ᤔᤷᤁᤢᤛ 4

ᤕᤠ᤹ᤖᤡ᤺ᤶᤒᤠ ᤁᤧᤗᤧᤵᤐᤠᤸᤗᤧᤴ ᤂᤧᤍᤠ᤹

(ᤔᤳᤋᤡ ᥇᥉:᥇-᥏; ᤗᤢᤁᤠ ᥎:᥊-᥎)

1ᤕᤠᤱᤛᤡ ᤕᤠᤶᤔᤥ ᤕᤧᤛᤢᤖᤧ ᤃᤠᤗᤡᤗ ᤘᤖᤰᤁᤡᤸᤗᤧ ᤁᤢᤕᤠᤀᤥ ᤏᤡᤛᤠᤶ ᤜᤢ᤹ᤔᤠ ᤜᤣ᤺ᤰᤋᤢᤛᤡᤖᤥ॥ ᤂᤧᤵᤔᤥ ᤕᤖᤡᤰ ᤔᤏᤠᤜᤠ᤹ ᤔᤧᤈᤢᤵᤛᤧ. ᤜᤧᤰᤁᤣ᤺ᤸᤗᤧ ᤂᤢᤏᤧ᤹ ᤂ᤺ᤱᤒᤣᤀᤥ ᤗᤠᤛᤧᤀᤠᤱ ᤕᤢᤱᤛᤡᤱ. ᤁᤖ ᤔᤏᤠᤜᤠ᤹ ᤗᤠ᤺ᤰᤁᤠᤳ ᤘᤖᤰᤁᤡᤸᤗᤧ ᤁᤢᤕᤠᤀᤥ ᤔᤧᤕᤧᤒᤧ॥ 2ᤜᤧᤰᤁᤩᤠᤱ ᤕᤧᤛᤢᤖᤧ ᤀᤰᤂᤣᤗ᤹ᤖᤡᤰ ᤕᤖᤡᤰ ᤐᤠ᤺ᤴᤜᤠ᤹ ᤂᤧᤍᤠ᤹ᤀᤥ ᤜᤢ᤹ᤖᤢᤛᤡ—

