Mako 6
6
1Ma nia lae faisia fanua eri; ka fula i fanua nia; ma toa nia ne toleda keka lae buriana. 2Sui lalae fula afa boṉi mamaloa, nia ka bii kwaifamanatai la biu ni ofu la: ma toa oro kera roṉoa, keka tona, keka una eri, Ifei mai wane nei e ṉalia do eki iei? ma, Si liotooa ta na kera falea ifana, na ra sukwai una eki mena keki ilia ana abana? 3Ta na sa wane ni thauwaia ba nania, kaluwane ni Meri, doorana tha Jemesi, ma tha Josesi, ma tha Judasi, ma tha Saimona, mado? ma ta na sa waiwaena nia ki kera ni bada isaka, mado? Ma kera taofai kera ani nia. 4Ma tha Jesus ka soree isada, Ṉa porofeta faabaita lana e ai si ei faisi nia, fanua nia, ma isana ina lana kera, ma biu nia ni bana e ai si ni iei. 5Ma nia ka dora ana ili lana ta si ra baita i fanua eri, talitoona ka alua abana fafia aṉee imole na kera matai, ma ka faamarukida. 6Ma nia ka kwele sulaania fitala lada.
Ma nia ka lae olili la toaa faekwa eki, ka kwaifamanatai.
7Ma nia ailia mai akwala ma ro wane eki isana, ma ka bii arasida too ro wane iada; ma ka falea sukwaia iada fafia spirit taa ki; 8Ma nia e ṉata fifi isada fasi e ai kesi ṉalia ta si do uria laea kera, tee kubau boo; ta wai ka ai, berede ka ai, ma kesi ṉalia malefo i la wai ni alumalefo kera; 9Keka toonia aaeda ana butu ki: ma kesi tooni ana ro tooni. 10Ma nia ka soree isada, Fanua ifei na muki kotho i la ta biu, muka to boo kula eri maasia si maṉa na muki lae faisia fanua eri. 11Ma ni tee bana ne ai si thathagoni kamulua, ma ka ai si roṉoa bae lamulua, si maṉa na muki lae faisia fanua eri, muki tagaraṉai nia gegeona theegano faisia lofo aemulua ana faamamane la isada. Mamana ku soree isamulua, Si do taa na kai uria i Sodomo ma i Gomora kai faekwa asi do taa na kai uria toaa susu eri afa boni ana kotu baita. 12Ma kera lae kau, keka ṉata fasi imole ki keki akeletania manatada. 13Ma keka arasia spirit taa oro ki, bia keka kikia toa oro na kera matai ana gwai, ma keka faamarukida.
14Ma kiṉa Heroda e roṉo nia; uria na thatana ka talo naa: ma nia ka sorea, Wane ni babataesi eri na tha Jone e tatae naa faisia toa mae ki, mania do sukwai eki kai to fatai ani nia. 15Ma tei wane lau kera sorea, Tha Elaeja nai nia. Ma tei wane lau kera sorea, Porofeta nai nia, ’uria ta porofeta ana porofeta ba ki. 16Sui si maṉa na tha Heroda e roṉoa, nia ka sorea, Tha Jone neri, na ku sigilia gwauna na ba; e tatae naa faisia toa mae ki. 17Uria tha Heroda talani nia e kwaiarasi keka raua tha Jone, ma keka kani nia i la lokafu fafia ni Herodiasi, kwaina doorana na tha Filifi: uria tha Heroda e tolea kini eri. 18Uria tha Jone e soree isatha Heroda, E ai kesi alamatania sa kwaina dooramu kai to isamu. 19Mania ni Herodiasi manatana e teo isana, e thathamia kai thauṉi nia; sui ka afetai; 20Uria na tha Heroda e mau atha Jone, e thaitoomana na nia wane kokoto ma ka abu, ma nia ka suusi nia. Ma si maṉa nia roṉoa, manatana ka rurua; ma nia roṉoa ṉata lana, seena ka thathala. 21Ma lalae afa boṉi ne kwaiakaori naa, na tha Heroda kai thasi faṉa sulia fa boṉi na kera thare nia ania ifana wane inoto nia ki, bia toa na kera tatha inaona omea ki, bia wane inoto i Galili ki; 22Ma si maṉa na thari ni Herodiasi ka kotho mai, kai wae, ma tha Heroda bia toa na kera teoreri bi nia isana fafaṉa eri, ka lea iada, kiṉa eri e soree isana thari eri, Oki gani nau uria atona bana si do no thathamia, ma nau kwai falea ifamu. 23Ma nia ka othi isana, Atona bana si do noki gani nau uria, kwai falea ifamu, ka fula ana ta bali ana tooa nau mena. 24Ma nia ka kotho i maa, ka soree isana thainana, Si ta na kwai gania? Ma nia ka sorea, Gwauna wane ni babataesi ba na tha Jone. 25Ma nia lae fofoa si maṉa eri u boo, ka kotho isana kiṉa eri, ka gani, ka una eri, Ku thathamia oki fale u boo maṉa eri gwau wane ni babataesi ba na tha Jone iaku i la ta labeṉa. 26Ma kiṉa eri liona ka dila faamau; ma sui sulaania othi la nia ki, ma sulaania toa na kera teoreri isana, nia lalakwa tofe lau faisia. 27Ma si maṉa eri u boo kiṉa eri ka arasia tee wane ana omea nia ne toi faisi nia, ma ka sorea keki ṉalia mai gwauna: ma nia lae ka sigilia gwauna i la lokafu, 28Ma ka ṉalia mai la ta labeṉa, ka falea ifana thari eri; ma thari eri ka falea ifana thainana. 29Ma si maṉa na toa nia ne toleda kera roṉoa, keka lae mai, keka ṉalia buta eri, keka alua i la ta kwaiṉeia.
