ᤔᤷᤁᤢᤛ 6

ᤏᤠᤛᤖᤋᤀᤥ ᤕᤧᤛᤢᤴ ᤏᤛᤠᤴ ᤔᤧᤴᤈᤥᤃᤢᤴ

(ᤔᤳᤋᤡ ᥇᥉:᥋᥉-᥋᥎; ᤗᤢᤁᤠ ᥊:᥇᥌-᥉᥆)

1ᤕᤧᤛᤢᤴ ᤂᤧᤵᤔᤥᤗᤠᤶ ᤐᤣᤀᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ᤏᤢ ᤀᤠᤒᤠᤅᤣ ᤁᤢᤒᤠᤱᤓᤣ᤹ᤀᤥ ᤋᤩᤧ॥ 2ᤜᤧᤰᤁᤩᤠᤱ ᤏᤠ᤺ᤶᤛᤡᤱ ᤕᤧᤴᤏᤥ ᤕᤧᤛᤢᤴ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥ ᤐᤣᤀᤠᤱ ᤜᤢ᤹ᤔᤠ ᤜᤣ᤺ᤰᤋᤢᤛᤡ॥ ᤂᤧᤵᤔᤥ ᤕᤖᤡᤰ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤁᤢᤏᤡᤛᤠᤶᤔᤡᤴ ᤔᤧᤄᤧᤵᤛᤢᤀᤠᤱ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤀᤠᤱ ᤀᤰᤂᤣ ᤔᤧᤒᤠ᤺ᤳᤋᤢ. “ᤁᤴ ᤔᤏᤠ᤺ᤸᤗᤧ ᤀᤰᤋᤱᤒᤠ ᤐᤠ᤺ᤴᤏᤡᤴ ᤀᤠᤳᤋᤥ ᤂᤥᤛᤢᤒᤣ᥅ ᤀᤠᤰᤂᤣᤗ᤹ᤖᤡᤰ ᤛᤡᤰᤁᤢᤶ ᤏᤡᤱᤘᤠ᤹ ᤏᤢ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤆᤥᤃᤢᤒᤣ᥄ 3ᤁᤱᤃ ᤔᤖᤡᤕᤔᤖᤧ ᤁᤢᤛ᤻ᤛᤠ ᤛᤡᤱ ᤁᤧᤃᤠᤶᤒᤧᤴ ᤔᤣ᤺ᤶᤒᤡ᥅ ᤁᤱᤃ ᤕᤠᤁᤢᤒ. ᤕᤢᤛᤢᤑ. ᤕᤜᤢᤍᤠ ᤏᤢ ᤛᤡᤔᤥᤏᤛᤡᤖᤧ ᤂᤢᤏᤡ᤹ ᤑᤢ᤹ᤏᤣ ᤔᤣ᤺ᤶᤒᤡ᥅ ᤁᤸᤗᤧ ᤁᤢᤴᤛᤠ᤹ ᤔᤧᤴᤇᤢᤔᤠᤜᤠ᤹ᤃ ᤀᤠᤏᤡ᤹ᤏᤢᤀᤣᤛᤧ ᤔᤧᤘᤠ᤹ᤒᤠ॥” ᤜᤧᤰᤁᤣ᤺ᤸᤗᤧ ᤂᤧᤴ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤏᤠᤔᤧᤴᤇᤠ᤹ᤖᤢᤴᤗᤥ॥

4ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤧᤱᤃ ᤁᤢᤒᤠᤱᤓᤣ᤹ᤛᤠᤒᤠᤜᤠ᤹. ᤁᤢᤃᤠ᤹ᤀᤡᤛᤥᤎᤥ᤺ᤰᤜᤠ᤹ ᤏᤢ ᤁᤢᤜᤡᤶᤛᤕᤱᤜᤠ᤹ᤖᤧ ᤀᤡᤱᤎᤠᤱ ᤔᤧᤶᤒᤡᤖᤢᤴᤗᤥ॥ ᤁᤖ ᤘᤣ᤹ ᤋᤧᤴᤏᤥᤖᤰ ᤂᤢᤏᤧ᤹ ᤁᤢᤒᤠ᤺ᤴᤏᤡᤴ ᤔᤧᤄᤧᤵᤛᤢ᤹ᤖᤥ॥” 5ᤂᤧᤵᤔᤥᤒᤠ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤏᤛᤠᤴ ᤜᤥ᤺ᤵᤋᤧᤒᤠᤸᤗᤧ ᤆᤥᤃᤢᤸᤗᤧ ᤕᤧᤛᤢᤖᤧ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤔᤧᤛᤢᤰᤋᤢᤴ. ᤁᤖ ᤌᤡᤰ-ᤏᤧᤳᤇᤡ ᤁᤧᤍᤢᤰᤐᤠᤜᤠ᤹ ᤛᤶᤍᤠᤱᤗᤰ ᤁᤢᤜᤢᤰ ᤏᤧᤛ᤻ᤛᤢ ᤐᤡᤖᤢᤛᤡᤀᤠᤱ ᤘᤣ᤺ᤴᤍᤢᤛᤡᤖᤥ॥ 6ᤕᤧᤛᤢᤖᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤛᤠ᤺ᤴᤏᤡᤴ ᤜᤥ᤺ᤵᤋᤧᤒᤠ ᤏᤡᤛᤢᤀᤠᤱ ᤁᤢᤏᤡᤱᤘᤠ᤹ ᤔᤕᤧ॥

ᤕᤧᤛᤢᤖᤧ ᤌᤡᤰ-ᤏᤧᤳ ᤁᤢᤜᤢ᤹ᤛᤠᤶᤒᤠᤜᤠ᤹ ᤐᤠᤱᤄᤢᤛᤡ᤹

(ᤔᤳᤋᤡ ᥇᥆:᥋-᥇᥋; ᤗᤢᤁᤠ ᥏:᥇-᥌)