3“ᤂᤧᤵᤛᤧᤶᤔᤧ᤹ᤀᤥ᥄ ᤗᤳᤇᤠ ᤕᤠ᤺ᤴᤁᤧᤔᤒᤠᤎᤡᤰ ᤕᤠ᤹ᤖᤡ᤺ᤶᤒᤠ ᤗᤧᤵᤛᤧ ᤐᤣᤖᤥ॥ 4ᤂᤧᤸᤗᤧ ᤕᤠ᤹ᤖᤡ᤺ᤶᤒᤧᤴ ᤗᤧᤵᤋᤢᤸᤗᤧ ᤁᤢᤓᤠ ᤕᤠ᤹ᤖᤡ᤺ᤶᤒᤧᤴ ᤗᤠᤶᤔᤥ ᤔᤰᤌᤩᤧ. ᤜᤧᤰᤁᤩᤠᤱ ᤐᤢᤜᤠ᤹ ᤔᤧᤍᤩᤧᤀᤠᤱ ᤔᤧᤈᤔᤧᤍᤣ᤺ᤛᤢᤖᤥ॥ 5-6ᤜᤧᤰᤁᤩᤠᤱ ᤁᤢᤓᤠ ᤕᤠ᤹ᤖᤡ᤺ᤶᤒᤧᤴ ᤗᤢᤱᤄᤧᤖᤧᤰᤁᤥ ᤆᤢᤰᤋᤧᤖᤥ॥ ᤂᤧᤱᤜᤠ᤹ ᤗᤡᤱᤔᤠᤃ ᤗᤡᤅᤧ. ᤁᤖ ᤕᤖᤡᤰ ᤂᤠᤶ ᤔᤧᤏᤧᤛ᤻ᤛᤧᤴᤏᤠᤱ ᤁᤢᤛᤠ᤺ᤵᤐᤡᤴ ᤂᤠᤶ ᤛᤡᤃᤠᤱᤎᤠᤖᤡᤰ ᤔᤧᤗᤠᤛᤧᤴᤒᤠᤸᤗᤧ ᤆᤥᤃᤢᤸᤗᤧ ᤁᤢᤍᤠ᤺ᤴᤍᤡᤰᤔᤠ ᤏᤠᤶ ᤛᤧ᤺ᤖᤧᤸᤗᤧ ᤏᤠᤶᤔᤡᤸᤗᤧ ᤕᤧᤶᤍᤢᤀᤠᤱ ᤁᤠᤰ ᤜᤣᤖᤧᤒᤣᤖᤥ॥ 7ᤜᤧᤰᤁᤩᤠᤱ ᤁᤢᤓᤠ ᤕᤠ᤹ᤖᤡ᤺ᤶᤒᤠᤱᤃ ᤋᤡᤱᤃᤪᤣᤰᤐᤠᤸᤗᤧ ᤁᤢᤛᤣ᤹ ᤁᤧᤏᤧᤒᤠ ᤋᤧᤴᤏᤥ ᤆᤢᤰᤋᤧᤀᤠᤱ ᤛᤥᤛᤥᤖᤡᤰ ᤗᤡᤅᤧᤸᤗᤧ ᤋᤡᤱᤃᤪᤣᤰᤐᤠᤸᤗᤧ ᤂᤧᤴ ᤛᤢ᤺ᤵᤋᤢᤍᤣ᤺ᤛᤢᤀᤠᤱ ᤁᤢᤈᤠ᤹ ᤌᤥ᤺ᤰᤔᤠ ᤔᤧᤛᤢᤰᤋᤧᤴᤗᤥ॥ 8ᤘᤣ᤹ ᤕᤠ᤹ᤖᤡ᤺ᤶᤒᤧᤴ ᤏᤢᤒᤠ ᤂᤠᤶᤔᤥ ᤆᤢᤰᤋᤧ॥ ᤜᤧᤰᤁᤩᤠᤱ ᤗᤡᤅᤧᤀᤠᤱ ᤂᤧᤱᤜᤠ᤹ᤖᤧ ᤛᤢᤶᤒᤥᤱ ᤗᤧᤱ (᥉᥆). ᤋᤢᤰᤐᤥᤱ ᤗᤧᤱ (᥌᥆) ᤜᤧᤰᤁᤩᤠᤱ ᤁᤡᤵᤌᤡᤰᤗᤧᤱ (᥇᥆᥆) ᤌᤠᤖᤡᤰ ᤁᤢᤈᤠ᤹ ᤐᤳᤇᤧᤖᤥ॥” 9ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤧᤶᤔᤠ ᤏᤧᤰᤂᤥ᤹ ᤁᤧᤃᤵᤐᤠᤜᤠ᤹ᤖᤧ ᤁᤴ ᤐᤠ᤺ᤴᤏᤡᤴ ᤏᤢᤖᤡᤰ ᤂᤧᤵᤛᤧᤶᤔᤧ᤹ᤀᤠᤱ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹ᤀᤥ᥄”

10ᤜᤧᤰᤁᤩᤠᤱ ᤕᤧᤛᤢᤴ ᤀᤧᤰᤗᤣ᤺ᤰ ᤘᤕᤧᤸᤗᤧ ᤌᤡᤰ-ᤏᤧᤳ (᥇᥈) ᤜᤢ᤹ᤛᤠᤶᤒᤠᤜᤠ᤹ ᤏᤢ ᤘᤣ᤹ ᤜᤢ᤹ᤛᤠᤶᤒᤠᤜᤠ᤹ᤖᤧ “ᤁᤴ ᤂᤧᤍᤠ᤹ᤀᤡᤸᤗᤧ ᤁᤢᤒᤣᤴ ᤌᤧᤔᤠᤒᤣ᥅” ᤑᤠ᤹ᤀᤠᤱ ᤛᤣ᤺ᤴᤔᤧᤍᤥᤛᤢ॥ 11ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤂᤡᤏᤡ᤹ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤸᤗᤧᤴ ᤛᤡᤃᤠᤱᤒᤠ ᤐᤠ᤺ᤴᤜᤠ᤹ ᤁᤢᤛᤡᤱ ᤏᤡ᤺ᤵᤔᤠ ᤁᤧᤄᤥᤛᤢᤶᤔᤠᤱ ᤁᤧᤘᤕᤡ᤹. ᤁᤖ ᤘᤣ᤹ ᤔᤏᤠᤜᤠ᤹ᤖᤧᤃ ᤂᤧᤍᤠ᤹ᤀᤥᤖᤰ ᤂᤧᤶᤔᤠ ᤔᤧᤄᤥᤛᤢ᤹ᤖᤥ॥ 12ᤂᤧᤸᤗᤧᤆᤥᤃᤢᤸᤗᤧ ᤀᤰᤂᤣ ᤛᤠᤵᤋᤧᤀᤠᤱ ᤐᤳ.

“‘ᤂᤧᤱᤜᤠ᤹ᤖᤧ ᤀᤥᤔᤧᤔᤧᤳᤋᤢ. ᤀᤧᤳᤗᤧᤱ ᤀᤥᤔᤧᤔᤧᤳᤋᤢᤛᤠᤱ ᤔᤧᤴᤏᤡᤛᤢᤴ॥

ᤂᤧᤱᤜᤠ᤹ᤖᤧ ᤀᤧᤳᤗᤧᤱ ᤔᤧᤄᤧᤵᤛᤢᤛᤠᤱ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤴ॥

ᤔᤣ᤺ᤴᤏᤣ ᤑᤠ᤹ᤃᤪ ᤂᤧᤱᤜᤠ᤹ᤃ ᤗᤠᤕᤥᤗᤠᤶ ᤔᤧᤏᤢ᤺ᤱ ᤔᤧᤍᤠᤀᤠᤱ ᤗᤠᤕᤥᤗᤠᤶ ᤗᤧᤵᤔᤡ ᤔᤧᤄᤥ᤺ᤛᤢ᤹ᤒᤠᤖᤥ॥’”#ᤕᤛᤤ ᥌:᥏-᥇᥆

ᤕᤧᤛᤢᤖᤧ ᤕᤠ᤹ᤖᤡ᤺ᤶᤒᤠ ᤁᤧᤗᤧᤵᤐᤠ ᤂᤧᤍᤠ᤹ᤀᤡᤸᤗᤧ ᤁᤢᤒᤣᤴ ᤜᤴᤍᤢᤐᤡᤖᤢᤛᤡ᤹

(ᤔᤳᤋᤡ ᥇᥉:᥇᥎-᥈᥉; ᤗᤢᤁᤠ ᥎:᥇᥇-᥇᥋)

