ᤔᤳᤋᤡ 25
25
ᤌᤡᤒᤥᤱ ᤛᤡᤛᤠᤃᤧᤴ ᤔᤧᤴᤇᤡᤕᤠ᤹ᤜᤠ᤹ᤖᤧᤴ ᤂᤧᤍᤠ᤹
1ᤕᤧᤛᤢᤖᤧ ᤕᤠᤶᤔᤥ ᤐᤠ᤺ᤳᤋᤢ. “ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤈᤢᤶᤔᤡᤱᤃ ᤀᤰᤋᤱᤒᤠ ᤆᤥᤰ—ᤋᤧᤴᤎᤠᤶᤃᤧᤴ ᤔᤣ᤺ᤰᤂᤡᤶᤗᤧᤴ ᤏᤠᤗᤡᤛᤠᤱᤅᤡᤴ ᤗᤠᤶᤗᤰᤛᤧ ᤛᤣᤔᤡ ᤁᤧᤒᤱᤔᤠᤀᤠᤱ ᤁᤧᤒᤣ᤺ᤰᤔᤠ ᤌᤡᤒᤥᤱ ᤛᤡᤛᤠᤃᤧᤴ ᤔᤧᤴᤇᤡᤕᤠ᤹ᤜᤠ᤹ ᤔᤧᤘᤕᤧ॥ 2ᤂᤧᤱᤜᤠ᤹ᤀᤥ ᤅᤠᤛᤡ ᤁᤢᤏᤡᤛᤡ᤺ᤰ ᤁᤧᤜᤥ᤺ᤵᤔᤠ ᤏᤢ ᤅᤠᤛᤡ ᤛᤡᤰᤁᤢᤶᤛᤠᤔᤠ ᤔᤧᤴᤇᤡᤕᤠ᤹ᤜᤠ᤹ ᤔᤧᤘᤕᤧᤖᤥ॥ 3ᤂᤧᤴ ᤁᤢᤏᤡᤛᤡ᤺ᤰ ᤁᤧᤜᤥ᤺ᤵᤔᤠ ᤔᤧᤴᤇᤡᤕᤠ᤹ᤜᤠ᤹ᤖᤧ ᤛᤣᤔᤡ᤺ᤱᤃ ᤔᤧᤍᤣ᤹ᤖᤢ ᤁᤖ ᤏᤡ᤺ᤱᤃᤣ᤺ᤴ ᤔᤧᤴᤕᤠᤱᤛᤡᤱᤅᤡᤴᤗᤥ॥ 4ᤁᤖ ᤂᤧᤴ ᤅᤠᤛᤡ ᤛᤡᤰᤁᤢᤶᤛᤠᤔᤠ ᤔᤧᤴᤇᤡᤕᤠ᤹ᤜᤠ᤹ᤖᤧᤃ ᤛᤣᤔᤡᤴ ᤏᤢ ᤏᤡ᤺ᤱᤃᤣ᤺ᤴ ᤁᤠᤷᤕᤥᤔᤠᤜᤠ᤹ᤀᤥ ᤔᤧᤕᤠᤱᤛᤡᤱᤗᤥ॥ 5ᤜᤧᤰᤁᤩᤠᤱ ᤋᤧᤴᤎᤠᤶᤃᤧᤴ ᤔᤣ᤺ᤰᤂᤡᤶᤗᤧᤴ ᤏᤠᤗᤡᤛᤠᤱᤅᤡᤴ ᤛᤢ᤺ᤛᤧᤀᤠᤱ ᤜᤠᤖᤠ ᤔᤧᤍᤩᤧᤏᤧᤴᤏᤡᤸᤗᤧᤃ ᤂᤧᤱᤜᤠ᤹ ᤀᤡᤳᤌᤥ᤹ᤘᤠ ᤗᤥᤔᤠ ᤔᤧᤜᤣ᤺ᤰᤋᤧᤀᤠᤱ ᤔᤧᤀᤡᤵᤛᤧᤖᤥ॥ 