ᤔᤳᤋᤡ 24
24
ᤁᤢᤏᤢᤵᤔᤠ ᤕᤧᤴᤏᤡᤸᤗᤧᤴ ᤔᤡᤰᤛᤣ᤺ᤴᤜᤠ᤹
(ᤔᤷᤁᤢ ᥇᥉:᥇-᥈; ᤗᤢᤁᤠ ᥈᥇:᥋-᥌)
1ᤕᤧᤛᤢᤴ ᤔᤠᤱᤜᤡᤶᤔᤥᤗᤠᤶ ᤐᤣᤖ ᤐᤳᤇᤧᤸᤗᤧ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤔᤠᤱᤜᤡᤶᤔᤡᤸᤗᤧᤴ ᤏᤢ᤺ᤒ᤻ᤏᤢᤒᤠ ᤜᤡᤶᤜᤠ᤹ ᤂᤢᤏᤧ᤹ ᤀᤥᤛᤣ᤺ᤴᤎᤠᤰᤔᤠ ᤑᤠ᤹ᤀᤠᤱ ᤁᤢᤒᤣᤛᤠᤱ ᤔᤧᤍᤩᤧ॥ 2ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤁᤴ ᤁᤧᤏᤡᤛᤢᤶᤒᤠ ᤜᤡᤶᤜᤠ᤹ᤖᤧ ᤁᤢᤕᤠ᤺ᤶᤒᤣᤀᤥ ᤛᤧᤰᤂᤠ ᤐᤠᤴ ᤔᤧᤳᤏᤡᤱ. ᤌᤡᤰ ᤗᤢᤱᤛᤶᤍᤠᤱ ᤘᤣ᤹ ᤗᤢᤱᤎᤡᤰᤁᤠᤱ ᤔᤧᤴᤏᤧᤀᤣ ᤌᤠᤖᤡᤰ ᤁᤱᤜᤠ᤹ ᤁᤧᤖᤧᤰ ᤔᤧᤕ ᤔᤧᤒᤣ᤺ᤰᤗᤥ॥”
3ᤕᤠᤱᤛᤡ ᤕᤧᤛᤢᤴ ᤈᤤᤋᤢᤏ ᤁᤥ᤺ᤰᤔᤠᤀᤥ ᤘᤕᤧᤸᤗᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤍᤩᤧᤀᤠᤱ ᤛᤫᤠ᤺ᤳᤋᤠᤱ ᤛᤣ᤺ᤴᤔᤧᤍᤥᤛᤢ. “ᤍᤠᤱᤒᤣ. ᤁᤴ ᤐᤠ᤺ᤴᤜᤠ᤹ ᤀᤠᤵᤑᤠᤸᤗᤧ ᤐᤥᤱᤒᤠᤒᤣ᥅ ᤂᤧᤏᤧ᤹ ᤁᤧᤕᤢᤔᤠ ᤕᤧᤶᤔᤡᤴ ᤏᤢ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤕᤧᤶᤔᤡᤸᤗᤧ ᤁᤢᤏᤢᤵᤔᤠ ᤔᤡᤰᤛᤣ᤺ᤴᤏᤡᤴ ᤀᤠᤔᤧᤳᤋᤧ᤹ᤀᤥ॥”
4ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤛᤡᤱᤛᤡᤱ ᤗ᤹ᤖᤧᤶᤔᤧ᤹ᤀᤥ. ᤀᤠᤳᤋᤡᤸᤗᤧᤀᤠᤱ ᤂᤡᤏᤡ᤹ ᤀᤡᤱᤃᤧᤴᤗᤧᤰᤋᤡᤴᤗᤖᤥ. 5ᤌᤣᤀᤠᤱᤓᤧᤸᤗᤧ ᤕᤖᤡᤰ ᤔᤏᤠᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤧᤴ ᤀᤡᤱᤃᤠ᤹ᤀᤣᤖᤥ ᤗ᤹ᤖᤡᤰ ᤔᤧᤒᤠ᤺ᤳᤋᤢᤖ ᤀᤡᤱᤃᤠ᤹ ᤀᤠᤔᤡᤱᤅᤥ ᤔᤧᤍᤠᤖᤥ. ᤜᤧᤰᤁᤩᤠᤱ ᤕᤖᤡᤰ ᤔᤏᤠᤜᤠ᤹ ᤀᤡᤱᤔᤧᤗᤧᤰᤋᤢᤛᤡ᤹ᤖᤥ॥ 