ဧဖက် 1

နှုတ်ဆက်ခြင်း

သို့၊ ဧဖက်မြို့ အသင်းတော်။

1ငါ ပေါလု၊ ငါစာ ခရစ်တော်ယေရှု၏ တမန်တော် တစ်ယောက် ဖြစ်တေ။ ထာဝရဘုရားစာ ကိုယ့်အလိုတော်အတိုင်း ငါ့ကို တမန်တော်အရာမာ ခန့်ထားလီရေ။ ဧဖက်မြို့မာ ဟိကတ်စာ ထာဝရဘုရား၏ လူရို့န သစ္စာတရားကို ထားရို့ ခရစ်တော်ယေရှု နောက်က လိုက်သူရို့တို့ ငါ ဒေ စာစောင်ကို ရွီးလိုက်တေ။

2ငါရို့မာ အဖထာဝရဘုရားန အသျှင်ယေရှုခရစ်တော်စာ နင်ရို့ကို ကျေးဇူးတော်န ငြိမ်းချမ်းခြင်း ပီးပါစီ။

ခရစ်တော်ကနီရို့ ဝိညာဉ်၏ ပဿိကို ခံရခြင်း

3ငါရို့မာ အသျှင်ယေရှုခရစ်တော်၏ အဖထာဝရဘုရား၏ ဘုန်းကြီးပါစီ။ ငါရို့စာ ခရစ်တော်န တစ်ကိုယ်တည်း ဖြစ်ကတ်တေအတွက်န ထာဝရဘုရားစာ ငါရို့ကို ဂေါင်းခင်ဘုံမာ ဟိသမျ ဝိညာဉ်၏ ပဿိကို ပီးဗျာ။ 4ထာဝရဘုရားစာ ငါရို့ကို ကိုယ့်ရှိက သန့်ရှင်းသူန အပြစ်နကင်းသူ ဖြစ်စီချင်ရေ။ ယင်းအတွက်န သူစာ ဒေ ကမ္ဘာကို မဖန်ဆင်းခင်အယင်ကပင် ခရစ်တော်ကနီရို့ ငါရို့ကို ရွီးကောက်ယူလီရေ။ 5ထာဝရဘုရားစာ ငါရို့ကို ချစ်ခင်ရေအတွက်န ခရစ်တော်ကနီရို့ ကောက်မွီးဇပ်ဖို့ ဆိုပြီးကေ ဒေ ကမ္ဘာကို မဖန်ဆင်းခင်အယင်ကပင် စီစဉ်ရို့ ထားလီရေ။ ထာဝရဘုရားစာ နှစ်သက်ပြီးကေ ကိုယ့်အလိုတော်အတိုင်း ယင်းပိုင် စီစဉ်ရို့ ထားလီရေ။ 6ဒေပိုင် လုပ်လီစာ အကြောင်းကား ကိုယ့်မာ ဘုန်းတန်ခိုးနပြည့်စုံစာ ကျေးဇူးတော်အတွက် ထာဝရဘုရားစာ ငါရို့က ချီမွမ်းခြင်းကို ရချင်လီရေ။ ထာဝရဘုရားစာ ထိုကျေးဇူးတော်ကို ကိုယ်ချစ်ခင်စာ သားတော်ကနီရို့ ငါရို့ကို အခမဲ့ ပီးလီရေ။ 7ငါရို့စာ ခရစ်တော်၏ သွီးအကြောင်းန လွတ်မြောင့်ခြင်းကို ရကတ်ပျာ အရာ ငါရို့စာ ထာဝရဘုရား၏ မဟာကျေးဇူးတော် အကြောင်းန အပြစ် ခွင့်ရွှတ်ခြင်းကို ရကတ်ပျာ။ 8ထာဝရဘုရားစာ ထိုကြီးမြတ်စာ ကျေးဇူးတော်ကို ငါရို့ကို သွန်ပီးလီရေ အရာ သူစာ ပြည့်စုံစာ ညာဏ်ပညာကိုလည်း ငါရို့ကို စေတနာစိတ်န ပီးလှူလီရေ။ 9ထာဝရဘုရားစာ ကိုယ့်အလိုတော်အတိုင်း ကိုယ့်မာ ဖုံးရွှက်စာ ရွယ်မှတ်ချက်ကို ငါရို့ဘားမာ ဖေါ်ပြလီရေ။ သူစာ ထိုဖုံးရွှက်စာ ရွယ်မှတ်ချက်ကို ခရစ်တော်ကနီရို့ အယင်ကပင် စီစဉ်ရို့ ထားလီရေ။ 10အကြောင်းကား အချိန်စိရေခါ ထာဝရဘုရားစာ ကိုယ့်ရွယ်မှတ်ချက်ကို ပြည့်စုံအောင် လုပ်ချင်လီရေ။ ထို ရွယ်မှတ်ချက် ဖြစ်တေကား ဒေပိုင်၊ ထာဝရဘုရားစာ ဂေါင်းခင်ဘုံန ကမ္ဘာမာ ဟိသမျ အားကုံးကို စုပေါင်းရို့ ခရစ်တော်၏ အုပ်ချုပ်ခြင်းအောက်မာ ချထားဖို့။

