Aposetolo 14
14
Ikoniuma voa
1Soka lōfeare mai Ikoniuma voa ta leipe: Paulo auka Banabasi ita Iuda karu ve sunako uvi oropi, itoro ōpe lea soa Iuda karu aea Helene karu ita rauapo kofa sukaerereōpe. 2A—, o kakeva leiti auke Iuda karu hea ere toruipi haria karu ve haiiri la kurea maealolo lei, ere Iesu la sukaerereaita karu la sukavuteai vei. 3Soka ereuka soa taheka savori lōvoa pepe, Papuvita ve o ape karōva ita itoro ape. Are ta areve maeaforoe leita o la o kofa mōri muiaiape, are ereukaro lei ereukave mai sa siahu ve peise haihava leita etau ita la leiape. 4Soka lea karikara karu ere faeafaea a’, karu hea Iuda karu la haikaeōpe, karu hea aposetolo karu la haikaeōpe.
5Soka toruipi haria karu aea Iuda karu hea ereve karikara papukaru ita laua seseōvi kekese leipe, ereukaro ivara eokere mai lei fave sa toai vei. 6Ereuka lea la ore lei, Lukaonia soa ve karikara oraka Lusitera aeata Derebe voa, aeata eakoa toepōpe mea voa safauka, 7lōvoa Ovoro Lareva la itoro ape.
8Soka Lusitera voa mora rofo auke karu aea peiape; are areve lou ve ére voa itiiti lea sare voa mora posa sa pui lei, mora kerorita ore auke lei peiape. 9Are aisesea Paulo sa ōpe itoro o la mapi, Paulo arero ofae fofoisa, are makuri leiti vei sukaerereaita haiiri ovōpe lea la eovi, 10ape rovaea ita mō isa moipe, Itei ave mora posa voa haurakao pavaia. Soka are forea itei pōvi, mora keroripe reha.
11Karu sitavu Paulo sa leipe lea etau la ofae eovi, ereve i moravi Lukaonia uri voa mō isa moipe, Ualare oraka karu maea lei ereitaro tai fauka foreraita meha. 12Banabasi ere Deo, rare aravōpe, aea Paulo ere Hereme rare aravōpe, ipi are laua sukavaita vita eavia. 13Soka Deo ve maso tivi vita, areve maso uvi karikara ve omopa voa peiape, lea vita boromakao torea hea tola pupuri moupa ari otiape voa lariōvi iti, karu rauapo ita boromakao la savi maso toai vei aposetolo oraka voa omopa posaseai vei forerōpe.
14A—, Banabasi auka Paulo ita ereuka lea leiti vei leipe etau la mapōpe lea mea, ereuka ereukave ve maea puta la torerapi, karu ve aru voa soea i mō isa moipe, 15Karu e, e mea etau leiti vei leipeta ipi levea? Elaka ta karu, usoso eve maea feare. Elaka Ovoro Lareva la itoro ari vei foreri auka mea, ipi e mea eite auke etau la kiripi, makuri lei vovo meipeta Ualare, kauri, mearovaeka, makaikara aea ereve iri voa roroaita lea etau foromai la pisosiape Ualare tai haiiri kerori vei.#Eso 20:11; Sal 146:6 16Evera taotao ve soa, are torutoru karu foromai la paparaeaiape, ere ereve elore elore haikaeaita mai la leiti vei. 17Etau farakeka are eite Ualare are lea la horahora auke ita karu la muia vovea, ipi are karu la leita mai lareva lei, kauri voa arita lai, aeata fare lareva taita pisahu kofa voa lei foreri, larietau ero miōri, eve haiiri la lei hailareva leititore. 18Soka ereuka lea o la mei, heafo lei lei, karu sitavu la etau savi maso toai vei o erere a’ a’ lōri sasaukōpe.
19A—, Antioka seika voa aea Ikoniuma voa pepeiape Iuda karu lōvoa foreri, ere karu sitavu la kurea, ere Paulo la fave sa toa toa roroka lei, ere arero opai o a’, karikara koravasa voa paitaravi forera miavi kiripōpe. 20A—, Iesu la sukaerereaita karu arero tai eakoa toepi popōvōpe lea mea, are areve aru voa itei, karikara voa ata oropōpe. Soka lea ve aite sare are Banabasi ita Derebe voa terōpe.
Aposetolo oraka Antioka Suria voa ata keroripe
21Soka ereuka Ovoro Lareva la lea karikara voa itoro a’ satiriaraita karu rauapo lei, ereuka Lusitera aea Ikoniuma aea Antioka seika voa ata keroripe. 22Ereuka Iesu la sukaerereaita karu ve haiiri la lei rofo lei, areve o voa pepei vei erero kurea mō ōpe, Ereita haisora leita etau rauapo ve aru voa rororaita, ereita Ualare ve basileia voa lōri oropai roi. 23Soka ereuka ekalesia karu firu farafarapo voa opasora‐sora vipi kekese lei, Ualare la loki o ita, larietau avoha leita soa ita, erero ere sukaerereaita lea Papuvita ve mai voa lōri miavōpe.
24Soka ereuka Pisidia ve aru voa sariva lei, Pamefulia voa forerōpe. 25Ereuka Perega voa o itoro a’ roroka lei, ereuka Atalia voa fauka isaipe. 26Lōvoa ereuka vavaea voa forea, Antioka rovaea voa kerori kei, ereuka sa lei kekese leipe lea tivi vei Ualare ve maeaforoe ereuka vei omopa loki o ita itapōpe lea ekalesia voa forerōpe.
27Soka ereuka foreri, ereuka ekalesia karu la isa kokoruka, Ualare sa ereuka ita leiape lea etau foromai ve fari la o mei mei, aea o ipi are utape la toruipi haria karu vei fapōpe, ere sa Iesu la sukaerereaita lea vei. 28Soka ereuka soa taheka savori lea karikara voa Iesu la sukaerereaita karu ita fareho pepeiape.
Currently Selected:
Aposetolo 14: TQO1983
Highlight
Share
Compare
Copy
Want to have your highlights saved across all your devices? Sign up or sign in
Published by the Bible Society of Papua New Guinea in 1983.
