ᤔᤷᤁᤢᤛ 5
5
ᤑᤧᤴᤛᤠᤶᤔᤡᤸᤗᤧ ᤋᤖᤢᤒᤠ ᤔᤏᤠᤴ ᤘᤣ᤺ᤳ
(ᤔᤳᤋᤡ ᥎:᥈᥎-᥉᥊; ᤗᤢᤁᤠ ᥎:᥈᥌-᥉᥏)
1ᤕᤧᤛᤢᤴ ᤏᤢ ᤁᤢᤜᤢ᤹ᤛᤠᤶᤒᤠᤜᤠ᤹ ᤘᤖᤰᤁᤡᤸᤗᤧ ᤏᤠᤜᤠᤱᤍᤠᤱ ᤃᤣᤖᤠᤛᤣᤏᤛ ᤗᤠᤈᤣ᤹ᤀᤥ ᤔᤧᤃᤧᤖᤧ॥ 2ᤕᤧᤛᤢᤴ ᤂ᤺ᤱᤒᤣᤀᤥᤏᤢ ᤗᤠ᤺ᤰᤁᤠᤳ ᤗ᤺ᤴᤍᤧᤏᤢᤔᤧ᤺ᤴᤏᤣ ᤑᤧᤴᤛᤠᤶᤔᤡᤸᤗᤧ ᤕᤠᤱᤄᤢᤒᤠ ᤔᤏᤠᤎᤡᤰ ᤀᤡ᤺ᤵᤐᤢᤱᤍᤧᤴᤏᤥᤗᤠᤶ ᤂᤢᤏᤧ᤹ ᤁᤢᤍᤢᤶᤛᤧ ᤋᤩᤧ॥ 3ᤂᤧᤴ ᤔᤏᤠᤴ ᤀᤡ᤺ᤵᤐᤢᤱᤍᤧᤴᤜᤠ᤹ᤀᤥ ᤘᤕᤧᤃᤳᤋᤧ॥ ᤜᤠ᤺ᤳᤗᤧᤀᤠᤱ ᤂᤧᤴ ᤑᤧᤴᤌᤰᤁᤪᤱᤅᤡᤸᤗᤧᤀᤠᤱ ᤀᤡᤄᤣ᤺ᤱᤔᤠ ᤔᤧᤛᤢᤰᤋᤢᤴ. 4ᤌᤣᤀᤠᤱᤓᤧᤸᤗᤧ ᤔᤏᤠᤜᤠ᤹ᤖᤧ ᤕᤖᤡᤰᤗᤧᤱ ᤁᤢᤜᤢᤰ ᤁᤢᤗᤠᤱᤅᤥ ᤀᤡᤔᤧᤄᤣ᤺ᤰᤂᤢ ᤔᤧᤓᤳᤇᤢ ᤔᤧᤒᤡᤖᤢᤒᤠ ᤑᤧᤴᤌᤰᤁᤪᤱᤜᤠ᤹ ᤏᤢ ᤑᤧᤴᤜᤢᤰᤐᤠ᤺ᤱᤃᤡᤜᤠ᤹ ᤑᤢ᤹ᤖᤢᤀᤠᤱ ᤘᤕᤧᤖᤥ॥ ᤀᤠᤳᤋᤡᤸᤗᤧᤀᤠᤱ ᤂᤧᤴ ᤔᤏᤠᤴ ᤕᤢᤰᤁᤥ ᤁᤵᤔᤠ ᤔᤧᤛᤢᤰᤋᤢᤴᤗᤥ॥ 5ᤂᤧᤴ ᤀᤡ᤺ᤵᤐᤢᤱᤍᤧᤴᤏᤥ ᤏᤢ ᤁᤥ᤺ᤰᤔᤠ ᤑᤠᤱᤈᤱᤄᤠ᤺ᤳᤋᤡᤖᤰ ᤛᤧᤴᤍᤡᤰ ᤗᤧᤴᤍᤡᤰ ᤀ᤺ᤰᤋᤧᤖ ᤑᤡ᤺ᤰᤋᤧᤖ ᤗᤢᤱᤅᤡᤸᤗᤧ ᤂᤧ᤺ᤴᤇᤡᤱᤗ ᤘᤕᤧᤃᤳᤋᤧᤖᤥ॥ 6ᤜᤧᤰᤁᤩᤠᤱ ᤂᤧᤸᤗᤧ ᤕᤧᤛᤢᤴ ᤔᤠ᤺ᤱᤄᤠᤗᤠᤶᤔᤣ ᤏᤡᤛᤢᤀᤠᤱ ᤗᤥ᤺ᤰᤋᤧᤖ ᤑᤧᤖᤧᤀᤠᤱ ᤔᤡᤱᤛᤥ ᤀᤡᤱᤎᤠᤱ ᤐᤡᤖᤢᤖ ᤁᤢᤗᤠᤱᤈᤰᤁᤥ ᤌᤢᤱᤒᤥᤜᤈ᤹ ᤕᤢᤱᤛᤡᤱᤗᤥ॥ 