13ᤕᤧᤛᤢᤖᤧ ᤂᤧᤱᤜᤠ᤹ ᤛᤣ᤺ᤴᤍᤥᤛᤢᤛᤡ. “ᤁᤴ ᤂᤧᤍᤠ᤹ᤀᤡᤴᤏᤣ ᤁᤢᤛᤡᤱ ᤁᤧᤴᤏᤡ᤺ᤳᤋᤢᤶᤔᤡᤴᤏᤧ ᤑᤠ᤹ᤃᤪ. ᤘᤣ᤹ ᤂᤧᤍᤠ᤹ᤜᤠ᤹ ᤀᤠᤰᤂᤣᤗ᤹ᤖᤡᤰ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤒᤠᤒᤣ᥅ 14ᤕᤠ᤹ᤖᤡ᤺ᤶᤒᤠ ᤁᤧᤗᤧᤵᤐᤠᤸᤗᤧ ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰᤁᤡᤴ ᤛᤧᤛᤢᤖᤥ॥ 15ᤁᤢᤓᤠ ᤔᤏᤠᤜᤠ᤹ ᤗᤠᤶᤔᤥ ᤁᤧᤈᤢᤰᤐᤠ ᤕᤠ᤹ᤖᤡ᤺ᤶᤒᤠ ᤁᤢᤀᤡᤛᤡᤰ ᤔᤧᤈᤥᤰᤗᤥ॥ ᤂᤧᤱᤜᤠ᤹ᤖᤧ ᤐᤠ᤺ᤴᤈᤠᤰ ᤔᤧᤄᤧᤵᤛᤢᤏᤢᤔᤧ᤺ᤴᤏᤣ ᤔᤠᤑᤧᤴᤛᤠᤶᤔᤡᤴ ᤋᤠᤀᤠᤱ ᤐᤠ᤺ᤴᤈᤠᤰᤁᤡᤴ ᤂᤢᤏᤡ᤹ ᤏᤡᤱᤘᤠ᤹ᤒᤥᤗᤠᤶ ᤗ᤺ᤳᤋᤢ ᤋᤣ᤹ᤖᤢᤖᤥ॥ 16ᤘᤣ᤹ ᤔᤏᤠᤜᤠ᤹ ᤗᤢᤱᤄᤧᤖᤧᤰᤁᤥ ᤁᤧᤈᤢᤰᤐᤠ ᤕᤠ᤹ᤖᤡ᤺ᤶᤒᤠ ᤁᤢᤀᤡᤛᤡᤰ ᤔᤧᤈᤥᤰᤗᤥ॥ ᤐᤠ᤺ᤴᤈᤠᤰ ᤔᤧᤄᤧᤵᤛᤢᤸᤗᤧ ᤔᤧᤛ᤺ᤳᤗ ᤔᤧᤄᤧᤵᤛᤢ᤹. 17ᤁᤖ ᤋᤠᤱᤒᤠ ᤁᤢᤛᤠ᤺ᤵ ᤁᤧᤒᤵᤐᤠ ᤁᤢᤒᤢᤱᤔᤠᤴ ᤜᤧᤰᤁᤣ ᤂᤧᤱᤜᤠ᤹ ᤛᤵᤑᤠᤖᤰ ᤔᤧᤒᤳᤗᤥ. ᤁᤖ ᤐᤠ᤺ᤴᤈᤠᤰᤁᤡᤴ ᤏᤛᤠᤴ ᤔᤧᤈᤥᤃᤢᤒᤠᤸᤗᤧ ᤆᤥᤃᤢᤸᤗᤧ ᤁᤧᤛᤠᤰᤐᤠ ᤐᤠᤴ ᤏᤢ ᤋᤢᤰᤂᤣᤴ ᤋᤠᤏᤢᤔᤧ᤺ᤴᤏᤣ ᤜᤠᤖᤠᤀᤣ ᤏᤛᤠ᤺ᤴᤏᤡᤴ ᤔᤧᤗᤧᤖᤢ ᤔᤧᤍᤣ᤺ᤛᤢ᤹ᤖᤥ॥ 18ᤘᤣ᤹ᤜᤠ᤹ ᤋᤡᤱᤃᤪᤣᤰᤐᤠ ᤗᤠᤀᤥ ᤁᤧᤈᤢᤰᤐᤠ ᤕᤠ᤹ᤖᤡ᤺ᤶᤒᤠ ᤁᤢᤀᤡᤛᤡᤰ ᤔᤧᤈᤥᤰᤗᤥ॥ 19ᤂᤧᤱᤜᤠ᤹ᤖᤧ ᤐᤠ᤺ᤴᤈᤠᤰ ᤂᤧᤶᤔᤠᤃ ᤔᤧᤄᤧᤵᤛᤢ᤹. ᤁᤖ ᤁᤴ ᤜᤡᤱᤔᤴᤏᤥ ᤌᤣ᤺ᤴ ᤆᤠᤔᤠ ᤌᤢᤱᤔᤠ. ᤕᤠᤱᤛᤠᤁᤢᤴᤎᤣᤛᤠᤒᤠ ᤀᤠᤰᤂᤣᤀᤠᤱ ᤐᤥᤱᤔᤠ ᤜᤧᤰᤋᤱᤒᤠ ᤘᤣ᤹ ᤑᤧᤴᤏᤡᤱᤘᤠ᤹ᤀᤡᤸᤗᤧ ᤐᤠ᤺ᤴᤈᤠᤰᤁᤡᤴ ᤛᤢ᤺ᤵᤋᤢᤍᤣᤛᤢ᤹ᤖᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤕᤠᤶᤔᤥ ᤁᤢᤈᤠ᤹ ᤔᤧᤶᤓᤳᤇᤢᤴᤗᤥ॥ 20ᤁᤖ ᤘᤣ᤹ ᤔᤏᤠᤜᤠ᤹ ᤏᤢᤒᤠ ᤂᤠᤶᤔᤥ ᤁᤧᤈᤢᤰᤐᤠ ᤕᤠ᤹ᤖᤡ᤺ᤶᤒᤠ ᤁᤢᤀᤡᤛᤡᤰ ᤔᤧᤈᤥᤰᤗᤥ॥ ᤂᤧᤱᤜᤠ᤹ᤖᤧ ᤐᤠ᤺ᤴᤈᤠᤰᤁᤡᤴ ᤔᤧᤄᤧᤵᤛᤢᤀᤠᤱ ᤏᤡᤱᤘᤠ᤹ᤀᤥ ᤔᤧᤍᤠ᤺ᤰᤋᤢ. ᤜᤧᤰᤁᤩᤠᤱ ᤛᤢᤶᤒᤥᤱ (᥉᥆) ᤗᤧᤱ. ᤋᤢᤰᤐᤥᤱ (᥌᥆) ᤗᤧᤱ ᤜᤧᤰᤁᤩᤠᤱ ᤁᤡᤵᤌᤡᤰ (᥇᥆᥆) ᤗᤧᤱ ᤌᤠᤖᤡᤰ ᤁᤢᤈᤠ᤹ ᤔᤧᤓᤳᤇᤢᤖᤥ॥”

