ᤔᤷᤁᤢᤛ 3

ᤕᤧᤛᤢᤖᤧ ᤏᤠ᤺ᤶᤛᤡᤱ ᤕᤧᤴᤏᤥ ᤘᤣ᤺ᤴᤍᤢᤒᤠ

(ᤔᤳᤋᤡ ᥇᥈:᥏-᥇᥊; ᤗᤢᤁᤠ ᥌:᥌-᥇᥇)

1ᤕᤧᤛᤢᤴ ᤕᤠᤶᤔᤥ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥ ᤐᤣ॥ ᤂᤧᤵᤔᤥ ᤗᤳᤇᤠ ᤁᤢᤜᤢᤰ ᤁᤧᤜᤣᤒᤠ ᤔᤏᤠᤎᤡᤰ ᤘᤕᤧ॥ 2ᤏᤠ᤺ᤶᤛᤡᤱ ᤕᤧᤴᤏᤥ ᤂᤧᤴ ᤔᤏᤠᤴ ᤕᤧᤛᤢᤖᤧ ᤘᤣ᤺ᤴᤍᤢ᤹ᤏᤧ ᤑᤠ᤹ᤃᤪ ᤂᤢᤏᤧ᤹ ᤑᤥᤋᤩᤠ ᤁᤢ᤺ᤵᤔᤠ ᤑᤠ᤹ᤀᤠᤱ ᤔᤏᤠᤜᤠ᤹ᤖᤧ ᤕᤧᤛᤢᤴ ᤔᤧᤛᤢᤃᤢᤖ ᤔᤧᤘᤕᤧ॥ 3ᤕᤧᤛᤢᤖᤧ ᤂᤧᤴ ᤁᤢᤜᤢᤰ ᤁᤧᤜᤣᤒᤠ ᤔᤏᤠᤴ ᤔᤧᤳᤋᤢ. “ᤑᤧᤖᤧ᤹ᤀᤠᤱ ᤁᤧᤖᤧᤰᤗᤧ ᤂᤢᤏᤡ᤹ ᤋᤃᤡ ᤕᤧᤒᤧ᤹॥” 4ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤱᤜᤠ᤹ ᤛᤣ᤺ᤴᤍᤥᤛᤢᤛᤡ. “ᤏᤠ᤺ᤶᤛᤡᤱ ᤕᤧᤴᤏᤥ ᤏᤢᤒᤠ ᤏᤢ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰᤁᤥ. ᤀᤠᤳᤋᤡᤴ ᤆᤥ᤺ᤰᤔᤠ ᤏᤢᤒᤠᤒᤣ᥅ ᤜᤡᤱᤔᤴ ᤋᤠᤱᤛᤧ᤺ᤵᤔᤠᤒᤡ ᤔᤧᤱᤔᤠᤒᤡ᥅” ᤁᤖ ᤂᤧᤴ ᤔᤏᤠᤜᤠ᤹ ᤔᤧᤶᤒᤠ᤺ᤳᤋᤣ ᤛᤫᤠ᤺ᤳ ᤔᤧᤕᤢᤅᤧᤖᤥ॥ 5ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ ᤆᤡ᤺ᤵᤔᤠᤴ ᤏᤡᤛᤢᤀᤠᤱ ᤂᤢᤏᤧ᤹ ᤁᤢᤏᤡᤱᤘᤠ᤹ ᤋᤢᤃᤧᤀᤠᤱ ᤛᤠ᤹ᤖᤡᤰ ᤁᤢᤛᤡᤰ ᤐᤥᤃᤧᤖᤥ॥ ᤜᤧᤰᤁᤩᤠᤱ ᤂᤧᤴ ᤔᤏᤠᤴ ᤔᤧᤳᤋᤢ. “ᤁᤧᤜᤢᤰᤁᤡᤴ ᤛᤴᤇᤧ᤹॥” ᤜᤧᤰᤁᤩᤠᤱ ᤂᤧᤸᤗᤧ ᤁᤢᤜᤢᤰᤁᤡᤴ ᤛᤴᤇᤢᤸᤗᤧ ᤂᤡᤔᤥ ᤘᤣ᤺ᤳᤋᤧᤖᤥ॥ 6ᤜᤧᤰᤁᤩᤠᤱ ᤑᤖᤡᤛᤡᤜᤠ᤹ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥᤗᤠᤶ ᤔᤧᤗ᤺ᤴᤍᤧ ᤔᤧᤒᤣᤀᤠᤱ ᤜᤧᤖᤥᤍ ᤜᤠᤱᤅᤡᤸᤗᤧ ᤁᤢᤔᤏᤠᤜᤠ᤹ᤏᤢ ᤕᤧᤛᤢᤴ ᤀᤠᤰᤂᤣᤀᤠᤱ ᤛᤧᤵᤔᤠᤒᤣ ᤑᤠ᤹ᤀᤠᤱ ᤐᤠ᤺ᤴᤔᤧᤍᤱᤄᤢᤖᤥ॥