6ᤛᤧᤳᤗᤢᤶᤓᤰᤋᤧᤸᤗᤧ ᤋᤧᤴᤎᤠᤶᤃᤧᤴ ᤏᤠᤗᤡᤛᤠᤱᤅᤡᤴ ᤂᤠ ᤋᤩᤧᤖᤥ. ᤁᤢᤍᤢᤶᤛᤧ ᤗ᤺ᤴᤍᤧᤶᤔᤧ᤹ᤀᤥ ᤗ᤹ᤖᤡᤰ ᤐᤠ᤺ᤵᤔᤏᤠᤒᤠ ᤀᤡᤰᤗᤠᤴ ᤔᤧᤄᤧᤵᤛᤢ. 7ᤜᤧᤰᤁᤩᤠᤱ ᤂᤧᤴ ᤛᤡᤛᤠᤃᤧᤴ ᤔᤧᤴᤇᤡᤕᤠ᤹ᤜᤠ᤹ ᤔᤧᤒᤥᤃᤧᤀᤠᤱ ᤂᤢᤏᤡ᤹ ᤛᤣᤔᤡᤴ ᤔᤧᤜᤠ᤺ᤴᤍᤢᤖᤥ॥ 8ᤂᤧᤴ ᤁᤢᤏᤡᤛᤡ᤺ᤰ ᤁᤧᤜᤥ᤺ᤵᤔᤠᤜᤠ᤹ᤖᤧ ᤛᤡᤰᤁᤢᤶᤛᤠᤔᤠ ᤔᤧᤴᤇᤡᤕᤠ᤹ᤜᤠ᤹ ᤔᤧᤔᤧᤳᤋᤢᤛᤡ. ‘ᤀᤠᤏᤡᤃᤧᤀᤠᤱ ᤁᤢᤓᤠ ᤏᤡ᤺ᤱᤃᤣ᤹ ᤀᤠᤒᤡᤖᤧ᤹ᤏᤠ. ᤀᤠᤏᤡᤃᤣ ᤛᤣᤔᤡ᤺ᤱᤃ ᤛᤡᤔᤠ ᤀᤡ᤺ᤳᤋᤧᤖᤥ॥’ 9ᤂᤧᤴ ᤛᤡᤰᤁᤢᤶᤛᤠᤔᤠ ᤔᤧᤴᤇᤡᤕᤠ᤹ᤜᤠ᤹ᤖᤧ ᤏᤥᤃᤵ ᤔᤧᤒᤡᤖᤢᤛᤡ. ‘ᤔᤣ᤺ᤴᤗᤥ. ᤀᤠᤏᤡ᤹ ᤁᤧᤖᤧᤰ ᤁᤧᤍᤧᤰᤐᤠ ᤏᤡ᤺ᤱᤃᤣ᤹ᤃ ᤔᤧᤃᤳᤋᤢᤶᤒᤧᤴᤗᤥ॥ ᤏᤡ᤺ᤱᤃᤣ᤹ ᤁᤧᤛᤱᤒᤠᤜᤠ᤹ᤖᤥ ᤂᤡᤏᤡ᤹ ᤐᤣᤃᤧᤶᤔᤧ᤹ᤀᤠᤱ ᤀᤡᤅᤧᤶᤔᤧ᤹ᤀᤥ॥’
10“ᤁᤖ ᤂᤧᤱᤜᤠ᤹ ᤏᤡ᤺ᤱᤃᤣ᤹ ᤀᤡᤱᤛᤧ ᤔᤧᤒᤣᤖ ᤔᤧᤒᤳᤇᤧᤸᤗᤧᤀᤣ ᤋᤧᤴᤎᤠᤶᤃᤧᤴ ᤔᤣ᤺ᤰᤂᤡᤶᤖᤧ ᤏᤠᤗᤡᤛᤠᤱᤅᤡᤴ ᤁᤧᤖᤧ ᤋᤩᤧᤖᤥ॥ ᤜᤧᤰᤁᤩᤠᤱ ᤂᤧᤴ ᤕᤠᤖᤡᤵ ᤁᤧᤒᤥᤱᤔᤠ ᤛᤡᤛᤠᤃᤧᤴ ᤔᤧᤴᤇᤡᤕᤠ᤹ᤜᤠ᤹ ᤂᤢᤏᤧ᤹ᤏᤢ ᤔᤣ᤺ᤰᤂᤡᤶ ᤛᤠᤓᤠᤱᤈᤠᤀᤥ ᤔᤧᤗᤠᤛᤧᤀᤠᤱ ᤗᤠᤶᤎᤣ᤺ᤵᤐᤧᤴ ᤛᤢᤒᤧᤖᤥ॥ 