6ᤂᤡᤏᤡ᤹ᤃ ᤌᤱ ᤏᤢ ᤌᤱᤜᤠ᤹ᤖᤧᤴ ᤜᤕᤱ ᤁᤡᤸᤗᤡᤱᤜᤠ᤹ ᤁᤧᤄᤧᤵᤛᤢᤶ. ᤁᤖ ᤂᤡᤏᤡ᤹ ᤏᤡᤱᤘᤠ᤹ ᤔᤧᤔᤕᤧᤶᤔᤡᤴᤏᤧ᤹ᤀᤥ॥ ᤁᤱᤜᤠ᤹ᤃ ᤐᤥᤱᤔᤠᤀᤣ ᤐᤥᤱ. ᤁᤖ ᤒᤠ ᤂᤧᤴ ᤕᤧᤶᤔᤥᤀᤣᤃ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤁᤢᤏᤢᤵᤔᤠᤴ ᤔᤧᤍᤠᤏᤧᤴᤗᤥ॥ 7ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤏᤢ ᤗᤠᤈᤣ᤹ᤜᤠ᤹ ᤗᤢᤶᤔᤥ ᤌᤱ ᤐᤥᤱ. ᤕᤖᤡᤰ ᤋᤧᤴᤏᤥ ᤕᤶᤒᤠ ᤛᤠᤰ ᤐᤥᤰ ᤜᤧᤰᤁᤩᤠᤱ ᤗᤢᤵᤗᤡ ᤌᤠᤱᤗᤥ॥ 8ᤁᤱᤃ ᤁᤧᤍᤠᤒᤠᤖ ᤁᤧᤒᤵᤐᤠ ᤁᤡᤵᤔᤠ ᤁᤧᤄᤢᤒᤠ ᤋᤢᤰᤂᤣᤜᤠ᤹ᤖᤧ ᤁᤢᤜᤣ᤺ᤰᤛᤡᤱᤔᤠᤖᤰᤗᤥ॥
9“ᤜᤧᤰᤁᤩᤠᤱ ᤂᤡᤏᤡ᤹ᤃ ᤔᤏᤠᤜᤠ᤹ᤖᤧ ᤁᤧᤶᤍᤧᤶᤛᤡᤀᤠᤱ ᤋᤢᤰᤂᤣ ᤁᤧᤶᤈᤠ᤺ᤳᤋᤡ᤹. ᤜᤧᤰᤁᤩᤠᤱ ᤁᤧᤶᤛᤧᤖᤡ᤹ᤖᤥ॥ ᤂᤡᤏᤡ᤹ ᤕᤠᤵᤔᤡ ᤏᤛᤠᤴ ᤁᤧᤈᤥᤃᤡᤒᤠᤸᤗᤧ ᤆᤥᤃᤢᤸᤗᤧ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤁᤧᤶᤈᤡ᤺ᤳᤋᤡ᤹ᤖᤥ॥ 10ᤂᤧᤴ ᤕᤧᤶᤔᤥ ᤕᤖᤡᤰ ᤔᤏᤠᤜᤠ᤹ ᤏᤛᤠ᤺ᤴᤗᤠᤶ ᤔᤧᤏᤢ᤺ᤱᤅᤠᤱ ᤀᤡᤱᤔᤧᤗᤧᤰᤛᤡᤱᤅᤠᤱ ᤔᤧᤈᤡ᤺ᤳᤇᤡᤱᤗᤥ॥ 11ᤜᤧᤰᤁᤣᤗ᤹ᤖᤡᤰ ᤀᤡᤱᤗᤧᤰᤐᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ ᤔᤧᤗᤴ ᤔᤧᤍᤠᤀᤠᤱ ᤕᤖᤡᤰ ᤔᤏᤠᤜᤠ᤹ ᤀᤡᤱᤔᤧᤗᤧᤰᤋᤢᤛᤡ᤹ᤖᤥ॥ 12ᤋᤠᤵᤑᤧ᤺ᤶᤒᤠ ᤐᤠ᤺ᤴᤜᤠ᤹ ᤐᤥᤖ ᤐᤣ᤺ᤰᤐᤠᤸᤗᤧ ᤆᤥᤃᤢᤸᤗᤧ ᤕᤖᤡᤰ ᤔᤏᤠᤜᤠ᤹ᤖᤧ ᤛᤧᤰᤂᤠ ᤏᤡᤱᤘᤠ᤹ᤀᤥᤏᤢ ᤗᤢᤱᤔᤠ᤹ ᤋᤢᤰᤛᤡᤱᤔᤠ ᤔᤧᤗᤧᤖᤢᤖᤥ॥ 13ᤁᤖ ᤀᤠᤳᤋᤡᤸᤗᤧ ᤁᤢᤏᤢᤵᤔᤥ ᤌᤠᤖᤡᤰ ᤌᤖᤢ᤹. ᤂᤧᤸᤗᤧᤀᤣ ᤛᤧᤴᤗᤵ ᤂᤥᤛᤢ᤹ᤖᤥ॥ 14ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤜᤠᤱᤈᤢᤶᤗᤧᤴ ᤁᤴ ᤛᤢᤏᤠᤀᤡᤱᤅᤡᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤁᤥ ᤂᤠᤖᤠᤰ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤗᤠᤃᤡ ᤋᤥ᤺ᤴᤍᤡ ᤜᤧᤰᤁᤣ ᤀᤡᤱᤓᤥᤖᤥ. ᤜᤧᤰᤁᤩᤠᤱ ᤁᤢᤏᤢᤵᤔᤠᤴ ᤋᤠᤖᤥ॥
