Mako 5
5
1Ma kera lae uri bali asi laba, fanua Gadarini ki. 2Ma si maṉa ne sifo naa faisia foorua eri, si maṉa eri u boo tee nonii wane e toto i la kula ni aluwanea ka toda ani nia, wane eri spirit taa ni ani nia, 3Ma fulii to la nia i la kula ni aluwanea ki: ma ka ai ta wane si talaana kani lana lau, ana nailii thalo ki mena ka ai; 4Uria si maṉa oro ki bana kera kania aaena asi do ni kani lana aena imole, bia kera kania lau ana nailii thalo ki bia, ma nailii thalo eki nia abamusia ana ro kadee do ki, ma do na kera kania ana aaena nia ka musimaga: me ai ta wane si talaana faarao lana. 5Ma sulia boṉi ni bana, afa rodo mafa thato, nia to i la tolo bia i la kula ni aluwanea, kai ’ai, ma kai furia seena ana fau ki. 6Ma si maṉa nia rikia tha Jesus ni da u mai, nia ka fita isana ma ka faabaita nia; 7Ma ka ’ai ana ’ai la baita, ka sorea, Si ta na kwai kwaimani bi oe fafia, Jesus, Kaluwane tha God ne Inoto ka tatha? Nau ku ṉata fifi isamu atha God, osi kwae fifi iaku. 8Uria nia soree isana, Lae mai faisia tha wane ena, oe spirit taa. 9Ma nia ka soetoona, Thatamu ni tei? Ma nia luua, ka una eri, Thataku tha Omeabaita; uria na mili oro. 10Ma nia ṉata kwaitakoi isana asi maṉa oro sa nia ka ai si arasida faisia fanua eri. 11Ma tee aini botho oro kera to i aena gwa tolo i kula eri, keki faṉa ada. 12Ma spirit taa eki sui boo keki ṉata kwaitakoi isana, keka una eri, Arasi kamilia uri la botho loko ki, fasi mika kothofida. 13Ma si maṉa eri u boo tha Jesus ka alamatanida. Ma spirit taa eki kera kotho i maa, keka kothofia botho eki: ma aini botho eki keka thaka ugwasu ana kula ne gigiloa uri la amali, fuliṉana too ro tooni botho; ma keka lolo i la amali eri. 14Ma toa na kera thareda kera thaka, lae keka faaroṉo ania i la toaa susu, ma fanua kakali ki mai. Ma kilu lae mai fasi kiku rikia si do na kera ilia. 15Ma keka fula isatha Jesus, ma keka rikia wane eri na spirit taa e toto ania bia omea baita eri, kai ono, e tooni ma ka manata naa: ma toa eki keka mau. 16Ma toa na kera rikia mai keka uunu sulia ade la eri isada na kera ilia ana wane eri na spirit taa ki e toto ania, ma keki uunu lau boo sulia botho eki. 17Ma toa eki kera ṉata kwaitakoi isana sa nia ka lae faisia oli lana fanua kera ki. 18Ma si maṉa nia kai tae i la foorua, wane eri na spirit taa ki kera toto ani nia e ṉata kwaitakoi isana sa kai lae bi nia. 19Sui tha Jesus e ai si alamatania, ma ka soree isana, Oki lae uri biu oe isana toa oe ki, oki faaroṉo kera asi do baita ki na tha Lord e ilia ifamu, ma ka tatakomi oe. 20Ma nia ka lae nana, kai faaroṉo faladoa ania i Dikapolisi asi do baita eki na tha Jesus e ilia ifana: ma toa eki sui boo keka kwele.
