Mako 10
10
1Ma nia tatae, ka lae faisia fanua eri, ka fula i oli lana Judia ma ibali laba i Jodana: ma toa eki keki figu lau isana; ma ’uria ade la nia kai ililia, nia ka kwaifamanatai lau isada. 2Ma Farisi ki kera fula isana, keki soetoona, Keki alamatania wane kai arasia kwaina? kera ilitoona. 3Ma nia e luuda, ka soree isada, Si ta na tha Mosesi e faaroṉo kamulua? 4Ma keka sorea, Tha Mosesi e alamatania keki keda ree do ni arasi lana, ma keka arasia kini eri. 5Ma tha Jesus e luuda, ka soree isada, Sulaania sadi lana ruruumulua nia ka keda si ṉata fifi eri iamulua. 6Ma sui too u bomai ana thauwaia ba inao mai, Tha God e thauwaidaroa wane ma kini. 7Uria si kula eri wane kai akwasia maka nia ma thainana, kai ofu bia kwaina; 8Ma keroa tee see imole naa: fasi keroa e ai lau ta ro ai neri, keroa tee see imole boo. 9Mania si do na tha God e ladoa, ada imole ka lubea lau. 10Ma si maṉa na kera ni la biu, toa nia ne toleda keka soetoona lau uria si do eri. 11Ma nia ka soree isada, Ni tei bana na kai arasia kwaina, ma ka tolea lau ta ai, kai oe fafia kwaina: 12Ma kini eri lau boo, mada sa nia kai arasia kwaina, ma ka toowane ata wane eeta lau, nia kai oe.
13Ma keka talaia mai kala wela isana, fasi nia kai suada: ma toa ne toleda keka sorea toa na kera talaida mai. 14Ma si maṉa na tha Jesus e rikia, ka taa faamau iana, ma nia ka soree isada, Alamatania kala wela keka lae mai isaku; ma musi lufida: uria na toa na kera ’urida kera ni ana tooa tha God. 15Mamana ku soree isamulua. Ni tei bana ne ai si ṉalia tooa tha God mala ta wela faekwa, e ai dodoloa nia ka fulatoona. 16Ma nia ka olida, sui ka alua abana fafida, ma ka falea lea la ifada.
17Ma si maṉa nia kai lae sula tale, tee wane e fita mai, ka boururu isana, ma ka soetoona, Wane ni kwaifamanatai ae, oe na abula lamu e lea, si ta na kwai ilia fasi kwai fulatoona marukia tatha? 18Ma tha Jesus ka soree isana, Uria ta noko alaṉi nau so ku abula lea? e ai ta wane si abula lea, tee tha God boo. 19O thaitoomana si ṉata fifi ba ki, Osi oee, Osi thathauwane, Osi bibili, Osi lolole fafia imole, Osi abula dodora, Fare baita ana maka oe ma thainamu. 20Ma nia luua, ka soree isana, Wane ni kwaifamanatai ae, si do eki sui bana ku adede sulia ita na ku faekwa. 21Sui tha Jesus e bubuṉia, ka liothau ania, ma ka soree isana, Tee do e ai u faisi oe: lae, oki usi ana ta si ta noko rikia, ma oki fale ana toa na kesi rikii do, ma toto oki rikia ogogonia i thalo: ma lae mai, ṉalia ’ai rarafolo eri, oki lae iburiaku. 22Ma maana ka asia sulaania si ṉata eri, ma nia ka lae ana liodila: uria nia rikia do oro.
23Ma tha Jesus e lio kakali nia, ka soree isana toa nia ne toleda, E afetai faamau sa toa na kera rikii do keki kotho ana tooa tha God! 24Ma toa ne toleda kera maata ana bae lana. Ma tha Jesus e luuda lau, ka soree isada, Baree wela ena, toa na kera fitoona si do na kera rikidaki, e afetai faamau sa keka kotho ana tooa tha God! 25E sukani afetai ana kamela kai tatha i maana ogila, me afetai faamau ana wane ne rikii do kai kotho ana tooa tha God. 26Ma kera kwele faamau, keka una eri kwailiu isada, Ni tei fetei keki faamarukia? 27Ma tha Jesus e lio uri kera, ka sorea, Si kula eri imole si talaana, tha God e talaana: uria na tha God e talaana si do ki sui bana. 28Sui tha Pita ka soree isana, Lio fasi, kamilia mili akwasia si do ki sui bana, ma mika lae iburiamu. 29Ma tha Jesus e luua, ka sorea, Mamana ku soree isamulua, Wane na kai akwasia maafera nia, mado doorana kera, mado waiwaena nia ki, mado maka nia, mado thainana, mado kwaina, mado wela ki, mado oole ki, inunufaku, ma inunufana si faaroṉoa lea eri, 30Nia kai ṉalia tee talaṉee do asi maṉa eri fuliṉana do ne akwasidaki, ana maafera ki, ma doorana kera, ma waiwaena ki, ma thainana kera, ma wela ki, ma oole ki, bia tona ilamatai la ki; ma asi kada na ni u kai ṉalia marukia tatha. 31Ma sui toa oro na kera tatha inao toto keki aru buri; ma toa na kera aru buri toto keki tatha inao.