ᤜᤧᤰᤁᤩᤠᤱ ᤕᤧᤛᤢᤖᤧ ᤐᤠᤱᤓᤣ᤹ᤜᤠ᤹ᤀᤥ ᤜᤢ᤹ᤖᤢᤛᤡᤖ ᤐᤣᤖᤥ॥

7ᤌᤡᤰ-ᤏᤧᤳ (᥇᥈) ᤁᤢᤜᤢ᤹ᤛᤠᤶᤒᤠᤜᤠ᤹ ᤀᤢ᤺ᤳᤋᤢᤛᤡᤀᤠᤱ ᤑᤧᤴᤛᤠᤶᤜᤠ᤹ ᤏᤠ᤺ᤵᤔᤠ ᤗ᤺ᤵᤔᤠ ᤕᤢᤰ ᤐᤡᤖᤢᤛᤡ. ᤜᤧᤰᤁᤩᤠᤱ ᤏᤧᤳᤏᤧᤳᤇᤡ ᤐᤠᤱᤄᤢᤛᤡ॥ 8ᤜᤧᤰᤁᤩᤠᤱ ᤀᤰᤂᤣᤗ᤹ᤖᤡᤰ ᤀᤡᤱᤈᤠᤱ ᤐᤡᤖᤢᤛᤡ. “ᤂᤡᤏᤡ᤹ ᤗᤠᤶᤍᤡ᤺ᤰᤁᤥ ᤁᤧᤒᤣᤃᤡᤸᤗᤧ ᤋᤰᤁᤠ᤺ᤳᤗᤰ ᤕᤠᤱᤅᤠᤛᤡᤶᤔᤧ᤹. ᤂᤧᤴᤏᤠᤱᤎᤥ ᤘᤣ᤹ ᤆᤠᤔᤠ ᤆᤠ. ᤛᤢ᤺ᤰᤘᤠ ᤏᤢ ᤕᤠᤱ ᤌᤣᤀᤠᤱ ᤔᤧᤍᤣ᤹ᤖᤧᤶᤔᤡᤴᤏᤧ᤹ᤀᤥ॥ 9ᤗᤠᤱᤛᤢ᤺ᤵᤐᤡᤴ ᤆᤠᤰᤂᤧᤶᤔᤧ᤹. ᤁᤖ ᤘᤣ᤹ ᤗᤧᤰᤛᤡᤱᤔᤠ ᤆᤠᤱ ᤔᤧᤒᤰᤂᤧᤶᤔᤡᤴᤏᤧ᤹ᤀᤥ॥ 10ᤂᤡᤏᤡ᤹ ᤁᤧᤒᤣᤃᤡᤸᤗᤧ ᤀᤠᤳᤋᤡᤴ ᤜᤡᤶᤔᤥ ᤗᤠᤶᤍᤠ᤺ᤰᤔᤠ ᤁᤧᤶᤒᤡᤖᤡ᤹. ᤂᤧᤴ ᤐᤠᤱᤓᤣ᤹ᤀᤥᤗᤠᤶ ᤔᤧᤶᤒᤣ᤺ᤰᤁᤣ ᤌᤠᤖᤡᤰ ᤒᤠ ᤂᤧᤴ ᤜᤡᤶᤔᤥᤀᤣ ᤘᤕᤧᤶᤔᤧ᤹ᤀᤥ॥ 11ᤜᤧᤰᤁᤩᤠᤱ ᤀᤠᤳᤋᤡᤴ ᤗᤠᤈᤣ᤹ᤀᤥ ᤂᤡᤏᤡ᤹ ᤗᤠᤶ ᤁᤧᤔᤧᤴᤍᤠ᤺ᤰᤋᤡᤴ ᤜᤧᤰᤁᤩᤠᤱ ᤂᤡᤏᤡ᤹ ᤐᤠ᤺ᤴᤏᤠᤱ ᤔᤧᤱᤄᤧᤵᤛᤢᤴ. ᤂᤧᤴ ᤗᤠᤈᤣ᤹ᤀᤡᤴ ᤁᤧᤗᤧᤖᤢᤶᤔᤠᤱ ᤁᤧᤒᤡᤃᤡᤸᤗᤧ ᤂᤡᤏᤡ᤹ ᤗᤠᤱᤅᤥ ᤁᤧᤄᤡᤵᤐᤠ ᤂᤠᤶᤜᤡ᤺ᤰᤁᤡᤴ ᤌᤠᤵᤛᤧᤶ ᤌᤠ᤹ᤖᤧᤶᤛᤡᤶᤔᤧ᤹#᥌:᥇᥇ “ᤂᤡᤏᤡ᤹ ᤗᤠᤱᤅᤥ ᤁᤧᤄᤡᤵᤐᤠ ᤂᤠᤶᤜᤡ᤺ᤰᤁᤡᤴ ᤌᤠᤵᤛᤧᤶ ᤌᤠ᤹ᤖᤧᤶᤛᤡᤶᤔᤧ᤹” ᤑᤠ᤹ᤀᤡᤴ ᤂᤧᤵᤔᤥ ᤁᤧᤕᤢᤱᤒᤠ ᤔᤏᤠᤜᤠ᤹ᤖᤧ ᤗᤠᤃᤡ ᤂᤧᤴᤏᤠᤱᤎᤥ ᤆᤥ᤺ᤰᤔᤠ ᤁᤧᤒᤥᤱᤒᤠ ᤌᤣᤀᤠᤱ ᤜᤥᤵᤗᤥ ᤁᤧᤗ᤹ᤒᤠ ᤔᤡᤰᤛᤣ᤺ᤴᤗᤥ॥ ᤁᤱᤃ ᤂᤢᤏᤡ᤹ ᤋᤰᤗᤧᤱᤘᤠᤀᤥ ᤁᤧᤒᤥᤱᤒᤠ ᤔᤡᤰᤛᤣ᤺ᤴᤗᤥ॥”

12ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤧᤒᤣᤀᤠᤱ ᤔᤏᤠᤜᤠ᤹ᤀᤥ ᤂᤡᤏᤡ᤹ ᤗᤠᤕᤥᤗᤠᤶ ᤜᤡᤴᤍᤧᤶᤔᤧ᤹ ᤑᤠ᤹ᤀᤠᤱ ᤀᤡᤱᤓᤴ ᤛᤧᤔᤠ ᤔᤧᤜᤣ᤺ᤰᤋᤢ॥ 13ᤂᤧᤱᤜᤠ᤹ᤖᤧ ᤔᤏᤠᤜᤠ᤹ᤗᤠᤶ ᤑᤧᤴᤛᤠᤶᤜᤠ᤹ ᤔᤧᤗ᤺ᤳᤋᤢᤛᤡ॥ ᤜᤧᤰᤁᤩᤠᤱ ᤕᤖᤡᤰ ᤁᤧᤍᤢᤰᤐᤠᤜᤠ᤹ ᤏᤡ᤺ᤱᤃᤣ᤹ ᤔᤧᤜᤢ᤺ᤳᤋᤢ ᤔᤧᤒᤡᤖᤢᤛᤡ. ᤜᤧᤰᤁᤩᤠᤱ ᤔᤧᤘᤣ᤺ᤴᤍᤢᤛᤡᤖᤥ॥

ᤕᤢᤜᤢᤴᤏᤠᤖᤧ ᤁᤢᤛᤡᤔᤧᤴ

(ᤔᤳᤋᤡ ᥇᥊:᥇-᥇᥈; ᤗᤢᤁᤠ ᥏:᥍-᥏)