ᤆᤶᤈᤶᤒᤠ ᤍᤧᤴᤏᤥ ᤛᤣᤔᤡᤴ

(ᤗᤢᤁᤠ ᥎:᥇᥌-᥇᥎)

21ᤀᤠᤸᤗ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ ᤛᤣᤔᤡᤴ ᤏᤧᤳᤏᤠ ᤛᤡᤃᤠᤱ ᤁᤧᤕᤢᤰᤂᤢᤶᤒᤡ᥅ ᤀᤡ ᤏᤀᤡᤔᤠᤸᤗᤧ ᤁᤧᤛᤢ᤺ᤵᤋᤢᤶ ᤁᤧᤕᤢᤰᤂᤢᤶᤒᤡ᥅ ᤜᤠ᤺ᤳᤗᤧᤀᤠᤱ ᤜᤧᤰᤁᤣᤃ ᤔᤧᤈᤥᤃᤢᤴᤗᤥ. ᤁᤖ ᤛᤣᤔᤡᤴ ᤆᤶᤈᤶᤒᤠ ᤋᤧᤴᤏᤥ ᤌᤥ ᤕᤢᤰᤂᤢ᤹ᤖᤥ॥ 22ᤜᤧᤰᤁᤣ᤺ᤸᤗᤧ ᤛᤡᤃᤠᤱᤒᤠ ᤐᤠ᤺ᤴᤏᤡᤴ ᤁᤧᤖᤧᤰᤗᤧ ᤔᤧᤏᤡᤛᤢ. ᤜᤧᤰᤁᤩᤠᤱ ᤆᤡᤱᤏᤠᤒᤠ ᤐᤠ᤺ᤴᤏᤡᤴ ᤀᤥᤛᤣ᤺ᤴᤍᤠᤱ ᤐᤥᤱᤗᤥ॥” 23ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤧᤶᤔᤠ ᤏᤧᤰᤂᤥ᤹ ᤁᤧᤃᤵᤐᤠᤜᤠ᤹ᤖᤧ ᤁᤴ ᤐᤠ᤺ᤴᤏᤡᤴ ᤏᤢᤖᤡᤰᤁᤠᤱ ᤂᤧᤵᤛᤧᤶᤔᤧ᤹ᤀᤥ॥” 24ᤂᤢᤏᤧ᤹ ᤕᤠᤶᤔᤥ ᤔᤧᤳᤋᤢᤛᤡ. “ᤛᤡᤱᤛᤡᤱᤅᤠᤱ ᤂᤧᤵᤛᤧᤶᤔᤧ᤹ᤀᤥ᥄ ᤀᤠᤰᤋᤱᤒᤠ ᤁᤢᤛᤡ᤺ᤰᤔᤠᤸᤗᤧ ᤁᤧᤛᤡ᤺ᤰᤋᤢᤶᤛᤡᤶ. ᤀᤠᤶᤓᤠ ᤂᤧᤴ ᤁᤢᤛᤡ᤺ᤰᤔᤠᤸᤗᤧ ᤂᤡᤏᤡ᤹ᤀᤠᤱ ᤁᤧᤶᤛᤡ᤺ᤰᤋᤡ᤹. ᤂᤧᤴᤏᤢ᤺ᤸᤗᤧ ᤕᤖᤡᤰᤁᤠᤱ ᤂᤡᤏᤡ᤹ ᤁᤧᤶᤛᤡ᤺ᤰᤋᤡ ᤁᤧᤶᤒᤡᤖᤡ᤹ᤖᤥ॥ 25ᤕᤖᤡᤰ ᤁᤧᤃᤵᤐᤠᤸᤗᤧ ᤀᤠᤸᤗᤛᤠᤱ ᤕᤖᤡᤰ ᤂᤥᤛᤢ᤹. ᤁᤖ ᤜᤠ᤺ᤳᤗᤧ ᤔᤧᤃᤳᤋᤢᤴ. ᤂᤧᤸᤗᤧ ᤁᤳᤋᤢᤒᤠᤴᤏᤠᤱ ᤔᤧᤏᤠᤵᤋᤢ᤹ᤖᤥ॥”

