ᤔᤷᤁᤢᤛ 7

ᤐᤠᤎᤧᤒᤠᤜᤠ᤹ᤖᤧ ᤂᤢᤏᤡ᤹ ᤛᤠᤰᤌᤡᤶᤔᤡᤴ

(ᤔᤳᤋᤡ ᥇᥋:᥇-᥏)

1ᤌᤡᤰᤕᤧᤴ ᤕᤖᤢᤛᤗᤧᤔ ᤕᤧᤰᤕᤰᤗᤠᤶ ᤁᤢᤓᤠ ᤑᤖᤡᤛᤡᤜᤠ᤹ ᤏᤢ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤕᤧᤛᤢᤖᤥ ᤔᤧᤍᤩᤧ॥ 2ᤂᤧᤱᤜᤠ᤹ᤖᤧ ᤕᤧᤛᤢᤖᤧ ᤁᤢᤓᤠ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤕᤜᤢᤍᤡᤜᤠ᤹ᤖᤧ ᤂᤢᤏᤡ᤹ ᤘᤠᤜᤵᤛᤡᤱᤔᤠ ᤆᤥ᤺ᤰᤌᤡᤶ ᤁᤢᤀᤡᤛᤡᤰ ᤜᤢᤰ ᤘᤠᤔᤧᤴᤜᤵᤐᤣ ᤆᤠ ᤔᤧᤈᤒᤠ ᤔᤧᤏᤡᤛᤢᤛᤡ॥ 3(ᤑᤖᤡᤛᤡᤜᤠ᤹ ᤏᤢ ᤁᤠᤰ ᤕᤜᤢᤍᤡᤜᤠ᤹ᤖᤧ ᤂᤢᤏᤡ᤹ ᤐᤠᤎᤧᤒᤠᤜᤠ᤹ᤖᤧ ᤂᤢᤏᤡ᤹ ᤛᤠᤰᤌᤡᤶ ᤁᤢᤀᤡᤛᤡᤰ ᤘᤠᤔᤧᤴᤜᤵᤛᤡᤱᤅᤣ ᤆᤠ ᤔᤧᤴᤈᤏᤧᤴᤗᤥ॥ 4ᤂᤧᤱᤜᤠ᤹ᤖᤧ ᤐᤠᤱᤈᤢᤶᤗᤠᤶ ᤜᤡᤶᤔᤥ ᤔᤧᤍᤠ᤺ᤸᤗᤧ ᤘᤠᤜᤵᤛᤡᤱᤔᤠ ᤏᤢ ᤛᤣᤛᤣᤛᤠᤱᤛᤠᤱ ᤆᤥ᤺ᤰᤔᤠ ᤌᤡᤶ ᤔᤧᤴᤈᤥ᤺ᤰᤁᤣ ᤔᤧᤴᤈᤏᤧᤴ॥ ᤂᤧᤱᤜᤠ᤹ᤖᤧ ᤑᤱᤏᤠᤜᤠ᤹. ᤆᤧᤳᤌᤩᤠᤜᤠ᤹. ᤂᤵᤐᤩᤠᤜᤠ᤹ ᤘᤠᤜᤵᤔᤠ ᤛᤢᤳᤌᤥ ᤆᤥ᤺ᤰᤔᤠ ᤘᤣ᤹ ᤌᤡᤶᤜᤠ᤹ᤀᤠᤱ ᤔᤧᤃᤳᤋᤢᤖᤥ॥) 5ᤜᤧᤰᤁᤣ᤺ᤸᤗᤧ ᤑᤖᤡᤛᤡᤜᤠ᤹ ᤏᤢ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ᤖᤧ ᤕᤧᤛᤢᤴ ᤛᤣ᤺ᤴᤔᤧᤗᤠᤵᤋᤢ. “ᤁᤧᤜᤢ᤹ᤛᤠᤶᤒᤠᤜᤠ᤹ᤖᤧᤃ ᤛᤢᤳᤌᤥ ᤆᤥ᤺ᤰᤔᤠ ᤌᤡᤶ ᤔᤧᤴᤈᤥ᤺ᤰᤁᤣ ᤆᤠ ᤔᤧᤈᤒᤠ ᤀᤠᤏᤡᤃᤣ ᤏᤡ᤺ᤶᤏᤠ॥ ᤌᤣᤀᤠᤱ ᤁᤧᤜᤢ᤹ᤛᤠᤶᤒᤠᤜᤠ᤹ᤖᤧ ᤀᤠᤏᤡ᤹ ᤐᤠᤎᤧᤒᤠᤜᤠ᤹ᤖᤧ ᤔᤧᤈᤥᤃᤢ ᤔᤧᤕᤢᤖᤢᤒᤠ ᤌᤡᤶᤔᤡᤴ ᤔᤧᤴᤀᤡ᤺ᤳᤋᤢᤴ ᤔᤧᤴᤏᤠ᤺ᤳᤋᤢᤴᤒᤠᤒᤣ᥅”

6ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤂᤡᤏᤡ᤹ ᤏᤡᤱᤘᤠ᤹ ᤁᤧᤈᤡ᤺ᤵᤐᤠᤜᤠ᤹ᤖᤧ ᤂᤡᤏᤡ᤹ ᤕᤠ᤺ᤶᤒᤣᤀᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤒᤠ᤺ᤴᤏᤡᤴ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤕᤛᤤᤕᤠ᤺ᤸᤗᤧ ᤛᤠᤵᤋᤢᤒᤠᤱᤃ ᤛᤧᤰᤂᤠᤀᤣ ᤗᤠ᤹ᤖᤢᤖᤥ.

“‘ᤁᤴ ᤔᤏᤠᤜᤠ᤹ᤖᤧᤃ ᤂᤢᤏᤡ᤹ ᤔᤢᤖᤠ᤺ᤸᤗᤧᤖᤰ ᤔᤡᤱᤛᤥ ᤀᤡᤱᤎᤠᤱ ᤔᤧᤒᤡᤀᤠᤖᤥ.

ᤁᤖ ᤂᤢᤏᤡ᤹ ᤏᤡᤱᤘᤠ᤹ᤀᤡᤴ ᤀᤡᤱᤃᤠ᤹ ᤗᤧᤵᤔᤠᤱ ᤜᤥᤵᤗᤥ॥

7ᤁᤱᤜᤠ᤹ᤖᤧ ᤜᤏᤧ ᤛᤧᤘᤠ ᤔᤧᤈᤥ᤺ᤰᤁᤠ.

ᤁᤖ ᤔᤧᤜᤢ᤹ᤖᤢᤛᤡᤒᤠ ᤏᤡᤛᤠᤶᤔᤡᤱᤃ ᤔᤧᤴᤇᤠᤶ ᤕᤠᤵᤔᤡᤖᤧ ᤀᤠᤵᤑᤣᤰ ᤔᤧᤈᤥᤃᤢᤒᤠ ᤌᤡᤶᤖᤰᤗᤥ॥’#ᤕᤛᤤ ᥈᥏:᥇᥉

8ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠᤱᤅᤡᤴ ᤁᤧᤏᤠ᤹ᤖᤢᤶᤔᤠᤱ ᤔᤧᤴᤇᤠᤶᤃᤧᤴ ᤕᤠᤵᤔᤡᤜᤠ᤹ᤖᤧ ᤂᤢᤏᤡ᤹ ᤆᤥ᤺ᤰᤌᤡᤶᤔᤡᤴ ᤁᤧᤀᤡ᤺ᤳᤋᤢᤶ ᤁᤧᤏᤠ᤺ᤳᤋᤢᤶᤗᤥ॥