ᤕᤖᤡᤰ ᤔᤏᤠᤜᤠ᤹ᤖᤧ ᤕᤧᤛᤢᤴ ᤔᤧᤍᤡᤶᤍᤢ᤹

7ᤜᤧᤰᤁᤩᤠᤱ ᤕᤧᤛᤢᤴ ᤁᤢᤜᤢ᤹ᤛᤠᤶᤒᤠᤜᤠ᤹ᤏᤢ ᤘᤖᤰᤁᤡᤸᤗᤧ ᤁᤢᤕᤠᤀᤥ ᤐᤣ᤺ᤸᤗᤧ ᤂᤧᤵᤔᤥ ᤃᤠᤗᤡᤗ ᤌᤢᤶᤔᤥᤗᤠᤶ ᤕᤖᤡᤰ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤔᤧᤍᤡᤶᤍᤢᤖᤥ॥ 8ᤂᤢᤏᤧ᤹ ᤆᤥᤃᤢᤒᤠ ᤕᤠ᤺ᤶᤒᤰᤜᤠ᤹ ᤔᤧᤄᤧᤵᤛᤢᤀᤠᤱ ᤕᤖᤡᤰ ᤔᤏᤠᤜᤠ᤹ ᤕᤜᤢᤍᤡᤕᤠ. ᤕᤖᤢᤛᤗᤧᤔ. ᤀᤡᤍᤢᤔᤡᤕᤠ. ᤕᤷᤍᤏ ᤏᤠᤎᤠ᤺ᤶᤒᤡᤒᤠ ᤗᤠᤈᤣ᤹ᤀᤥᤏᤢ. ᤜᤧᤰᤁᤩᤠᤱ ᤋᤠᤕᤖ ᤏᤢ ᤛᤡᤍᤥᤏ ᤕᤧᤰᤕᤰ ᤂᤡᤖᤡᤗᤠᤶ ᤁᤢᤀᤥᤔᤧᤳᤇᤧ ᤔᤧᤍᤩᤧᤖᤥ॥ 9ᤜᤧᤰᤁᤩᤠᤱ ᤂᤢᤏᤧ᤹ ᤕᤖᤡᤰ ᤔᤏᤠᤜᤠ᤹ᤖᤧ ᤔᤧᤴᤗᤠ᤺ᤰᤋᤢᤴᤗ ᤔᤧᤴᤍᤥ᤹ᤖᤢᤴᤗ ᤑᤠ᤹ᤀᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ ᤂ᤺ᤱᤒᤣᤎᤡᤰ ᤁᤢᤗᤠᤃᤡ ᤕᤠᤖᤡᤵ ᤆᤥ᤺ᤰᤔᤠ ᤐᤠᤱᤄᤢᤛᤡ॥ 10ᤂᤢᤏᤧ᤹ ᤕᤖᤡᤰ ᤔᤏᤠᤜᤠ᤹ ᤏᤢᤛᤢᤛᤡᤒᤠᤸᤗᤧ ᤆᤥᤃᤢᤸᤗᤧ ᤂᤢᤏᤧ᤹ ᤁᤢᤛᤢᤛᤧ ᤔᤏᤠᤜᤠ᤹ ᤔᤧᤈᤴᤇᤡᤱᤗ ᤔᤧᤒᤥᤖᤧ ᤔᤧᤎᤠᤅᤧ॥ 11ᤜᤧᤰᤁᤩᤠᤱ ᤑᤧᤴᤛᤠᤶᤜᤠ᤹ᤖᤧ ᤕᤠᤱᤄᤢᤛᤡᤒᤠ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤔᤧᤏᤡᤛᤢᤸᤗᤧ ᤂᤧᤱᤜᤠ᤹ ᤔᤧᤎᤠᤶᤛᤡᤱᤗ ᤔᤧᤓᤡ᤺ᤰᤋᤧᤖ ᤀᤰᤂᤣᤗ᤹ᤖᤡᤰ ᤔᤧᤒᤠᤖᤧ. “ᤂᤧᤏᤧ᤹ᤃ ᤏᤡᤱᤘᤠ᤹ᤑᤢᤛᤠᤏᤧᤖᤥ᥄” 12ᤁᤖ ᤕᤧᤛᤢᤖᤧ ᤂᤧᤱᤜᤠ᤹ ᤂᤢᤏᤧ᤹ ᤁᤢᤕᤠ᤺ᤶᤒᤣᤀᤥ ᤌᤣᤀᤠᤱ ᤔᤧᤶᤒᤠ᤺ᤳᤋᤢᤴᤗ ᤑᤠ᤹ᤀᤠᤱ ᤁᤧᤛᤠᤰᤐᤠ ᤀᤡᤱᤈᤠᤱ ᤐᤡᤖᤢᤛᤡ॥