7ᤂᤧᤸᤗᤧ ᤕᤶᤒᤠ ᤀᤡᤰᤗᤠᤀᤥ ᤀ᤺ᤰᤋᤧᤖ ᤕᤧᤛᤢᤴ ᤔᤧᤳᤋᤢ. “ᤁᤧᤖᤧᤰᤏᤢ᤺ᤸᤗᤧ ᤐᤕᤶ ᤕᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛ᤻ᤛᤠ ᤕᤧᤛᤢᤀᤣ. ᤂᤧᤏᤧ᤹ ᤀᤡᤱᤃᤠ᤹ᤏᤢ ᤌᤣ ᤁᤧᤃᤥ᤺ᤳᤋᤢᤒᤠᤒᤣ᥅ ᤀᤡᤱᤃᤠ᤹ ᤋᤢᤰᤂᤣ ᤔᤧᤈᤠ᤺ᤳᤋᤠᤱᤅᤡᤴᤏᤧ᤹ ᤑᤠ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤱᤅᤥ ᤐᤣᤗᤡ ᤑᤠᤰᤏᤧ᤹ᤖᤥ॥” 8(ᤌᤣᤀᤠᤱᤓᤧᤸᤗᤧ ᤋᤃᤡ ᤕᤧᤛᤢᤖᤧ ᤂᤧᤴ ᤑᤧᤴᤛᤠᤶᤔᤡᤴ ᤂᤧᤏᤧ᤹ ᤂᤧᤴ ᤔᤏᤠᤀᤥᤗᤠᤶ ᤗᤠ᤺ᤰᤁᤠᤳ ᤗ᤺ᤴᤍᤧ ᤐᤣᤃᤧ᤹ ᤑᤠ᤹ᤀᤠᤱ ᤔᤧᤳᤋᤢᤀᤠᤱ ᤘᤕᤧᤖᤥ॥)
9ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤴ ᤛᤣ᤺ᤴᤍᤥᤛᤢ. “ᤁᤧᤔᤡᤱ ᤌᤧᤔᤠᤒᤣ᥅”
ᤜᤧᤰᤁᤩᤠᤱ ᤂᤧᤸᤗᤧ ᤏᤥᤃᤵ ᤐᤡᤖᤢ. “ᤀᤡᤱᤃᤠ᤹ ᤀᤠᤔᤡᤱ ᤋᤢᤖᤠᤖᤥ. ᤌᤣᤀᤠᤱᤓᤧᤸᤗᤧ ᤁᤴ ᤔᤏᤠᤀᤥ ᤀᤠᤏᤡᤃᤣ ᤕᤖᤡᤰ ᤕᤠᤃᤡᤃᤧ॥”
10ᤜᤧᤰᤁᤩᤠᤱ ᤂᤧᤸᤗᤧ ᤕᤧᤛᤢᤴ ᤀᤧᤳᤗᤧᤱ ᤀᤧᤳᤗᤧᤱ ᤐᤣᤗᤡ ᤑᤠᤰᤋᤢ. “ᤁᤴ ᤌᤢᤶᤔᤥᤗᤠᤶ ᤀᤠᤏᤡᤃᤣ ᤀᤠᤶᤒᤠᤱᤄᤧᤴᤏᤧ᤹ᤀᤥ॥” 11ᤀᤠᤸᤗ ᤂᤧᤴ ᤁᤥ᤺ᤰᤔᤠᤀᤥ ᤕᤖᤡᤰ ᤑᤠᤰᤜᤠ᤹ ᤆᤠᤔᤧᤖᤠᤔᤧᤖ ᤔᤧᤕᤧᤒᤧ॥ 12ᤜᤧᤰᤁᤩᤠᤱ ᤂᤧᤴ ᤑᤧᤴᤛᤠᤶᤜᤠ᤹ᤖᤧ ᤕᤧᤛᤢᤴ ᤐᤣᤗᤡ ᤔᤧᤓᤠᤰᤋᤢ. “ᤀᤠᤏᤡᤃᤣ ᤂᤧᤴ ᤑᤠᤰᤜᤠ᤹ᤀᤥ ᤗᤠ᤺ᤵᤔᤠ ᤀᤠᤒᤠᤱᤄᤧ᤹ᤀᤥ॥ ᤀᤠᤏᤡᤃᤣ ᤂᤧᤱᤜᤠ᤹ᤀᤥ ᤗᤠ᤺ᤛᤡᤃᤧ᤹॥” 13ᤜᤧᤰᤁᤩᤠᤱ ᤕᤧᤛᤢᤖᤧᤀᤠᤱ ᤂᤧᤱᤜᤠ᤹ ᤗᤠ᤺ᤵᤔᤠ ᤐᤠᤱᤄᤢᤛᤡᤀᤠᤱ ᤑᤧᤴᤛᤠᤶᤜᤠ᤹ ᤂᤧᤴ ᤔᤏᤠᤀᤥᤗᤠᤶ ᤔᤧᤗ᤺ᤴᤍᤧ ᤔᤧᤒᤣᤀᤠᤱ ᤑᤠᤰᤜᤠ᤹ᤀᤥ ᤔᤧᤗᤠᤛᤧ॥ ᤂᤧᤴ ᤜᤧᤴᤇᤡᤱ ᤏᤧᤳᤇᤡ ᤕᤠᤖᤡᤰ ᤑᤠᤰᤜᤠ᤹ ᤛᤱᤔᤠᤱᤅᤣ ᤛᤱᤔᤠᤱ ᤔᤧᤗᤥ᤺ᤰᤋᤧᤖ ᤕᤠᤰᤐᤧᤀᤥᤏᤢ ᤔᤰᤔᤧᤎᤩᤧᤀᤠᤱ ᤘᤖᤰᤁᤥ ᤔᤧᤜᤢᤔᤧ ᤔᤧᤛᤩᤧᤖᤥ॥ 14ᤂᤧᤵᤔᤥ ᤑᤠᤰ ᤁᤧᤃᤶᤒᤠᤜᤠ᤹ᤀᤠᤱ ᤔᤧᤘᤕᤧ॥ ᤂᤧᤱᤜᤠ᤹ ᤔᤧᤗᤥ᤺ᤰᤋᤧᤖ ᤔᤧᤒᤣᤀᤠᤱ ᤐᤠᤱᤈᤢᤶᤔᤥ ᤏᤢ ᤂᤧᤴ ᤂᤡᤖᤡᤒᤠ ᤐᤠᤱᤓᤣ᤹ᤜᤠ᤹ᤀᤥ ᤁᤴ ᤐᤠ᤺ᤴᤏᤡᤴ ᤔᤧᤛᤧᤛᤢ॥ ᤜᤧᤰᤁᤩᤠᤱ ᤔᤏᤠᤜᤠ᤹ ᤌᤣ᤺ᤴᤏᤧ ᤐᤥ᤺ᤰᤂᤧᤒᤣ ᤑᤠ᤹ᤀᤠᤱ ᤀᤥᤔᤧᤳᤇᤧ 15-16ᤕᤧᤛᤢᤴ ᤘᤕᤧᤒᤠ ᤋᤧᤴᤏᤥ ᤔᤧᤍᤩᤧᤖᤥ॥ ᤂᤧᤵᤔᤥ ᤂᤧᤱᤜᤠ᤹ᤖᤧ ᤋᤃᤡ ᤑᤧᤴᤛᤠᤶᤔᤡᤸᤗᤧ ᤕᤠᤱᤄᤢᤒᤠ ᤔᤏᤠᤴ ᤘᤣ᤺ᤳᤋᤧᤀᤠᤱ ᤏᤢᤖᤡᤰᤁᤠᤱ ᤋᤣᤳ ᤆᤠᤰᤂᤢᤀᤠᤱ ᤕᤢᤅᤧᤒᤠ ᤔᤧᤏᤡᤛᤢ॥ ᤜᤧᤰᤁᤩᤠᤱ ᤂᤧᤴ ᤔᤏᤠᤴ ᤏᤢ ᤑᤠᤰᤜᤠ᤹ ᤌᤣ ᤔᤧᤒᤥ᤺ᤰᤂᤧ ᤑᤠ᤹ᤀᤠᤱ ᤁᤧᤏᤡᤒᤠ ᤔᤏᤠᤜᤠ᤹ᤖᤧ ᤔᤧᤈᤧᤰᤋᤢᤛᤡ॥ ᤜᤧᤰᤁᤩᤠᤱ ᤂᤧᤱᤜᤠ᤹ ᤛᤠ᤹ᤖᤡᤰ ᤔᤧᤃᤡᤛᤧ॥ 17ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤖᤧ ᤕᤧᤛᤢᤴ ᤀᤠᤏᤡᤃᤣ ᤌᤢᤶᤔᤥᤗᤠᤶ ᤗ᤺ᤴᤍᤧ ᤐᤣᤃᤧ᤹ ᤑᤠ᤹ᤀᤠᤱ ᤐᤣᤗᤡ ᤔᤧᤓᤠᤰᤋᤢᤖᤥ॥ 