32Ma kera ni sula tale, si maṉa na kera tae uri Jerusalema; ma tha Jesus ka tatha inaoda: ma kera maata; ma si maṉa na kera lae iburiana, keka mau. Ma nia ka talaia lau akwala ma ro nonii wane eki, ka bii faaroṉo kera asi do na nia toto kai fulatoona, 33Ka una eri, Rikia fasi, kuki tae uri Jerusalema; ma Kaluwane imole keki falea ifana wane inoto ni foa ki ma wane ni kekeda ki; ma keki sorea nia kai mae, ma keka fale nia ifana Jenetaele ki: 34Ma toto keki aefara iana, ma keki kwae tataria ana suila, ma keki ṉisufi nia, ma keki thauṉi nia; ma ulu fa boṉi e sui, nia kai tatae lau.
35Ma tha Jemesi ma tha Jone, ro kaluwane tha Sebedi ki, kero lae mai isana, keka una eri, Wane ni kwaifamanatai ae, kamarea mere thathamia sa ta si ta na meki gani oe uria oki ilia ifamarea. 36Ma nia ka soree isada, Si ta na moro thathamia kwai ilia ifamaroa? 37Keko soree isana, Oki falea si kula eri ifamarea, fasi toto meki ono bamarea, ta wane ibali aba aola oe, ma ta wane ibali aba mauli oe, ana inotoa oe. 38Ma tha Jesus ka soree isada, E ai mosi thaitoomana si do na moki gania. Kamaroa moro talaana kuu la ana titiu na nau kwai kuu ania? mado moro talaana sa keki babataesi kamaroa ana babataesi la na keki babataesi nau ania? 39Ma keka soree isana, Mere talaana boo. Ma tha Jesus ka soree isada, Toto moki kuu boo ana titiu na nau kwai kuu ania; ma babataesi la na keki babataesi nau ania toto keki babataesi kamaroa ania: 40Ma ono la ibali aba aola nau bia ibali aba mauli nau do nau e ai fasi kwai falea: do ifana toa na kera thauwai nia si kula eri maakwalida. 41Ma si maṉa na akwala eri kera roṉoa, keka bii rakeaṉoṉo uria tha Jemesi ma tha Jone. 42Ma tha Jesus e ailida isana, ka soree isada, Mulu thaitoomana wane na kera sorea keka inoto ana Jenetaele ki keki thasi naunau uria toa eki; ma wane baita kera ki keki oroa toa eki. 43Sui ka ai si una eri ani kamulua: ma ni tei bana ne thathamia kai baita ani kamulua, nia wane na kai ra ifamulua: 44Ma ni tei bana ne thathamia kai tatha inaomulua, nia wane na kai ra ifamulua sui. 45Sulia Kaluwane imole mena e ai si fula fasi keki ra iana e ai, e fula uria ra la ifana imole, ma fale lana maṉona ana tae la faisia toa oro.
46Ma kera fula i Jeriko: sui si maṉa nia kai lae kau faisia Jeriko, bia toa nia ne toleda bia malului wane baita, tha Batimiasi, wane maane rodo, kaluwane tha Timiasi, kai ono i ninimana tale, kai gani. 47Ma si maṉa ne roṉoa tha Jesus ana, wane i Nasaretha, na kai tatha, nia kei ’ei, ka sorea, Jesus, kaluwane tha Defeta, oki tatakomi nau. 48Ma toa oro keka sore nia, fasi nia kai bona: ma nia ka bii ’ai faamau, Kaluwane tha Defeta, oki tatakomi nau. 49Ma tha Jesus e takwe ṉado, ka sorea keka ailia mai. Ma keka ailia wane eri maane rodo, keki una eri isana, Kai lea i manatamu: tatae, nia kai aili oe. 50Ma nia naṉa ana tooni nia, ka thaka alaa, ka lae mai isatha Jesus. 51Ma tha Jesus e luua, ka soree isana, Si ta no thathamia kwai ilia ani oe? Ma wane eri maane rodo ka soree isana, Lord, ku thathamia kwai lio. 52Ma tha Jesus ka soree isana, Oki lae amua; fitooa oe e adea maamu ka laa naa. Ma si maṉa eri u boo nia ka lio, ka lae buriatha Jesus sula tale.
Currently Selected:
Mako 10: MLU1949
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1949, 1951