ᤕᤧᤛᤢᤖᤧ ᤌᤡᤰ-ᤏᤧᤳ (᥇᥈) ᤛᤣ᤺ᤰᤕᤢᤰᤔᤡᤒᤠᤜᤠ᤹ ᤛᤣᤃᤢᤛᤡ᤹

(ᤔᤳᤋᤡ ᥇᥆:᥇-᥊; ᤗᤢᤁᤠ ᥌:᥇᥈-᥇᥌)

13ᤜᤧᤰᤁᤩᤠᤱ ᤕᤧᤛᤢᤴ ᤁᤥ᤺ᤰᤔᤠᤀᤥ ᤐᤣᤖ ᤐᤳᤇᤧᤸᤗᤧ ᤁᤢᤏᤡᤱᤘᤠ᤹ᤒᤠᤸᤗᤧ ᤆᤛᤡᤒᤠ ᤁᤢᤜᤢ᤹ᤛᤠᤶᤒᤠᤜᤠ᤹ ᤀᤢ᤺ᤳᤋᤢᤛᤡᤀᤠᤱ ᤂᤧᤱᤜᤠ᤹ᤀᤠᤱ ᤂᤢᤏᤧ᤹ᤏᤢᤀᤣ ᤔᤧᤒᤣᤖᤥ॥ 14ᤜᤧᤰᤁᤩᤠᤱ ᤂᤢᤏᤧ᤹ᤏᤢ ᤔᤧᤘᤠ᤹ᤖ ᤜᤧᤰᤁᤩᤠᤱ ᤛᤢᤏᤠᤀᤡᤱ ᤔᤧᤛᤧᤛᤢᤖ ᤑᤠ᤹ᤀᤠᤱ ᤌᤡᤰ-ᤏᤧᤳ (᥇᥈) ᤜᤢ᤹ᤛᤠᤶᤒᤠᤜᤠ᤹ ᤛᤣᤃᤢᤛᤡᤀᤠᤱ ᤂᤧᤱᤜᤠ᤹ ᤛᤣ᤺ᤰᤕᤢᤰᤔᤡᤒᤠ ᤑᤠ᤹ᤀᤠᤱ ᤔᤧᤳᤋᤢᤛᤡᤖᤥ॥ 15ᤜᤧᤰᤁᤩᤠᤱ ᤂᤧᤱᤜᤠ᤹ ᤑᤧᤴᤛᤠᤶ ᤏᤠ᤺ᤵᤔᤠ ᤗ᤺ᤵᤔᤠ ᤕᤢᤰ ᤐᤡᤖᤢᤛᤡ॥ 16ᤕᤧᤛᤢᤖᤧ ᤛᤣᤃᤢᤛᤡᤒᤠ ᤌᤡᤰ-ᤏᤧᤳ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤂᤢᤏᤡ᤹ ᤔᤡᤱᤜᤠ᤹ ᤁᤴᤗᤥ—ᤛᤡᤔᤥᤏ (ᤂᤢᤏᤧ᤹ ᤐᤋᤪᤢᤛ ᤗ᤹ᤖᤡᤰ ᤔᤡᤱ ᤘᤠ᤺ᤳᤋᤢ). 17ᤈᤒ᤻ᤍᤡᤕᤠᤖᤧ ᤁᤢᤛ᤻ᤛᤠᤜᤠ᤹ ᤕᤠᤁᤢᤒ ᤏᤢ ᤕᤢᤜᤢᤴᤏᤠ (ᤕᤧᤛᤢᤖᤧ ᤂᤧᤱᤜᤠ᤹ ᤒᤥᤀᤏᤖᤃᤧᤛ ᤗ᤹ᤖᤡᤰ ᤔᤡᤱ ᤘᤠ᤺ᤳᤋᤢᤛᤡ. ᤂᤧᤸᤗᤧ ᤁᤢᤒᤣᤀᤡᤱᤃ “ᤋᤠᤱᤛᤠᤰ ᤁᤧᤗᤥᤱᤒᤠᤸᤗᤧ ᤁᤢᤛ᤻ᤛᤠᤜᤠ᤹” ᤐᤥᤱᤗᤥ). 18ᤜᤧᤰᤁᤩᤠᤱ ᤀᤠᤴᤍᤪᤡᤕᤠᤛ. ᤑᤡᤗᤡᤐ. ᤒᤠᤖᤌᤥᤗᤥᤔᤠᤀᤡ. ᤔᤳᤋᤡ. ᤌᤥᤔᤠ. ᤀᤸᤑᤠᤕᤛᤖᤧ ᤁᤢᤛ᤻ᤛᤠ ᤕᤠᤁᤢᤒ. ᤌᤧᤍᤡᤕᤛ. ᤛᤡᤔᤥᤏ (ᤜᤠᤱᤒᤡᤑᤩᤢᤱ ᤁᤧᤈᤥ᤺ᤰᤐᤠ). 19ᤜᤧᤰᤁᤩᤠᤱ ᤕᤜᤢᤍᤠ ᤀᤡᤛ᤻ᤁᤖᤡᤕᤥᤋᤡᤴ (ᤋᤠ᤺ᤴᤍᤡ ᤂᤧᤸᤗᤧ ᤕᤧᤛᤢᤴ ᤀᤡᤱᤗᤧᤰᤋᤢ)॥