18ᤕᤧᤛᤢᤴ ᤂ᤺ᤱᤒᤣᤀᤥ ᤗᤠᤛᤧᤖ ᤐᤳᤇᤧᤸᤗᤧ ᤋᤃᤡ ᤑᤧᤴᤛᤠᤶᤔᤡᤸᤗᤧ ᤕᤠᤱᤄᤢᤒᤠ ᤔᤏᤠᤴ ᤕᤧᤛᤢᤖᤧ ᤁᤢᤒᤣᤛᤠᤱ ᤋᤩᤧᤀᤠᤱ. ᤀᤠᤍᤠᤱᤒᤣ. ᤀᤡᤱᤃᤠ᤹ᤀᤠᤱ ᤂᤧᤏᤧ᤹ᤏᤢᤀᤣ ᤋᤣ᤹ᤖᤠᤱᤅᤧ᤹ᤀᤥ ᤑᤠ᤹ᤀᤠᤱ ᤐᤣᤗᤡ ᤑᤠᤰᤋᤢ॥ 19ᤁᤖ ᤕᤧᤛᤢᤖᤧ ᤔᤧᤍᤧᤴᤍᤧᤴᤗ ᤀᤰᤂᤣ ᤔᤧᤳᤋᤢ. “ᤂᤧᤏᤧ᤹ ᤏᤢ᤺ᤰᤂᤧ ᤐᤣᤃᤧ᤹ᤀᤠᤱ ᤁᤧᤜᤡᤶᤛᤕᤱ ᤏᤢ ᤁᤧᤒᤠᤱᤓᤣ᤹ᤛᤠᤒᤠᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤗᤠᤃᤡ ᤆᤥᤃᤢᤒᤠ ᤕᤶᤒᤠ ᤕᤠ᤺ᤶᤒᤰᤁᤡᤴ ᤏᤢ ᤗᤢᤱᤔᤠ᤹ ᤁᤧᤍᤢᤰᤋᤧᤒᤠ ᤐᤠ᤺ᤴᤏᤡᤴ ᤆᤧᤰᤋᤧᤛᤧ᤹ᤀᤥ॥” 20ᤜᤧᤰᤁᤩᤠᤱ ᤂᤧᤴ ᤔᤏᤠᤴᤏᤠᤱ ᤂᤧᤵᤔᤥᤗᤠᤶ ᤏᤢ᤺ᤰᤂᤧ ᤐᤣᤀᤠᤱ ᤌᤡᤒᤥᤱ ᤐᤠᤱᤈᤢᤶᤔᤡᤸᤗᤧᤴ ᤌᤢᤶᤔᤥ ᤂᤠᤖᤠᤰ ᤕᤧᤛᤢᤖᤧ ᤆᤥᤃᤢᤒᤠ ᤕᤶᤒᤠ ᤐᤠ᤺ᤴᤏᤡᤴ ᤀᤡᤱᤓᤴ ᤛᤧᤛᤢᤖᤥ॥ ᤜᤧᤰᤁᤩᤠᤱ ᤔᤏᤠᤜᤠ᤹ᤖᤧ ᤂᤧᤴ ᤔᤧᤄᤧᤵᤛᤢᤀᤠᤱ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤖᤥ॥
ᤁᤧᤛᤡᤔᤠ ᤆᤢᤰᤔᤧᤴ ᤏᤢ ᤁᤧᤍᤢᤰᤔᤠ ᤔᤧᤴᤇᤢᤔᤠᤴ
(ᤔᤳᤋᤡ ᥏:᥇᥎-᥈᥌; ᤗᤢᤁᤠ ᥎:᥊᥆-᥋᥌)
21ᤕᤧᤛᤢᤴ ᤂ᤺ᤱᤒᤣᤀᤥ ᤗᤠᤛᤧᤀᤠᤱ ᤘᤖᤰᤁᤡᤸᤗᤧ ᤏᤠᤜᤠᤱᤍᤠᤱ ᤏᤢ᤺ᤰᤂᤧ ᤐᤣᤀᤠᤱ ᤘᤖᤰᤁᤡᤸᤗᤧ ᤁᤢᤕᤠᤀᤥ ᤕᤖᤡᤰ ᤔᤏᤠᤜᤠ᤹ ᤁᤢᤃᤒᤪᤡᤱ ᤔᤧᤈᤢᤵᤛᤧᤖᤥ॥ 