ᤁᤡᤵᤔᤠ ᤁᤧᤄᤢᤒᤠ ᤕᤧᤶ
(ᤔᤷᤁᤢ ᥇᥉:᥇᥊-᥈᥉; ᤗᤢᤁᤠ ᥈᥇:᥈᥆-᥈᥊)
15“ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤍᤠᤏᤡᤀᤧᤗᤖᤧ ᤐᤠ᤺ᤳᤋᤢᤒᤠ ᤛᤡᤰᤁᤧᤗᤧ᤺ᤱᤒᤠᤴ ᤔᤠᤱᤜᤡᤶᤔᤥᤒᤠ ᤛᤣᤛᤣᤍᤧᤴᤏᤥ ᤕᤧᤵᤐᤠ ᤁᤧᤏᤡᤛᤢᤶᤗᤥ॥”#ᤍᤠᤏᤡ ᥏:᥈᥍. ᥇᥇:᥉᥇. ᥇᥈:᥇᥇ (ᤁᤧᤏᤡ᤺ᤵᤐᤠᤜᤠ᤹ᤖᤧ ᤁᤴ ᤐᤠ᤺ᤴᤏᤡᤴ ᤁᤢᤛᤡᤱ ᤔᤧᤏᤡ᤺ᤳᤋᤢᤖᤖᤥ᥄) 16“ᤂᤧᤴ ᤕᤧᤶᤔᤥ ᤕᤜᤢᤍᤡᤕᤠᤒᤠ ᤔᤏᤠᤜᤠ᤹ ᤁᤥ᤺ᤰᤔᤠ ᤑᤠᤱᤈᤱ ᤜᤧᤱᤄᤠᤳᤋᤡ ᤔᤧᤄᤧᤳᤇᤡᤱ ᤔᤧᤒᤣ᤺ᤰᤗᤖᤥ॥ 17ᤂᤧᤴ ᤕᤧᤶᤔᤥ ᤜᤡᤶ ᤛᤶᤍᤠᤱ ᤁᤧᤘᤠ᤹ᤒᤠ ᤔᤏᤠᤴ ᤆᤡᤃᤰᤘᤠ ᤗᤠᤛᤧ ᤜᤡᤶᤛᤡᤃᤠᤱ ᤔᤧᤗᤠ᤺ᤳᤏᤧᤴᤗ॥ 18ᤐᤩᤠᤱᤛᤡᤃᤧᤴ ᤀᤡᤰᤋᤠᤵᤐᤥ ᤁᤧᤘᤠ᤹ᤒᤠᤴ ᤁᤢᤛᤢᤱᤄᤣ᤺ᤰᤘᤠ ᤗᤠᤛᤧ ᤁᤢᤜᤡᤶᤔᤥ ᤔᤧᤏᤢ᤺ᤱᤏᤧᤴ ᤔᤧᤒᤣ᤺ᤰᤏᤧᤴᤗᤖᤥ॥ 19ᤁᤴ ᤕᤧᤶᤔᤡᤱᤃ ᤔᤧᤴᤇᤢᤰᤔᤠ ᤏᤢ ᤛᤠᤘᤠᤔᤠᤜᤠ᤹ᤖᤧ ᤗᤠᤃᤡ ᤀᤠᤰᤂᤧᤴ ᤁᤡᤵᤔᤠ ᤁᤧᤄᤢᤒᤠ ᤐᤥᤱᤅᤡ᥄ 20ᤆᤢᤱᤘᤠ᤺ᤶᤔᤠ ᤕᤧᤶᤔᤥ ᤏᤢ ᤏᤠ᤺ᤶᤛᤡᤱ ᤕᤧᤴᤏᤥ ᤂᤡᤏᤡ᤹ ᤂᤧᤳᤇᤡᤱᤔᤠ ᤔᤧᤒᤥᤱᤏᤧᤴᤗ ᤑᤠ᤹ᤀᤠᤱ ᤋᤢᤘᤠ ᤆᤥᤃᤧᤶᤔᤧ᤹ᤀᤥ॥#᥈᥊:᥈᥆ ᤂᤧᤴ ᤗᤠᤈᤣ᤹ᤀᤥ ᤆᤢᤱᤘᤠ᤺ᤶᤔᤠᤀᤥ ᤕᤖᤡᤰ ᤘᤠᤜᤡᤳ ᤁᤧᤎᤠ᤺ᤒᤠ ᤏᤢ ᤆᤢᤱᤃᤧᤈᤡᤰᤐᤠ ᤕᤧᤶ ᤐᤥᤱᤒᤠᤸᤗᤧ ᤆᤥᤃᤢᤸᤗᤧ ᤗᤠᤶᤍᤡᤰ ᤆᤥ᤺ᤰᤔᤠ ᤛᤠᤰᤗᤥ॥ ᤜᤧᤰᤁᤩᤠᤱ ᤕᤜᤢᤍᤡ ᤛᤠᤶᤕᤥᤌᤡᤶᤔᤥ ᤏᤠ᤺ᤶᤛᤡᤱ ᤕᤧᤴᤏᤥ ᤁᤡᤗᤥᤔᤡᤋᤖᤎᤡᤰ ᤌᤠᤖᤡᤰᤗᤰ ᤗᤠᤱᤄᤣ᤺ᤰᤔᤠ ᤛᤢᤰᤁᤧᤍᤧᤵᤐᤠ ᤌᤡᤶ ᤘᤕᤧ॥ 