14ᤀᤠᤸᤗ ᤕᤧᤛᤢᤖᤧ ᤁᤢᤔᤡᤱᤛᤥ-ᤁᤢᤎᤠ᤺ᤱᤛᤥ ᤁᤧᤖᤧᤰ ᤐᤡᤛᤠᤱ ᤛᤧᤖᤧ. ᤜᤧᤰᤁᤩᤠᤱ ᤕᤧᤛᤢᤖᤧ ᤁᤢᤕᤠ᤺ᤶᤒᤣᤀᤥ ᤜᤧᤖᤥᤍ#᥌:᥇᥊ ᤜᤧᤖᤥᤍ—ᤁᤴ ᤜᤧᤖᤥᤍ ᤜᤠᤱᤅᤡᤴ ᤕᤧᤛᤢ ᤛᤠᤘᤠ᤺ᤴᤇᤡᤱᤅᤧᤸᤗᤧ ᤜᤠᤱ ᤁᤧᤈᤥ᤺ᤰᤐᤠ ᤜᤧᤖᤥᤍ ᤜᤠᤱᤅᤡᤸᤗᤧ ᤁᤢᤛ᤻ᤛᤠ ᤜᤧᤖᤥᤍ ᤀᤣᤴᤋᤡᤐᤠᤛᤖᤥ॥ ᤜᤠᤱᤅᤡᤸᤗᤧᤀᤠᤱ ᤂᤧᤵᤛᤢᤖᤥ॥ ᤁᤢᤓᤠᤖᤧ ᤔᤧᤒᤠ᤺ᤳᤋᤢ. “ᤒᤵᤋᤡᤛ᤻ᤔᤠ ᤁᤧᤒᤡᤒᤠ ᤕᤢᤜᤢᤴᤏᤠᤴ ᤕᤠᤶᤔᤥ ᤜᤡᤅᤧᤒᤠᤸᤗᤧ ᤆᤥᤃᤢᤸᤗᤧ ᤂᤢᤏᤧ᤹ ᤔᤢᤰᤛᤠᤶᤗᤠᤶᤒᤠ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰ ᤆᤥᤃᤢᤖ ᤘᤠ᤹ᤖᤥ॥” 15ᤁᤖ ᤘᤣ᤹ᤜᤠ᤹ᤖᤧ ᤔᤧᤒᤠ᤺ᤳᤋᤢ. “ᤁᤱᤃ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤀᤣᤗᤡᤕᤠᤴᤗᤥ॥”#᥌:᥇᥋ ᤀᤣᤗᤡᤕᤠ—ᤀᤢᤏᤠᤜᤢᤖᤡᤀᤥ ᤁᤧᤘᤠ᤹ᤒᤠ ᤗᤳᤇᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤖᤥ॥

ᤘᤣ᤹ᤜᤠ᤹ᤖᤧ ᤔᤧᤒᤠ᤺ᤳᤋᤢ. “ᤀᤢᤴᤇᤥ᤺ᤴᤒᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤀᤥ ᤂᤢᤏᤧ᤹ᤀᤠᤱ ᤌᤡᤰᤗᤥ॥” 16ᤁᤖ ᤜᤧᤖᤥᤍ ᤜᤠᤱᤅᤡᤸᤗᤧ ᤁᤴ ᤂᤧᤵᤛᤢᤀᤠᤱ ᤀᤰᤂᤣ ᤐᤠ᤺ᤳᤋᤢ. “ᤁᤱᤃ ᤒᤵᤋᤡᤛ᤻ᤔᤠ ᤁᤧᤒᤡᤒᤠ ᤕᤢᤜᤢᤴᤏᤠ᤺ᤸᤗᤥ॥ ᤀᤡᤱᤃᤠ᤹ ᤂᤢᤏᤧ᤹ ᤁᤢᤏᤡ᤺ᤱᤔᤠᤴ ᤂᤰ ᤐᤠᤱᤄᤢᤱᤛᤡᤱᤅᤠᤱ ᤘᤕᤧ. ᤁᤖ ᤕᤠᤶᤔᤥ ᤁᤢᤛᤡᤘᤧᤳᤗᤠᤶ ᤁᤢᤜᤡᤱᤘᤧᤳ ᤐᤥ᤺ᤰᤂᤧᤖᤥ᥄” 17-18ᤜᤧᤖᤥᤍ ᤜᤠᤱᤅᤡᤸᤗᤧ ᤀᤠᤒᤠᤅᤣ ᤁᤢᤴᤛᤠ᤹ ᤑᤡᤗᤡᤐᤖᤧ ᤁᤢᤔᤣᤳ ᤜᤧᤖᤥᤍᤡᤕᤠᤛᤧᤴ ᤔᤣ᤺ᤳ ᤁᤳᤋᤢᤀᤠᤱ ᤘᤕᤧ॥ ᤜᤧᤰᤁᤩᤠᤱ ᤜᤧᤖᤥᤍᤡᤕᤠᤛᤖᤧ ᤁᤢᤏᤡᤱᤘᤠ᤹ ᤋᤠᤔᤠ ᤑᤠ᤹ᤀᤠᤱ ᤒᤵᤋᤡᤛ᤻ᤔᤠ ᤁᤧᤒᤡᤒᤠ ᤕᤢᤜᤢᤴᤏᤠᤴ ᤋᤧᤶᤔᤠᤀᤠᤱ ᤐᤢᤱᤗᤠᤜᤡᤶᤔᤥ ᤛᤠᤰᤔᤠ ᤀᤡᤱᤈᤠᤱ ᤐᤡᤖᤢᤛᤡᤀᤠᤱ ᤘᤕᤧ. ᤌᤣᤀᤠᤱᤓᤧᤸᤗᤧ ᤕᤢᤜᤢᤴᤏᤠᤖᤧ ᤂᤢᤏᤧ᤹ ᤀᤧᤳᤗᤧᤱ “ᤂᤧᤴ ᤀᤠᤒᤠᤅᤣ ᤁᤧᤴᤛᤠ᤹ᤖᤧ ᤁᤢᤔᤣ᤺ᤳᤋᤡᤴ ᤔᤣ᤺ᤳ ᤁᤵᤔᤠ ᤔᤧᤏᤢ᤹ᤏᤧᤴ” ᤔᤧᤳᤋᤢᤀᤠᤱ ᤘᤕᤧᤖᤥ॥ 19ᤜᤧᤖᤥᤍᤡᤕᤠᤛᤖᤧ ᤕᤢᤜᤢᤴᤏᤠ᤺ᤴᤏᤢ ᤁᤢᤛᤡᤰ ᤐᤥᤃᤧᤀᤠᤱ ᤂᤧᤴ ᤛᤧᤵᤔᤠ ᤏᤡᤱᤘᤠ᤹ ᤆᤥᤃᤢᤀᤠᤱ ᤘᤕᤧᤛᤠᤱ ᤂᤢᤏᤧ᤹ ᤛᤧᤵᤔᤠ ᤔᤧᤴᤇᤢᤰᤁᤣ ᤘᤕᤧ. 20ᤌᤣᤀᤠᤱᤓᤧᤸᤗᤧ ᤜᤧᤖᤥᤍ ᤜᤠᤱᤅᤡᤸᤗᤧ ᤕᤢᤜᤢᤴᤏᤠᤴ ᤛᤠᤶᤕᤥᤒᤠ ᤏᤢ ᤛᤣᤛᤣᤒᤠ ᤔᤏᤠ ᤑᤠ᤹ᤀᤠᤱ ᤁᤢᤛᤡᤱ ᤏᤡ᤺ᤳᤋᤢᤀᤠᤱ ᤘᤕᤧ. ᤂᤧᤸᤗᤧᤆᤥᤃᤢᤸᤗᤧ ᤂᤢᤏᤧ᤹ ᤋᤠᤱᤛᤧ᤺ᤵᤋᤢᤀᤠᤱ ᤘᤕᤧᤖᤥ॥ ᤕᤢᤜᤢᤴᤏᤠᤖᤧ ᤁᤢᤒᤠ᤺ᤴᤏᤡᤴ ᤂᤢᤏᤧ᤹ ᤂᤧᤵᤛᤢᤸᤗᤧ ᤛᤠ᤹ᤖᤡᤰ ᤁᤡᤛᤧᤀᤠᤱ ᤘᤕᤧᤛᤠᤱ ᤛᤋᤧᤖ ᤂᤧᤵᤛᤢᤖᤀᤣ ᤘᤕᤧᤖᤥ॥