22ᤐᤠᤱᤋᤡᤒᤠ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥᤒᤠ ᤗᤠᤶᤗᤥᤒᤠ ᤕᤠᤀᤡᤖᤛ ᤔᤧᤵᤔᤏᤠᤒᤠ ᤔᤏᤠᤴ ᤋᤩᤧ ᤜᤧᤰᤁᤩᤠᤱ ᤕᤧᤛᤢᤖᤧ ᤁᤢᤗᤠᤱᤈᤰᤁᤥ ᤜᤒᤳ ᤑᤴᤇᤡᤱᤗ 23ᤀᤰᤂᤣᤗ᤹ᤖᤡᤰ ᤐᤣᤗᤡ ᤑᤠᤰᤋᤢ. “ᤀᤠᤍᤠᤱᤒᤣ. ᤀᤡᤱᤃᤠ᤹ ᤀᤠᤛ᤻ᤛᤠ᤺ ᤆᤢᤰᤔᤧᤴ ᤛᤡᤔᤠᤗᤡᤱᤎᤥᤀᤥ ᤁᤧᤖᤧᤀᤠᤱ ᤏᤧᤖᤥ॥ ᤂᤧᤴ ᤘᤣ᤺ᤳᤋᤠᤱ ᤜᤡᤱᤗ ᤑᤠ᤹ᤀᤠᤱ ᤂᤧᤏᤧ᤹ ᤑᤧᤖᤧ᤹ᤀᤠᤱ ᤁᤧᤜᤢᤰᤁᤡᤴ ᤁᤢᤛᤶᤍᤠᤱ ᤏᤧᤛ᤻ᤛᤧ ᤐᤡᤖᤧ᤹ᤀᤥ॥” 24ᤜᤧᤰᤁᤩᤠᤱ ᤕᤧᤛᤢᤴ ᤂᤧᤴᤏᤢ ᤌᤠᤛᤡᤱ. ᤜᤧᤰᤁᤩᤠᤱ ᤕᤖᤡᤰ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤆᤡᤓᤡ᤺ᤳ ᤔᤧᤓᤡ᤺ᤳᤋᤢᤖ ᤔᤧᤍᤡᤶᤍᤢᤖᤥ॥ 25ᤂᤧᤵᤔᤥ ᤋᤱᤒᤣ ᤌᤡᤰ-ᤏᤧᤳᤋᤠᤱᤎᤥ (᥇᥈) ᤔᤠᤰᤂᤡ᤹ ᤘᤕᤢ᤺ᤔᤠᤸᤗᤧ ᤋᤖᤢᤔᤠ ᤔᤧᤴᤇᤢᤔᤠ᤹ᤎᤡᤰ ᤘᤕᤧ॥ 26ᤂᤢᤏᤧ᤹ ᤕᤖᤡᤰ ᤛᤡᤍᤠ᤹ᤛᤠᤶᤒᤠᤜᤠ᤹ᤖᤥ ᤛᤡᤍᤠ᤹ ᤔᤧᤳᤇᤡᤱᤛᤧ ᤐᤣᤀᤠᤱ ᤂᤢᤏᤧ᤹ ᤁᤳᤋᤢᤒᤠ ᤁᤧᤖᤧᤰ ᤕᤠᤱᤛᤠᤁᤢᤴᤎᤣᤜᤠ᤹ ᤔᤠ᤺ᤴᤍᤢᤛᤠᤱ. ᤂᤧᤴ ᤘᤣ᤺ᤵᤔᤠᤸᤗᤧ ᤁᤢᤗᤧᤰᤘᤠ ᤂᤧᤴᤏᤢ᤺ᤸᤗᤧᤀᤠᤱ ᤛᤠ᤹ᤖᤡᤰ ᤋᤢᤃᤧᤒᤣᤀᤠᤱ ᤘᤕᤧᤖᤥ॥ 27ᤂᤧᤸᤗᤧ ᤕᤧᤛᤢᤖᤧ ᤁᤢᤕᤠ᤺ᤶᤒᤣᤀᤥ ᤂᤧᤵᤛᤢᤀᤠᤱ ᤘᤕᤧ॥ ᤜᤧᤰᤁᤩᤠᤱ ᤂᤧᤴ ᤔᤧᤴᤇᤢᤔᤠ᤹ᤀᤡᤸᤗᤧ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤀᤣᤃᤠᤱᤗᤠᤶ ᤋᤩᤧᤀᤠᤱ ᤕᤧᤛᤢᤖᤧ ᤁᤢᤍᤣ᤺ᤳᤋᤡᤴ ᤛᤢᤛᤢᤖᤥ॥ 