Mako 7
7
1Sui Farisi ki kera figu isana, bia tei wane ana wane ni kekeda ki, na kera toto i Jerusalema, 2Ma si maṉa na kera rikia tei wane ana toa nia ne toleda keki ania berede, abade sua, na kesi taua neri, keka soreda. 3Uria na Farisi ki, bia Ju ki sui bana, mada sa kesi tau lea ana abada, e ai kesi faṉa, kera bira fafia ṉata lana ulunao ki: 4Ma kera toto ana usia keka lae mai, mada sa kesi sisiu, e ai kesi faṉa: ma do oro ki lau, na kera roṉoa keka bira fafia, tau lana titiu ki, ma kwadee do ki, ma kwadana thalo ki, ma thamataia ki. 5Sui Farisi ki bia wane ni kekeda ki keka soetoona, Uria ta na toa oe noki toleda e ai kesi abula sulia ṉata lana ulunao ki, keki ania bada berede, abade sua? 6Nia luuda, ka soree isada, Si do na tha Aisaia ṉa porofeta e sorea suli kamulua na ba e too, toa na muki olodola, ’uria si do na kera keda na ba,
Toa nei ki keki fare baita iaku ana ṉiduda bana,
Ma ruruude ni da faisi nau.
7Keki tona fare baita iaku,
Keki to’oa si ṉata fifi imole ana kwaifamanatai la kera ki.
8Kamulua muka ekwa asi ṉata fifi tha God, ma muka bira naa fafia ṉata lana imole, tau lana kwadee do ki ma titiu ki: ma si do oro lau una eki muki ilia bamulua. 9Ma nia ka soree isada, Muka lalakwatania mamana boo si ṉata fifi tha God, fasi muki roo sulia ṉata lana toa kamulua inao. 10Uria na tha Mosesi e sorea, Fare baita ana maka oe ma thainamu; bia, Wane na kai ṉata taa seena maka nia mado thainana, nia kai mae ana maea ba: 11Ma ni kamulua muki sorea, Mada sa ta wane kai soree isana maka nia mado thainana, Si do ba soki ṉalia ani nau uria adomi lamu e Kobana, ma si ṉata eri e una eri, Kera falea naa ifatha God; 12Musi alamatania si ilia lau ta si do ifana maka nia mado thainana; 13Muki ufolo ana bae lana tha God ana ṉata lana toa kamulua inao, na mulu ṉata ania: ma si do oro una eki muki ilia bamulua. 14Ma buriana ne ailia lau toa eki sui boo isana, nia ka soree isada, Kamulua sui muki roṉoa fasi ṉata laku, ma muki thaitoomana maalutana: 15-16E ai ta si do asi do ne ni thara faisia imole, sui kai liu i lala, si talaana faasua lana: si do na kai tatha mai faisia imole, si do eki na kai faasua imole. 17Ma si maṉa ne kotho i biu faisia toa eki, toa nia ne toleda keka soetoona uria si tarifula eri. 18Ma nia ka soree isada, Kamulua lau boo manatamulua si too? Musi thaitoomana na ṉa atona bana ta si do i thara mai na kai liu i la imole e ai si talaana faasua lana; 19Uria ne ai si liu i la ruruuna, kai liu uri la rakena, sui ka tatha lau bana i masuu? Nia ṉata una eri, kai faawaluda si faṉa ni sui bana. 20Ma nia ka sorea, Si do na kai kotho mai faisia imole, si do eri kai faasua imole. 21Sulaania faisia i lala, faisia rurui imole, si lio taa ki kai lae, oe la toa keki oe fafia kwaida, oe la, thauwanea, 22Bili la, thathami lana si do ta wane, taa la ki, lole la, daidei la, uga la, ṉata taa la seena imole, nau ni baita la, oewanea la: 23Si do taa nei ki sui bana kai lae mai faisia i lala, ma kai faasua imole.
24Ma nia ka tae faisia kula eri, ka lae uri oli lana Taera bia Saedona. Ma nia ka kotho i la tee biu, ka lalakwa sa ta wane kai thaitoomana: sui e afetai sa nia kai thaufuni. 25Uria tee kini na kali thari nia spirit taa ni ani nia, ka roṉo nia, ka lae mai, ka asi nia sana aaena. 26Ma kini eri ṉa ai Girisi, ana toa i Saerofenisi. Ma nia ka ṉata kwaitakoi, ka sorea sa nia kai arasia spirit taa eri faisia thari nia. 27Ma tha Jesus ka soree isana, Baree wela keki abusu fasi totonao: uria e ai si lea keki ṉalia berede wela ki, keki u ania ifana kui ki. 28Ma nia luua, ka soree isana, Iu, Lord: ma kui ki mena na kera ni fara tatafe keki ania nanafui faṉa baree wela eri. 29Ma nia ka soree isana, Sulaania si ṉata eri oki lae amua; spirit taa eri e lae naa faisia thari oe. 30Ma si maṉa ne lae uri maafera nia, ka rikia wela eri kera reriṉai nia i la fitei, ma spirit taa eri e lae naa faisi nia.
31Ma nia lae lau faisia oli lana Taera, ka tatha i Saedona, ka lae uri amali i Galili, ka tatha lau boo i initoona oli lana Dikapolisi. 32Ma keka talaia mai tee wane aliṉane bani, ma ka bae aatola, isana; kera ṉata kwaitakoi sa nia kai alua abana fafi nia. 33Ma nia talaia wane eri tee nia faisia malului wane eri, ka rada kukuna i la aliṉana, sui ka ṉisu, ma ka suana meana; 34Ma nia lio alaa uria thalo, ka asi maṉo baita, ma ka soree isana, Efatha, ma si ṉata eri e una eri, Laa. 35Ma si maṉa eri u boo aliṉana ka laa, ma si ula ana meana ka luke, ma nia ka bae ka nete. 36Ma nia ka bae fifi isada kesi faaroṉoa ta wane: sui nia ka bae fifi isada ka faamau mena, keka bii faaroṉo faladoa ania. 37Ma kera tona ka faamau asia naa, keka una eri, Nia ilia si do ki sui bana ka lea: nia kai adea toa na aliṉade bani keka roṉo, ma toa fokode ato keka bae.
Currently Selected:
Mako 7: MLU1949
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1949, 1951