21ᤀᤠᤸᤗ ᤕᤶᤒᤠ ᤛᤢᤕᤧᤶ ᤋᤩᤧ॥ ᤜᤧᤖᤥᤍ ᤜᤠᤱᤅᤡᤸᤗᤧ ᤁᤢᤛᤠᤘᤠ᤺ᤴᤇᤡᤱᤔᤠ ᤛᤛ᤺ᤳᤛᤖᤠᤱᤅᤥ ᤃᤠᤗᤡᤗ ᤌᤢᤶᤔᤥᤒᤠ ᤐᤕᤶ ᤕᤶᤒᤠ ᤛᤢᤜᤠᤱᤕᤢᤰᤐᤠᤜᤠ᤹. ᤋᤡᤗᤡᤱᤃᤠᤜᤠ᤹ᤖᤧ ᤂᤢᤏᤡ᤹ ᤌᤰᤋᤢᤶᤒᤠᤜᤠ᤹ ᤏᤢ ᤔᤡᤱᤛᤥᤍᤠᤱᤒᤠ ᤋᤢᤶᤔᤩᤠᤜᤠᤱᤜᤠ᤹ ᤋᤖᤣ ᤀᤢ᤺ᤳᤋᤢᤛᤡᤀᤠᤱ ᤘᤕᤧ॥ 22ᤜᤧᤖᤥᤍᤡᤕᤠᤛᤖᤧ ᤀᤠᤒᤠᤅᤣ ᤁᤢᤛ᤻ᤛᤠ ᤔᤧᤴᤇᤢᤔᤠ᤹ᤀᤡᤴ ᤂᤧᤵᤔᤥ ᤋᤩᤧᤀᤠᤱ ᤗᤠ᤺ᤰᤂᤧ. ᤜᤧᤰᤁᤩᤠᤱ ᤜᤧᤖᤥᤍ ᤜᤠᤱᤅᤡᤴ ᤏᤢ ᤂᤧᤵᤔᤥ ᤁᤧᤍᤠᤒᤠ ᤁᤧᤖᤧᤰ ᤋᤖᤣᤒᤠᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ ᤋᤠᤛᤢ ᤐᤡᤖᤢᤛᤡᤸᤗᤧ ᤜᤠᤱᤅᤡᤸᤗᤧ ᤂᤧᤴ ᤔᤧᤳᤋᤢ. “ᤂᤧᤏᤧ᤹ ᤌᤣ ᤁᤧᤏᤠ᤺ᤰᤁᤠᤛᤠᤱ ᤀᤡᤱᤃᤠ᤹ ᤐᤡᤏᤧᤖᤥ॥” 23ᤂᤧᤸᤗᤧ ᤔᤠᤱᤜᤧᤰᤛᤡᤱᤗ ᤔᤧᤳᤋᤢ. “ᤂᤧᤏᤧ᤹ ᤌᤣ ᤁᤧᤏᤠ᤺ᤰᤁᤠ ᤀᤡᤱᤃᤠ᤹ ᤐᤡᤏᤧ॥ ᤀᤠᤜᤠᤱᤈᤢᤶᤔᤡᤴ ᤁᤢᤓᤪᤧ᤺ᤱ ᤁᤧᤏᤠ᤺ᤰᤋᤢᤛᤠᤱ ᤐᤡᤏᤧᤖᤥ॥”

24ᤂᤧᤴ ᤆᤢᤰᤔᤧᤴ ᤁᤢᤶᤔᤠᤖᤥ ᤐᤣᤀᤠᤱ ᤛᤣ᤺ᤴᤍᤥᤛᤢ. “ᤀᤠᤸᤗ ᤌᤣ ᤏᤠ᤺ᤰᤋᤢᤱᤒᤠᤒᤣ᥅”

ᤜᤧᤰᤁᤣ᤺ᤸᤗᤧ ᤁᤢᤶᤔᤠᤖᤧ ᤔᤧᤳᤋᤢ. “ᤒᤵᤋᤡᤛ᤻ᤔᤠ ᤁᤧᤒᤡᤒᤠ ᤕᤢᤜᤢᤴᤏᤠ᤺ᤸᤗᤧ ᤁᤢᤎᤧᤃᤣ᤺ᤰᤁᤡᤴ ᤏᤠ᤺ᤰᤋᤧ᤹॥” 25ᤂᤡᤔᤥ ᤂᤧᤴ ᤆᤢᤰᤔᤧᤴᤏᤠᤱ ᤐᤣᤀᤠᤱ ᤔᤧᤳᤋᤢ. “ᤒᤵᤋᤡᤛ᤻ᤔᤠ ᤁᤧᤒᤡᤒᤠ ᤕᤢᤜᤢᤴᤏᤠ᤺ᤸᤗᤧ ᤁᤢᤎᤧᤃᤣ᤺ᤰᤁᤡᤴ ᤀᤠᤸᤗᤥᤛᤠ ᤆᤧᤳᤌᤩᤠᤀᤥ ᤐᤡᤖᤠᤱᤅᤧ᤹ᤀᤥ॥”