30Ma aposela ki kera figu isatha Jesus; keki faaroṉoa asi do ki sui bana na kera ilidaki, bia si do na kera to’odaki. 31Ma nia ka soree isada, Muki lae mai talitoomulua uria ta fanua kwasi, muki mamalo ta kasi maṉa faekwa. Uria na toa oro keki lae olili, me ai kesi tona to fasi keka faṉa mena. 32Ma kera lae talitoodalua i la foorua faisia si kula eri uria ta fanua kwasi ne to banitei. 33Ma toa eki kera rikia lae lada, ma toa oro keka thaitoomada, ma keka fita ofu tala thara uria si kula eri faisia toaa susu eki sui bana, ma keka taluda, keka ofu isana. 34Ma tha Jesus, si maṉa ne lae mai, ka rikia toa oro, ma ka tatakomida, sulaania kera ’uria bada sifi ne ai ada ta wane ni toi la kalida: ma nia ka bii to’oa do oro isada. 35Ma si maṉa na thato e lio folo naa, toa nia ne toleda kera fula isana, keka sorea, Fanua kwasi nania, ma thato e lio folo naa: 36Oko arasida, fasi keki lae uri fanua ne to kakali ki mai bia toaa faekwa ki, keka usia ada ta si berede; uria ne ai ada ta si do ni ania. 37Nia luuda, ka soree isada, Kamulua muki fale iada. Ma keka soree isana, Miki lae, miki usia berede na kai talaana ro taleṉee peni, miki falea iada keki ania? 38Nia ka soree isada, Fita fa bisikete na mulu alua? lae, muki rikia fasi. Sui si maṉa na kera thaitoomana, keka sorea, Lima fa do, ma ro gwa ia. 39Ma nia ka faaroṉo kera keka ukali kera, keka teoreri i la loua katha. 40Ma keka teoreri ana figu la ki, too tee taleṉee imole ki, ma too lima akwala ki. 41Ma nia ka ṉalia lima bisikete eki bia ro gwa ia eki, ma ka lio alaa uri thalo, ka foa uria fufuṉu, sui ka oea bisikete eki; ma ka falea ifana toa nia ne toleda keki alua inaofana toa eki; ma ro gwa ia eki nia ka toliṉia faisida sui. 42Ma kera sui boo kera faṉa, keka abusu. 43Ma kera gwea tafulu nanado ma ro nanado ka fuṉu ana oretana bisikete eki, bia oretana ia eki. 44Ma toa na kera ania bisikete eki adalua lima tooni wane.
45Ma si maṉa eri u boo nia ka suuwai nia toa nia ne toleda keki tae i la foorua, keka lae inao uri bali laba i Betheseida, si maṉa nia talani nia kai arasia toa eki. 46Sui buriana no alulu iada, nia lae uri gwa tolo eri fasi kai foa. 47Ma si maṉa ne thaulafia naa, foorua eri ka ni nei initoona matakwa, ma nia talitoona boo ka to i thara. 48Ma nia rikida keki aṉasi ana faluta la, uria na thauthau e maṉo mai inaofada; ma karaṉia thathala ana dani nia lae mai isada, kai talau fafona amali; ma nia sa kai tatha faisida: 49Ma si maṉa na kera riki nia kai talau fafona amali, manatade soso na spirit bana, ma keka ’ai: 50Uria na kera sui boo kera riki nia, ma ka taa iada. Ma si maṉa eri u boo nia ka ṉata bi kera, ka soree isada, Kai lea i manatamulua: ni nau bana nania; musi mau. 51Ma nia ka tae isada i la foorua eri; ma thauthau eri ka ai naa: ma kera tona faamau asia, ma keka kwele; 52Uria na kesi onotoona naa bisikete ba ki, uria ruruuda e sadi.
53Ma lalae kau kera fai folo naa, keka fula i thara i Genesarete, keki arugwalu i thara. 54Ma si maṉa na kera sifo na mai faisia foorua eri, si maṉa eri u boo toa eki keka thaitoomana, 55Keka fita i la fanua kakali ki mai ka sui boo, ma keka bii ṉalia toa na kera matai i la thamataia ki, uria si kula na kera roṉoa nia ni iei. 56Ma fanua ifei na nia ka fula iei, i la toaa faekwa ki, mado i la toaa susu ki, mado i fanua na ṉadee si toaa ni iei, kera alua toa na kera matai keki teo isana usia ki, ma kera ṉata kwaitakoi isana fasi mado e ai keka suana boro so talitoona tagwarana tooni nia ni mena: ma toa eki na kera sua nia kera maruki.
Currently Selected:
Mako 6: MLU1949
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1949, 1951