ᤁᤧᤗᤡᤱᤒᤠ ᤕᤠ᤹ᤖᤡ᤺ᤶᤒᤠ ᤂᤧᤍᤠ᤹

26ᤕᤧᤛᤢᤖᤧ ᤕᤠᤶᤔᤥ ᤐᤠ᤺ᤳᤋᤢ. “ᤏᤡᤱᤘᤠ᤹ᤑᤢ ᤜᤠᤱᤈᤢᤶᤔᤡᤴ ᤀᤰᤋᤱᤒᤠ ᤆᤥᤰ—ᤔᤏᤠᤎᤡᤰᤗᤧ ᤕᤠ᤹ᤖᤡ᤺ᤶᤒᤠᤴ ᤀᤡᤰᤋᤠᤵᤐᤥ ᤗᤧᤵᤋᤢ᤹. 27ᤜᤧᤰᤁᤩᤠᤱ ᤕᤧᤶ ᤗᤧᤰᤗ ᤐᤣ᤺ᤰᤁᤡᤸᤗᤧ. ᤂᤢᤏᤧ᤹ ᤂᤧᤴ ᤕᤠ᤹ᤖᤡ᤺ᤶᤒᤠᤴ ᤀᤠᤰᤂᤣᤗ᤹ᤖᤡᤰ ᤗᤡᤱ ᤑᤠ᤹ᤀᤠᤱ ᤁᤢᤛᤡᤱ ᤔᤧᤏᤡ᤺ᤳᤋᤢᤴᤇᤠᤱ ᤂᤧᤴ ᤕᤠ᤹ᤖᤡ᤺ᤶᤒᤠᤴ ᤗᤡᤱᤗᤥ॥ 28ᤂᤠᤶᤒᤣ᤺ᤰᤔᤠᤸᤗᤧ ᤀᤠᤒᤠᤅᤣ ᤐᤥᤃᤢᤃᤧᤴ ᤁᤢᤈᤠᤴ ᤗᤡᤱᤗ ᤕᤠ᤺ᤴᤍᤢ᤹. ᤂᤠᤶᤒᤣ᤺ᤰᤔᤠᤸᤗᤧᤀᤣ ᤁᤢᤈᤠ᤹ ᤌᤥ᤺ᤰᤗ ᤕᤠ᤺ᤴᤍᤢ᤹. ᤋᤃᤡ ᤁᤢᤏ᤺ᤰ ᤌᤠᤱ ᤜᤧᤰᤁᤩᤠᤱ ᤐᤥᤀᤠᤱ ᤁᤢᤈᤠ᤹ ᤌᤥᤰ॥ 29ᤐᤥᤃᤢᤃᤧᤴ ᤁᤢᤈᤠᤴ ᤋᤢᤶᤔᤠᤱ ᤂᤧᤴ ᤔᤏᤠᤴ ᤁᤠᤳᤆᤩᤠᤴ ᤕᤠᤱᤛᤡᤱᤅᤠᤱ ᤆᤠ ᤛᤢᤶᤛᤧ ᤀᤡᤰᤋᤠᤵᤐᤥ ᤗᤠ᤺ᤳ. ᤌᤣᤀᤠᤱᤓᤧᤸᤗᤧ ᤆᤠᤛᤢᤶᤔᤠ ᤕᤧᤶᤔᤡᤴ ᤋᤩᤧᤖᤥ॥”

ᤏᤢᤎᤡ ᤕᤠ᤹ᤖᤡ᤺ᤶᤒᤠ ᤂᤧᤍᤠ᤹

(ᤔᤳᤋᤡ ᥇᥉:᥉᥇-᥉᥈; ᤗᤢᤁᤠ ᥇᥉:᥇᥎-᥇᥏)