9“ᤂᤡᤏᤡ᤹ ᤐᤠᤎᤧᤒᤠᤜᤠ᤹ᤖᤧ ᤔᤧᤈᤥᤃᤢ ᤔᤧᤕᤢᤖᤢᤒᤠ ᤌᤡᤶᤔᤡᤴ ᤀᤡ᤺ᤵᤔᤠ ᤏᤠ᤺ᤵᤔᤠ ᤛᤠ᤹ᤖᤡᤰ ᤆᤠ᤺ᤵᤐᤠ ᤁᤧᤈᤥᤃᤡ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠᤱᤅᤡᤴ ᤁᤧᤏᤠ᤹ᤖᤢᤶᤗᤥ॥ 10ᤁᤢᤒᤡᤀᤥ ᤔᤥᤛᤠ᤺ᤸᤗᤧ#᥍:᥇᥆ ᤔᤥᤛᤠ—ᤂᤢᤏᤧ᤹ ᤀᤢᤴᤇᤥᤴ ᤕᤜᤢᤍᤡᤜᤠ᤹ᤖᤧ ᤂᤢᤏᤡ᤹ ᤗᤠᤶᤗᤥᤒᤠ ᤘᤕᤧ॥ ᤂᤢᤏᤧ᤹ᤀᤣ ᤕᤜᤢᤍᤡᤜᤠ᤹ ᤔᤡᤛᤪ ᤗᤠᤈᤣ᤹ᤗᤠᤶ ᤆᤥ᤺ᤰᤕᤢᤶᤓᤥ ᤆᤥᤃᤢ ᤗ᤺ᤳᤋᤢᤛᤡᤀᤠᤱ ᤛᤠᤶᤕᤥᤌᤡᤶ ᤐᤡᤖᤢᤛᤡ॥ ᤐᤠ᤺ᤳᤋᤢᤀᤠᤱ ᤘᤠ᤹. ‘ᤁᤧᤶᤒᤠ ᤁᤧᤶᤔᤠᤛᤡ ᤔᤡᤱᤛᤥ ᤀᤡᤱᤎᤠᤱ ᤐᤡᤖᤧᤛᤧ᤹’ ᤜᤧᤰᤁᤩᤠᤱ ‘ᤀᤠᤳᤋᤡᤸᤗᤧ ᤁᤢᤶᤒᤠ ᤁᤢᤶᤔᤠᤛᤡ ᤛᤠᤱᤃᤪᤠ ᤔᤧᤳᤋᤢᤛᤡ. ᤂᤧᤱᤃ ᤛᤧᤵᤔᤠᤀᤣ ᤐᤥᤱᤗᤥ॥’#ᤗᤠ ᥈᥆:᥇᥈. ᥈᥇:᥇᥍ 11ᤁᤖ ᤂᤡᤏᤡ᤹ ᤑᤖᤡᤛᤡᤜᤠ᤹ᤖᤧ ᤕᤠᤵᤔᤡᤜᤠ᤹. ‘ᤆᤩᤠ ᤀᤡᤱᤃᤠ᤹ᤗᤠᤶ ᤁᤢᤓᤠ᤹ ᤁᤧᤄᤥᤛᤢᤶ. ᤂᤧᤴ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤷᤒᤠᤏ ᤐᤡᤔᤏᤠᤒᤠᤖᤥ’ ᤗ᤹ᤖᤡᤰ ᤂᤢᤏᤡ᤹ ᤐᤠᤔᤠᤜᤠ᤹ ᤜᤧᤰᤁᤣ ᤔᤧᤵᤔᤠᤛᤡ ᤏᤢᤒᤠᤖᤥ ᤑᤠ᤹ᤀᤠᤱ ᤁᤧᤔᤧᤳᤋᤢᤶᤛᤡᤶᤗᤥ (ᤁᤢᤷᤒᤠᤏ ᤑᤠ᤹ᤀᤡᤴ ᤏᤡᤱᤘᤠ᤹ᤑᤢᤔᤠᤱᤅᤥ ᤋᤥ᤺ᤶᤏᤠᤒᤠ ᤜᤢᤰᤛᤥᤕᤠᤱᤗᤥ)॥ 12ᤜᤧᤰᤁᤣᤗ᤹ᤖᤡᤰ ᤂᤧᤴ ᤁᤢᤶᤒᤠ ᤁᤢᤶᤔᤠᤛᤡ ᤁᤢᤓᤠ᤹ ᤐᤡᤔᤠ ᤂᤡᤏᤡ᤹ ᤁᤧᤶᤒᤠᤱᤄᤢᤶᤔᤡᤴᤗᤥ॥ 13ᤀᤰᤂᤣᤗ᤹ᤖᤡᤰ ᤂᤡᤏᤡ᤹ ᤁᤧᤒᤥᤱᤒᤠ ᤁᤧᤕᤢ᤺ᤒᤠ ᤆᤥ᤺ᤰᤌᤡᤶᤜᤠ᤹ ᤁᤧᤀᤡ᤺ᤳᤋᤢᤶ ᤁᤧᤏᤠ᤺ᤳᤋᤢᤶᤔᤠᤱ ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰᤁᤡᤴ ᤁᤧᤗᤧᤖᤢᤶ ᤁᤧᤍᤣ᤺ᤛᤢᤶᤗᤥ॥ ᤒᤠᤜᤧᤰᤋᤱᤒᤠ ᤕᤠ᤺ᤶᤒᤰᤜᤠ᤹ᤖᤰ ᤂᤡᤏᤡ᤹ ᤁᤧᤈᤥᤃᤢᤶ॥”