21ᤌᤣᤀᤠᤱᤓᤧᤸᤗᤧ ᤂᤧᤴ ᤕᤧᤶᤔᤥ ᤀᤰᤋᤱᤒᤠ ᤁᤡᤵᤔᤠ ᤁᤧᤄᤢᤒᤠ ᤋᤢᤰᤂᤣᤴ ᤋᤠ᤺ᤖᤥ॥ ᤀᤰᤋᤱᤒᤠ ᤋᤢᤰᤂᤣ᤺ᤱᤃ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤏᤠᤘᤠᤃᤧᤴ ᤆᤀᤡ᤺ᤳ ᤏᤧᤛ᤻ᤛᤧᤀᤠᤱᤎᤥ ᤀᤠᤸᤗᤥ ᤌᤠᤖᤡᤰ ᤔᤧᤶᤒᤥᤱᤅᤣ ᤘᤠ᤹. ᤜᤧᤰᤁᤩᤠᤱ ᤋᤠ᤺ᤴᤍᤡ ᤕᤠᤶᤔᤥ ᤀᤠᤵᤑᤠᤸᤗᤧᤀᤠᤱ ᤔᤧᤒᤥᤱᤏᤧᤸᤗᤥ॥ 22ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤴ ᤕᤧᤴᤜᤠ᤹ ᤋᤠᤱᤛᤠ ᤔᤧᤈᤥᤃᤢᤴᤏᤡᤸᤗᤧᤃ ᤀᤠᤳᤋᤡᤴ ᤔᤏᤠᤜᤠ᤹ᤀᤠᤱ ᤜᤡᤱᤔᤠ ᤔᤧᤴᤇᤢᤰᤋᤧᤴᤒᤠᤖᤥ॥ ᤁᤖ ᤂᤢᤏᤧ᤹ ᤛᤣᤃᤢᤛᤡᤒᤠᤜᤠ᤹ ᤔᤧᤜᤡᤱᤗ ᤑᤠ᤹ᤀᤠᤱ ᤂᤧᤴ ᤕᤧᤴᤜᤠ᤹ ᤋᤠᤱᤛᤠ ᤐᤥ᤺ᤰᤂᤧᤒᤠᤖᤥ॥
23“ᤜᤧᤰᤁᤩᤠᤱ ᤂᤧᤴ ᤕᤧᤶᤔᤥ ᤔᤏᤠᤜᤠ᤹ᤖᤧ ‘ᤀᤥᤔᤧᤳᤋᤧᤶᤔᤧ᤹. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤧᤴ ᤁᤵᤔᤥ ᤘᤠ᤹’ ᤀᤡᤃᤪ ‘ᤂᤢᤏᤧ᤹ ᤂᤧᤵᤔᤥ ᤘᤠ᤹’ ᤗ᤹ᤖᤡᤰ ᤔᤧᤒᤠ᤺ᤳᤋᤢᤖ ᤔᤧᤍᤠ᤺ᤸᤗᤧ ᤏᤛᤠᤴ ᤔᤧᤈᤥᤃᤧᤶᤛᤡᤶᤔᤡᤴᤏᤧ᤹ᤀᤥ॥ 24ᤌᤣᤀᤠᤱᤓᤧᤸᤗᤧ ᤀᤡᤱᤗᤧᤰᤐᤠ ᤂᤪᤡᤛ᤻ᤋᤜᤠ᤹ ᤏᤢ ᤀᤡᤱᤗᤧᤰᤐᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ ᤔᤧᤗᤴ ᤔᤧᤍᤠᤀᤠᤱ ᤐᤕᤶ ᤕᤶᤒᤠ ᤔᤡᤰᤛᤣᤴ ᤏᤢ ᤏᤡᤱᤘᤠ᤹ ᤁᤧᤔᤠᤒᤠ ᤐᤠ᤺ᤴᤜᤠ᤹ ᤔᤧᤈᤥᤃᤢᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤃᤢᤛᤡᤒᤠ ᤔᤏᤠᤜᤠ᤹ᤀᤠᤱ ᤂᤢᤏᤡ᤹ ᤛᤢᤰᤛᤢᤰ ᤀᤡᤱᤔᤧᤗᤧᤰᤋᤢᤛᤡ᤹ᤖᤥ॥ 25ᤀᤥᤔᤧᤳᤋᤧᤶᤔᤧ᤹. ᤁᤴ ᤐᤠ᤺ᤴᤜᤠ᤹ ᤐᤥᤱᤔᤠᤏᤢ᤺ᤸᤗᤧ ᤋᤃᤡᤀᤣ ᤂᤡᤏᤡ᤹ ᤔᤧᤳᤏᤡᤱᤅᤠᤱ ᤘᤠ᤹ᤀᤠᤖᤥ॥
26“ᤂᤧᤸᤗᤧᤆᤥᤃᤢᤸᤗᤧ ᤔᤏᤠᤜᤠ᤹ᤖᤧ ‘ᤀᤥᤔᤧᤳᤋᤧᤶᤔᤧ᤹. ᤂᤪᤡᤛ᤻ᤋᤧᤱᤃ ᤕᤧ᤺ᤱᤄᤠᤍᤧᤴᤏᤥ ᤘᤠ᤹’ ᤁᤧᤶᤔᤧᤳᤋᤡᤃᤪ. ᤀᤥᤔᤧᤳᤇᤧ ᤂᤧᤵᤔᤥ ᤔᤧᤒᤣᤃᤧᤶᤔᤡᤴᤏᤧ᤹ᤀᤥ. ᤀᤡᤃᤪ ‘ᤀᤥᤔᤧᤳᤋᤧᤶᤔᤧ᤹. ᤂᤢᤏᤧ᤹ ᤁᤵᤔᤥ ᤛᤡᤃᤠᤱᤒᤠ ᤕᤠᤰᤑᤠᤱᤅᤥ ᤘᤠ᤹’ ᤁᤧᤶᤔᤧᤳᤋᤡᤛᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤐᤠ᤺ᤴᤏᤡᤴ ᤏᤛᤠᤴ ᤔᤧᤈᤥᤃᤧᤶᤔᤡᤴᤏᤧ᤹ᤀᤥ॥ 27ᤌᤣᤀᤠᤱᤓᤧᤸᤗᤧ ᤔᤧᤴᤇᤠᤶᤛᤠ᤺ᤸᤗᤧ ᤁᤢᤕᤢᤔᤠᤱᤃ ᤛᤠ᤺ᤶᤓᤣ ᤗᤧᤰᤁᤡᤸᤗᤧ ᤁᤧᤖᤧᤰ ᤋᤠᤱᤛᤠᤰᤐᤧᤴ ᤌᤥ᤹ᤖᤢᤒᤠ ᤁᤢᤀᤡᤛᤡ᤺ᤰᤁᤣ ᤐᤥᤱᤗᤥ॥ 28ᤀᤠᤳᤋᤥ ᤛᤠᤃᤡ᤺ᤰᤁᤧᤴ ᤏᤧ᤹. ᤂᤧᤵᤔᤥᤀᤣ ᤁᤡᤍᤠᤒᤠᤜᤠ᤹ᤀᤠᤱ ᤔᤧᤈᤢᤶᤗᤥ॥”#᥈᥊:᥈᥎ ᤂᤧᤴ ᤑᤠ᤹ᤀᤡᤴ ᤁᤧᤖᤧᤰ ᤔᤏᤠᤜᤠ᤹ᤖᤧ ᤔᤧᤴᤇᤠᤶᤛᤠ᤺ᤸᤗᤧ ᤁᤢᤕᤢ᤺ᤔᤠᤴ ᤁᤢᤛᤡᤱ ᤔᤧᤏᤡ᤺ᤳᤋᤢ᤹॥
ᤔᤧᤴᤇᤠᤶᤛᤠ᤺ᤸᤗᤧ ᤁᤢᤕᤢ᤺ᤔᤠᤴ
(ᤔᤷᤁᤢ ᥇᥉:᥈᥊-᥈᥍; ᤗᤢᤁᤠ ᥈᥇:᥈᥋-᥈᥎)
29“ᤂᤧᤴ ᤁᤡᤵᤔᤠ ᤁᤧᤄᤢᤒᤠ ᤋᤢᤰᤂᤣᤴ ᤀᤣᤃᤠᤱ ᤂᤡᤔᤥ
“‘ᤏᤠᤶᤔᤡᤴ ᤂᤠᤔᤠᤰᤗᤥ.
ᤗᤠᤒᤠᤸᤗᤧ ᤀᤥ᤺ᤳᤋᤡ ᤔᤧᤒᤡᤖᤢᤴᤗᤥ.
ᤋᤠᤱᤛᤠᤰᤐᤥᤒᤠ ᤂᤣ᤺ᤶᤛᤡᤰᤐᤠᤜᤠ᤹ ᤔᤰᤔᤧᤎᤠᤖᤥ.
ᤜᤧᤰᤁᤩᤠᤱ ᤋᤠᤱᤛᤠᤰᤐᤥᤒᤠ ᤔᤢᤰᤛᤠᤶᤜᤠ᤹ ᤔᤧᤕᤱᤗᤥ॥’#ᤕᤛᤤ ᥇᥉:᥇᥆. ᥉᥊:᥊; ᤕᤥᤀᤣ ᥈:᥇᥆
30ᤜᤧᤰᤁᤩᤠᤱ ᤂᤧᤴ ᤕᤧᤶᤔᤥ ᤋᤠᤱᤛᤠᤰᤐᤥ ᤔᤧᤴᤇᤠᤶᤛᤠ᤺ᤸᤗᤧ ᤁᤢᤕᤢᤔᤠᤸᤗᤧᤴ ᤔᤡᤰᤛᤣ᤺ᤴᤏᤡᤴ ᤌᤠ᤺ᤵᤐᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤔᤧᤖᤡᤱ ᤔᤧᤎᤰᤗᤥ॥ ᤂᤧᤱᤜᤠ᤹ᤖᤧ ᤔᤧᤴᤇᤠᤶᤛᤠᤴ ᤋᤠᤱᤛᤠᤰᤐᤥ ᤔᤢᤰᤛᤠᤶ ᤜᤧᤰᤁᤩᤠᤱ ᤐᤕᤶ ᤔᤡᤔᤡᤍᤡᤱᤅᤡᤴᤏᤢ ᤂᤠᤵᤔᤡ᤺ᤳᤋᤥ ᤕᤢ᤺ᤖ ᤐᤵᤐᤠ ᤔᤧᤏᤡᤛᤢ᤹ᤖᤥ॥