28-29ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤁᤢᤍᤣ᤺ᤳᤋᤡᤴᤗᤰ ᤛᤢᤛᤢᤱᤛᤠᤱ ᤀᤡᤱᤃᤠ᤹ ᤘᤣ᤺ᤳᤋᤠ ᤗ᤹ᤖᤡᤰ ᤁᤢᤏᤡᤱᤘᤠ᤹ᤀᤥ ᤀᤡ᤺ᤳᤇᤡᤱ॥ ᤜᤧᤰᤁᤩᤠᤱ ᤕᤧᤛᤢᤖᤧ ᤁᤢᤍᤣ᤺ᤳᤋᤡᤴ ᤛᤢᤛᤢᤏᤢᤔᤧ᤺ᤴᤏᤣ ᤁᤢᤎᤰᤁᤥ ᤔᤠᤰᤂᤡ᤹ ᤘᤕᤢ᤺ᤔᤠᤴ ᤆᤡᤒᤧᤀᤠᤱ ᤆᤠᤱᤈᤠᤱ ᤗ᤹ᤖᤧᤒᤠ ᤏᤡᤱᤘᤠ᤹ ᤂᤥᤛᤢᤖᤥ॥ 30ᤂᤡᤔᤥ ᤕᤧᤛᤢᤖᤧ ᤁᤢᤎᤰᤁᤥᤏᤢ ᤔᤢᤰᤛᤠᤶ ᤗ᤺ᤴᤍᤧᤒᤠ ᤏᤡᤱᤘᤠ᤹ ᤂᤥᤛᤢᤀᤠᤱ ᤂᤡᤖᤡ ᤜᤡᤛᤡᤱᤅᤠᤱ ᤔᤏᤠᤜᤠ᤹ ᤀᤥᤔᤧᤳᤋᤢᤛᤡᤖ ᤔᤧᤳᤋᤢᤛᤡ. “ᤜᤠ᤺ᤳᤗᤧ ᤀᤡᤱᤃᤠ᤹ ᤀᤠᤍᤣ᤺ᤳᤋᤡᤴ ᤛᤢᤛᤢᤒᤣ᥅”
31ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤂᤢᤏᤧ᤹ ᤔᤧᤔᤧᤳᤋᤢ. “ᤀᤠᤍᤠᤱᤒᤣ. ᤀᤰᤂᤣᤗ᤹ᤖᤡᤰ ᤔᤏᤠᤜᤠ᤹ᤖᤧ ᤁᤧᤶᤈᤴᤗ ᤁᤧᤶᤓᤡ᤺ᤳᤗ ᤔᤧᤒᤳ. ᤜᤧᤰᤁᤣ᤺ᤸᤗᤧ ᤀᤠᤰᤂᤣᤗ᤹ᤖᤡᤰ ᤜᤠ᤺ᤳᤗᤧ ᤛᤢᤛᤠᤱᤒᤣ ᤑᤠ᤹ᤀᤠᤱ ᤁᤧᤒᤠ᤺ᤳᤋᤢᤒᤠᤒᤣ᥅”
32ᤁᤖ ᤕᤧᤛᤢᤖᤧ ᤂᤢᤏᤧ᤹ ᤁᤧᤛᤢᤔᤧᤴ ᤀᤥᤔᤧᤳᤇᤧ ᤂᤡᤖᤡ ᤀᤥᤔᤕᤧ॥ 33ᤂᤧᤴ ᤔᤧᤴᤇᤢᤔᤠ᤹ᤀᤡᤸᤗᤧ ᤏᤠᤛᤡᤱᤃᤧᤴ ᤁᤢᤎᤰᤁᤥ ᤐᤥ᤺ᤰᤂᤧᤒᤠ ᤐᤠ᤺ᤴᤏᤡᤴ ᤏᤡᤱᤘᤠ᤹ ᤀᤡᤋᤢᤀᤠᤱ ᤁᤢᤃᤡᤔᤠᤸᤗᤧ ᤕᤰᤂᤧᤖ ᤕᤧᤛᤢᤖᤧ ᤁᤢᤗᤠᤱᤈᤰᤁᤥ ᤜᤒᤳ ᤑᤴᤇᤡᤱᤗ ᤕᤧᤛᤢᤴ ᤁᤧᤖᤧᤰ ᤐᤠ᤺ᤴᤏᤡᤴ ᤆᤧᤰᤋᤢ॥ 