14ᤕᤧᤛᤢᤖᤧ ᤔᤏᤠᤜᤠ᤹ ᤕᤠᤶᤔᤥ ᤀᤢ᤺ᤳᤋᤢᤛᤡᤀᤠᤱ ᤔᤧᤳᤋᤢᤛᤡ. “ᤂᤡᤏᤡ᤹ ᤁᤧᤖᤧᤰᤗᤧ ᤀᤡᤱᤃᤠ᤹ ᤀᤠᤒᤠ᤺ᤴᤏᤡᤴ ᤂᤧᤵᤛᤧᤶᤔᤧ᤹ᤀᤠᤱ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹ᤀᤥ॥ 15ᤗᤠ᤺ᤰᤁᤠᤳᤗᤠᤶ ᤔᤏᤠ ᤛᤡᤃᤠᤱ ᤁᤧᤗᤠ᤺ᤵᤐᤠ ᤐᤠ᤺ᤴᤏᤡᤸᤗᤧ ᤔᤏᤠᤴ ᤀᤠᤛᤢᤳᤌᤥ ᤔᤧᤈᤥᤃᤢᤴᤗᤥ. ᤁᤖ ᤏᤡᤱᤘᤠ᤹ᤀᤥᤗᤠᤶ ᤗᤠ᤺ᤰᤁᤠᤳ ᤁᤧᤗ᤺ᤶᤒᤠ ᤐᤠ᤺ᤴᤏᤡᤸᤗᤧᤀᤣ ᤔᤏᤠᤴ ᤀᤠᤛᤢᤳᤌᤥ ᤆᤥᤃᤢ᤹ᤖᤥ॥ 16((ᤏᤧᤰᤂᤥ᤹ ᤁᤧᤒᤵᤐᤠᤜᤠ᤹ᤖᤧ ᤏᤢ᤺ᤖᤡᤰᤁᤠᤱ ᤂᤧᤵᤛᤧᤶᤔᤧ᤹ᤀᤥ॥”)) 17ᤂᤧᤴ ᤔᤏᤠᤜᤠ᤹ ᤐᤰᤌᤛᤡᤀᤠᤱ ᤕᤧᤛᤢᤴ ᤜᤡᤶᤛᤡᤃᤠᤱ ᤗᤠᤛᤧ ᤜᤧᤰᤁᤩᤠᤱ ᤂᤧᤵᤔᤥ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤂᤢᤏᤧ᤹ ᤁᤴ ᤂᤧᤍᤠ᤹ᤀᤡᤸᤗᤧ ᤁᤢᤒᤣᤴ ᤌᤧᤔᤠᤒᤣ ᤑᤠ᤹ᤀᤠᤱ ᤛᤣ᤺ᤴᤔᤧᤍᤥᤛᤢᤖᤥ॥ 18ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤠᤸᤗᤛᤠᤱ ᤂᤡᤏᤡ᤹ ᤏᤡᤱᤘᤠ᤹ ᤐᤠ᤺ᤰᤗᤥ᥄ ᤔᤏᤠ ᤛᤡᤃᤠᤱ ᤁᤧᤗᤠ᤺ᤵᤐᤠ ᤆᤠ᤺ᤔᤏᤠᤒᤠ ᤁᤢᤈᤠ᤺ᤸᤗᤧ ᤂᤧᤴ ᤀᤠᤛᤢᤳᤌᤥ ᤔᤧᤈᤥᤃᤢᤴ ᤁᤧᤗ᤹ᤒᤠ ᤁᤧᤴᤏᤡᤛᤢᤶᤔᤡᤴᤒᤡ᥅ 19ᤁᤱᤃ ᤛᤡᤰᤗᤢᤱᤔᤠᤀᤥ ᤔᤧᤒᤣ᤺ᤰᤏᤧᤴ. ᤁᤖ ᤁᤴ ᤛᤠᤵᤐᤥ᤺ᤰᤁᤥ ᤗᤠ᤺ᤳᤋᤠᤱ ᤗᤠ᤺ᤰᤁᤠᤳ ᤗ᤺ᤶᤒᤣ᤺ᤰᤗᤥ॥” (ᤀᤰᤂᤣᤗ᤹ᤖᤡᤰ ᤕᤧᤛᤢᤖᤧ ᤁᤠᤰ ᤆᤠ᤺ᤔᤏᤠᤒᤠ ᤆᤠᤜᤠ᤹ ᤛᤢᤳᤌᤥ ᤆᤥᤰ ᤑᤠ᤹ᤀᤠᤱ ᤐᤠ᤺ᤳᤋᤢᤖᤥ॥) 20ᤜᤧᤰᤁᤩᤠᤱ ᤕᤠᤶᤔᤥ ᤂᤢᤏᤧ᤹ ᤐᤠ᤺ᤳᤋᤢ. “ᤛᤡᤰᤗᤢᤱᤔᤥᤗᤠᤶ ᤁᤧᤗ᤺ᤶᤒᤠ ᤐᤠ᤺ᤴᤏᤡᤸᤗᤧ ᤂᤢᤏᤧ᤹ ᤀᤠᤛᤢᤳᤌᤥ ᤆᤥᤃᤢ᤹ᤖᤥ॥ 21-22ᤌᤣᤀᤠᤱᤓᤧᤸᤗᤧ ᤔᤧᤴᤇᤠᤶᤃᤧᤴ ᤕᤠᤵᤔᤡ ᤏᤡᤱᤘᤠ᤹ ᤛᤡᤃᤠᤱᤗᤠᤶ ᤑᤧᤴᤏᤡᤱᤘᤠ᤹. ᤕᤠᤶᤒᤥ᤺ᤵᤔᤠ. ᤂᤢ᤺ᤶᤔᤠ. ᤔᤏᤠᤛᤧᤵᤔᤠ. ᤆᤠᤖᤠᤶᤔᤠ ᤕᤠ᤺ᤶᤒᤰ. ᤂᤡ᤺ᤶᤔᤠ. ᤋᤠᤵᤑᤧ᤺ᤶᤒᤠ ᤏᤡᤱᤘᤠ᤹ ᤆᤥ᤺ᤰᤔᤠ. ᤀᤡᤱᤗᤧᤰ ᤆᤥ᤺ᤰᤔᤠ. ᤆᤧᤸᤗᤧᤰᤗᤧᤰ ᤗ᤹ᤔᤠ. ᤏᤠᤜᤧᤶᤔᤠ. ᤆᤧ᤹ᤕᤠ ᤀᤡᤱᤍᤥ ᤐᤠ᤺ᤵᤔᤠ. ᤀᤠᤱᤍᤡᤱ ᤗ᤹ᤔᤠ. ᤀᤍᤱᤐᤠᤴ ᤆᤥ᤺ᤰᤔᤠ. ᤜᤧᤰᤋᤱᤒᤠ ᤑᤧᤴ ᤐᤠ᤺ᤴᤜᤠ᤹ ᤗ᤺ᤴᤗᤥ॥ 23ᤀᤰᤋᤱᤒᤠ ᤑᤧᤴ ᤐᤠ᤺ᤴᤜᤠ᤹ ᤛᤡᤃᤠᤱᤗᤠᤶ ᤗᤠ᤺ᤰᤁᤠᤳ ᤗ᤺ᤴᤏᤠᤱ ᤔᤏᤠᤴ ᤀᤠᤛᤢᤳᤌᤥ ᤆᤥᤃᤢ᤹ᤖᤥ॥”

