ဧဖက် နိဒါန်း
နိဒါန်း
စာရွီးဆရာ အကြောင်း
စာရွီးဆရာ နာမည် ပေါလု ဖြစ်ပါရေ (ဧဖက် ၁:၁)။ စာရွီးဆရာ အကြောင်းကို အလှပ သိချင်ရေဆိုကေ ရောမဩဝါဒ စာစောင် နိဒါန်းမာ ကြည့်ပါ။
စာရွီးစာ အချိန်န နေရာ
ခရစ်သက္ကရာဇ် ၆၁-၆၂ နှစ်အထဲတွင်းမာ ရောမမြို့မာ ထောင်ထဲကနီရို့ ပေါလု ဒေ စာစောင်ကို ရွီးလီပါရေ။ ဒေ စာစောင်ကို ပယ်ရို့ ပေါလု အရာလည်း စာစောင် လေးခု ရောမမြို့ထောင်ထဲကနီရို့ ရွီးခလီပါရေ။ ထိုစာစောင်တိစာ ဖိလိပ္ပိ ဩဝါဒ စာစောင်၊ ကောလောသဲ ဩဝါဒ စာစောင်၊ ၂တိမောသေ ဩဝါဒ စာစောင် အရာ ဖိလေမုန် ဩဝါဒ စာစောင် ဖြစ်ပါရေ။
စာရွီးဆရာ၏ ရွယ်မှတ်ချက်
ထာဝရဘုရား၏ ထာဝရ ရွယ်မှတ်ချက် အကြောင်းကို ဂရုစိုက်ရို့ ရှင်းပြဖို့အတွက်၊ အရာ ကိုယ်ရွယ်မှတ်ချက်အတိုင်း ထာဝရဘုရား ဟိသမျ အားကုံးကို ပြည့်စုံအောင် လုပ်နီရေဆိုစာကို ရှင်းပြဖို့အတွက် ပေါလု ဒေ စာစောင်ကို ရွီးလီပါရေ။ ထာဝရဘုရား၏ ရွယ်မှတ်ချက်စာ ဒေပိုင်၊ ထာဝရဘုရားစာ ဂေါင်းခင်ဘုံန ကမ္ဘာမာ ဟိသမျ အားကုံးကို ခရစ်တော်၏ အုပ်ချုပ်ခြင်းအောက်မာ ထားဖို့ (ဧဖက် ၁:၁၀၊ ၂၁-၂၃)။ ယင်းအတွက်န အယင်ကခါ ယုဒလူမျိုးန ယုဒမဟုတ်သူရို့ အခြား ဟိလီကတ်ကေလည်း ဒေဂု အားကုံးသူ အသျှင်ယေရှုကို ကျုံခြင်းကနီရို့ ထာဝရဘုရား၏ မိသားစုအထဲမာ ပါဝင်ကတ်ပျာ (ဧဖက် ၂:၁-၂၂)။ ခရစ်တော်၏ အသင်းတော်စာ ထာဝရဘုရား၏ မိသားစု ဖြစ်တေ (၁တိမောသေ ၃:၁၄-၁၅)။ ခရစ်တော် ကိုယ်တိုင် အသင်းတော်မာ အဂေါင်း ဖြစ်တေ၊ အရာ ခရစ်တော်န အသင်းတော်စာ လင်-မယားပိုင် ဖြစ်ကတ်တေဆိုစာကို ရှင်းပြဖို့အတွက်လည်း ဒေ စာစောင်ကို ရွီးလီပါရေ (ဧဖက် ၅:၂၂-၃၃)။
စာအုပ် ခွဲခြားမှု
ဒေ စာစောင်စာ အခြားစာစောင်တိထက် ခွဲခြားမှု ဖြစ်တေကား၊ ဒေ စာစောင်မာ ပုံဥပမာ နှစ်ခု အသုံးပြုလီပါရေ။ (၁) လင်-မယား၏ ပုံဥပမာကို အသုံးပြုရို့ ခရစ်တော်န အသင်းတော် ဆက်သွေမှု အကြောင်းကို ရှင်းပြလီပါရေ (ဧဖက် ၅:၂၂-၃၃)။ (၂) စစ်သားတစ်ယောက်၏ ပုံဥပမာကို အသုံးပြုရို့ ကျုံသူအနေန ဝိညာဉ်၏ စစ်တိုက်ဖို့စာ အကြောင်းကို ရှင်းပြလီပါရေ (ဧဖက် ၆:၁၀-၂၀)။ ဒေ အကြောင်းစာ နာမည်ကျော် အကြောင်းတစ်ခု ဖြစ်ပါရေ၊ အကြောင်းကား ဝိညာဉ်၏ စစ်တိုက်ဖို့အတွက် ဇာ ဇာ လိုရေလည်းဆိုစာကို ဒေ ပုဒ်မကနီရို့ သိရပါရေ။ အရာ ဒေ အကြောင်းစာ အခြားစာစောင် တစ်ခုမာလည်း မဟိပါ။
ဒေ ဧဖက်ဩဝါဒ စာစောင်စာ အခြားစာစောင်တိန ခွဲခြားကေလည်း ကောလောသဲဩဝါဒ စာစောင်နတူပါရေ၊ အကြောင်းကား ဒေ စာစောင်နှစ်ခုမာ တစ်ပုံဇံတည်း သွန်သင်ချက်တိကို မြင်ရပါရေ။
အကြောင်းအရာ အကျဉ်းချုပ်
(က) နှုတ်ဆက်ခြင်း ၁:၁-၂
(ခ) ခရစ်တော်န အသင်းတော် အကြောင်း ၁:၃-၃:၂၁
(ဂ) ခရစ်တော်န တစ်ကိုယ်တည်း ဖြစ်ရို့ ဘဝအသစ်ကို ရခြင်း ၄:၁-၆:၂၀
(ဃ) အဆုံးသတ်ချက် စကား ၆:၂၁-၂၄
Currently Selected:
ဧဖက် နိဒါန်း: RMZ
Highlight
Copy
Compare
Share
Want to have your highlights saved across all your devices? Sign up or sign in
©2023 Wycliffe Bible Translators, Inc.