Aposetolo 17
17
Paulo auka Silasi ita Tesalonika voa
1Soka ereuka sariva lei lei Amefipoli aeata Apolonia ve aru voa orapi, isei isei Tesalonika karikara voa forerōpe; Iuda karu ve sunako uvi aeata lōvoa ia. 2Paulo usoso areve leita mai feare, lea sunako uvi te oropaiape. Soka Sabati sare oroisoria voa are lea karu ita Safu Karoro ve o vei laua seseōvi, 3o ve eite erero satiriōri, Keriso hehea leiti vei, aea opi ata itoi vei lea ve ipi kofa erero muia muia mō ōpe, Mea Iesu, ara ero itoro aipeta lea vita are Keriso reha. 4Ereve karu hea lea o la sukaererea, ere Paulo auka Silasi ita haiiri farakeka lei topiaraiape, aeata Ualare la maso toaita Helene karu rauapo, aeata fari koa uamori ta havōu‐kao.
5Etau farakeka Iuda karu hilisi lei, au roroaita karu maealolo maealolo hea la kokoruka, karikara la lei lavukakaeai vei. Ere te karu rare Iasona ve uvi la toa, Paulo auka Silasi ita la lea kokoruka roroiape karu tai aruovi forerai vei haikaeōpe. 6A—, ere ereukaro eavai auke lei, ere Iasona aea paumarehari hea ita la karikara kiva harofave karu ve omopa voa aruovi, mō isa moipe, Mearovaeka foromai la lei lavukakaeaita lea karu mōvoa ta foreri, 7aea Iasona sa areve uvi voa erero maeafukapi roroa. Ere foromai Kaisara sa moita o la sukavutea, o mō ō vovea, King aeata ia, areve rare Iesu. 8Lō mei lea kokorukōpe karu, karikara la kiva harofave papukaru ita mapi haiiri kapekapeōpe. 9Soka ere safu o mei, maea tai moni Iasona voa aeata karu hea ita voa fareōvi, erero lōri paraeōpe.
Berea voa
10Soka paumarehari Paulo auka Silasi ita la faita voa utohoa itapi soeōpe Berea voa. Lōvoa kei foreri, ereuka Iuda karu ve sunako uvi voa te oropōpe. 11Mea karu ere haiiri pisasa karu, Tesalonika karu ere feare kao; ipi ere o mapai vei haikakare lei, ere Safu Karoro saresare haisukafori muti muti lōvoa siseita o, Paulo ve o ita usoso leitita varo lea la ore leiti vei. 12Ereve karu rauapo lōfeare vei sukaerereōpe, aeata Helene karu ita ta hiake kasirau, fari lareva uamori, heavita ta reha.
13A—, Iuda karu Tesalonika voa ere Paulo sa Ualare ve o la Berea voa ta itoro ōpe fari la mapōpe soa, ere lōvoa kei foreri, karikara karu la lei lavukakaea aeata lei kitou leipe. 14Soka paumarehari Paulo la utohoa makaikara otiharo voa itapi isaipe, a—, Silasi auka Timote ita lea oti voa seraipe. 15Paulo la lariōvi isaipe maeapavora are ita fareho vavaea voa forea sariva lei isei Atena voa forerōpe. Foreri maeapavora karu lōvoa sukavi, Paulo sa moipe o, Silasi auka Timoteo ita arero tai lavelave koti vei lea o la ovi ere ata keroripe.