11ᤕᤠᤱᤛᤡ ᤂᤧᤴ ᤁᤢᤏᤡᤛᤡ᤺ᤰ ᤁᤧᤜᤥ᤺ᤵᤔᤠ ᤛᤡᤛᤠᤃᤧᤴ ᤔᤧᤴᤇᤡᤕᤠ᤹ᤜᤠ᤹ ᤔᤧᤃᤧᤖᤧ ᤔᤧᤍᤩᤧᤀᤠᤱ ᤀᤰᤂᤣᤗ᤹ᤖᤡᤰ ᤔᤧᤀ᤺ᤰᤋᤧ. ‘ᤍᤠᤱᤒᤣ. ᤍᤠᤱᤒᤣ. ᤀᤠᤏᤡᤃᤣ ᤗᤠᤃᤡᤀᤠᤱ ᤗᤠᤶᤎᤣ᤺ᤵᤐᤧᤴ ᤜᤴᤍᤧ ᤀᤠᤒᤡᤖᤧ᤹ᤏᤠ᥄’ 12ᤁᤖ ᤂᤧᤴ ᤏᤠᤗᤡᤛᤠᤱᤅᤡᤸᤗᤧ ᤏᤥᤃᤵ ᤐᤡᤖᤢᤛᤡ. ‘ᤀᤡᤱᤃᤠ᤹ ᤛᤧᤰᤂᤠᤛᤠᤱ ᤁᤢᤛᤡᤱ ᤔᤧᤏᤡ᤺ᤳᤏᤡᤱᤅᤡᤴᤗᤥ॥’ 13ᤂᤧᤸᤗᤧᤆᤥᤃᤢᤸᤗᤧ ᤛᤡᤱᤛᤡᤱ ᤕᤧᤰᤕᤧᤰᤁᤠᤱ ᤕᤠᤖᤡᤵ ᤘᤕᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤀᤠᤕᤢᤔᤠ ᤕᤧᤶᤔᤡᤴ ᤁᤧᤴᤏᤡᤛᤢᤶᤔᤡᤴᤗᤥ॥”
ᤛᤢᤶᤛᤡ ᤛᤣᤘᤠᤖᤥᤒᤠᤜᤠ᤹ᤖᤧᤴ ᤂᤧᤍᤠ᤹
(ᤗᤢᤁᤠ ᥇᥏:᥇᥇-᥈᥍)
14ᤕᤧᤛᤢᤖᤧ ᤕᤠᤶᤔᤥ ᤔᤧᤳᤋᤢᤛᤡ. “ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤈᤢᤶᤔᤡᤱᤃ ᤀᤰᤋᤱᤒᤠ ᤆᤥᤰ—ᤔᤠ᤺ᤱᤄᤠ ᤗᤠᤶᤍᤡ᤺ᤰᤁᤥ ᤁᤧᤒᤣ᤺ᤰᤐᤠᤖ ᤁᤧᤒᤵᤐᤠ ᤔᤏᤠᤎᤡᤰ ᤘᤕᤧ॥ ᤂᤧᤸᤗᤧ ᤁᤢᤛᤧᤘᤠᤖᤥᤒᤠᤜᤠ᤹ ