Aposetolo 13
13
Banabasi auka Saulo ita ve oarehōva sariva
1Soka Antioka ve ekalesia voa peroveta karu aea satiriaraita papukaru hea ta pepeiape. Ereve rare rare meha: Banabasi aea Simeona, Maea‐uru rare la aravōpe lea vita, aea Lukiu, Kurene karu, aea Manaena are Gavana Heroda ve moraitai, aeata Saulo. 2Soka ere Ualare la maso toa, larietau avoha leiape lea mea, Safu Arahoha Lareva erero mō ōpe, Banabasi auka Saulo ita la ara vei fareovaia, ereuka ara ereukaro haikaea ovaita lea tivi aea leiti vei. 3Soka ere larietau avoha lei aea Ualare la loki lei roroka lei, ereve mai ereukaro miavi ereukaro paraea maea leipe.
Kupero voa
4Soka Safu Arahoha Lareva sa itapi, ere Seleukia miri karikara voa fauka, lōvoa vavaea forea Kupero voa soea vo ufōpe. 5Ufi ere Salamisi karikara voa forera, ereuka Ualare ve o Iuda karu ve sunako uvi voa itoro ape. Ioane Mareko ta ereukaro lea tivi voa toari meiape.
6Ere lea firu ve itua‐tao voa sariva lei isei isei soa itua‐tao karikara Pafosi voa forerōpe. Lōvoa ere kaeavuru aea apeva peroveta Iuda karu farakeka aea la sukaeōpe, areve rare Bara‐Iesu. 7Are gavana rovaea Seregio Paulo ita fareho peiape. Lea gavana are haiore vita, aea are Banabasi auka Saulo ita la isa haikaeōpe Ualare ve o la mapai vei. 8A—, Elumasi, lea kaeavuru karu, areve rare lōfeare Helene uri voa, are ereukaro sukelapi, gavana la lei are Iesu vei lea o la levi mapai vei seseōvōpe. 9Lea mea Saulo, areve rare ta Paulo, Safu Arahoha Lareva sa soa’, arero ofae koko fofoisa, 10mō ōpe, Diabolo ve atute, haura etau foromai la kaifa leita vita e, a apeva aea maeahahauhahau foromai ita so kofa oita vita; a Papuvita ve otiharo haura la lei kaiae leiti vei levi kiripai roi ei? 11Soka faitora mapaia, Papuvita ve mai a voa miavaita meha; a ofae kuku lei, sare la soa hea levi eavai roi. Ma‐huvu murumuru ita arero tai utohoa forerōpe, are karu arero mai sa lariōvai vei totoapaiape. 12Soka gavana are lea leipe etau la eovi sukaerereōpe reha, ipi are Papuvita ve satiriaraita lea o vei haihava leipe eavia.
Pisidia Antioka voa
13Soka Paulo areve maeapavora karu ita vavaea voa forea Pafosi kiripi, Perega karikara Pamefulia voa fosi pavōpe. Lōvoa Ioane ereukaro kiripi Ierusalema voa ata keroripe. 14Ereuka Perega kiripi maea lei Pisidia soa ve Antioka karikara voa kei forerōpe. Foreri ereuka Sabati sare voa sunako uvi voa oropi avōpe. 15Mose ve Safu Buka, aea peroveta karu ve buka ita la muti muti roroka leipe soa, sunako papukaru karu aea la mei ereukaro lalasi mō ōpe, Euka karu la kureaita ovoro ita oria, o moia. 16Soka Paulo itei, mai muia fapi mō ōpe:
Israela karu e, aea Ualare la tore leita karu e, mapaia! 17Israela karu ve Ualare ereita ve papa‐ita la haikaea ovi ere Egupto voa oti haria karu lei au pepeiape soa voa, erero lei totavi rauapo lei, aea siahu rovaea ita are erero lariōvi ere Egupto kiripi maria voa forerōpe.#Eso 1:7; 12:51 18Sisoro forty feare are furuka merava voa erero au morari vovo meiape.#Num 14:34; Deut 1:31 19Are toruipi‐ipi seven la Kanana mea voa saroroapi roroka lei, are lea karu ve mea la papa hasu vei areve karu la miarōpe.#Deut 7:1; Iosu 14:1 20Lea mai sisoro 450 feare voa leiape.