ᤌᤡᤶᤔᤧᤴᤍᤱ ᤔᤧᤴᤇᤢᤔᤠ᤹ᤀᤡᤸᤗᤧ ᤁᤢᤏᤛᤠᤴ

(ᤔᤳᤋᤡ ᥇᥋:᥈᥇-᥈᥎)

24ᤕᤧᤛᤢᤴ ᤂᤧᤴ ᤋᤧᤴᤏᤥᤗᤠᤶ ᤋᤠᤕᤖ ᤏᤢ ᤛᤡᤍᤥᤏ ᤕᤧᤰᤕᤰ ᤂᤡᤖᤡᤒᤠ ᤌᤢᤶᤜᤠ᤹ᤀᤥ ᤐᤣᤖᤥ॥ ᤜᤧᤰᤁᤩᤠᤱ ᤂᤢᤏᤧ᤹ ᤌᤡᤰ ᤜᤡᤶᤔᤥ ᤗᤠᤛᤧ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤂᤧᤵᤔᤥ ᤋᤩᤧᤒᤠ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤏᤡᤱᤘᤠ᤹ ᤔᤧᤱᤄᤥᤛᤢᤴᤗ ᤁᤧᤗ᤹ᤒᤠ ᤀᤡᤋᤢᤀᤠᤱ ᤘᤕᤧ॥ ᤁᤖ ᤂᤢᤏᤧ᤹ ᤆᤡᤱᤛᤡᤱᤔᤠ ᤔᤧᤛᤢᤰᤋᤧᤴᤗᤥ॥ 25ᤁᤖ ᤁᤢᤛ᤻ᤛᤠᤴ ᤑᤧᤴᤛᤠᤶᤔᤡᤸᤗᤧ ᤕᤠᤱᤄᤢᤀᤠᤱ ᤁᤧᤘᤠ᤹ᤔᤠ ᤔᤧᤴᤇᤢᤔᤠ᤹ᤀᤡᤸᤗᤧ ᤂᤢᤏᤧ᤹ ᤋᤩᤧᤒᤠ ᤐᤠ᤺ᤴᤏᤡᤴ ᤂᤧᤵᤛᤢᤏᤠᤔᤧ᤺ᤴᤏᤣ ᤕᤧᤛᤢᤖᤥ ᤋᤩᤧᤀᤠᤱ ᤁᤢᤗᤠᤱᤈᤰᤐᤥ ᤌᤢᤱᤒᤥᤜᤈ᤹ ᤕᤢᤱᤛᤡᤱ॥ 26ᤂᤧᤴ ᤔᤧᤴᤇᤢᤔᤠᤴ ᤛᤡᤖᤡᤕᤠ ᤗᤠᤈᤣ᤹ᤛᤔᤠ ᤛᤢᤖᤥᤑᤥᤏᤡᤛᤡᤕᤠ ᤌᤢᤶᤔᤥ ᤛᤠᤃᤧᤘᤠ᤺ᤴᤇᤡᤱᤔᤠ ᤌᤡᤶᤔᤧᤴᤍᤱ ᤛᤢᤘᤠᤱᤛᤔᤠ ᤘᤕᤧ॥ ᤂᤧᤸᤗᤧ ᤀᤠᤛ᤻ᤛᤠ ᤆᤢᤰᤔᤧᤸᤗᤥᤗᤠᤶ ᤑᤧᤴᤛᤠᤶᤜᤠ᤹ ᤗ᤺ᤳᤋᤠᤱ ᤐᤡᤖᤠᤱᤅᤧ᤹ᤏᤠ ᤑᤠ᤹ᤀᤠᤱ ᤂᤢᤏᤧ᤹ ᤐᤣᤗᤡ ᤑᤠᤰᤋᤢ॥ 27ᤕᤧᤛᤢᤖᤧ ᤂᤧᤴ ᤔᤧᤴᤇᤢᤔᤠ᤹ᤀᤡᤴ ᤔᤧᤳᤋᤢ. “ᤜᤡᤴᤈᤠ᤹ᤒᤡᤳᤇᤠᤜᤠ᤹ᤖᤧ ᤂᤖᤧ᤺ᤱᤅᤡᤴ ᤂᤠᤄᤠ ᤔᤧᤈᤖ ᤐᤥᤱ॥ ᤜᤡᤴᤈᤠ᤹ᤒᤡᤳᤇᤠᤜᤠ᤹ᤖᤧ ᤂᤢᤏᤡ᤹ ᤂᤖᤧ᤺ᤱᤅᤡᤴ ᤏᤠᤵᤔᤠᤛᤡᤀᤠᤱ ᤁᤥ᤺ᤳᤆᤥᤜᤠ᤹ ᤐᤡᤔᤠᤛᤡ ᤏᤢᤒᤠ ᤔᤣ᤺ᤴᤗᤥ॥”

