အရာ နင်ရို့မာ ညာဏ်မျက်စိလည်း ပွင့်လတ်အောင် ငါ နင်ရို့အတွက် ထာဝရဘုရားဘားမာ ဆုတောင်းပီးနီရေ။ ယင်းပိုင်ဆိုကေ ထာဝရဘုရား၏ ခေါ်ခြင်းကို ခံရကတ်စာ လူရို့ မျှော်လင်းချက် အကြောင်းကို နင်ရို့ သိရကတ်လိမည်၊ ကိုယ့်လူရို့ကို ထာဝရဘုရား ပီးဖို့ခံထားစာ ဂတိတော် ပဿိ ဇာလှောက် ကြီးမြတ်တေလည်းဆိုစာကို နင်ရို့ သိရကတ်လိမည် အရာ ငါရို့ ကျုံသူရို့ စိတ်နှလုံးထဲမာ အလုပ်လုပ်နီစာ မဟာတန်ခိုး အကြောင်းကိုလည်း နင်ရို့ သိရကတ်လိမည်။ ထာဝရဘုရားစာ ထိုမဟာတန်ခိုးကို အသုံးပြုရို့ ခရစ်တော်ကို သီရာက ပြန်ရှင်ထမြောင့်စီလီရေ အရာ သူစာ ခရစ်တော်ကို ဂေါင်းခင်ဘုံမာ ကိုယ့်ညာဖက်က ထိုင်စီလီရေ။ ခရစ်တော်စာ ထာဝရဘုရား၏ ညာဖက်က ထိုင်ရို့ ဟိသမျ အုပ်ချုပ်သူရို့ကို၊ အာဏာပိုင်သူရို့ကို၊ တန်ခိုးသျှင်ရို့ကို အရာ ဟိသမျ အသျှင်ရို့ကို အုပ်ချုပ်နီရေ။ ဒေ ကာလမာ ဖြစ်စီ၊ နောင်ကာလမာ ဖြစ်စီ၊ ခရစ်တော်စာ ဟိသမျ အားကုံးသူထက် အမြင့်မြတ်ဆုံး ဖြစ်တေ။
