Mako 8
8
1Afa boṉi eki, si maṉa na malului wane e baita, ma ka ai ada ta si do ni ania, tha Jesus ka ailia toa nia ne toleda isana, ka soree isada, 2Nau ku tatakomia malului wane nei, uria na kera to bi nau sulia ulu fa boṉi ki naa, ma ka ai ada ta do ni ania: 3Ma mada sa kwai arasida uri toaa kera ki maṉa kesi faṉa, keki feda sula tale; uria na tei toa iada kera lae da mai. 4Ma toa nia ne toleda kera luua, Kula ifei mai ta wane kai talaana fale lana bisikete ki ifana toa nei keki abusu kunei la fanua kwasi? 5Ma nia ka soetooda, Ta fita fa bisikete mulu alua? Ma kera sorea, Fiu fa do. 6Ma nia ka faaroṉoa toa eki keki ono iano: ma nia ka ṉalia fiu bisikete eki, ka sore lea, ka oea, ma ka falea ifana toa nia ne toleda, fasi keki alua inaofada; ma keka alua inaofana malului wane eki. 7Ma kera alua ta ṉada gwa ia faekwa: ma nia foa uria fufuṉu, ma ka sorea keka alua lau boo inaofada. 8Mania kera faṉa, keka abusu: ma kera gwea oretana faṉa ne teo, fiu ita ka fuṉu. 9Ma toa eki na kera faṉa fuliṉana fai tooni wane: sui nia ka arasida keka lae. 10Ma si maṉa eri u boo nia ka tae i la foorua bia toa nia ne toleda, lae mai ka fula asi kula nai Dalamanutha ki.
11Ma Farisi ki kera lae mai, keka thafalii oli susuu bi nia, keka gania uria bala ta si do i thalo lo mai, keka ilitoona. 12Ma nia ka asi maṉo baita i spirit nia, ka sorea, Uria ta na unii wane nei kai gania bala si do? mamana ku soree isamulua, Sa keki fatai nia bala ta si do isana unii wane nei, e ai. 13Ma nia akwasida, ka tae lau i la foorua, ka lae uri bali laba.
14Ma liode dora kesi ṉalia berede; tee bisikete boo kera ṉalia i la foorua bi kera. 15Ma nia ka ṉata fifi isada, ka una eri, Muki to kinakina, muka fia lefena Farisi ki bia lefena tha Heroda. 16Ma kera ṉata uri kera, keka una eri, E uria ne ai akulua ta berede. 17Ma tha Jesus e thaitoomana, ka soree isada, Uria ta na muki ṉata, uria ne ai amulua ta berede? musi thaitoomana u, ma musi filoṉania? ruruumulua e sadi u? 18Amulua ro maa, musi lio? bia amulua ro aliṉa, musi roṉoi? ma musi onotoona? 19Si maṉa nau ku oea lima bisikete ba ki faisia lima tooni wane ba ki, fita nanado ka fuṉu ana oretana faṉa na mulu gwea? Keka soree isana, Tee tafulu do, ro do. 20Ma si maṉa ku oea fiu do ba ki faisia fai tooni wane ba ki, fita ita ka fuṉu ana oretana faṉa na mulu gwea? Ma keka soree isana, Fiu do. 21Ma nia ka soree isada, Nifana ade lana musi filoṉania?
22Ma nia lae mai uri Betheseida. Ma keka talaia mai tee wane maane rodo isana, kera ṉata kwaitakoi isana sa nia ka suana. 23Ma nia rau i abana wane eri maane rodo, ka talai nia faisia toaa eri; ma buriana ne ṉisufia ro maa nia ki, me alua ro aba nia ki fafi nia, nia ka soetoona mada sa nia rikia ta si do. 24Ma nia e lio alaa, ka sorea, Nau ku rikia boo imole; sui ka ’uria ’ai ki bana, kai lae. 25Sui nia ka alua lau ro aba nia ki fafia maana, ma ka adea ka lio alaa; ma maana ka laa naa, ma nia ka riki lea asi do ki sui bana. 26Ma nia arasia uri biu nia, ma ka una eri, Osi lae i la toaa eri, bia osi faaroṉo ania isata imole i la toaa eri.
27Ma tha Jesus ka lae nana bia toa nia ne toleda, ka lae uri toaa faekwa ki i Sesaria Filifae: ma si maṉa na kera ni sula tale, nia ka soetoona toa eki, ka una eri isada, Imole ki keki sorea nau ni tei? 28Ma keka luua, keka una eri, Wane ni babataesi eri na tha Jone: ma tei toa lau, Tha Elaeja; ma tei toa lau, Ta porofeta ana porofeta ba ki. 29Ma nia soree isada, Ma ni kamulua mulu sorea nau ni tei? Tha Pita ka luua, ka soree isana, Oe ṉa Christ. 30Ma nia ka ṉata fifi isada kesi faaroṉoa ta wane ani nia. 31Ma nia bii kwaifamanatai isada sulia Kaluwane imole, kai to ana taa la oro ki e ai si ei boo, ma ulunao ki, bia wane inoto ni foa ki, bia wane ni kekeda ki, keki lalakwatania, ma keki thauṉi nia, ma ulu fa boṉi ka sui, nia kai tatae lau. 32Ma nia e sore lalaa asi ṉata eri. Ma tha Pita e tolea, ka bii sore nia. 33Ma si maṉa ne akele iburi, ma ka lio uri toa nia ne toleda, nia ka sorea tha Pita, ka una eri, Lae, oki tatha iburiku, Satan: uria nosi manatatoona si do tha God ki, si do imole ki bana. 34Ma buriana ne ailia mai toa eki bia toa nia ne toleda isana, nia ka soree isada, Ni tei bana na kai thathamii lae iburiaku, kai sorea nia dora ani nia i talaana, kai ṉalia ’ai rarafolo nia, ma kai lae iburiaku. 35Uria ni tei bana ne thathamia kai faamarukia maṉona, maṉona kai aana; ma ni tei bana na kai faaaana maṉona inunufaku ma inunufana faaroṉoa lea eri kai faamarukia. 36Uria si ta na ta wane kai ṉalia ana adomi lana, mada sa nia kai toda fanua nei iano sui bana, ma kai faaaana bana maṉona? 37Mado si ta na ta wane kai falea kai taala ana maṉona? 38Mania ni tei bana na kai seenoni suli nau ma kai seenoni sulia bae laku maalutana unii wane nei na kera oe ma kera abula taa, Kaluwane imole kai seenoni lau boo suli nia, si maṉa na nia kai lae mai ana inotoa Maka nia bia angel abu ki.
Currently Selected:
Mako 8: MLU1949
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1949, 1951