11ထာဝရဘုရားစာ ကိုယ့်အသိပညာန ကိုယ့်အလိုတော်အတိုင်း ဟိသမျ အလုပ်ကို လုပ်နီရေ။ ငါရို့ ထာဝရဘုရား၏ လူဖြစ်ကတ်ဖို့ဆိုစာကို ထာဝရဘုရားစာ အယင်ကပင် ကိုယ့်ရွယ်မှတ်ချက်အတိုင်း စီစဉ်ရို့ ထားလီရေ။ ယင်းပိုင် စီစဉ်ရို့ ထားရေအတိုင်း ထာဝရဘုရားစာ ငါရို့ကို ကိုယ့်လူဖြစ်ဖို့အတွက် ခရစ်တော်ကနီရို့ ရွီးကောက်ယူလီရေ၊ 12အကြောင်းကား ထာဝရဘုရားစာ ကိုယ့်ဘုန်းတန်ခိုး၏ ချီမွမ်းခြင်းကို ငါရို့က ရစီချင်လီရေ။ ငါရို့ ယုဒလူမျိုးရို့စာ ပထမဆုံး ခရစ်တော်ကို မျှော်လင်းလီကတ်တေ။ 13အရာ နင်ရို့လည်း မှန်ကန်ခြင်း၏ စကားတော် ဟို့ ခေါ်စာ ကယ်တင်ခြင်း၏ သတင်းကောင်းကို ကြားရို့ ခရစ်တော်ကို ကျုံလီကတ်တေ။ နင်ရို့ ခရစ်တော်ကို ကျုံကတ်တေအတွက်န ထာဝရဘုရားစာ ကိုယ်ဂတိခံထားစာ သန့်ရှင်းသောဝိညာဉ်တော်န နင်ရို့ကို တံဆိပ်ရိုက်ထားဗျာ။ ဒေ တံဆိပ်ရိုက်ခြင်း အဓိပ္ပါယ်ကား နင်ရို့စာ ထာဝရဘုရား၏ လူဖြစ်ကတ်ပျာ။ 14ကိုယ့်လူရို့အတွက် ထာဝရဘုရား၏ ဂတိတော်အမွီ အာမခံချက်အဖြစ် ဒေ သန့်ရှင်းသောဝိညာဉ်တော်ကို ပီးလီရေ။ ယင်းအတွက်န နောက်ဆုံးပြီးမာ ငါရို့ ထိုအမွီကို ရကတ်ဖို့။ ငါရို့ ထိုအမွီကို ရကတ်တေခါ ထာဝရဘုရား၏ ဘုန်းတန်ခိုးစာ ချီမွမ်းခြင်းကို ခံရဖို့။

