1 Korinti 7

Banna de ba kaana taane

1A lage a leiri á na popone á bwei amo taana yalo to mo a pa abam.

Baaro ná wane o ja o tete kaana baŋa ne, ko wó taa lana. 2Ko nam ba lana se baara taa lage kaana yɔɔ yɔɔ. Konto ŋwaane, ko maŋe se baaro maama taa jege o tete kaane, se kaane maama de taa jege o tete baro. 3Baaro yé zaŋe o ve se o peini de o kaane. Kaane nam yé ve se o peini de o baro. 4Kaane ba tei o tete yera, ko ye o baro mo tei-ya. Baaro de nam ba tei o tete yera, ko ye o kaane de mo tei-ya. 5Yé zaŋe-na á ve se á ta‑á tigi daane, ko ná dae we á maama mo sɛ se á yage da-peiga, se á wane á seene á yia á lwoori Wɛ se ko taa vei maŋa kalo á na lage to. Maŋa kam konto ná yia, se á jwoori á ta‑á tigi daane. Ko ná dae konto, setaana pɛ wó soge abam pa á tusi, á na ware á tete á ja to ŋwaane.

6Amo na popone banna de kaana taane konto to, a tage se ko woli abam mo, se ko dae we a lage a fe abam. 7Amo ya wó taa lage se nɔɔno maama taa ye ne amo na ye tei to. Wɛ pɛɛra nam ye teiri teiri mo ye o pa nɔɔno maama o nyem.

8Ko daare abam balo na ye badeina de kadeina to, a lage a ta de abam we, ko lana se á ta‑á ye á yerane konto, ne amo de na ye tei to. 9Á nam ná ware á tete á ja, ko maŋe se á di kaana naa á zo banna mo. Konto gare á ná pae ka-laga fera tiini ya zo abam. 10-11Ko ná ye banna de ba kaana, ko ye fefeo mo se kaane yé yage o baro, se baro de yé yage o kaane. Konto dae amo tete ni, ko ye dé Teiru Yezu mo pɛ-ne ni dem konto. Kaane nam ná maŋe o yage o baro, ko maŋe se o jwoori o vo o baro wom tei mo se ba fɔge daane. Ko ná dae konto, o daa yé zaŋe o zo baro wodwoŋi.#Maake 10:9

12Ko daare baaro wolo na tɔge Yezu to ná jege kaane wolo na ba tɔge Yezu to, ye kaane wom ná sɛ se ba taa zoore daane, baaro wom ba jege chwoŋa se o yage o kaane wom. Ko ye amo mo pɛ ni dem konto, se ko dae dé Teiru Yezu mo pɛ-de. 13Kaane wolo nam ná tɔge Yezu ye o baro ná ba tɔge Yezu, ye o baro wom ná sɛ se ba taa zoore daane, se o yé zaŋe o yage o baro wom. 14Wɛ mo le baro wolo na wo sɛ Yezu to pa o ji o nyem, o kaane wom na tɔge Yezu to ŋwaane. Wɛ ta kwori o le kaane wolo na wo sɛ Yezu to pa o ji o nyem, o baro wom na tɔge Yezu to ŋwaane. Ko ya ná dae konto, ba bia bá taa ye ba yera Wɛ ŋwaane. Ko nam na ye tei to, Wɛ mo le ba bia bam pa ba ye o nyem.

15Wolo wom na ba tɔge Yezu to ná boŋe se o viiri, ko ná maŋe ko ye kaane wom naa baro wom de, se á yage‑o se o viiri. Wolo na daare ye o tɔge Yezu to laam wó taa tei o tete. Wɛ na bwoŋi debam se dé taa tɔge‑o to, ko ye se dé taa zoore daane de wo-zuru mo. 16Kaane, nmo na tɔge Yezu to, n wó ke tɛ mo n lɔre we, n wó wane n jwoŋi n baro wom n ke Wɛ jeŋa ne, naa n bá‑n wane n jwoŋi‑o? Baro, n de wó ke tɛ mo n lɔre we, n wó wane n kaane wom n jwoŋi n ke Wɛ jeŋa ne, naa n bá‑n wane n jwoŋi‑o?

17Abam déem na ye tei ye Wɛ bwoŋi abam se á ta‑á tɔge‑o to, á ta ta‑á ye konto, se ko maŋe de dé Teiru wom na mɔɔne abam tei to. Mo kolo a na bere Yezu kɔgɔ kom jeiga maama ne to. 18Wɛ déem na bwoŋi abam to, á wolo déem ná maŋe o gwoni o peini, konto tu yé kwaane se o taa seigi o tete o peini dem gwonim ŋwaane. Ko daare wolo déem nam ná maŋe o wo gwoni o peini, o daa yé kwaane se o gwoni-de. 19Kokuri peini delo na gwoni de delo na wo gwoni to maama ba ke kolokolo. Woŋo kolo na jege kuri to mo ye se nɔɔno seene o yia de Wɛ nia yam tɔgem.

