Aposetolo 16
16
Lusitera voa
1Soka Paulo Derebe voa aea Lusitera voa ata kei forerōpe. Iesu la sukaerereaita karu farakeka rare Timoteo lōvoa peiape; are Iesu ve o la sukaerereaita Iuda ua ve atute, a—, areve oa are Helene karu. 2Lusitera voa aeata Ikoniuma voa pepeiape paumarehari voa are fari lareva vita. 3Paulo are Timoteo are ita fareho terai haikaeōpe; soka ipi lea soasoa voa pepeiape Iuda karu vei, are arero ovi peritome leipe, ipi areve oa Helene karu ere foromai lea la ore leipe eavia. 4Ere karikara haroharo voa kei kei foreraiape lea mea, ere Ierusalema voa pepeiape aposetolo karu aea opasora‐sora karu ita sa seseōvi kekese leipe lea safu o la fafarapaiape, erero lea o la kakeva leiti vei omoiape. 5Soka ekalesia karu firufiru sukaerereaita haiiri ve rofo rovaea lei, ere saresare voa karu rauapo au topiaraiape.
Paulo sa paeōpe auka Troasa voa
6Soka ere sariva lei lei Furugia aeata Galatia ve soa ve aru voa teraiape, ipi Safu Arahoha Lareva sa ere Asia soa voa itoro ari vei o erere ōpe eavia. 7Ere Musia ve itua‐tao voa foreri Bitunia voa alaeai vei leipe, a—, Iesu ve Arahoha ere lōvoa kavai vei haikaeai kao. 8Soka ere Musia ve aru voa isei isei Troasa karikara voa fauka forerōpe. 9Foreri, Paulo faita soa voa auka paea, are Makedonia heavita aea soi pavōpe la eovi, arero loki mō leipe, Makedonia voa elaro toarai vei fosia. 10Are auka paea roroka lei itei, ela utohoa Makedonia voa ufai etau vei eliape, ipi ela hai mō seseōvōpe, Ualare sa elaro isai Ovoro Lareva la erero lōvoa itoro ari vei.
Paulo areve maeapavora ita Filipi voa
11Soka ela Troasa voa vavaea voa forea, mauta ve lavo farea, elaro ovi Samoterake voa haurakao soea vo ufa ufa, lea aite sare voa Neapoli voa forera pavōpe. 12Ela lovoa kiripi kei Filipi voa forerōpe, Roma karu ve karikara reha, Makedonia ve soa aea ve toare karikara aea. Ela lea karikara voa sare hea pepeiape. 13Sabati sare voa ela karikara ve otiape maria voa te tetete mai poe voa, Ualare la loki leita oti lōvoa eaeita varo, ela hai lōri seseōvōpe. Ela avi, lōvoa kokoruka aipepeiape uamori ita laua sukavaiape. 14Sukōvi sukōvi, elaro mapaiape ua aea rare Ludia, puta mohari la itaea lei miaraita ua, areve karikara Tuatira reha; are Ualare la maso toaita ua. Papuvita areve haiiri la fapi, Paulo sa moiape lea o la haisukafori kaeai vei. 15Arero areve uvi karu ita la bapatiso lei roroka leipe soa, are elaro loki mō leipe, Ara Papuvita la sukaerereaita, e lea okofa eve haiiri voa seseōvait’ oria, a—, kotiria arave uvi voa pavaia. Are elaro taupi lei lei ela kakeva leipe reha.
Filipi dibura uvi voa
16Sare aea ela veveu oti voa teraiape lea mea, kaeavuru harisu sa toōpe tivi mori elaro sukaeōpe, areve kaeavuru sa arita o vei tava rovaea areve papukaru sa maravaiape. 17Are Paulo elaro ita la aitetei isa mōri moiape, Mea karu Koakoaeite Ualare ve tivi karu, ere makuri ve otiharo la itoro arita karu. 18Are lōfeare mai sare sare rauapo voa leiape. Lei lei Paulo haisora foromai lei, aiterori a’ harisu la mō ōpe, Iesu Keriso ve rare vei ara aro haisa mō la moi, Arero kiripi soeaia. Harisu maealolo lea soa kofa voa arero kiripi soeōpe reha. 19A—, areve papukaru ereve moni tava ovaita mai kaleipe la ofae eavōpe lea mea, ere Paulo auka Silasi ita la mai sa sukafori paea, ereukaro karikara ve aru‐pisiri oti voa, karikara kiva harofave karu ve omopa voa aruovōpe. 20Aruovi ere ereukaro Roma gavana karu tai lariōvi mō ōpe, Mea karu oraka Iuda karu, aea ereuka ereitave karikara la lavukakaeaipea. 21Ereuka leita mai haria la itoro ō vovea, ereita lea mai la mapi haikaea leiti vei usoso kao, ipi ereita Roma karu eavia. 22Karikara karu sitavu ta ereukaro toai vei leipe. Lea mea lea harofave karu Paulo auka Silasi ita ve maea puta la torerapi fareōvi, ereukaro tola sa teavi sari vei moipe. 23Ere soa rauapo ereukaro tola sa teavi sa’ sa’, ereukaro dibura uvi voa toapi, dibura kiva vita la ereukaro kiva kofa leiti vei o kere moipe. 24Are lōfeare o mapi, are ereukaro dibura iri kofa lalava voa vipi, ereukave mora la tola sofa pasou ita fasōpe.