34ᤜᤧᤰᤁᤩᤠᤱ ᤕᤧᤛᤢᤖᤧ ᤔᤧᤳᤋᤢ. “ᤔᤠᤔᤢᤀᤣ. ᤏᤛᤠᤴ ᤁᤧᤈᤥᤃᤢᤒᤠᤸᤗᤧ ᤆᤥᤃᤢᤸᤗᤧ ᤂᤧᤏᤧ᤹ ᤁᤧᤘᤣ᤺ᤳᤋᤧᤖᤥ॥ ᤂᤧᤏᤧ᤹ ᤁᤧᤘᤣ᤺ᤳᤋᤧᤀᤠᤱ ᤁᤧᤘᤠ᤹ᤖᤥ. ᤏᤢᤖᤡᤰᤁᤠᤱ ᤐᤣᤃᤧ᤹ᤀᤥ᥄”
35ᤕᤧᤛᤢᤴ ᤐᤠᤖᤧᤖ ᤐᤳᤇᤧᤸᤗᤧ ᤂᤧᤴ ᤗᤠᤶᤗᤥᤒᤠ ᤕᤠᤀᤡᤖᤛᤖᤧ ᤁᤢᤜᤡᤶᤔᤥᤗᤠᤶ ᤀᤡᤱᤛᤠᤒᤠᤜᤠ᤹ ᤔᤧᤍᤩᤧᤀᤠᤱ ᤔᤧᤔᤧᤳᤋᤢ. “ᤀᤠᤍᤠᤱᤒᤣ. ᤁᤧᤛ᤻ᤛᤠ᤺ᤱᤃ ᤛᤩᤧᤖᤥ॥ ᤀᤠᤸᤗ ᤛᤡᤰᤛᤠᤶᤒᤧᤴ ᤌᤣᤀᤠᤱ ᤋᤢᤰᤂᤣ ᤆᤠ᤺ᤵᤔᤠᤒᤣ᥅”
36ᤁᤖ ᤕᤧᤛᤢᤖᤧ ᤂᤧᤴ ᤂᤧᤶᤂᤧᤶᤔᤠᤱ ᤔᤧᤴᤗᤠᤵᤐᤣ ᤕᤠᤀᤡᤖᤛᤧᤴ ᤔᤧᤳᤋᤢ. “ᤂᤧᤏᤧ᤹ ᤔᤧᤃᤡᤛᤧᤴᤏᤧ᤹ᤀᤥ. ᤏᤛᤠ᤺ᤴᤗᤰ ᤆᤥᤃᤧ᤹ᤀᤥ॥”
37ᤜᤧᤰᤁᤩᤠᤱ ᤕᤧᤛᤢᤖᤧ ᤐᤋᤪᤢᤛ. ᤕᤠᤁᤢᤒ ᤏᤢ ᤁᤢᤴᤛᤠ᤹ ᤕᤢᤜᤢᤴᤏᤠ᤺ᤴᤗᤰ ᤂᤢᤏᤧ᤹ᤏᤢ ᤐᤣ᤺ᤰᤔᤠ ᤐᤠᤱᤄᤢᤛᤡ॥ 38ᤂᤧᤱᤜᤠ᤹ ᤕᤠᤀᤡᤖᤛᤖᤧ ᤁᤢᤜᤡᤶᤔᤥ ᤔᤧᤃᤧᤖᤧᤸᤗᤧ ᤔᤏᤠᤜᤠ᤹ ᤜᤕᤱ ᤁᤡᤸᤗᤡᤱ ᤏᤢ ᤔᤧᤖᤡᤱ ᤌᤰᤏᤢ ᤔᤧᤜᤠᤒᤧᤖ ᤔᤧᤕᤠᤃᤧᤒᤠ ᤕᤧᤛᤢᤖᤧ ᤏᤡᤛᤢᤛᤡ॥ 39ᤜᤧᤰᤁᤩᤠᤱ ᤂᤢᤏᤧ᤹ ᤜᤡᤶᤛᤡᤃᤠᤱ ᤗᤠᤛᤧᤀᤠᤱ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ ᤌᤣᤀᤠᤱ ᤜᤕᤱ ᤁᤡᤸᤗᤡᤱ ᤏᤢ ᤔᤧᤖᤡᤱ ᤌᤰᤏᤢ ᤁᤧᤜᤠᤒᤡᤒᤠᤒᤣ᥅ ᤆᤢᤰᤔᤧᤱᤃ ᤔᤧᤴᤇᤡᤀᤣ ᤘᤠ᤹. ᤀᤡᤵᤛᤧᤀᤠᤱᤗᤰ ᤏᤧ᤹॥”