ᤕᤧᤛᤢᤴ ᤏᤢ ᤔᤠᤑᤧᤴᤛᤠᤶᤔᤡᤴ

(ᤔᤳᤋᤡ ᥇᥈:᥈᥈-᥉᥈; ᤗᤢᤁᤠ ᥇᥇:᥇᥊-᥈᥉)

20ᤜᤧᤰᤁᤩᤠᤱ ᤕᤧᤛᤢᤴ ᤜᤡᤶᤔᤥ ᤗᤠᤛᤧᤀᤠᤱ ᤂᤧᤵᤔᤥ ᤕᤖᤡᤰ ᤔᤏᤠᤜᤠ᤹ ᤔᤧᤈᤢᤵᤛᤧᤒᤠᤸᤗᤧ ᤆᤥᤃᤢᤸᤗᤧ ᤂᤢᤏᤧ᤹ ᤏᤢ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤆᤠᤈᤠᤔᤠ ᤕᤧᤶᤔᤡᤴᤏᤣ ᤔᤧᤱᤄᤥᤛᤢᤴᤗᤥ॥ 21ᤁᤢᤓᤠ ᤔᤏᤠᤜᤠ᤹ ᤀᤰᤂᤣ ᤔᤧᤔᤧᤳᤇᤡᤱ. “ᤔᤧ᤺ᤶᤒᤧ. ᤀᤠᤀᤡᤴ ᤂᤢᤏᤧ᤹ᤃ ᤏᤠᤰᤂᤧᤒᤣ ᤒᤡ ᤌᤣᤏᤡᤒᤣ᥅” ᤜᤧᤰᤁᤣ᤺ᤸᤗᤧ ᤁᤢᤜᤡᤶᤛᤕᤱᤖᤧ ᤂᤧᤴ ᤔᤧᤄᤧᤵᤛᤢᤀᤠᤱ ᤂᤢᤏᤧ᤹ ᤂᤧᤵᤔᤥᤗᤠᤶ ᤀᤢ᤺ᤵᤔᤠ ᤋᤣ᤹ᤔᤠ ᤑᤠ᤹ᤀᤠᤱ ᤔᤧᤍᤩᤧᤖᤥ॥ 22ᤕᤖᤢᤛᤗᤧᤔᤗᤠᤶ ᤁᤧᤍᤠᤒᤠ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ᤖᤧ ᤀᤰᤂᤣ ᤔᤧᤒᤠ᤺ᤳᤋᤢ. “ᤂᤢᤏᤧ᤹ᤃ ᤒᤠᤗᤈᤡᤒᤢᤗ ᤔᤠᤑᤧᤴᤛᤠᤶᤔᤡᤸᤗᤧ ᤕᤠᤱᤄᤢᤀᤠᤱ ᤘᤠ᤹॥ ᤂᤢᤏᤧ᤹ ᤑᤧᤴᤛᤠᤶᤜᤠ᤹ᤖᤧ ᤂᤢᤏᤡ᤹ ᤜᤠᤱᤅᤡᤸᤗᤧ ᤁᤢᤔᤢᤰᤛᤠᤶᤗᤠᤶ ᤑᤧᤴᤛᤠᤶᤜᤠ᤹ ᤏᤠ᤺ᤳᤋᤢ᤹ ᤗ᤺ᤳᤋᤢᤛᤡ᤹ᤖᤥ॥” 23ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤂᤧᤱᤜᤠ᤹ ᤀᤢ᤺ᤳᤋᤢᤛᤡᤀᤠᤱ ᤂᤧᤍᤠ᤹ᤀᤥ ᤔᤧᤳᤋᤢᤛᤡ. “ᤀᤠᤰᤂᤣᤗ᤹ᤖᤡᤰ ᤔᤠᤑᤧᤴᤛᤠᤶᤔᤡᤴ ᤀᤠᤒᤠᤅᤣ ᤏᤠ᤺ᤳᤇᤡᤱᤒᤣ᥅ 24ᤀᤠᤵᤑᤣᤰ ᤗᤢᤶᤔᤥ ᤁᤧᤄᤣᤒᤠ ᤁᤧᤎᤰᤐᤠᤀᤠᤱ ᤁᤧᤛᤧᤶᤒᤠ ᤜᤠᤱᤈᤢᤶᤔᤡᤸᤗᤧ ᤔᤧᤎᤖᤢᤴᤗᤥ॥ 