25A—, apisi soa feare, Paulo auka Silasi ita Ualare la loki lei, maeati fara feri feri, dibura karu ta ereukaro mapaiape soa, 26pupuiōvu rovaea utohoa patei, dibura uvi ve ipi oti la lei lulalula ōpe, utape foromai utohoa tofapi, aea karu foromai ve fasaita etau ta felaukeōpe reha. 27Lea dibura kiva vita ivutu voa itakaeri a’ itei, utape fapōpe la ofae eovi, areve marehaukaita soi la paitaravi, areve maea la elore maea paeai vei leipe, ipi are haiiri mō seseōvōpe, dibura karu foromai foreri oroavi kaleipe. 28A—, Paulo i rovaea mō isa moipe, Ave maea la levi hasiavaia! Ela foromai mōvoa laipepea meha. 29Dibura kiva vita sasae‐a vei isa, iri voa forea, Paulo auka Silasi ita ve mora ipi voa maea totororo rovaea ita sosorapi putoipe. 30Aite are ereukaro maria voa lariōvi forera lalasi mō leipe, Papukaru oraka e, ara lekōru la lei araro fareōvi makuri leiti vei? 31Lei ereuka mō ōpe, Papuvita Iesu la sukaerereaia, aea aro ave uvi karu ita la fareōvi makuri leiti roi. 32Aite ereuka Papuvita ve o arero, areve uvi voa pepeita karu foromai ita la omoipe reha. 33Soka are ereukaro lea faita soa kofa voa lariōvi, ereukave teavi sape siaviri la ma uka uka, aea arero areve karu foromai ita la lea soa kofa voa bapatiso leipe. 34Are Paulo auka Silasi ita la areve uvi voa lariōvi, larietau ereukave omopa voa vipōpe. Are areve uvi karu foromai ita hailareva foromai leipe, ipi are lea soa Ualare la sukaerereōpe eavia.
35Soka miori soa Roma gavana tivi toaraita karu la dibura kiva vita tai itapi mō moi vei, Lea karu oraka paraea itapaia. 36Dibura kiva vita lōfeare o Paulo la mō moipe, Gavana karu eukaro paraeai o itapaita meha. Soka maria voa foreri, foforoe auka teraia. 37A—, Paulo gavana tivi toaraita karu la mō ōpe, Ere elakaro kaiae eavai auke lei, karikara karu ve soso voa teavi sosōvota; eite elaka ta Roma basileia ve siahu voa meita karu oraka. Faitora ere elakaro maria voa murufakao sukavuteai haikaeaipea. Lōfeare kakaeite. Ere kofa sa koti elakaro maria voa lariōvi forerai vei.
38Lea tivi toaraita karu te lea o gavana karu la moipe; aea ere Paulo auka Silasi ita Roma basileia ve siahu voa meita karu oraka lea o la mapōpe soa, ere tore foromai leipe. 39Soka ere te o mafu mei, ereukave kitou safefeapai vei haikaeōpe. Ere ereukaro dibura uvi maria voa lariōvi forera roroka lei, ereukaro loki leipe lea karikara kiripi maea lei terai vei. 40Soka Paulo auka Silasi ita dibura uvi kiripi Ludia ve uvi voa terōpe. Lōvoa ereuka paumarehari la sukaea, erero rofo leiti vei kurea roroka lei, maea lei isaipe reha.
Currently Selected:
Aposetolo 16: TQO1983
Highlight
Share
Compare
Copy
Want to have your highlights saved across all your devices? Sign up or sign in
Published by the Bible Society of Papua New Guinea in 1983.