26ᤜᤧᤰᤁᤣ᤺ᤸᤗᤧ ᤜᤧᤖᤥᤍ ᤜᤠᤱᤅᤡᤴ ᤛᤠ᤹ᤖᤡᤰ ᤁᤢᤏᤡᤱᤘᤠ᤹ ᤋᤢᤃᤧᤛᤠᤱ ᤂᤧᤵᤔᤥ ᤁᤧᤘᤠ᤹ᤒᤠ ᤋᤖᤣᤒᤠᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤂᤢᤏᤧ᤹ ᤆᤥᤃᤢᤒᤠ ᤔᤠᤱᤜᤧᤰᤁᤡᤴ ᤁᤧᤵᤔᤠᤀᤣ ᤁᤧᤗ᤹ᤒᤠ ᤏᤡᤱᤘᤠ᤹ ᤆᤥᤃᤢᤀᤠᤱ 27ᤂᤧᤵᤔᤥ ᤁᤧᤕᤧᤵᤐᤠ ᤜᤠᤱᤋᤡᤗᤡᤱᤃᤠ᤺ᤴ ᤐᤣᤃᤧ᤹ᤀᤠᤱ ᤕᤢᤜᤢᤴᤏᤠᤖᤧ ᤁᤢᤎᤧᤃᤣ᤺ᤰᤁᤡᤴ ᤑᤧᤳᤋᤧ᤹ ᤑᤠ᤹ᤀᤠᤱ ᤀᤡᤱᤈᤠᤱ ᤐᤡᤖᤢ॥ ᤂᤧᤴ ᤂᤡᤔᤥ ᤐᤢᤱᤗᤠᤜᤡᤶᤔᤥ ᤐᤣᤀᤠᤱ ᤕᤢᤜᤢᤴᤏᤠᤖᤧ ᤁᤢᤎᤧᤃᤣ᤺ᤰᤁᤡᤴ ᤂᤰᤋᤢ. 28ᤜᤧᤰᤁᤩᤠᤱ ᤆᤧᤳᤌᤩᤠᤀᤥ ᤑᤧᤳᤋᤢᤀᤠᤱ ᤂᤧᤴ ᤆᤢᤰᤔᤧᤴ ᤐᤡᤖᤢ॥ ᤆᤢᤰᤔᤧᤸᤗᤧ ᤂᤧᤴ ᤋᤣ᤹ᤖᤢᤀᤠᤱ ᤁᤢᤶᤔᤠ ᤐᤡᤖᤢᤖᤥ॥

29ᤕᤢᤜᤢᤴᤏᤠ᤺ᤸᤗᤧ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤁᤴ ᤔᤧᤄᤧᤵᤛᤢᤀᤠᤱ ᤔᤧᤍᤩᤧ. ᤜᤧᤰᤁᤩᤠᤱ ᤁᤢᤎᤰᤁᤡᤴ ᤔᤧᤍᤣ᤹ᤖᤢᤀᤠᤱ ᤀᤡ᤺ᤵᤐᤢᤱᤅᤥ ᤔᤧᤗᤢᤵᤋᤢ॥

ᤕᤧᤛᤢᤖᤧ ᤜᤧᤴᤇᤡᤱ ᤅᤠᤛᤡ ᤔᤏᤠᤜᤠ᤹ ᤆᤠᤈᤠ᤺ᤳᤋᤢᤛᤡ᤹

(ᤔᤳᤋᤡ ᥇᥊:᥇᥉-᥈᥇; ᤗᤢᤁᤠ ᥏:᥇᥆-᥇᥍; ᤕᤢᤜᤢ ᥌:᥇-᥇᥊)

30ᤋᤃᤡ ᤕᤧᤛᤢᤖᤧ ᤀᤡᤱᤓᤴ ᤆᤥ᤺ᤰᤛᤧ ᤐᤠᤱᤄᤢᤛᤡᤒᤠ ᤛᤣ᤺ᤰᤕᤢᤰᤔᤡᤒᤠᤜᤠ᤹ᤖᤧ ᤔᤧᤈᤥᤃᤢᤒᤠ ᤕᤠ᤺ᤶᤒᤰ ᤏᤢ ᤔᤧᤜᤢ᤹ᤖᤢᤛᤡᤒᤠ ᤐᤠ᤺ᤴᤜᤠ᤹ ᤔᤧᤏᤢ᤺ᤰᤂᤧ ᤔᤧᤍᤩᤧᤀᤠᤱ ᤕᤧᤛᤢᤴ ᤔᤧᤈᤧᤰᤋᤢ॥ 31ᤜᤧᤰᤁᤩᤠᤱ ᤕᤧᤛᤢᤖᤧ ᤀᤠᤸᤗ ᤀᤣ᤺ᤰᤛᤠᤍᤧᤴᤏᤥ ᤐᤡᤃᤡᤀᤠᤱ ᤛᤵᤑᤠᤛᤡᤰ ᤏᤠ᤺ᤶᤔᤠᤛᤡ ᤑᤠ᤹ᤀᤠᤱ ᤂᤧᤱᤜᤠ᤹ ᤔᤧᤳᤋᤢᤛᤡ. ᤌᤣᤀᤠᤱᤓᤧᤸᤗᤧ ᤁᤧᤍᤠᤒᤠ ᤁᤧᤒᤣ᤺ᤰᤐᤠ ᤔᤏᤠᤜᤠ᤹ᤖᤧ ᤔᤧᤈᤥᤃᤢᤸᤗᤧ ᤂᤢᤏᤡ᤹ ᤆᤠᤔᤠ ᤕᤧᤶᤔᤠᤱ ᤔᤧᤱᤄᤥᤀᤣ ᤔᤧᤘᤕᤧᤖᤥ॥ 32ᤜᤧᤰᤁᤣ᤺ᤸᤗᤧ ᤕᤧᤛᤢᤴ ᤏᤢ ᤁᤢᤜᤢ᤹ᤛᤠᤶᤒᤠᤜᤠ᤹ ᤂ᤺ᤱᤒᤣᤀᤥ ᤛᤫᤠ᤺ᤳᤋᤠᤱ ᤔᤧᤗᤠᤛᤧᤀᤠᤱ ᤀᤣ᤺ᤰᤛᤠᤍᤧᤴᤏᤥ ᤔᤧᤒᤣ॥ 33ᤁᤖ ᤕᤖᤡᤰ ᤔᤏᤠᤜᤠ᤹ᤖᤧ ᤂᤧᤱᤜᤠ᤹ ᤔᤧᤒᤣᤖ ᤔᤧᤒᤳᤇᤧᤒᤠ ᤔᤧᤏᤡᤛᤢᤛᤡᤀᤠᤱ ᤁᤢᤛᤡᤱ ᤔᤧᤏᤡ᤺ᤳᤋᤢᤛᤡ. ᤜᤧᤰᤁᤩᤠᤱ ᤁᤧᤖᤧᤰ ᤐᤠᤱᤈᤢᤶᤔᤥᤗᤠᤶ ᤔᤧᤗᤥ᤺ᤰᤋᤧᤖ ᤔᤧᤒᤣ. ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤧᤒᤣᤒᤠ ᤋᤧᤴᤏᤥ ᤂᤧᤱᤜᤠ᤹ᤏᤢ᤺ᤸᤗᤧ ᤋᤃᤡ ᤂᤧᤵᤔᤥ ᤔᤧᤃᤧᤖᤧ॥ 34ᤜᤧᤰᤁᤩᤠᤱ ᤕᤧᤛᤢᤴ ᤂ᤺ᤱᤒᤣᤀᤥᤗᤠᤶ ᤗ᤺ᤴᤍᤧᤸᤗᤧ ᤕᤖᤡᤰ ᤔᤏᤠᤜᤠ᤹ ᤏᤡᤛᤢᤛᤡᤀᤠᤱ ᤁᤢᤗᤢᤱᤔᤠ᤹ ᤔᤧᤍᤢᤃᤧ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤔᤧᤸᤗᤢᤰᤁᤶᤒᤠ ᤔᤣ᤺ᤴᤏᤣᤒᤠ ᤔᤧᤸᤗᤢᤰᤜᤠ᤹ ᤜᤧᤰᤁᤣ ᤔᤧᤗ᤹ᤖᤧ॥ ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤂᤧᤱᤜᤠ᤹ ᤕᤖᤡᤰ ᤏᤡᤛᤠᤶ ᤜᤢ᤹ᤖᤢᤛᤡ॥