30ᤕᤧᤛᤢᤖᤧ ᤕᤠᤶᤔᤥ ᤐᤠ᤺ᤳᤋᤢ. “ᤏᤡᤱᤘᤠ᤹ᤑᤢ ᤜᤠᤱᤈᤢᤶᤔᤡᤴ ᤌᤣ᤺ᤴᤏᤢ ᤋᤱᤔᤠᤒᤣ᥅ ᤀᤠᤰᤂᤣᤗ᤹ᤖᤡᤰ ᤁᤢᤒᤡ ᤐᤡᤔᤠᤀᤠᤱ ᤐᤥᤎᤰ ᤆᤥ᤺ᤰᤔᤠᤒᤣ᥅ 31ᤁᤱᤃ ᤂᤠᤶᤔᤥ ᤗᤧᤵᤔᤏᤠᤒᤠ ᤕ᤺ᤱᤃᤣ᤹ ᤕᤠ᤹ᤖᤡ᤺ᤶᤒᤠᤴ ᤁᤢᤀᤡᤛᤡᤰ ᤆᤥᤰᤗᤥ॥ ᤀᤡᤰᤛᤠ ᤂᤠᤶᤒᤣ᤺ᤰᤁᤥᤒᤠ ᤕᤠ᤹ᤖᤡ᤺ᤶᤒᤠᤜᤠ᤹ᤀᤥ ᤂᤧᤴ ᤁᤧᤖᤧᤰᤏᤢ᤺ᤸᤗᤧ ᤆᤢᤰᤛᤠᤱ 32ᤀᤡᤰᤋᤠᤵᤐᤥ ᤘᤣ᤹ ᤏᤢᤎᤡᤛᤠᤰᤆᤡ᤹ᤏᤢ᤺ᤸᤗᤧ ᤕᤶᤒᤠ ᤐᤥᤱᤅᤠᤱ ᤁᤢᤒᤥᤖᤠᤰᤜᤠ᤹ᤀᤥ ᤐᤢᤜᤠ᤹ᤖᤧᤀᤠᤱ ᤜᤠᤵ ᤔᤧᤈᤥᤃᤢᤖᤥ॥” 33ᤕᤧᤛᤢᤖᤧ ᤀᤰᤋᤱᤒᤠ ᤂᤧᤍᤠ᤹ᤀᤥ ᤔᤏᤠᤜᤠ᤹ᤖᤧ ᤐᤠ᤺ᤴᤈᤠᤰ ᤁᤢᤛᤡᤱ ᤏᤡ᤺ᤵᤔᤠ ᤔᤧᤛᤢᤰᤋᤢᤖ ᤌᤠᤖᤡᤰ ᤜᤢ᤹ᤖᤢᤛᤡ॥ 34ᤂᤢᤏᤧ᤹ ᤐᤠᤖᤧᤸᤗᤧ ᤂᤧᤍᤠ᤹ᤀᤥᤖᤰ ᤐᤠᤖᤧ. ᤁᤖ ᤁᤢᤜᤢ᤹ᤛᤠᤶᤒᤠᤜᤠ᤹ᤏᤢ ᤀᤣ᤺ᤰ ᤔᤧᤘᤕᤧᤸᤗᤧ ᤂᤧᤍᤠ᤹ᤀᤡᤸᤗᤧ ᤁᤢᤒᤣᤴ ᤜᤴᤍᤢ ᤐᤡᤖᤢᤛᤡᤖᤥ॥

ᤕᤧᤛᤢᤖᤧ ᤛᤢᤖᤡᤳ ᤁᤣᤈᤱᤅᤡᤴ ᤆᤡᤈᤡ ᤕᤧᤶᤕᤧᤶ ᤆᤥᤃᤢ᤹

(ᤔᤳᤋᤡ ᥎:᥈᥉-᥈᥍; ᤗᤢᤁᤠ ᥎:᥈᥈-᥈᥋)

