiina balo na ba tɔge Wɛ nia yam to, a na wo ba tei ne to, a tɔge a zoore ne banto mo tei, se a wane a na chwoŋa a jwoŋi-ba a ke Wɛ jeŋa ne. Ko nam dae we a yiga tera dedaane Wɛ nia yam, se Yezu Krista nia yam mo tei amo. 22Ko nam ná ye balo boboŋa na wo kweere Wɛ seeni to, a yeini a ji ne banto de mo tei, se a wane a na chwoŋa a jwoŋi-ba a ke Wɛ jeŋa ne. Amo ná wo nɔɔna balo maama tei ne, a yeini a ji ne banto mo tei, ye a kwaane a ke a na wó ke tei se a jwoŋi ba badaara a yage.

23Amo na ke tei maama to ye Wɛ kwor-ywoŋa kam ŋwaane mo, se a wane a na a teiri ka wo-laaro tem baŋa ne. 24Nɔɔna ná kwaane ba duri se ba di yiga, ba maama wó kwaane se ba di mo, ye ba dedoa yerane mo wó di o jwoŋi pɛɛre dem. Abam yeiri konto na? Nam kwaane-na konto dwoŋi se á wane á di yiga á jwoŋi pɛɛre dem. 25Nɔɔno wolo maama na lage se o duri to yeini o tiini o seene o yia mo o ke o tete o ke daane. Banto nam yeini ba ke konto se ba jwoŋi pɛɛre, ye ba pɛɛre dem konto bá dáane de chɔge mo. Ko daare debam pɛɛre delo dé na lage dé jwoŋi to bá fɔge de chɔge maŋa de maŋa. 26Konto mo pae a ba yeini a duri ne wolo na duri yɔɔ yɔɔ to dwoŋi. A nam ba ke jara ne wolo na yeiri jara keim to. 27Amo nam peene a tete mo se a pa a yera lɔre we, amo mo tei-ya. A ke konto se ko yé wane ko pa a tɔɔle Wɛ kwora kam a bere nɔɔna, se a tete laam ba a ga pɛɛre dem.

Currently Selected:

1 Korinti 9: KBG

Highlight

Copy

Compare