Lea ve aite voa are lohio karu erero miaraiape itiiti soa Samuela peroveta karu ve soa voa.#Lohi 2:16; 1 Sam 3:20 21Soka lea soa voa ere king vei loki leipe. Lei, Saulo Kisa, Beniamina ve toruipi karu aea, ereve king leiti vei erero miarōpe sisoro forty voa.#1 Sam 8:5; 10:21 22Arero sukavutea areve king ve soa fareōvi roroka lei, Ualare Davida la lei ereve king leipe, are vei karu la ore leiti vei Ualare sa moipe o meha, Ara Davida Iese la eovi, arave haiiri la elita vita are reha, are arave haikaeai foromai la leiti roi.#1 Sam 13:14; 16:12; Sal 89:20 23Areve meavumōla voa Ualare sa Israela la erero lei makuri leita vita vei Iesu la miarōpe, omopa moiape otoare lōfeare. 24Are forerōpe soa ve omopa voa, Ioane haiiri kerorita bapatiso Israela karu foromai la everori itoro ape.#Mak 1:4; Luk 3:3 25Soka Ioane areve tivi soa kaleiti vei leipe lea mea, are mō ōpe, E ara vei haikaeaipeta ara leisa? E sa are vei taipeta lea vita ara kasirau. A—, mapaia, are arave aite voa la kotipea; ara hiopi areve mora ve tamaka éla la felaukeai vei lareva kasirau.#Mat 3:11; Mak 1:7; Luk 3:16; Ion 1:20, 27
26Paumarehari e, Abrahama ve meavumōla ve atutemori, aea eve aru voa Ualare la tore leita karu e, mea makuri leita o ereitaro tai itapi foreri la eaea. 27Ipi Ierusalema voa pepeita karu, ereve harofave karu ita, arero ore leiti kao, aea ere haveva lei arero paeai vei moipe lea mea, ere peroveta karu hariaharia ve o la okofa leipe, Sabati sare sare foromai voa mutita lea o. 28Ere arero paeai ve kaiae eavai kao, a—, ere Pilato la arero paeai vei loki leipe.#Mat 27:22–23; Mak 15:13–14; Luk 23:21–23; Ion 19:15 29Ere are vei evera ukōpe lea o foromai la lei okofa lei, ere arero paeaita tola voa fareōvi fauka, arero tapu oti voa viopōpe.#Mat 27:57–61; Mak 15:42–47; Luk 23:50–56; Ion 19:38–42 30A—, Ualare arero opai voa ata moravōpe. 31Are ita farehoria Galilea kiripi Ierusalema voa kotipe lea karu sare rauapo arero eavaiape. Ere faitora are vei Israela karu la okofa moita karu.#Apos 1:3 32Soka papa‐ita la ōpe lea otoare Ovoro Lareva la elaka ero tai oviti itoro la aipea meha. 33Are Iesu la moravōpe lea mea, Ualare lea otoare la ereita areve meavumōla vei lei okofa leipe. Usoso orakoria Salamo voa o mōri ukōpe o feare,
Arave Atute a reha,
iso sare ara aro ovi la me meha.#Sal 2:7 34Aea are arero opai voa ata moravi suru levi leiti vei, are o mōri moipe,
Ara Davida la ōpe horahora auke leita safu otoare etau ero ta miarai roi.#Isa 55:3 35Usoso Safu Buka sa oti aea voa mō mōipe o,
A ave safu vita lareva la puruta lei levi kiripai roi.#Sal 16:10 36Ipi Davida are areve elore heatao ve soa voa Ualare sa haikaeaita etau la lei lei roroka lei, opi areve papa‐ita ve maea maria voa viopi, areve maea ta suru leipe. 37A—, Ualare sa moravōpe lea vita suru leiti kasirau.
38Lea vei, paumarehari e, mea la ore leitia, iri kaiae la felaukea mutapaita o Iesu voa ero itoro arita meha. 39Sukaerereaita karu foromai la mai kaiae voa, mea vita sa haura leititore, a—, Mose ve Safu sa lea la haura leiti sore. 40Lea vei e kiva leitia, peroveta karu ve buka voa o mōri moita mea etau ero tai forerai ave.
41Mapaia, e sukavuteaita karu e, haihava lei saroroapi kaleitia,
ipi ara eve mea soa voa tivi aea la la leipea,
lea fari ero o sa moit’ oria, e levi sukaerereai roi.#Hab 1:5
42Soka Paulo auka Banabasi ita sunako uvi kiripi maria voa forerōpe soa, karu ereukaro loki leipe aite Sabati sare voa lea o la erero ata omoi vei. 43Soka kokorukai karu sa faraipe lea mea, Iuda karu rauapo, aea Iuda ve maso mai haihahari leita toruipi haria karu ita Paulo auka Banabasi ita la aitetaipe. Ereuka erero kureōpe ere Ualare ve maeaforoe ve meru la mai kere paeai vei.
44Lea aite Sabati sare voa, karikara karu sitavu sitavu Papuvita ve o la mapai vei kokorukōpe. 45A—, Iuda karu lea karu sitavu sitavu la ofae eovi, ere hilisi foromai lei Paulo sa moipe o la o kere ita sukavutea, kaiae o ōpe. 46Soka Paulo auka Banabasi ita ape karōva ita mō ōpe, Ualare ve o ero omopa itoro ari vei, haikaeaita mai reha. A—, ipi e lea o la sukavutea, aea eve seseōvaita haiiri e peita makuri ovai vei usoso auke eavia, mapaia, elaka toruipi haria karu tai kerori roi. 47Ipi Papuvita mea safu o elakaro miarōpe,
Ara aro lei a torutoru karu vei ovava leiti roi.
A makuri leita siahu la lei mearovaeka ve itua‐tao voa lei forerai vei.#Isa 42:6; 49:6
48Soka toruipi haria karu lea o la mapi, hailareva lei, Ualare ve o la maeatipe; Ualare sa haikaea ovōpe lea karu foromai sukaererōpe.
49Soka Papuvita ve o lea mea foromai voa fafarapaiape. 50A—, Iuda karu ere Ualare la maso toaita rare rovaea uamori, aea karikara karu metameta ita la kurea lavukakaea, ere Paulo auka Banabasi ita la lei haisora lei, ereukaro ereve mea la kiripai vei sukavuteōpe. 51A—, ereuka ereukave mora voa pasaea siseiape tetere la pailalaea sisapōpe ereve mai maealolo ve muiaita peise vei, aea Ikoniuma voa maea leipe terōpe.#Mat 10:14; Mak 6:11; Luk 9:5; 10:11 52A—, Iesu la sukaerereaiape lea karu Antioka voa hailareva foromai lei, Safu Arahoha Lareva sa soōpe.
Currently Selected:
Aposetolo 13: TQO1983
Highlight
Share
Compare
Copy
Want to have your highlights saved across all your devices? Sign up or sign in
Published by the Bible Society of Papua New Guinea in 1983.
