1 Korinti 8

Jwona wodiiru taane

1A lage a ta jwona wodiiru taane mo.

Dé yei we, dé maama jege yeino. Nam ta‑á yei-na we, nɔɔno ná jege yeino, ko pa‑o kamunni mo. Nɔɔno nam ná jege swono, ko pae zeinim mo. 2Nɔɔno wolo ná boŋe we o yei o tia, ko bere we o ta yeiri kolo na maŋe se o taa yei to mo. 3Wolo nam na swoi Wɛ to, Wɛ yei o de.

4Ko ná ye jwona wodiu kom dim taane dem, dé yei we jwona ba ŋwe, ye Wɛ dedoa yerane mo wora. 5Nabiina jege wonnu tedwonna mo ba maa bwoi we ‘wa’, ko ná ye tega baŋa wonnu naa wɛyuu wonnu de. Wonnu tento daga dedɛ ye nɔɔna bwoi-te we, ba wa de ba yuu tiina. 6Ko nam ná ye debam, Wɛ dedoa yerane mo wora. Debam Kwo wom na ke woŋo maama ye dé ŋwea wo o tei ne to mo konto. Ko daa ta woli da, debam Teiru ye dedoa mo, ye wonto mo ye Yezu Krista. Wɛ na dɛ wolo ŋwaane o ke woŋo maama ye dé ŋwe o ŋwaane to mo wonto.#Rom 11:36

7Ko nam dae nɔɔno maama mo yei we jwona ba jege dam. Nɔɔna badaara déem me de jwona kaanem mo, ye ba laam ba ba sɛ Wɛ. Konto ŋwaane ba kɔre foone ye ba boŋe we, ba ná di jwoni wodiu, ko wó taa ye nenɛɛne ba jwoori ba sɛ jwona kaanem mo. Ba boboŋa ta na wo kweere Wɛ seeni to, ba boŋe we ba ke ba chɔge mo. 8Wodiu dim dae kolokolo debam de Wɛ laŋa ne. Dé ná chuli wodiiru naa dé ba chula, dé bá jwoŋi kolokolo naa dé ga kolokolo Wɛ yiga ne. 9Ko daare abam balo na ba chuli wodiu dim to, se á ta‑á yei se á wó wane á pa balo boboŋa na wo kweere Wɛ seeni to ke ba tusi, de abam na di jwona wodiiru tem to ŋwaane. 10Nmo wolo na jege yeino ye n boboŋa kweere to ná vei n zo jwoni diga n tɔge n di de wodiu kom, ye n nu-bu wolo boboŋa ta na wo kweere to ná nɛ‑m, konto bá wane ko pa se o boboŋa ja se o de vo o tɔge o di na? 11Konto to, o ná dɛ o di jwoni wodiu kom konto, ko dae nmo mo mɛ n yeino kom n ma n chɔge n nu-bu wolo boboŋa na wo kweere ye o ta ye wolo Yezu Krista na tega o ŋwaane to na? 12Nmo ná yeini n ke keim-balɔrɔ kom konto dwoŋi n chɔge n nu-bia wo, ye n ja ba boboŋa yalo na wo kweere to n chɔge, n ke tusim n chɔge Yezu Krista yiga mo. 13Mo kokuri, wodiu dim ná lage ko pa amo nu-bu tusi, a daa bá fɔge a do nɔna.#8:13 a do nɔna naa a di wodiu kom konto A ba lage se a pa a nu-bu ywori Wɛ chwoŋa kam wone.

Currently Selected:

1 Korinti 8: KBG

Highlight

Copy

Compare