21Ma si maṉa na tha Jesus e fai folo lau i la foorua uri bali laba, toa oro keka ofu mai isana: ma nia ka to karaṉia amali. 22Ma rikia fasi, tee nonii wane ana toa gwauwai ki ana biu ni ofu la, thatana tha Jairasi, e lae mai; ma si maṉa ne riki nia, nia ka aru isana aaena, 23Ma ka ṉata kwaitakoi isana asi maṉa oro, ka una eri, Kali thari nau karaṉia kai mae naa: ku thathamia oki lae, oki alua abamu fafi nia, fasi nia kai akwa, ma kai maruki. 24Ma nia ka lae bia; ma toa oro kera lae buriana, keka beresi nia.
25Ma tee kini, ne nanai aṉaruu sulia tee tafulu fa ṉali ma ro fa ṉali, 26Ma ka to ana seefia ana doketa oro ki, ma nia e arua do nia ki ka daṉa faisi nia, ma ka ai si lea boo buira, do eri ka bii baita fafi nia, 27Si maṉa nia roṉoa tha Jesus, ka fula mai buriana i la laea baita eri, ka suana tooni nia. 28Uria nia sorea, Mada sa kwai suana tooni nia ki mena, nau kwai maruki, 29Ma si maṉa eri u boo abu eri ka ai faisi nia; ma nia ka thaitoomana ana seena na nia maruki faisia do ne thauṉi nia. 30Ma tha Jesus si maṉa eri u boo ka thaitoomana ani nia i talaana na sukwaia e lae faisi nia, ka akele iburi la laea baita eri, ma ka sorea, Ni tei ne suana tooni nau? 31Ma toa nia ne toleda keka soree isana, Oko rikia malului wane nei keki beresi oe, oki soetoona lau, Ni tei ne sua nau kau? 32Ma nia e lio kakali nia fasi kai rikia ai ne ilia si do eri. 33Ma kini eri ka mau ma ka leleba, e thaitoomana si do kera ilia iana, nia ka lae mai ka asi nia isana, ma ka faaroṉo mamana asi do eki sui boo. 34Ma nia ka soree isana, Thari nau ae, fitooa oe e faamaruki oe; oki lae ana eneno la, ma oki maruki naa faisia do ne thathauṉi oe.
35Si maṉa na nia kai ṉata u bana, tei toa na kera toto i maafera wane eri ne gwauwai ana biu ni ofu la kera lae mai, keka sorea, Thari oe e mae naa: uria ta noko sorea Wane ni kwaifamanatai nei kai aṉasi lau? 36Si maṉa eri u boo na tha Jesus e roṉoa si ṉata na kera sorea, nia ka soree isana wane eri ne gwauwai ana biu ni ofu la, Osi mamau, talitoona boo oko fitoo. 37Ma nia e ai si alamatania ta wane si lae iburiana, talitoona boo tha Pita, ma tha Jemesi, ma tha Jone doorana tha Jemesi. 38Ma nia fula i maafera wane eri ne gwauwai ana biu ni ofu la; ma ka rikia toa kera ṉalu, bia toa oro keki aṉi ma keki tatao faamau. 39Sui si maṉa ne kotho mai, nia ka soree isada, Uria ta na muki ṉalu, ma muki aṉi? wela nei e ai si mae, kai biṉa bana. 40Ma kera wawaela, keka aefara iana. Ma buriana ne arasi teefau ani kera i maa, nia ka talaia maka thari eri bia thainana bia wane na kera to u boo bi nia, ma ka kotho asi kula na thari eri kai teo iei. 41Ma ka rau ana abana wela eri, ka soree isana, Talitha Kumi; ma toolaṉai lana si ṉata eri e una eri, Thari ena ae, ku soree isamu, Oki tatae. 42Ma si maṉa eri u boo thari eri e tatae, ka lae; uri thari eri tee tafulu fa ṉali ma ro fa ṉali e sui naa maṉa na kera thare nia. Ma toa eki keki tona ana tona la baita. 43Ma nia ṉata fifi isada fasi ta wane si roṉoa: ma ka faaroṉo kera keka falea ta si do thari eri kai ania.
Currently Selected:
Mako 5: MLU1949
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1949, 1951