#ᤍᤠᤏᤡ ᥍:᥇᥉ 31ᤜᤧᤰᤁᤩᤠᤱ ᤂᤢᤏᤧ᤹ ᤛᤣᤃᤢᤛᤡᤒᤠ ᤔᤏᤠᤜᤠ᤹ ᤛᤢᤶᤛᤧ ᤁᤧᤖᤧᤰ ᤐᤡᤛᤠᤱᤗᤠᤶ ᤋᤠᤱᤛᤠᤰᤐᤠᤸᤗᤧ ᤂᤥ᤺ᤵᤋᤢᤒᤠ ᤏᤢ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤋᤠ᤺ᤰᤋᤢᤒᤠᤀᤥ ᤌᤢᤳᤋᤢᤖᤡ᤺ᤵᤐᤠᤸᤗᤧᤴ ᤐᤕᤶ ᤀᤡᤰᤗᤠᤏᤢ ᤁᤢᤔᤠᤱᤗᤠᤀᤡᤱᤒᤠᤜᤠ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤐᤠᤱᤄᤢ ᤕᤢᤛᤢᤛᤡ᤹ᤖᤥ॥
ᤐ᤺ᤳᤇᤣ᤹ᤒᤢᤱᤔᤠᤸᤗᤧ ᤁᤢᤒᤡ
(ᤔᤷᤁᤢ ᥇᥉:᥈᥎-᥉᥇; ᤗᤢᤁᤠ ᥈᥇:᥈᥏-᥉᥉)
32“ᤀᤠᤸᤗ ᤐ᤺ᤳᤇᤣ᤹ᤒᤢᤱᤔᤥᤗᤠᤶ ᤁᤴ ᤐᤠ᤺ᤴᤏᤡᤴ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹ᤀᤥ. ᤂᤧᤸᤗᤧ ᤁᤢᤒᤥᤖᤠᤰᤜᤠ᤹ᤗᤠᤶᤒᤠ ᤁᤢᤛᤱ ᤁᤢᤏ᤺ᤰᤜᤠ᤹ ᤗ᤺ᤶᤔᤠ ᤜᤣ᤺ᤰᤁᤡᤸᤗᤧ ᤜᤠᤱᤘᤠ᤺ᤶᤔᤠ ᤕᤧᤶᤔᤡᤴ ᤏᤡ᤺ᤳᤋᤠᤱ ᤋᤩᤧᤖᤥ ᤑᤠ᤹ᤀᤠᤱ ᤁᤢᤛᤡᤱ ᤁᤧᤏᤡ᤺ᤳᤋᤢᤶ॥ 33ᤜᤧᤰᤁᤣᤗ᤹ᤖᤡᤰᤁᤣ ᤀᤡᤱᤃᤠ᤹ ᤐᤠ᤺ᤳᤋᤢᤱᤒᤠ ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤁᤧᤳᤗ ᤐᤣ᤺ᤰᤐᤠ ᤁᤧᤏᤡᤛᤢᤶᤔᤡᤸᤗᤧ ᤔᤧᤴᤇᤠᤶᤛᤠ᤺ᤸᤗᤧ ᤁᤢᤕᤢ᤺ᤔᤠᤴ ᤏᤡ᤺ᤳᤋᤠᤱᤅᤣ ᤘᤠ᤹ ᤑᤠ᤹ᤀᤠᤱ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤗᤥ॥ 34ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤔᤧᤶᤒᤥᤱᤅᤣ ᤌᤠᤖᤡᤰ ᤁᤴ ᤔᤧᤴᤇᤠᤶ ᤌᤠ᤺ᤰᤜᤠ᤹ ᤔᤧᤴᤇᤡᤏᤧᤴ॥ 35ᤋᤠᤱᤛᤠᤰᤐᤧᤴ ᤏᤢ ᤂᤠᤶᤒᤣ᤺ᤰᤔᤠᤴ ᤗᤧᤰᤁᤠᤱ ᤐᤣᤰ. ᤁᤖ ᤀᤡᤱᤃᤠ᤹ ᤀᤠᤒᤠ᤺ᤴᤈᤠᤰᤜᤠ᤹ ᤀᤠᤵᤑᤠᤸᤗᤧᤀᤠᤱ ᤔᤧᤗᤧᤰᤏᤧᤴ ᤔᤧᤒᤣ᤺ᤰᤏᤧᤴᤗᤥ॥
ᤕᤧᤛᤢᤖᤧ ᤁᤢᤕᤢᤔᤠᤀᤥ ᤕᤠᤖᤡᤵ ᤘᤠ᤹ᤔᤠᤴ
(ᤔᤷᤁᤢ ᥇᥉:᥉᥈-᥉᥍; ᤗᤢᤁᤠ ᥇᥍:᥈᥌-᥉᥆)
36“ᤀᤠᤸᤗ ᤂᤧᤴ ᤕᤧᤶ ᤏᤢ ᤕᤧᤴᤜᤠ᤹ ᤀᤠᤵᤑᤠᤸᤗᤧ ᤐᤥᤱ ᤑᤠ᤹ᤀᤠᤱ ᤀᤠᤳᤋᤡᤸᤗᤧᤀᤠᤱ ᤔᤧᤏᤡᤛᤢᤴ॥ ᤛᤠᤱᤃᤪᤠᤶᤐᤣᤍᤠᤱᤒᤠ ᤔᤠᤱᤗᤠᤀᤡᤱᤒᤠ ᤏᤢ ᤏᤡᤱᤘᤠ᤹ᤑᤢᤛᤠ᤺ᤸᤗᤧᤀᤠᤱ ᤔᤧᤏᤡᤛᤢᤴᤗᤥ. ᤁᤖ ᤐᤠᤏᤢᤍᤡᤱ ᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤖᤰ ᤏᤡᤛᤢ᤹ᤖᤥ॥