25ᤜᤧᤰᤁᤩᤠᤱ ᤀᤠᤵᤑᤣᤰ ᤗᤢᤶᤔᤥ ᤁᤧᤄᤣᤒᤠ ᤁᤧᤎᤰᤐᤠᤀᤠᤱ ᤁᤧᤛᤧᤶᤒᤠ ᤜᤡᤶᤛᤕᤱᤅᤡᤸᤗᤧ ᤔᤧᤎᤖᤢᤴᤗᤥ॥ 26ᤔᤠᤑᤧᤴᤛᤠᤶᤔᤡᤴᤏᤠᤱ ᤀᤠᤒᤠᤅᤣ ᤋᤰᤗᤧᤱᤘᤠᤀᤥ ᤐᤥ᤺ᤰᤏᤧ ᤑᤠ᤹ᤃᤪ ᤂᤧᤸᤗᤧᤀᤠᤱ ᤔᤧᤎᤖᤢᤴᤏᤠᤱ ᤏᤢᤵᤗᤥ॥ 27ᤁᤧᤎᤢᤶᤒᤠ ᤔᤏᤠ᤺ᤸᤗᤧ ᤁᤢᤜᤡᤶᤔᤥ ᤗᤠ᤺ᤵᤔᤠᤀᤠᤱ ᤂᤧᤸᤗᤧ ᤁᤢᤈᤡᤃᤰᤘᤠᤜᤠ᤹ ᤏᤠᤵᤔᤠᤍᤣ᤹ᤔᤠᤏᤢ᤺ᤸᤗᤧ ᤋᤃᤡ ᤂᤧᤴ ᤁᤧᤎᤢᤶᤒᤠ ᤔᤏᤠᤴ ᤀᤡᤄᤣ᤺ᤱᤔᤠᤀᤣ ᤐᤥᤱᤗᤥ॥ ᤜᤧᤰᤁᤩᤠᤱᤗᤰ ᤁᤢᤜᤡᤶᤔᤥ ᤗᤠ᤺ᤵᤔᤠᤀᤠᤱ ᤆᤡᤃᤰᤘᤠᤜᤠ᤹ ᤗ᤺ᤵᤔᤠᤍᤣ᤹ᤔᤠ ᤛᤢᤰᤋᤧᤳᤗᤥ॥ 28ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤔᤧᤒᤠ᤺ᤳᤋᤢᤒᤠ ᤁᤧᤖᤧᤰ ᤔᤠᤱ ᤆᤧ᤹ᤕᤠᤐᤠᤴ ᤏᤢ ᤔᤧᤈᤥᤃᤢᤒᤠ ᤁᤧᤖᤧᤰ ᤗᤠᤕᤥᤜᤠ᤹ᤖᤧᤴ ᤗᤧᤵᤔᤡ ᤂᤥᤔᤠ ᤔᤧᤛᤢᤰᤋᤢᤖᤥ. 29ᤁᤖ ᤛᤣᤛᤣᤔᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤔᤠᤱ ᤆᤧ᤹ᤕᤠᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤀᤠᤵᤑᤠᤸᤗᤧᤀᤠᤱ ᤗᤧᤵᤔᤡ ᤔᤧᤱᤄᤥᤛᤢᤴᤗᤥ. ᤌᤣᤀᤠᤱᤓᤧᤸᤗᤧ ᤁᤱᤃ ᤗᤧᤵᤔᤡ ᤔᤧᤶᤒᤥᤱᤔᤏᤠᤒᤠ ᤗᤠᤕᤥᤖᤥ॥” 30(ᤕᤧᤛᤢᤖᤧ ᤑᤧᤴᤛᤠᤶᤔᤡᤴ ᤁᤳᤋᤢ ᤗ᤹ᤖᤡᤰ ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢᤀᤠᤱ ᤔᤧᤘᤕᤧᤒᤠᤸᤗᤧ ᤆᤥᤃᤢᤸᤗᤧ ᤕᤧᤛᤢᤖᤧ ᤂᤧᤱᤜᤠ᤹ ᤜᤧᤰᤁᤣ ᤔᤧᤳᤋᤢᤛᤡᤒᤠᤖᤥ॥)