40ᤂᤧᤱᤜᤠ᤹ᤖᤧ ᤂᤢᤏᤧ᤹ ᤔᤧᤀᤣ᤺ᤳᤋᤢ. ᤁᤖ ᤕᤧᤛᤢᤖᤧ ᤂᤧᤱᤜᤠ᤹ ᤁᤧᤖᤧᤰ ᤗᤠ᤺ᤰᤁᤠᤳ ᤗ᤺ᤳᤋᤢᤛᤡᤀᤠᤱ ᤆᤢᤰᤔᤧᤸᤗᤧ ᤁᤢᤶᤒᤠ ᤁᤢᤶᤔᤠ ᤜᤧᤰᤁᤩᤠᤱ ᤂᤢᤏᤧ᤹ᤏᤢ ᤁᤧᤘᤠ᤹ᤒᤠ ᤁᤢᤜᤢ᤹ᤛᤠᤶᤒᤠᤜᤠ᤹ ᤆᤢᤰᤔᤧᤴ ᤏᤧᤛ᤻ᤛᤧᤒᤠ ᤋᤧᤴᤏᤥ ᤋᤣ᤹ᤖᤢᤛᤡ॥ 41ᤜᤧᤰᤁᤩᤠᤱ ᤂᤧᤴ ᤆᤢᤰᤔᤧᤸᤗᤧ ᤁᤢᤜᤢᤰᤁᤥ ᤋᤧᤶᤛᤢᤀᤠᤱ “ᤋᤗᤡᤋᤠ ᤁᤢᤔᤡ” ᤔᤧᤳᤋᤢ. ᤂᤧᤸᤗᤧ ᤁᤢᤒᤣ᤺ᤱᤃ “ᤆᤢᤰᤔᤣ. ᤐᤥᤃᤧ᤹ᤀᤥ᥄” ᤐᤥᤱᤗᤥ॥ 42ᤂᤡᤔᤥ ᤂᤧᤴ ᤆᤢᤰᤔᤧᤴ ᤔᤢᤳᤌᤪᤡᤰ ᤐᤥᤃᤧᤀᤠᤱ ᤗᤠᤱᤄᤣᤃᤧ॥ (ᤂᤧᤴ ᤋᤱᤒᤣ ᤌᤡᤰ-ᤏᤧᤳ (᥇᥈) ᤁᤧᤖᤧᤀᤠᤱ ᤘᤕᤧ॥) ᤂᤧᤱᤜᤠ᤹ ᤁᤧᤖᤧᤰᤗᤧ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤖᤥ॥ 43ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤱᤜᤠ᤹ ᤁᤴ ᤐᤠ᤺ᤴᤏᤡᤴ ᤀᤠᤳᤋᤡᤴᤏᤠᤱ ᤔᤧᤔᤧᤳᤋᤧᤶᤔᤡᤴᤏᤧ᤹ ᤑᤠ᤹ᤀᤠᤱ ᤁᤧᤛᤠᤰᤐᤠ ᤀᤡᤱᤈᤠᤱ ᤐᤡᤖᤢᤛᤡ॥ ᤜᤧᤰᤁᤩᤠᤱ ᤂᤧᤴ ᤆᤢᤰᤔᤧᤴ ᤌᤧᤔᤠᤀᤡ ᤆᤠᤔᤠ ᤐᤡᤖᤧᤶᤔᤧ᤹ ᤑᤠ᤹ᤀᤠᤱ ᤔᤧᤳᤋᤢᤛᤡᤖᤥ॥
Currently Selected:
ᤔᤷᤁᤢᤛ 5: LIFOTNT
Highlight
Copy
Compare
Share
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.
