Ta̤htû̌sò̌ǐ 48
48
Sǐowî̤ mî̌ Cǒmaradû̌ awî̤dû̌
Kǒri akhlialè toǒ ata̤sò̌po̤ htû̌sò̌ǐ.
1Cǒmara tûjûpwa̤ mî̌ adû̌ayǒkhlo ta kòyò.
Kò to htû̌sò̌ǐ mè̤mè̤̌ nû̌û dě pacǒmaradû̌ awî̤kû, akholocahtǐkhû̌.#Ta̤khwè̌mǎnǎ awǐlǒ tabǎ 16:25
2Cǒmaradû̌ akholo, Sǐokholo numî̌ adû̌ahtû, awî̤awǒ mè̤mè̤̌, a ma̤sò̌le̤sò̌lò̤bò hǎkhû̌ tebě.
Sǐokholo htǒonu alò̤ta shǒdû̌shǒhtû ǒ dě cǔcî̌ tokho toǒ, a mî̌ Khwǐdû̌ wî̤dû̌ tî̤wî̤.#Matěo 5:35
3Cǒmaradû̌ ǒ dě wî̤nutî̤wî̤ ahohta toǒ akû.
A dǔlṳhtò̌ ana̤ ta a mî̌ gûla̤ la̤ǒhǔ.
4Kè̌mò̌lè, Khwǐ toǒ kaǎplǒ akli toǒ dě a hèshě wî̤ htǒo.
5Bǎ asî kè̌shǐ Sǐokholo akhanu, a htò̌te̤pe̤bò asî.
Asî ǐshabò, a hǎhtò̌ khlè̌htukhlè̌tò̤bò.
6Asî ǐsha gònò̤gèglè dě ashajî lò̤kèta mamǔ phushaphû̌ǒnu.#Isaǐa 13:8
7Na ma̤pî̌ma̤lṳ̂kè asî pwǐ gili̤sǎ dě bǎhtò̌ tokho htěnûpò̌kèbò Tashǐwî̤ sǒkhlidû̌.
8Pa gana̤debǎ wî̤htǒo a ǒ ta asîrîdû̌sîrîhtû, khònò̤htǒo pa kè̌shǐbǎ Cǒmara tûjûpwa̤ htě a pǒ ta̤ lǒ̤꤮ bò awî̤dû̌ ta pana̤.
Wî̤dû̌ htǒomî̌ Cǒmaradû̌ awî̤, a ma̤htò̌nǎkè nû̌û tûjûpwa̤ talakhǎ.
9Kǒ Cǒmaradû̌, pa ǒ dě nata̤lṳhtò̌hokû.
Pa gènè̤htò̌ nata̤mo̤ǐ htě ahǎbòjò tò̤ htǒo awi̤akè̌.
10Kǒ Cǒmaradû̌, pwǐ nami̤ lṳshilṳga mè̤mè̤̌nu, kò glè htû̌sò̌ǐ cû̌pîshîto̤ nami̤ dě mǒkòtṳ, nacǔdemû htǒo aǒlǒǒbe ta ta̤cǒta̤tè̤.
11Na cèròcǒ cèròtè̤ ta̤ akhû̌akhî, Sǐowî̤phû̌ sò̌le̤sò̌lò̤ tû̌ta nî̌.
Yṳ̌daga awî̤ toǒ mo̤sû̌mo̤sò̌ tû̌ta nî̌.
12Cû̌te̤we̤ Sǐokholo, lète̤we̤ Sǐowî̤, cû̌dǒmǎǐ hǐphû̌htò̌yî̤ la̤ǒpo̤kè̌nu toǒ.
13Ma̤pûhǐ na pwe̤ǐlṳbò̌ bǎ naphû̌nali̤ nǒkò tuhtu pě ayanu, kè̌to̤mǎǐ gûla̤ la̤ǒhǔnu toǒ, cû̌sèlèkè̌ hohtanu toǒ.
14Cǒmaradû̌ mî̌ pacǒmaradû̌ tûjûpwa̤ talakhǎ.
A htû bǎ pa pwa̤yṳ̂klè̌nè̌klò tûjûpwa̤ talakhǎ pě.
Currently Selected:
Ta̤htû̌sò̌ǐ 48: KRC
Highlight
Copy
Compare
Share
Want to have your highlights saved across all your devices? Sign up or sign in
Wycliffe USA