Atena voa
16Soka Paulo are Silasi auka Timoteo ita la Atena voa taiape soa, are lea karikara voa apeva ualare ve ove rauapo kofa la ofae eovi, haiiri heafo foromai leipe. 17Lōfeare vei are sunako uvi voa Iuda karu aea Iuda maso toaita mai la malasa toruipi haria karu ita laua sukavaiape, are saresare voa ta karikara aru pisiri voa foreri au sukaeaiape karu ta omoiape. 18Soka Epikuro ve ovoro la satiriaraita karu aeata Setoika ve ovoro la satiriaraita karu hea ita are ita laua seseōvōpe. Ereve karu hea lalasi mō leipe, Mea o titi vita lekōru o la moi vei haikaeaipea? Karu hea mō ōpe, Are ualare hariaharia vei laua sukavaipeta feare. Ereve lōfeare o ve ipi Paulo Iesu ve aeata areve opi ata itoi ve Ovoro Lareva la itoro ape eavia. 19Soka ere Paulo la mai paea, Areo Raepa voa lariōvi patei lea kokorukai ve aru voa mō ōpe, A satiriaraipeta mea o áre a elaro lei ore leitita leafeare? 20Ipi a sa elave ōvauta voa kakaupaipeta lea etau soa haria ela evera mapai sore. 21Ipi Atena karikara karu foromai aea lōvoa pepeita toruipi hariaharia karu ita ve mai farakeka meha, sare foromai voa laua áre meimei aeata au mapai vei lea haria.
22Soka Paulo Areo Raepa ve kokorukai ve aru voa soi pea mō ōpe, Atena karu e, ara ofae eavai e ualare hariaharia la maso toaita mai rauapo leita karu. 23Ipi ara eve maso toaita etau la fofoisa fofoisa foapaia lea mea, ara alitara farakeka aea la eavai, are voa o uka eaea, Ore Auke Ualare aea veia. Soka e eite haveva ita maso toaita lea Ualare ara ero itoro la aipea meha. 24Mearovaeka aea areve iri ve roroaita etau la pisosiape lea Ualare, kauri mearovaeka ita ve Papuvita, mai sa turaita maso uvi voa pei sore.#1 King 8:27; Isa 42:5; Apos 7:48 25Karu ve mai sa arero ta kiva leiti sore, are etau ta maeamaea haikaeaita ovitao; ipi are kofa sa makuri aea haiiri ve siahu aea etau etau foromai la karu foromai la miara vovea. 26Are karu farakeka la pisosi lei tatavi toru hariaharia lei foreri, ere mearovaeka ve oti foromai voa pepei vei, are ereve pepeita meamea ve soa aeata otioti ve soa la lei kekese leipe lea mea. 27Are lōfeare leipe ipi ere arero eli vei, ere arero totoapi sukaeaita varo. Eite are ereitaro ára‐ita pavai sore; 28ipi ereita are voa makuri ovi lulalula a’, aeata pepea vovea, usoso eve elore fara pisosipe karu hea sa moipe o feare,
Ela ta areve atutemori.
29Ereita Ualare ve atutemori eavia, ereita haiiri mōfeare levi seseōvaia, Ualare ve maea are usoso gold ō silva ō fave, karu ve haiore aeata maihoa sa pisosita ove feare. 30Soka lea haihaveva leitia soasoa voa Ualare kaiae tava miarai vei seseōvai sore; a—, faitora are karu foromai la otioti foromai voa kaiae la kiripi, haiiri kerori vei itoro la aipea. 31Ipi are sare farakeka mei kekese lei la eaea, lea sare voa are omoipe lea vita sa mearovaeka karu la mai haura ita seseōvai tava miarai roi. Are lea vita la opai voa moravōpe lea vei, are seseōvi tava miaraita soa lōfeare lei karu foromai la horahora auke ita muiaita reha.
32A—, ere karu opi ata itoi o la mapōpe lea mea, hea area ōpe, hea ta mō ōpe, Ela mea etau vei aite voa a voa ata mapai roi. 33Soka Paulo ereve kokorukai kiripi terōpe. 34Karu hea arero topiari sukaerereōpe, ere voa Dionusio, Areo Raepa Kokorukai ve karu aea; aeata ua farakeka rare Damarisi, aea karu hea ta reha.
Currently Selected:
Aposetolo 17: TQO1983
Highlight
Share
Compare
Copy
Want to have your highlights saved across all your devices? Sign up or sign in
Published by the Bible Society of Papua New Guinea in 1983.
