Aposetolo 15
15
Ekalesia ve Kokorukai Rovaea Ierusalema voa
1Karu hea Iuda voa pea koti, paumarehari la satiriōri o mōri moipe, E Mose sa miarōpe lea mai feare peritome leiti auke leitita, a—, e makuri levi leiti roi.#Levi 12:3 2Ere Paulo auka Banabasi ita ape sosori a’, o serea rovaea elore elore ōpe reha. Lea vei paumarehari ere Paulo auka Banabasi ita aea ereve karu hea ita la itapai vei haiiri kekese leipe, ere aposetolo aea opasora‐sora ita tai Ierusalema voa patei, mea horahora etau vei lalasi leiti vei.
3Soka ekalesia karu erero toilalōpe, ere Fenisia ve mea aeata Samaria ve aru voa isaipe soa, ere toruipi hariaharia karu haiiri kerorita fari la fafarapi, aea paumarehari foromai la lei hailareva leiape. 4Ere Ierusalema voa forerōpe lea mea, ekalesia karu aea aposetolo aea opasora‐sora karu ita erero maeafukapōpe, Soka ere Ualare sa ereuka ita leiape lea etau foromai la omoipe. 5A—, Farisea karu ve firu la topiari sukaerereaita lea karu hea itotea mō ōpe, Erero peritome lei, ere Mose ve safu la kiva leiti vei lōfeare sa haria haura.
6Soka aposetolo karu aea opasora‐sora karu ita lea o la seseōvai vei kokorukōpe. 7O serea rovaea elore elore a’ a’ roroka lei, Petero itei erero mō ōpe, Paumarehari e, e ore evera soa voa Ualare araro eve aru voa haikaeōpe, toruipi hariaharia karu la Ovoro Lareva itoro a’ arave ape voa mapi sukaerereai vei.#Apos 10:1–43 8Aea karu ve haiiri la ore leita Ualare, toru hariaharia karu ta Iesu la sukaerereaita lea usoso lōfeare vei muiōpe ipi are Safu Arahoha Lareva erero ta miarōpe, usoso are sa ereitaro omopa miarōpe lōfeare.#Apos 2:4; 10:44 9Are ere ita aea ereita ita mai haria leiti kao, ipi are ereve haiiri ve sirisiri ta lei ovava leipe ere sa Iesu la sukaerereōpe eavia. 10Soka e Ualare la seseōvai haikaeaipeta ipi levea, ipi e mea sukaerereaita karu ve avea‐ipi voa etau pasou la miavai, ereitave papa‐ita sa ereita ita taiovai vei rofo usoso auke leipe lea etau? 11A—, ereitave sukaerereai ereitaro lei makuri leiti roi Papuvita Iesu ve maeaforoe ve meru voa, soka erero ta lōfeare.
12Lea kokorukōpe karu ere Banabasi auka Paulo ita, Ualare sa ereuka ita toruipi hariaharia karu ve aru voa leiape siahu ve peise, haihava leita etau ita la omoiape lea mea ere mapi mapi o auke ita aipepeiape. 13Ereuka laua sukōvi sukōvi roroka lei, lakobo tava o mō ōpe, Paumarehari e, arave o mapaia. 14Simona sa ereitaro o mei roroka loi, Ualare omopa soa voa toruipi hariaharia la haikaeōpe, are ere voa areve rare aravaita karu firu ta ovai vei. 15Lea etau vei peroveta karu sa mōri ukōpe o feare,
16Lea etau ve aite voa ara ata koti roi,
Davida ve hohōroōpe uvi la ata moravi,
areve foforukaita oti la ata lei pōvi,
arero ata turi moravai roi.#Amos 9:11–12
17Lea vei aite karu haria foromai Papuvita la eli roi,
arave rare ita aravaita lea toruipi haria karu foromai ta reha.
18Papuvita lea o la moipea;
are mea etau la evera soa voa itiiti faitora lei ore leititore.
19Iakobo o aeata topiari mō ōpe, Arave haiiri meha, Ualare tai haiiri kerorita lea toruipi haria karu la lei haisora levi leiti vei; 20a—, ereita o erere karoro ere vei uka, ere apeva ualare ve ove etau voa omopa posaseaita larietau levi laria, aea herei mai, aea faihohōroaita ovo ita etau avoha lei sukavuteai vei.#Eso 34:15–17; Levi 17:10–16; 18:6–12 21Ipi omopa kofa taotao voa itiiti faitora, karikara foromai voa Mose ve o la itoro arita karu ia, ipi areve o la sunako uvi foromai voa, Sabati sare foromai voa muti vovea.
22Soka aposetolo karu aea opasora‐sora aea ekalesia karu foromai ita haiiri kekese leipe, ereve karu firu voa hea la fareōvi Paulo auka Banabasi ita fareho Antioka voa itapi kavai vei. Ere Iudasi, Barasabasi la aravōpe, aeata Silasi ita la fareōvi itapōpe, paumarehari voa harofave karu ereuka reha. 23Ere ovi kavōpe karoro meha:
Aposetolo karu aea opasora‐sora paumarehari ita, toru hariaharia karu Antioka karikara voa aeata Suria voa aea Kilikia voa pepeita paumarehari veia; e foforoe reha. 24Ela fari mapai elave karu hea ereve laua sa ero lei haisora lei, eve haiiri la lei kapekapeai. Eite ela erero itapai kasirau. 25Soka ela haiiri farakeka lei kekese lei, elave karu hea la fareōvi ero tai itapai. Lea karu ere elave haikakare leita karu oraka Paulo auka Banabasi ita, 26Papuvita Iesu Keriso ve rare vei makuri la miaraita lea karu oraka fareho kavai vei. 27Lea vei ela Iudasi auka Silasi ita la fareōvi ero tai itapi la kavai reha, ela sa ukaita o usoso feare ereukave ape kofa sa ero omoi roi. 28Safu Arahoha Lareva ela ita haiiri farakeka lei kekese lei, etau pasou rovaea la e voa levi miarai vei, a—, mea etau haria; 29apeva ualare ve ove etau voa omopa posaseaita larietau aea ovo ita faihohōroaita etau avoha lei sukavutea, aea herei mai ta levi leitia. Lea etau la e kiva leitia, a—, e lareva leiti roi. E foforoe au avai puavai‐o.
30Soka itapōpe meu karu maea lei kei, Antioka voa foreri sukaerereaita karu firu foromai kokoruka, karoro erero au miarōpe. 31Miōri ere karoro muti roroka lei, ere lea kureaita o vei hailareva leipe. 32Iudasi auka Silasi ita, ereuka ta peroveta karu oraka, o rauapo ita lea paumarehari la kuria lei rofo leipe. 33Soa taheka savori leipe aite voa, lea paumarehari ereukaro foforoe o ita paraea, ereukaro itapōpe karu tai ata kerori isaipe. [ 34A—, eite Silasi haiiri seseōvi kekese leipe lōvoa pavaita lareva.] 35Soka Paulo auka Banabasi ita Antioka voa pepeiape, ereuka karu rauapo ita farehoria Papuvita ve o la satiriōri itoro ape.
Paulo Silasi la lariōvi Kilikia voa kavōpe
36Sare hea kaleipe soa Paulo Banabasi la mō ōpe, Kotiria, elaka sariva lei Papuvita ve o la itoro ape lea karikara foromai voa pepeita paumarehari la ofae eavai vei, ere leafeare roroa lea la ore leiti vei. 37Soka Banabasi ve haiiri Ioane Mareko ereuka ita sariva ata leiti vei. 38A—, Paulo ve haiiri arero ata ovaita lareva kao, ipi are Pamefulia voa ereukaro kiripi soea, ereuka ita fareho tivi vei kavai auke leipe eavia.#Apos 13:13 39Ereuka o serea elore elore a’ kitou lei faea, Banabasi are Mareko la lariōvi, vavaea voa forea, Kupero voa ufōpe. 40A—, Paulo are Silasi la haikaea ovi, paumarehari ereuka vei Papuvita ve maeaforoe ve meru vei loki lei, maea lōri lei, 41Suria aea Kilikia ve soa ve aru voa kei kei, ekalesia firu hariaharia la lei rofo leiape.
Currently Selected:
Aposetolo 15: TQO1983
Highlight
Share
Compare
Copy
Want to have your highlights saved across all your devices? Sign up or sign in
Published by the Bible Society of Papua New Guinea in 1983.
