Ta̤htû̌sò̌ǐ 49
49
Nǎla̤ǐ pûma̤ ta̤dû̌yò̤htò̌sa ma̤
Kǒri akhlialè toǒ ata̤sò̌po̤ htû̌sò̌ǐ. Dě ta̤sò̌po̤ htǒomî̌ pwa̤sò̌po̤ ta̤ toǒ ahǐkǒdû̌ ta ta̤lṳhtò̌hokûnu tapwa̤ aya.
1Kǒ khlilèphû̌ lǒ̤꤮ bò toǒ, gana̤de lǒkho.
Kòyò ǒ dě hǎkhû̌ lǒ̤꤮ bò toǒ, dò̌ sînò̌ku.
2Kòyò khû̌ǎshû̌sho bǎbǎ, khû̌ǎyû̌lò̤ bǎbǎ, kòyòshèwè bǎbǎ, kòyòdû̌yò̤ bǎbǎ gana̤de lǒkho.
3He hî̌bǎ yo̤ htě alǒbe ta ta̤sî̌ta̤jò.
Hesò̌phlǒ ata̤gènè̤ toǒnu aphloaphǎ.
4He glè to̤ǐphî̌gle pwa̤sî̌jòyo̤.
He dǒ tǐtute̤gwe dě he glè pwe̤ǐlṳphlo bǎ kò ta heyo̤khěkhǒ amûasǎ.
5Bǎ ta̤pò̤ta̤sha hèbǎ he akha bǎbǎ, kòyò ta̤sǔta̤plě ǒ toǒ ata̤ma̤jîma̤jû kònu a ǒte̤we̤ he akha bǎbǎ, he cû̌ǐshape ma̤tè?
6Kòyònu toǒ mî̌ kòyò htě a nǎla̤ǐ tû̌ ata̤dû̌yò̤htò̌sa.
A htû̌sò̌ǐ tû̌ ata̤dû̌yò̤htò̌sa dû̌꤮ nu toǒ.
7Kòyò htě a htè̌gebò̌ bǎ kòsò̌phlǒhtûpwa̤nu a ǒ dǐpwǎ̤꤮ tò̤.
Dě kòyò tapwa̤ sò̌htûpwa̤ ayanu, a ǐbò̌ nǒ Cǒmaradû̌ ale̤apwî̤ tò̤.
8Sò̌htûpwa̤ ale̤apwî̤nu apwî̤dû̌꤮ mè̤mè̤̌, kò htè̌gebò̌ yǎta wû dǐkhò̌꤮ tò̤.
9Ma̤pûhǐ kòyò tapwa̤ ǒhtûpwa̤bò̌ tûjûpwa̤, a gupî̌gusokè tò̤ ayanu, kò htè̌gebò̌ yǎta wû dǐkhò̌꤮ tò̤.#Matěo 16:26
10Kò pṳ̂̌꤮ tapwa̤ kè̌shǐ te̤mǎ ta kòyò htě a sî̌jò toǒ mî̌ a si pwǎ.
Kòyòkě toǒ bǎbǎ, kòyòpè̌ǒò̌ toǒ bǎbǎ, a bǎ꤮ sinò pwǎ.
Asî lǒ̤꤮ bò mî̌ bǎ bè̌kè ata̤dû̌yò̤htò̌sa ta kòhǔwa̤ aya.
11Asîhǎkhû̌ toǒnu aǒ tû̌ta asîmi̤ toǒ pwǎ̤tadě asî lṳkhû̌ toǒnu mî̌ asîhǐ tûjûpwa̤ talakhǎ.
Asî la̤ǒ agûla̤nu a htû asîphû̌li̤ la̤ǒ tûjûpwa̤ talakhǎ.
12Kòyò dû̌yò̤htò̌sa tapwǎ̤ mî̌ a ǒyî̤jò bǎ hǎkhû̌ bǎo tûjûpwa̤ tò̤.
Asî lò̤ta ta̤phû̌ta̤li̤ dě a sikèbò.
13Kòyòǒò̌ htě a yṳǎ ana̤nu toǒ bǎbǎ, kòyò htě a sò̌phlǒ nî̤dû kû̌ta asînu toǒ bǎbǎ, htû̌꤮ asî klè̌ gutṳ pěmî̌, a htûhtò̌pwǎ hǐnu pěpě.
14Lṳnǎkhwǎdo glè ǒpo̤gèǐ asî pwǐ pwa̤gèǐsophû̌, asî bǎ꤮ si sǒsǒbò pwǐ sophû̌.
Lṳmṳlîakha kòyòcǒkòyòtè̤ glè pǒǐ asî.
Asîna̤klû gulǒgusokèbò lṳnǎkhwǎdo dě a ǒtepheyî̤ ta asîhǐphò.
15He lè̌dě Cǒmaradû̌ glè htè̌ge hesò̌phlǒhtûpwa̤ dě lṳnǎkhwǎdo ata̤shû̌ta̤sho acǔdekû, a glè kaǎge he dě aǒ.
16Bǎ kòyò tapwa̤pwa̤ dû̌yò̤ dě sǔsǔ ata̤dû̌yò̤htò̌sa toǒ ǒdû̌htò̌ akhanu, sǎpla̤ pûma̤ dǐcǎ꤮ ma̤.
17Bǎ a sikè akhanu, a phî̌cû̌nṳjò nǒ dǐcǎ꤮ tò̤.#Timò̤̌te awǐlǒ tabǎ 6:7
Ata̤dû̌yò̤htò̌sanu a gûcû̌to̤jò kû̌ a dě lṳkhû̌ tò̤.
18Bǎ a ǒhtûpwa̤ akha a sò̌phlǒmo̤ mè̤mè̤̌ tû̌ ana̤, kò htû̌sò̌ǐ a pwǎ̤tadě, 19A glè si sǒsǒkû̌pwǎ ta amo̤phaphiphusî dě wǐkha, a glè lòte̤to̤kè dě ta̤khǐta̤lo̤ agûla̤ tûjûpwa̤.
20Kòyò tapwa̤pwa̤ htě a htû̌sò̌ǐ ata̤dû̌yò̤htò̌sa, a asî̌yaphlophǎ kû̌kò tò̤ tapwa̤pwa̤nu, apî̌alṳ̂ sǒsǒta ta̤phû̌ta̤li̤.
Currently Selected:
Ta̤htû̌sò̌ǐ 49: KRC
Highlight
Copy
Compare
Share
Want to have your highlights saved across all your devices? Sign up or sign in
Wycliffe USA