28ᤜᤧᤰᤁᤣ᤺ᤸᤗᤧ ᤂᤧᤴ ᤔᤧᤴᤇᤢᤔᤠ᤹ᤀᤡᤸᤗᤧ ᤏᤥᤃᤵ ᤐᤡᤖᤢ. “ᤛᤧᤰᤂᤠᤀᤣᤖᤥ ᤀᤠᤍᤠᤱᤒᤣ. ᤁᤖ ᤁᤥ᤺ᤳᤆᤥᤜᤠ᤹ᤖᤧᤀᤠᤱ ᤜᤡᤴᤈᤠ᤹ᤒᤡᤳᤇᤠᤜᤠ᤹ᤖᤧ ᤂᤢᤏᤡ᤹ ᤆᤠᤔᤠᤍᤧᤴᤏᤥᤗᤠᤶ ᤔᤰᤁᤧᤎᤠ᤺ᤒᤠ ᤁᤢᤈᤡᤜᤠ᤹ ᤔᤧᤈᤖᤥ॥”

29ᤕᤧᤛᤢᤖᤧ ᤂᤧᤴ ᤔᤧᤴᤇᤢᤔᤠ᤹ᤀᤡᤴ ᤔᤧᤳᤋᤢ. “ᤂᤧᤏᤧ᤹ ᤏᤢᤒᤠ ᤏᤛᤠᤴ ᤁᤢᤎᤡᤶᤒᤠ ᤏᤥᤃᤵ ᤁᤧᤒᤡᤖᤠᤱᤒᤠᤸᤗᤧ ᤆᤥᤃᤢᤸᤗᤧ ᤁᤧᤜᤡᤶᤔᤥ ᤐᤣᤃᤧ᤹. ᤁᤧᤛ᤻ᤛᤠ ᤆᤢᤰᤔᤧᤸᤗᤥᤗᤠᤶ ᤑᤧᤴᤛᤠᤶᤔᤡᤴ ᤗ᤺ᤴᤍᤧ ᤐᤣᤀᤠᤱ ᤘᤠ᤹ᤖᤥ॥” 30ᤂᤧᤴ ᤔᤧᤴᤇᤢᤔᤠ᤹ᤀᤡᤴ ᤁᤢᤜᤡᤶᤔᤥ ᤏᤢ᤺ᤰᤂᤧ ᤐᤣᤀᤠᤱ ᤁᤢᤛ᤻ᤛᤠᤴ ᤏᤢ᤺ᤖᤡᤰᤁᤠᤱ ᤁᤢᤏᤧᤳᤏᤠᤀᤥ ᤀᤡᤵᤛᤧᤀᤠᤱ ᤏᤧᤛ᤻ᤛᤧᤒᤠ ᤋᤢᤔᤢ. ᤌᤣᤀᤠᤱᤓᤧᤸᤗᤧ ᤑᤧᤴᤛᤠᤶᤜᤠ᤹ᤖᤧ ᤂᤧᤴ ᤔᤧᤗᤧᤖᤢ ᤔᤧᤎᤀᤠᤱ ᤘᤕᤧ॥