35-36ᤏᤠᤶᤎᤩᤧᤖ ᤐᤳᤇᤧᤸᤗᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤂᤧᤵᤔᤥ ᤔᤧᤍᤩᤧᤀᤠᤱ ᤕᤧᤛᤢᤴ ᤔᤧᤔᤧᤳᤋᤢ. “ᤀᤠᤍᤠᤱᤒᤣ. ᤁᤱᤜᤠ᤹ ᤐᤠᤱᤄᤧᤍᤣᤛᤧᤛᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤁᤴ ᤀᤣ᤺ᤰᤛᤠᤍᤧᤴᤏᤥ ᤌᤣᤀᤠᤱ ᤀᤡᤱᤔᤠ ᤆᤠᤔᤠ ᤂᤥᤔᤧᤍᤧᤳᤏᤧᤴᤗᤥ. ᤕᤠᤶᤔᤥ ᤏᤠᤶᤔᤠᤱ ᤌᤩᤧᤒᤣᤖᤥ॥ ᤜᤠᤖᤠ᤹ ᤂᤡᤖᤡᤒᤠ ᤜᤡᤶᤜᤠ᤹ ᤏᤢ ᤐᤠᤱᤓᤣ᤹ᤜᤠ᤹ᤀᤥ ᤔᤧᤒᤣ᤺ᤰᤁᤠᤱ ᤆᤠᤔᤠ ᤌᤢᤱᤔᤠ ᤔᤧᤀᤡᤅᤢ ᤔᤧᤈᤖᤖᤥ॥”

37ᤁᤖ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ᤀᤣ ᤁᤱᤜᤠ᤹ ᤁᤢᤈᤠ ᤐᤡᤖᤧᤶᤛᤡᤶᤔᤧ᤹ᤀᤥ॥”

ᤂᤧᤱᤜᤠ᤹ᤖᤧ ᤕᤧᤛᤢᤴ ᤕᤠᤶᤔᤥ ᤔᤧᤔᤧᤳᤋᤢ. “ᤀᤠᤍᤠᤱᤒᤣ. ᤁᤡᤵ ᤏᤧᤳᤇᤡ (᥈᥆᥆) ᤕᤠᤱᤅᤡᤸᤗᤧ ᤀᤡᤱᤔᤏᤠᤒᤠ ᤂᤖᤧ᤺ᤱᤅᤡᤸᤗᤧᤀᤠᤱ ᤁᤱᤜᤠ᤹ ᤔᤧᤕᤥᤖᤢᤴᤇᤡᤴᤗᤥ॥ ᤀᤠᤰᤂᤣᤗ᤹ᤖᤡᤰ ᤐᤡᤔᤠ ᤛᤢᤰᤔᤧᤍᤧᤵᤐᤣ᥅”

38ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ ᤀᤠᤰᤂᤧᤶᤔᤩᤠᤰ ᤂᤖᤧ᤺ᤱ ᤁᤧᤃᤳᤋᤢᤶ. ᤐᤣᤃᤧᤶᤔᤧ᤹ᤀᤠᤱ ᤀᤥᤔᤧᤳᤋᤧᤶᤔᤧ᤹᥄”

ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤀᤥᤔᤧᤔᤧᤳᤋᤢ. ᤜᤧᤰᤁᤩᤠᤱ ᤔᤧᤓᤧᤖᤧᤀᤠᤱ ᤔᤧᤔᤧᤳᤋᤢ. “ᤀᤠᤍᤠᤱᤒᤣ. ᤀᤠᤏᤡᤃᤧᤃ ᤅᤠᤛᤡ (᥋) ᤂᤖᤧ᤺ᤱ ᤏᤢ ᤏᤧᤳᤇᤡ (᥈) ᤅᤠᤖᤰ ᤁᤳᤋᤢᤶᤒᤧ॥” 39ᤂᤧᤴ ᤔᤏᤠᤜᤠ᤹ ᤕᤠᤴ ᤁᤧᤕᤢᤱᤒᤠ ᤂᤠᤶᤔᤥ ᤌᤧ᤺ᤰᤐᤧᤳᤋᤠᤱ ᤕᤢᤱᤔᤠ ᤐᤠᤱᤄᤧᤶᤛᤡᤶᤔᤧ᤹ ᤑᤠ᤹ᤀᤠᤱ ᤕᤧᤛᤢᤖᤧ ᤀᤡᤱᤈᤠᤱ ᤐᤡᤖᤢᤛᤡ. 40ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ ᤁᤡᤵ ᤌᤡᤰ (᥇᥆᥆) ᤏᤢ ᤅᤠᤒᤥᤱ (᥋᥆) ᤗ᤹ᤖᤡᤰ ᤔᤧᤜᤠᤛᤡᤱᤅᤠᤱ ᤌᤧ᤺ᤰᤐᤧᤳ ᤔᤧᤒᤧᤴᤇᤡᤱᤅᤠᤱ ᤔᤧᤕᤢᤱᤛᤡᤱ॥ 41ᤕᤧᤛᤢᤖᤧ ᤂᤧᤴ ᤅᤠᤛᤡ (᥋) ᤂᤖᤧ᤺ᤱ ᤏᤢ ᤏᤧᤳᤇᤡ (᥈) ᤅᤠᤜᤠ᤹ ᤕᤠᤱᤛᤡᤱᤅᤠᤱ ᤛᤠᤱᤃᤪᤠᤶᤐᤣᤍᤠᤱ ᤗᤧᤵᤔᤠᤱ ᤀᤥᤔᤧᤳᤋᤢᤖ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴ ᤐᤡᤖᤢᤖ ᤂᤖᤧ᤺ᤱᤜᤠ᤹ ᤂᤧ᤺ᤰᤂᤢ॥ ᤜᤧᤰᤁᤩᤠᤱ ᤂᤧᤴ ᤔᤏᤠᤜᤠ᤹ ᤔᤧᤜᤠ᤺ᤳᤋᤢᤛᤡᤖ ᤑᤠ᤹ᤀᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ ᤐᤡᤖᤢᤛᤡ॥ ᤂᤧᤴ ᤏᤧᤳᤇᤡ ᤅᤠᤜᤠ᤹ᤀᤠᤱ ᤂᤧ᤺ᤰᤂᤢᤀᤠᤱ ᤔᤏᤠᤜᤠ᤹ ᤔᤧᤜᤠ᤺ᤳᤋᤢᤛᤡᤖ ᤑᤠ᤹ᤀᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ ᤐᤡᤖᤢᤛᤡᤖᤥ॥ 42ᤂᤧᤱᤜᤠ᤹ᤖᤧ ᤂᤠᤄᤠ ᤔᤧᤈᤖᤥ॥ 43ᤜᤧᤰᤁᤩᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤂᤧᤴ ᤂᤖᤧ᤺ᤱ ᤏᤢ ᤅᤠᤜᤠ᤹ᤖᤧ ᤁᤢᤈᤡ ᤁᤧᤏᤶᤒᤠᤜᤠ᤹ ᤔᤧᤛᤢᤵᤛᤢᤸᤗᤧ ᤌᤡᤰ-ᤏᤧᤳ (᥇᥈) ᤏᤀᤡᤔᤠ ᤕᤥᤖᤧᤖᤥ॥ 44ᤂᤧᤴ ᤂᤖᤧ᤺ᤱ ᤁᤧᤈᤠᤒᤠᤜᤠ᤹ ᤜᤧᤴᤇᤡᤱ ᤅᤠᤛᤡ (᥋.᥆᥆᥆) ᤕᤧᤶᤒᤡᤳᤇᤠ᤹ᤜᤠ᤹ᤖᤰ ᤔᤧᤘᤕᤧ॥

ᤕᤧᤛᤢᤴ ᤆᤫᤠ᤺ᤳ ᤛᤶᤎᤠᤱ ᤗᤠᤱᤄᤣᤰ

(ᤔᤳᤋᤡ ᥇᥊:᥈᥈-᥉᥌; ᤕᤢᤜᤢ ᥌:᥇᥋-᥈᥇)

45ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤂ᤺ᤱᤒᤣᤀᤥ ᤗᤠᤛᤧᤶᤔᤧ᤹ᤀᤠᤱ ᤘᤖᤰᤁᤡᤸᤗᤧ ᤏᤠᤜᤠᤱᤍᤠᤱ ᤒᤧᤌᤛᤣᤍᤠᤀᤥ ᤀᤡᤱᤃᤠ᤹ᤏᤢ᤺ᤸᤗᤧ ᤋᤃᤡ ᤐᤣᤃᤧᤶᤔᤧ᤹ ᤑᤠ᤹ᤀᤠᤱ ᤔᤢᤖᤠ ᤔᤧᤳᤋᤢᤛᤡ ᤜᤧᤰᤁᤩᤠᤱ ᤂᤧᤶᤓᤩᤠᤖᤡᤰ ᤌᤠᤖᤡᤰᤗᤧ ᤔᤏᤠᤛᤢᤶᤜᤠ᤹ ᤐᤠᤱᤛᤢᤍᤣᤛᤢᤛᤡ॥ 46ᤜᤧᤰᤁᤩᤠᤱ ᤂᤧᤱᤜᤠ᤹ᤏᤢ ᤛᤧᤴᤍᤧᤀᤠᤱ ᤂᤢᤏᤧ᤹ ᤋᤢᤘᤠ ᤆᤥ᤺ᤰᤛᤧ ᤌᤥ ᤁᤥ᤺ᤰᤔᤠᤀᤥ ᤐᤣᤖᤥ॥ 47ᤀᤠᤸᤗ ᤂᤠᤍᤠᤔᤧᤸᤗᤧ ᤂ᤺ᤱᤒᤣᤴ ᤘᤖᤰᤁᤡᤸᤗᤧ ᤁᤢᤗᤢᤶᤔᤥ ᤘᤕᤧ. ᤜᤧᤰᤁᤩᤠᤱ ᤘᤖᤰᤁᤡᤸᤗᤧ ᤁᤢᤕᤠᤀᤥ ᤕᤧᤛᤢ᤺ᤴᤃ ᤀᤣ᤺ᤰ ᤘᤕᤧᤖᤥ॥ 48ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤛᤢᤖᤡᤳ ᤁᤣᤈᤱᤅᤡᤴ ᤂᤢᤏᤡ᤹ ᤋᤰᤗᤧᤵᤔᤠᤱᤏᤢ ᤜᤢ᤺ᤖᤧᤒᤠᤸᤗᤧ ᤂ᤺ᤱᤒᤣᤴ ᤘᤖᤰᤁᤥ ᤋᤃᤡ ᤋᤣ᤹ᤔᤠ ᤁᤧᤛᤠᤰᤐᤠ ᤔᤧᤍᤢᤔᤢᤀᤠᤱ ᤔᤧᤕᤠᤃᤧᤒᤠ ᤕᤧᤛᤢᤖᤧ ᤏᤡᤛᤢᤛᤡ॥ ᤜᤧᤰᤁᤣ᤺ᤸᤗᤧ ᤀᤡᤱᤘᤠ ᤁᤠᤔᤠᤏᤢ᤺ᤸᤗᤧ ᤋᤃᤡ ᤕᤧᤛᤢᤴ ᤘᤖᤰᤁᤥ ᤗᤠᤱᤄᤣᤃᤧᤖ ᤐᤣᤖᤥ॥ ᤜᤧᤰᤁᤩᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤕᤠᤃᤧᤒᤠ ᤂ᤺ᤱᤒᤣᤴ ᤗᤠᤶᤒᤠᤰᤔᤠ ᤀᤡ᤺ᤳᤋᤢᤸᤗᤧ 49-50ᤂᤧᤱᤜᤠ᤹ᤖᤧ ᤂᤢᤏᤧ᤹ ᤗᤠᤱᤄᤣᤃᤧᤒᤠ ᤔᤧᤏᤡᤛᤢᤀᤠᤱ ᤁᤱᤃ ᤛᤡᤛᤠᤶᤏᤣ ᤑᤠ᤹ᤀᤠᤱ ᤛᤠ᤹ᤖᤡᤰ ᤔᤧᤃᤡᤛᤧᤖ ᤔᤧᤀ᤺ᤰᤋᤧ॥ ᤂᤡᤔᤥ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤔᤧᤃᤡᤛᤧᤶᤔᤡᤴᤏᤧ᤹᥄ ᤀᤡᤱᤃᤠ᤹ ᤕᤣᤛᤢᤀᤠ॥ ᤜᤠᤱᤜᤠᤱ ᤗ᤹ᤖᤧᤶᤔᤧ᤹ᤀᤥ᥄” 51ᤜᤧᤰᤁᤩᤠᤱ ᤕᤧᤛᤢᤴ ᤂ᤺ᤱᤒᤣᤀᤥ ᤗᤠᤛᤧᤀᤠᤱ ᤛᤢᤖᤡᤳ ᤁᤣᤈᤱᤅᤡᤴ ᤜᤢᤔᤠ ᤆᤰ ᤗ᤹ᤖᤧ॥ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤛᤠ᤹ᤖᤡᤰ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧ॥ 52ᤂᤧᤱᤜᤠ᤹ᤖᤧ ᤂᤖᤧ᤺ᤱᤅᤡᤸᤗᤧ ᤕᤖᤡᤰ ᤔᤏᤠᤜᤠ᤹ ᤋᤧᤰᤋᤢᤛᤡᤒᤠ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤁᤡᤴ ᤁᤢᤛᤡᤱ ᤔᤧᤴᤏᤡ᤺ᤳᤋᤣ ᤔᤧᤘᤕᤧ. ᤌᤣᤀᤠᤱᤓᤧᤸᤗᤧ ᤂᤢᤏᤡ᤹ ᤏᤡᤱᤘᤠ᤹ ᤁᤧᤎᤢᤱᤒᤠ ᤆᤥᤃᤧᤖᤥ॥

53-54ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤘᤖᤰᤁᤡᤸᤗᤧ ᤏᤠᤎᤠ᤺ᤶᤒᤡ ᤔᤧᤃᤠ᤺ᤰᤋᤢᤀᤠᤱ ᤃᤏᤧᤛᤖᤧᤳᤋᤥ ᤔᤧᤃᤧᤖᤧᤀᤠᤱ ᤂ᤺ᤱᤒᤣᤴ ᤀᤡᤔᤧᤄᤣ᤺ᤰᤂᤢ॥ ᤕᤧᤛᤢᤴ ᤂ᤺ᤱᤒᤣᤗᤠᤶ ᤗ᤺ᤴᤍᤧᤏᤢᤔᤧ᤺ᤴᤏᤣ ᤂᤧᤵᤔᤥᤒᤠ ᤔᤏᤠᤜᤠ᤹ ᤁᤧᤖᤧᤰᤗᤧ ᤂᤢᤏᤧ᤹ ᤁᤢᤛᤡᤱ ᤔᤧᤏᤡ᤺ᤳᤋᤢ॥ 55ᤜᤧᤰᤁᤩᤠᤱ ᤂᤧᤱᤜᤠ᤹ ᤂᤡᤖᤡᤒᤠ ᤋᤧᤴᤏᤥ ᤔᤧᤗᤥ᤺ᤰᤋᤧᤖ ᤔᤧᤒᤣᤀᤠᤱ ᤁᤧᤍᤢᤰᤐᤠ ᤁᤧᤕ᤹ᤒᤠᤜᤠ᤹ ᤕᤧᤛᤢᤴ ᤘᤕᤧᤒᤠ ᤋᤧᤴᤏᤥᤀᤣ ᤂᤢᤏᤡ᤹ ᤏᤧᤳᤏᤠ᤺ᤴᤏᤢᤀᤣ ᤔᤧᤍᤠᤖᤢᤛᤡᤖᤥ॥ 56ᤐᤠᤱᤓᤣ᤹ ᤐᤠᤱᤈᤢᤶ ᤕᤧᤰᤕᤰᤁᤥ ᤂᤢᤏᤧ᤹ ᤀᤠᤳᤋᤠᤴ ᤐᤣᤛᤠᤱ ᤁᤧᤍᤢᤰᤐᤠ ᤁᤧᤕ᤹ᤒᤠᤜᤠ᤹ ᤁᤢᤗᤠᤶᤔᤥ ᤔᤧᤏᤧᤛ᤻ᤛᤢᤛᤡᤖᤥ॥ ᤜᤧᤰᤁᤩᤠᤱ ᤕᤧᤛᤢᤖᤧ ᤁᤢᤍᤣ᤺ᤳᤋᤡᤸᤗᤧ ᤁᤢᤛᤢᤰᤐᤧᤴᤗᤰᤛᤠᤱ ᤛᤢᤔᤠ ᤑᤠ᤹ᤀᤠᤱ ᤁᤧᤍᤢᤰᤐᤠᤜᤠ᤹ᤖᤧ ᤐᤣᤗᤡ ᤔᤧᤓᤠᤰᤋᤢ. ᤜᤧᤰᤁᤩᤠᤱ ᤂᤢᤏᤧ᤹ ᤁᤧᤛᤢᤒᤠᤜᤠ᤹ ᤁᤧᤖᤧᤰ ᤔᤧᤘᤣ᤺ᤳᤋᤧᤖᤥ॥

Currently Selected:

ᤔᤷᤁᤢᤛ 6: LIFOTNT

Highlight

Copy

Compare