Mako 11
11
1Ma si maṉa na kera fula karaṉia Jerusalema, keka tatha fasi karaṉia i Bethefage ma i Bethani, isana gwa tolo i Olifesi, nia ka arasia ro wane ana toa nia ne toleda, 2Ka soree isada, Moki lae i la toaa faekwa na ni otofamaroa: ma si maṉa eri u boo na moka fula iei, do moki fulatoona tee kalee ase na kera kania, na ta wane si ono u i suila; lubea, moki talaia mai. 3Ma mada sa ta wane kai soetoomaroa, Uria ta na moki ilia si do eri? moki sorea, Ṉa Lord e thathamia; ma si maṉa eri u boo nia kai alamatania mai kunei. 4Ma kero lae nadaroa, keko fulatoona kalee ase eri na kera kania sula tale ne tabali uri maana biu; ma keka lubea. 5Ma tei wane na kera takwe kula eri keka soree isadaroa, Uria ta lau na moki lubea kalee ase ena? 6Ma keko faaroṉoa toa eri asi do na tha Jesus e sorea: ma kero alamatanida keko lae. 7Ma keko tolea kalee ase eri isatha Jesus, keka naṉa ana tooni kera ki fafia; ma nia ka ono i fafona. 8Ma toa oro keka regweta tooni kera ki sula tale; ma tei toa lau keka kasia ulii ’ei, keka tharaṉania sula tale. 9Ma toa na kera lae inao, bia toa na kera lae mai iburi, keka ’ai, keka una eri, Tha God ka thufi nia; Lea iana, wane na ka lae mai ana thatana tha Lord: 10Lea la ifana tooa maka kia tha Defeta na kai lae mai ana thatana tha Lord: Nia ne ni mai thalo ka thufi nia.
11Ma tha Jesus e fula i Jerusalema, ka kotho i la biu baita tha God; ma buriana ne lilio me rikia si do ni la biu eri ka sui boo, uria ne thaulafi naa, nia ka lae uri Bethani bia akwala ma ro wane eki.
12Ma dani ta, si maṉa na kilu lae faisia Bethani, nia ka thaofa. 13Ma nia rikia tee thakwari to da mai ne ululua, nia lae uria, fasi mado e ai kai rikia ta foee do i gwauna: ma lalae kau e fula i aena ’ai eri, ka rikia talitoona bana rena; uria na unii thakwari e ai u. 14Ma tha Jesus ka luua, ka soree isana, Ta wane toto si ania ta foee do i gwaumu, too asi maṉa eri ka lae alaa naa. Ma toa nia ne toleda kera roṉoa.
15Ma keka fula i Jerusalema: ma tha Jesus ka, kotho i la biu baita tha God, ka bii taria toa na keki usi asi do ki bia toa na keki usi la biu eri, ma ka kefua tatafe toa na keki tatala ana malefo, bia do ni ono toa na keki usi ana bola ki; 16Me ai si alamatania ta wane si tatha fafia ta kwadee do i la biu eri. 17Ma nia ka kwaifamanatai, ka una eri isada, Ta na sa kera keda, Biu nau keki alaṉia ana biu ni foa la ifana kulee toa eki sui bana, mado? ma ni kamulua mulu adea biu nau ṉa maofi toa na keki laulau. 18Ma wane ni kekeda ki bia wane inoto ni foa ki kera roṉoa, ma keka rofe fufuli uria si ade la na keki ilia fasi keki thauṉi nia: uria na kera mau iana, sulia malului wane eki sui bana kera kwele ana kwaifamanatai la nia.
19Ma afa thaulafia ki ka sui bana nia lalae kau faisia toaa susu eri.
20Ma i uusuwadia, si maṉa na kera tatha, keka rikia thakwari ba ka dele naa, thafali mai ana laila. 21Ma tha Pita ka onotoona, ka soree isana, Wane ni kwaifamanatai ae, rikia fasi, thakwari ba no sorea taa la kai to fafia e dele naa. 22Ma tha Jesus e luua, ka soree isada, Muki fitoona tha God. 23Uria mamana ku soree isamulua, Ni tei bana na kai soree isana gwa tolo nai, Keki ṉali oe ma keki u ani oe i la amali; ma ka ai si fitala i ruruuna, kai fitoo sa do nia sorea kai mamana; nia kai rikia atona bana si do ne sorea. 24Mania ku soree isamulua, Si do ki sui bana na muki gania maṉa na muka foa, muka fitoo na mulu ṉalia naa, ma toto muki rikida boo. 25Ma si maṉa na muki takwe, muka foa, mada sa manatamulua e teo ana ta si do uria ta wane, muka manata lube; fasi Maka kamulua lau boo ne ni mei thalo ka manata lube kamulua ana abula garo lamulua, 26Ma mada se ai musi manata lube, Maka kamulua ne ni mei thalo ka ai si manata lube kamulua lau boo ana abula garo lamulua.
27Ma keka fula lau i Jerusalema: ma si maṉa na nia kai liliu i la biu baita tha God, wane inoto ni foa ki, bia wane ni kekeda ki, bia ulunao ki, keka fula isana; 28Ma keka soree isana, Sukwaia ta oki ilia ana do nei ki? mado ni tei ana ne falea sukwaia nei ifamu uria ili lana do nei ki? 29Ma tha Jesus e luuda, ka soree isada, Nau lau boo kwai soetoomulua uria tee do; muki faaroṉo nau ania ma nau kwai bii faaroṉo kamulua ana sukwaia na nau kwai ilia ana do nei ki. 30Babataesi la tha Jone, do e ita mai thalo lo, mado ana imole? faaroṉo nau fasi ania. 31Ma kera ṉata uri kera i talaadalua, keka una eri, Mada sa kuka sorea, I thalo lo mai; nia kai sorea, Sui uria ta na musi fitoona? 32Sui mada sa kuka sorea, E ita mai ana imole — kera mau ana toa eri: uria na kera sui kera sorea tha Jone ṉa porofeta mamana boo. 33Ma kera luua, keka soree isatha Jesus, E ai misi thaitoomana. Ma tha Jesus e luuda, ka soree isada, Nau kwasi faaroṉo kamulua lau boo ana sukwaia na nau kwai ilia ana do nei ki.
Currently Selected:
Mako 11: MLU1949
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1949, 1951