37“ᤜᤧᤰᤁᤩᤠᤱ ᤔᤧᤴᤇᤠᤶᤛᤠᤴ ᤏᤢ᤺ᤱ ᤕᤢ᤺ᤸᤗᤧ ᤏᤢᤜᤠᤖᤧ ᤁᤢᤕᤧᤶ ᤜᤧᤰᤁᤣᤀᤣ ᤐᤥᤱᤗᤥ॥ 38ᤏᤢᤜᤴ ᤘᤠᤗᤠᤎᤠᤀᤥ ᤗᤠᤛᤧᤒᤠ ᤕᤧᤶᤔᤥ ᤌᤠᤖᤡᤰᤁᤣ ᤔᤏᤠᤜᤠ᤹ ᤔᤧᤈᤖ ᤔᤧᤎᤢᤅᤢᤖ ᤜᤧᤰᤁᤩᤠᤱ ᤔᤣ᤺ᤰᤂᤡᤶ ᤔᤧᤈᤥᤃᤢᤖ ᤔᤧᤘᤕᤧ॥ 39ᤜᤧᤰᤁᤩᤠᤱ ᤘᤠᤍᤥ᤺ᤰᤔᤠ ᤌᤠᤅᤧᤀᤠᤱ ᤏᤡ᤺ᤶᤔᤠ ᤛᤡᤔᤠᤏᤢ᤺ᤸᤗᤧ ᤋᤃᤡ ᤌᤣ ᤐᤥᤱ ᤁᤧᤗ᤹ᤒᤠᤴ ᤂᤧᤱᤜᤠ᤹ᤖᤧ ᤌᤣᤀᤠᤱ ᤏᤡᤱᤘᤠ᤹ ᤔᤧᤱᤃᤳᤋᤢᤴᤗᤥ॥ ᤒᤠ ᤜᤧᤰᤁᤣᤗ᤹ᤖᤡᤰᤁᤣ ᤔᤧᤴᤇᤠᤶᤛᤠ᤺ᤸᤗᤧ ᤁᤢᤕᤢᤔᤠᤴᤏᤠᤱ ᤐᤥᤱᤗᤥ॥ 40ᤂᤧᤴ ᤕᤧᤶᤔᤥ ᤏᤧᤵᤑᤢ ᤔᤏᤠᤜᤠ᤹ ᤐᤩᤠᤱᤛᤡᤃᤧᤴ ᤀᤡᤰᤋᤠᤵᤐᤥ ᤕᤠ᤺ᤶᤒᤰ ᤆᤥ᤺ᤰᤛᤢᤖ ᤕᤠᤰᤛᤡᤸᤗᤧ ᤌᤡᤰᤁᤡᤴ ᤋᤣ᤹. ᤘᤣ᤹ᤛᤔᤠ ᤘᤠ᤹ ᤗᤠ᤺ᤳᤗᤥ॥ 41ᤜᤧᤰᤁᤩᤠᤱ ᤏᤧᤵᤑᤢ ᤔᤧᤴᤇᤢᤔᤠᤜᤠ᤹ ᤗᤢᤱᤛᤢᤶᤔᤥ ᤕᤠ᤹ᤕᤢ᤺ᤳᤏᤢ ᤕᤢᤱᤛᤡᤸᤗᤧ ᤌᤡᤰᤁᤡᤴ ᤋᤣ᤹. ᤘᤣ᤹ᤛᤔᤠ ᤕᤢᤱ ᤗᤠ᤺ᤳᤗᤥ॥ 42ᤂᤧᤸᤗᤧᤆᤥᤃᤢᤸᤗᤧ ᤂᤡᤏᤡ᤹ᤀᤠᤱ ᤀᤠᤵᤑᤠᤸᤗᤧᤛᤠᤱ ᤕᤠᤖᤡᤵ ᤐᤥ᤺ᤰᤂᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤍᤠᤱᤒᤠᤴ ᤀᤠᤵᤑᤠᤸᤗᤧ ᤕᤢᤒᤣ ᤁᤧᤗ᤹ᤒᤠᤴ ᤂᤡᤏᤡ᤹ ᤏᤡᤱᤘᤠ᤹ ᤁᤧᤱᤃᤳᤋᤢᤶᤔᤡᤴᤗᤥ॥ 43ᤜᤡᤶᤍᤠᤱᤒᤠᤸᤗᤧ ᤂᤢ᤺ᤴᤍᤪᤡᤰᤐᤧᤴ ᤀᤠᤳᤋᤡᤴ ᤕᤧᤶᤔᤥ ᤋᤠ ᤁᤧᤗ᤹ᤒᤠᤴ ᤏᤡᤱᤘᤠ᤹ ᤂᤥᤛᤢᤏᤧ ᤑᤠ᤹ᤃᤪ ᤂᤧᤸᤗᤧ ᤔᤧᤴᤀᤡᤶᤔᤣ ᤜᤡᤶᤔᤡᤴ ᤁᤥᤛᤢᤀᤠᤱ ᤂᤧᤴ ᤂᤢ᤺ᤴᤍᤪᤡᤰᤐᤧᤴ ᤂᤢ᤺ᤵᤔᤠ ᤔᤧᤒᤠᤱᤄᤢᤴ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹ᤀᤥ॥ 44ᤂᤧᤸᤗᤧᤆᤥᤃᤢᤸᤗᤧ ᤂᤡᤏᤡ᤹ᤀᤠᤱ ᤀᤠᤵᤑᤠᤸᤗᤧᤛᤠᤱ ᤕᤠᤖᤡᤵ ᤘᤕᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤔᤧᤴᤇᤠᤶᤛᤠᤴ ᤕᤢ ᤑᤠ᤹ᤀᤠᤱ ᤔᤧᤴᤀᤡ᤺ᤳᤋᤣ ᤁᤧᤘᤕᤡᤸᤗᤧ ᤂᤢᤏᤧ᤹ ᤕᤢᤖᤥ॥