ᤕᤧᤛᤢᤖᤧ ᤏᤠᤎᤠᤰᤐᤠ ᤔᤏᤠᤴ ᤘᤣ᤺ᤴᤍᤢ᤹

31ᤕᤧᤛᤢᤴ ᤋᤠᤕᤖᤗᤠᤶ ᤛᤡᤍᤥᤏ ᤐᤥ᤺ᤰᤂᤧᤖ ᤐᤣᤀᤠᤱ ᤂᤢᤏᤧ᤹ ᤃᤠᤗᤡᤗ ᤘᤖᤰ ᤏᤢ ᤌᤡᤒᤥᤱ ᤐᤠᤱᤈᤢᤶᤔᤡᤸᤗᤧᤴ ᤌᤢᤶᤔᤥ ᤐᤣᤖᤥ॥ 32ᤂᤧᤵᤔᤥ ᤔᤏᤠᤜᤠ᤹ᤖᤧ ᤏᤠᤎᤠᤰᤐᤠ ᤏᤢ ᤁᤢᤒᤠᤴ ᤔᤧᤴᤗ᤺ᤶᤔᤏᤠᤒᤠ ᤔᤏᤠᤎᤡᤰ ᤔᤧᤍᤠᤖᤢᤀᤠᤱ ᤕᤧᤛᤢᤖᤧ ᤁᤢᤜᤢᤰᤁᤡᤴ ᤁᤢᤛᤶᤍᤠᤱ ᤏᤧᤛ᤻ᤛᤢᤏᤡ ᤑᤠ᤹ᤀᤠᤱ ᤐᤣᤗᤡ ᤔᤧᤓᤠᤰᤋᤢᤖᤥ॥ 33-34ᤕᤧᤛᤢᤖᤧ ᤂᤧᤴ ᤔᤏᤠᤜᤠ᤹ᤗᤠᤶ ᤔᤠ᤺ᤱᤄᤠ ᤋᤣ᤹ᤖᤢᤀᤠᤱ ᤁᤢᤏᤧᤰᤂᤥ᤹ᤒᤥ ᤜᤢᤰᤆᤥᤴ ᤁᤣ᤺ᤳᤋᤢ. ᤜᤧᤰᤁᤩᤠᤱ ᤜᤢᤰᤁᤥ ᤌᤩᤠ᤺ᤳ ᤌᤥ᤺ᤰᤋᤢᤀᤠᤱ ᤁᤢᤗᤧᤛᤥ᤺ᤵᤐᤡᤴ ᤛᤢᤛᤢ ᤜᤧᤰᤁᤩᤠᤱ ᤋᤠᤱᤛᤠᤰᤐᤧᤴ ᤗᤧᤵᤔᤠᤱ ᤀᤥᤔᤕᤧᤀᤠᤱ ᤛᤰᤔᤠ ᤛᤥ᤺ᤴᤇᤡᤱᤗ “ᤀᤡᤑ᤻ᤑᤠᤌᤠ” ᤔᤧᤳᤋᤢᤖᤥ॥ ᤂᤧᤴ ᤑᤠ᤹ᤀᤡᤴ “ᤜᤴᤇᤡᤱᤅᤧ᤹” ᤐᤥᤱᤗᤥ॥ 35ᤂᤡᤔᤥ ᤂᤧᤴ ᤔᤏᤠᤴ ᤏᤧᤰᤂᤥ᤹ ᤂᤧᤶᤔᤠ ᤁᤧᤛᤢᤰᤐᤠ ᤏᤢ ᤐᤠ᤺ᤵᤔᤠ ᤁᤧᤛᤢᤰᤐᤠ ᤐᤥ᤺ᤰᤂᤧᤀᤠᤱ ᤏᤢᤖᤡᤰ ᤐᤠ᤺ᤵᤔᤠ ᤜᤣ᤺ᤰᤋᤧᤖᤥ॥ 36ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤴ ᤔᤏᤠᤜᤠ᤹ ᤁᤴ ᤐᤠ᤺ᤴᤏᤡᤴ ᤜᤠ᤺ᤳᤋᤠᤱ ᤔᤧᤵᤔᤠᤛᤡ ᤔᤣ᤺ᤴ ᤑᤠ᤹ᤀᤠᤱ ᤀᤡᤱᤈᤠᤱ ᤐᤡᤖᤢᤛᤡᤖᤥ॥ ᤁᤖ ᤀᤠᤰᤂᤧᤴ ᤔᤧᤵᤔᤠᤛᤡ ᤔᤣ᤺ᤴᤗᤥ ᤔᤧᤳᤋᤢᤛᤡᤛᤠᤱ ᤁᤴ ᤀᤡᤱᤓᤴᤏᤡᤴ ᤔᤧᤛᤧᤛᤢᤖ ᤔᤧᤍᤣ᤹ᤖᤢᤖᤥ॥ 37ᤂᤧᤱᤜᤠ᤹ᤖᤧ ᤛᤠ᤹ᤖᤡᤰ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤖ ᤀᤰᤂᤣ ᤔᤧᤒᤠ᤺ᤳᤋᤢᤖᤥ. “ᤂᤢᤏᤧ᤹ᤃ ᤁᤠᤰ ᤐᤠ᤺ᤴᤜᤠ᤹ ᤛᤠ᤹ᤖᤡᤰ ᤏᤢᤒᤠ ᤆᤥᤃᤢᤀᤠᤱ ᤘᤠ᤹ᤖᤥ᥄ ᤀᤰᤂᤣᤗ᤹ᤖᤡᤰ ᤏᤠᤎᤠᤰᤐᤠᤜᤠ᤹ ᤏᤢ ᤐᤠ᤺ᤵᤔᤠ ᤔᤧᤴᤇᤢᤰᤔᤏᤠᤒᤠᤜᤠ᤹ᤀᤠᤱ ᤏᤢᤛᤢᤛᤡᤖᤥ॥”

Currently Selected:

ᤔᤷᤁᤢᤛ 7: LIFOTNT

Highlight

Copy

Compare