20Nɔɔno maama déem na ye tei ye Wɛ bwoŋi‑o to, ko maŋe se o ta taa ye konto mo. 21Wɛ déem ná bwoŋi wolo ye o ye kabaa, se kotu yé pa ko taa daane‑o. O nam ná nɛ chwoŋa se o taa tei o tete, se o sɛ se ko taa ye konto. 22Wolo maama déem na ye nɔɔno kabaa ye Wɛ bwoŋi‑o se o taa tɔge dé Teiru Yezu to, konto tu laam tei o tete, dé Teiru wom na jwoŋi‑o to ŋwaane. Wolo de déem na tei o tete ye Wɛ bwoŋi‑o to, konto tu laam nye de kabaa mo Yezu Krista tei ne. 23Á ye Wɛ nyem mo. O yeigi abam de o kwora mo. Mo kokuri yé zaŋe-na á ji kabɛ nɔɔn-nɔɔno tei ne.

24Konto ŋwaane, a nu-bia bam, abam maama déem na ye tei ye Wɛ bwoŋi abam se á ta‑á tɔge‑o to, se á ta ta‑á ye konto o yiga ne.

25Ko daare bukwa balo ta na wo zo banna to, dé Teiru Yezu wo pɛ-ne o ni ba ŋwaane. Amo nam ye wolo dé Teiru wom na duri a yibwona pa se a zege a chega wone to mo. Amo boboŋa na jaane tei to mo tento: 26Amo boŋe we, yaara yalo na wo debam baŋa ne leile to ŋwaane, ko lamma se nɔɔno taa ye o na maŋe o ye tei to mo. 27Konto to, nmo ná jege kaane, se n yé zaŋe n yage‑o. Nmo nam ná ba jege kaane, se n yé zaŋe n ta‑n kwaane se n di kaane. 28Ko dae we, n ná di kaane, n ga n ke wo-lɔŋɔ. Ko nam ta dae we, bukɔ ná zo baro, o ke wo-lɔŋɔ. Banna de ba kaana nam bá sii logo baŋa yaara yam wone. Konto mo a ba lage se á yaare konto dwoŋi.

29A nu-bia bam, a na tɛ konto de abam kolo ŋwaane to mo ye maŋa kam daa ba tiini ka daga se dé maa toŋe Wɛ totoŋa. Ko zege leile konto ko taa via, ko maŋe se balo na jege kaana to taa zoore ne ba wo di kaana mo tei. 30Ko maŋe se balo wo na chɔge to taa zoore ne ba wo wo chɔge mo tei. Balo wo na pwoli to de taa zoore ne ba wo wo pwoli mo tei. Balo na yeigi wonnu to taa zoore ne ba ba tei wonnu tem konto mo tei. 31Balo na ye pipim-piina logo baŋa ne to taa zoore ne ba yi wo su ba jejegero tem mo tei. Kokuri logo baŋa de ko wonnu maama lage te ti mo.

32Amo ba lage se lwia taa jege abam. Wolo na ba jege kaane to yeini o kwei o boboŋa maama o pa dé Teiru Yezu mo, se o taa toŋe o pwoli o wo. 33Wolo na jege kaane to yeini o kwei o boboŋa o ke logo baŋa wonnu wone mo, ye o kwaane o taa toŋa o pwoli o kaane wo. 34Konto bere we, o boboŋa ye yalei mo. Ko ye bedwe mo de busankana, naa kaane wolo na ba jege baro to. Wonto kwei o boboŋa maama mo o pa dé Teiru Yezu, o na lage se o yera de o jworo maama taa ye Wɛ nyem to ŋwaane. Ko daare kaane wolo na jege baro to kwei o boboŋa o ke logo baŋa wonnu wone mo, ye o kwaane se o taa toŋe o pwoli o baro wom wo.

35Amo nam tɛ botare sento se ko woli abam mo. A ba kwaane se ko taa ye fefeo á tei ne. Amo nam lage se a pa á ta‑á tɔge chwo-laao mo, se á seene á yia á ta‑á toŋa á pa dé Teiru Yezu ye á ba jege boboŋa yalei ko wone.

36Nɔɔno wolo ná boŋe we, o wo ke o katɔgɔ lanyerane, ye o fera ná tiini ya zo‑o pa o daa ware o tete o ja, ko maŋe se kotu kwaane o di‑o mo, ne o na boŋe tei to. O ná ke konto, o wo ke wo-lɔŋɔ. 37Nɔɔno wolo nam ná jege boboŋ-dɛɛra ye o wae o tete o jaana, ye kotu ná ke o boboŋa ne we, ko dae fefeo se o di katɔgɔ kom, ye o ná wo di‑o, o ke lanyerane mo. 38Konto to, wolo na di o katɔgɔ to ke lanyerane. Wolo de nam na yage o katɔgɔ kom ye o wo di‑o to tiini o ke lanyerane. 39Kaane ná jege baro, ye o baro wom ta ná ŋwe, o ba jege chwoŋa se o yage‑o. O baro wom nam ná tega, o laam jege chwoŋa se o zo o na lage wolo to. O nam jege se o tɔge dé Teiru wom boboŋa mo o zo baro wodwoŋi. 40Amo nam boŋe we, o ná jei o yerane, o wó taa jege wopwolo dedɛ ko dwoi o daa ná zo baro. Wɛ Sin-laao kom wo amo tei ne, ye a boŋe we konto mo pɛ-ne boboŋa yam konto.

Currently Selected:

1 Korinti 7: KBG

Highlight

Copy

Compare