ᤏᤛᤠ᤺ᤴᤛᤠᤒᤠ ᤏᤢ ᤋᤠᤵᤑᤧ᤺ᤶᤒᤠ ᤛᤧᤘᤠᤖᤥᤒᤠᤜᤠ᤹
(ᤗᤢᤁᤠ ᥇᥈:᥊᥇-᥊᥎)
45“ᤀᤠᤳᤋᤡᤴ ᤛᤧᤘᤠᤖᤥᤒᤠᤴ ᤏᤛᤠ᤺ᤴᤛᤠᤒᤠ ᤏᤢ ᤛᤡᤰᤁᤢᤶᤛᤠᤒᤠ ᤆᤥᤰ. ᤂᤧᤴᤏᤡᤴ ᤜᤡᤶᤍᤠᤱᤒᤠᤸᤗᤧ ᤁᤢᤜᤡᤶᤎᤠ᤺ᤱᤜᤠ᤹ ᤀᤥᤔᤧᤵᤔᤠ ᤕᤢᤰ ᤐᤡᤖᤢᤀᤠᤱ ᤂᤧᤸᤗᤧ ᤘᤣ᤹ ᤛᤧᤘᤠᤖᤥᤒᤠᤜᤠ᤹ ᤕᤧᤶᤕᤧᤶᤔᤥ ᤆᤠᤔᤠ ᤌᤢᤱᤔᤠ ᤐᤡᤖᤢᤛᤡ᤹ᤖᤥ॥ 46ᤂᤧᤴ ᤜᤡᤶᤍᤠᤱᤒᤠᤴ ᤏᤢ᤺ᤱ ᤋᤠ᤺ᤸᤗᤧ ᤂᤧᤴ ᤛᤧᤘᤠᤖᤥᤒᤠᤸᤗᤧ ᤒᤠ ᤜᤧᤰᤁᤣᤀᤣ ᤆᤥᤃᤢᤖ ᤘᤠ᤹ᤒᤠ ᤋᤢᤔᤢᤏᤧ ᤑᤠ᤹ᤃᤪ ᤂᤧᤴ ᤌᤢᤶᤄᤥ ᤐᤡᤖᤢ᤹ᤖᤥ॥ 47ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤂᤧᤴ ᤜᤡᤶᤍᤠᤱᤒᤠᤸᤗᤧ ᤂᤧᤴ ᤛᤧᤘᤠᤖᤥᤒᤠᤴ ᤁᤧᤖᤧᤰ ᤁᤢᤕᤠᤱᤛᤠᤁᤢᤴᤎᤣ ᤛᤶᤍᤠᤱ ᤕᤢᤰ ᤐᤡᤖᤢ᤹ᤖᤥ॥ 48ᤁᤖ ᤂᤧᤴ ᤋᤠᤰᤁᤧᤓᤧ᤹ᤒᤠ ᤛᤧᤘᤠᤖᤥᤒᤠᤸᤗᤧ ᤁᤢᤏᤡᤱᤘᤠ᤹ᤒᤥ ᤀᤠᤴᤍᤠᤱᤒᤠᤴ ‘ᤜᤠᤖᤠ ᤔᤧᤍᤠᤏᤧᤴ’ ᤗ᤹. 49ᤜᤧᤰᤁᤩᤠᤱ ᤁᤢᤴᤈᤢᤶ ᤛᤧᤘᤠᤖᤥᤒᤠᤜᤠ᤹ ᤜᤡᤵᤋᤢᤛᤡᤀᤠᤱ ᤌᤡ᤺ᤔᤛᤠᤱᤜᤠ᤹ᤏᤢ ᤆᤠᤔᤠ ᤌᤢᤱᤔᤠ ᤜᤣ᤺ᤰᤋᤢ᤹ᤏᤧ ᤑᤠ᤹ᤃᤪ 50ᤂᤧᤸᤗᤧ ᤁᤢᤴᤍᤠᤱᤒᤠᤴ ᤋᤠ ᤗ᤹ᤖᤡᤰ ᤏᤡᤱᤘᤠ᤹ ᤔᤧᤀᤡ᤺ᤳᤋᤢᤴᤒᤠ ᤕᤧᤶᤔᤥ ᤁᤢᤴᤍᤠᤱᤒᤠᤴ ᤋᤠ᤺ᤖᤥ॥ 51ᤜᤧᤰᤁᤩᤠᤱ ᤁᤢᤴᤍᤠᤱᤒᤠᤸᤗᤧ ᤂᤧᤴ ᤛᤠ᤹ᤖᤡᤰ ᤋᤧ᤺ᤶᤓᤢᤰ ᤕᤠᤰᤋᤢᤀᤠᤱ ᤁᤢᤏᤡᤱᤘᤠ᤹ ᤁᤧᤈᤡ᤺ᤵᤐᤠᤜᤠ᤹ᤏᤢ ᤛᤥᤖᤡᤰ ᤂᤢᤶᤍᤡᤱ ᤐᤡᤖᤢ᤹ᤖᤥ॥ ᤂᤧᤵᤔᤥᤃ ᤜᤠ᤺ᤵᤔᤠᤴ ᤏᤢ ᤛᤠ᤹ᤖᤡᤰ ᤋᤢᤰᤂᤣ᤺ᤸᤗᤧ ᤜᤠᤒᤥ᤹ ᤕᤧ᤺ᤱᤔᤠᤴ ᤐᤥᤱᤗᤥ॥”
© 2009, 2023, Wycliffe Bible Translators, Inc. All rights reserved.