ᤕᤧᤛᤢᤖᤧ ᤁᤢᤶᤔᤠ ᤏᤢ ᤁᤢᤴᤛᤠ᤹ᤛᤡ

(ᤔᤳᤋᤡ ᥇᥈:᥊᥌-᥋᥆; ᤗᤢᤁᤠ ᥎:᥇᥏-᥈᥇)

31ᤕᤠᤱᤛᤡ ᤕᤧᤛᤢᤖᤧ ᤁᤢᤶᤔᤠ ᤏᤢ ᤁᤢᤴᤛᤠ᤹ᤛᤡ ᤂᤢᤏᤧ᤹ ᤘᤕᤧᤒᤠ ᤜᤡᤶᤔᤥ ᤔᤧᤍᤩᤧᤀᤠᤱ ᤗᤠ᤺ᤰᤁᤠᤳ ᤁᤢᤀᤢ᤺ᤳᤇᤧ ᤔᤏᤠᤜᤠ᤹ ᤔᤧᤒᤠᤱᤄᤢᤛᤡᤖᤥ॥ 32ᤜᤧᤰᤁᤩᤠᤱ ᤁᤢᤃᤒᤪᤡᤱ ᤁᤧᤕᤢᤱᤒᤠ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤔᤧᤔᤧᤳᤋᤢ. “ᤁᤧᤶᤔᤠ ᤏᤢ ᤁᤧᤴᤛᤠ᤹ᤛᤡ ᤗᤠ᤺ᤰᤁᤠᤳ ᤔᤧᤍᤩᤧᤀᤠᤱ ᤂᤧᤏᤧ᤹ ᤁᤧᤶᤜᤠᤱᤗ ᤔᤧᤕᤧᤵᤗᤥ॥” 33ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤀᤠᤶᤔᤠ ᤏᤢ ᤀᤠᤴᤛᤠ᤹ᤛᤡ ᤜᤠ᤺ᤳᤇᤡᤒᤣ᥅” 34ᤂᤢᤏᤧ᤹ ᤂᤧᤵᤔᤥ ᤁᤢᤃᤒᤪᤡᤱ ᤁᤧᤕᤢᤱᤒᤠ ᤔᤏᤠᤜᤠ᤹ ᤀᤥᤔᤧᤳᤋᤢᤛᤡᤖ ᤕᤠᤶᤔᤥ ᤐᤠ᤺ᤳᤋᤢ. “ᤁᤵᤔᤥ ᤀᤠᤶᤔᤠ ᤏᤢ ᤀᤠᤴᤛᤠ᤹ᤛᤡ ᤔᤧᤕᤢᤱᤗᤥ॥ 35ᤀᤠᤳᤋᤡᤴᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤜᤧᤰᤁᤣ ᤔᤧᤈᤥᤃᤢ᤹ ᤂᤧᤱᤜᤠ᤹ᤀᤣ ᤀᤠᤶᤔᤠ ᤏᤢ ᤀᤠᤴᤛᤠ᤹ᤛᤡᤖᤥ॥”

Currently Selected:

ᤔᤷᤁᤢᤛ 3: LIFOTNT

Highlight

Copy

Compare