35ᤂᤧᤴ ᤛᤧᤴᤍᤡᤰ ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤳᤋᤢᤛᤡ. “ᤘᤖᤰᤁᤡᤸᤗᤧ ᤏᤠᤜᤠᤱᤍᤠᤱ ᤐᤣᤃᤡ॥” 36ᤜᤧᤰᤁᤣᤗ᤹ᤖᤡᤰ ᤕᤖᤡᤰ ᤔᤏᤠᤜᤠ᤹ᤏᤢ ᤔᤧᤛᤧᤴᤍᤧᤀᤠᤱ ᤂᤢᤏᤧ᤹ ᤒᤠ ᤂᤧᤴ ᤂ᤺ᤱᤒᤣᤀᤥᤏᤢ ᤏᤠᤜᤠᤱᤍᤠᤱ ᤔᤧᤍᤣ᤹ᤖᤢᤖᤥ॥ ᤂᤧᤵᤔᤥ ᤘᤣ᤹ ᤂ᤺ᤱᤒᤣᤜᤠ᤹ᤀᤠᤱ ᤔᤧᤏᤧᤛ᤻ᤛᤧᤖᤥ॥ 37ᤜᤰᤆᤄᤳ ᤕᤶᤒᤠ ᤛᤢᤖᤡᤳ ᤁᤣᤈᤱ ᤜᤢᤔᤠ ᤜᤣ᤺ᤰᤋᤧᤀᤠᤱ ᤘᤠᤓᤧᤸᤗᤧᤱᤅᤡᤴ ᤂ᤺ᤱᤒᤣᤀᤥ ᤗᤠᤛᤧᤀᤠᤱ ᤂᤠ ᤂ᤺ᤱᤒᤣᤀᤡᤴᤏᤣ ᤋᤡᤶᤛᤧᤖᤥ॥ 38ᤕᤧᤛᤢᤴ ᤂ᤺ᤱᤒᤣᤸᤗᤧ ᤁᤢᤀᤣ᤺ᤰ ᤗᤧᤵᤔᤠᤱ ᤋᤠᤰᤂᤥ᤺ᤱᤎᤡᤰ ᤁᤥ᤺ᤰᤛᤡᤱᤅᤠᤱ ᤀᤡᤵᤛᤧᤀᤠᤱ ᤏᤧᤛ᤻ᤛᤧ॥ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤔᤧᤓᤥ᤺ᤰᤂᤢᤖ ᤀᤰᤂᤣ ᤔᤧᤔᤧᤳᤋᤢ. “ᤛᤡᤰᤛᤠᤶᤒᤣ. ᤀᤠᤏᤡᤃᤣ ᤜᤢᤶᤔᤠ ᤛᤡᤔᤠ ᤀᤡᤋᤡᤃᤧᤖᤥ᥄ ᤌᤣᤀᤠᤱ ᤛᤫᤠ᤺ᤳ ᤁᤧᤏᤧᤒᤠᤒᤣ᥅” 39ᤕᤧᤛᤢᤴ ᤐᤥᤃᤧᤀᤠᤱ ᤛᤢᤖᤡᤳ ᤁᤣᤈᤱᤅᤡᤴ “ᤔᤧᤴᤜᤢᤀᤧ᤹” ᤔᤧᤳᤋᤢᤀᤠᤱ ᤑᤧ᤺ᤰᤋᤢ. ᤜᤧᤰᤁᤩᤠᤱ ᤘᤠᤓᤧᤸᤗᤧᤱᤅᤡᤴ “ᤆᤡᤈᤡ ᤕᤧᤶᤕᤧᤶ ᤗ᤹ᤖᤧ᤹” ᤔᤧᤳᤋᤢ. ᤛᤢᤖᤡᤳ ᤁᤣᤈᤱᤅᤡᤴ ᤆᤡᤈᤡ ᤕᤧᤶᤕᤧᤶ ᤗ᤹ᤖᤧᤀᤠᤱ. ᤘᤠᤓᤧᤸᤗᤧᤱᤅᤡᤴᤏᤠᤱ ᤆᤡᤈᤡ ᤕᤧᤶᤕᤧᤶ ᤐᤥ᤺ᤰᤂᤧᤖᤥ॥ 40ᤜᤧᤰᤁᤩᤠᤱ ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤛᤣ᤺ᤴᤗᤠᤵᤋᤢᤛᤡ. “ᤌᤣᤀᤠᤱ ᤂᤡᤏᤡ᤹ ᤁᤧᤃᤡ᤺ᤛᤡ ᤁᤧᤛᤩᤧ᤹ᤀᤡᤒᤠ᥅ ᤀᤠᤸᤗᤛᤠᤱ ᤕᤠᤵᤔᤡ ᤏᤛᤠᤴ ᤁᤧᤴᤈᤥᤃᤡᤴᤒᤡ᥅” 41ᤁᤖ ᤂᤧᤱᤜᤠ᤹ ᤛᤠ᤹ᤖᤡᤰ ᤔᤧᤃᤡᤛᤧᤀᤠᤱ ᤀᤰᤂᤣ ᤔᤧᤔᤧᤳᤇᤡᤱ. “ᤀᤠᤰᤂᤣᤗ᤹ᤖᤡᤰ ᤂᤢᤏᤧ᤹ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤛᤢᤖᤡᤳ ᤁᤣᤈᤱᤅᤡᤴ ᤏᤢ ᤘᤠᤓᤧᤸᤗᤧᤱᤅᤡᤸᤗᤧᤀᤠᤱ ᤂᤧᤵᤛᤢᤒᤠᤒᤣ᥅ ᤁᤴ ᤔᤏᤠ᤺ᤱᤃ ᤜᤠ᤺ᤵᤐᤣ᥅”

Currently Selected:

ᤔᤷᤁᤢᤛ 4: LIFOTNT

Highlight

Copy

Compare