ကျေးဇူးတင်ခြင်းန ချီမွမ်းခြင်း

15-16ယင်းအတွက်န ငါ နင်ရို့အတွက် အမြဲတိုင်း ထာဝရဘုရားကို ကျေးဇူးတင်နီရေ၊ အကြောင်းကား နင်ရို့ အသျှင်ယေရှုကို ကျုံကတ်စာ အကြောင်းန ထာဝရဘုရား၏ ဟိသမျ လူရို့ကို နင်ရို့ ချစ်ခြင်းမေတ္တာ ထားကတ်စာ အကြောင်းတိကို ငါ ကြားရဗျာ။ 17ငါ ဆုတောင်းရေခါ အမြဲတိုင်း နင်ရို့ကို အောက်မိနီရေ။ ငါရို့မာ အသျှင်ယေရှုခရစ်တော်၏ အဖထာဝရဘုရားစာ ဘုန်းတန်ခိုးနပြည့်စုံရေ။ သူစာ နင်ရို့ကို ဝိညာဉ်၏ ညာဏ်ပညာန နားလည်ဖို့စာ တန်ခိုးကို ပီးလတ်အောင် ငါ နင်ရို့အတွက် ဆုတောင်းနီရေ။ ယင်းပိုင်ဆိုကေ နင်ရို့ အရာလည်း ပိုရို့ ထာဝရဘုရားကို သိရကတ်လိမည်။ 18-19အရာ နင်ရို့မာ ညာဏ်မျက်စိလည်း ပွင့်လတ်အောင် ငါ နင်ရို့အတွက် ထာဝရဘုရားဘားမာ ဆုတောင်းပီးနီရေ။ ယင်းပိုင်ဆိုကေ ထာဝရဘုရား၏ ခေါ်ခြင်းကို ခံရကတ်စာ လူရို့ မျှော်လင်းချက် အကြောင်းကို နင်ရို့ သိရကတ်လိမည်၊ ကိုယ့်လူရို့ကို ထာဝရဘုရား ပီးဖို့ခံထားစာ ဂတိတော် ပဿိ ဇာလှောက် ကြီးမြတ်တေလည်းဆိုစာကို နင်ရို့ သိရကတ်လိမည် အရာ ငါရို့ ကျုံသူရို့ စိတ်နှလုံးထဲမာ အလုပ်လုပ်နီစာ မဟာတန်ခိုး အကြောင်းကိုလည်း နင်ရို့ သိရကတ်လိမည်။ 20ထာဝရဘုရားစာ ထိုမဟာတန်ခိုးကို အသုံးပြုရို့ ခရစ်တော်ကို သီရာက ပြန်ရှင်ထမြောင့်စီလီရေ အရာ သူစာ ခရစ်တော်ကို ဂေါင်းခင်ဘုံမာ ကိုယ့်ညာဖက်က ထိုင်စီလီရေ။ 21ခရစ်တော်စာ ထာဝရဘုရား၏ ညာဖက်က ထိုင်ရို့ ဟိသမျ အုပ်ချုပ်သူရို့ကို၊ အာဏာပိုင်သူရို့ကို၊ တန်ခိုးသျှင်ရို့ကို အရာ ဟိသမျ အသျှင်ရို့ကို အုပ်ချုပ်နီရေ။ ဒေ ကာလမာ ဖြစ်စီ၊ နောင်ကာလမာ ဖြစ်စီ၊ ခရစ်တော်စာ ဟိသမျ အားကုံးသူထက် အမြင့်မြတ်ဆုံး ဖြစ်တေ။ 22ထာဝရဘုရားစာ ဟိသမျ အားကုံးကို ခရစ်တော်၏ တန်ခိုးအောက်မာ ချထားလီရေ အရာ သူ့ကို အသင်းတော် အဂေါင်းအဖြစ် ခန့်ထားလီရေ။ 23အသင်းတော်စာ ခရစ်တော်၏ ကိုယ်ခန္ဓာ ဖြစ်တေ အရာ ခရစ်တော်စာ အသင်းတော်ကို ပြည့်စုံအောင် လုပ်တေ။ သူစာ ဟိသမျ နည်းလမ်းဖက်က ဟိသမျ အားကုံးကို ပြည့်စုံအောင် လုပ်တေ။

Currently Selected:

ဧဖက် 1: RMZ

Highlight

Copy

Compare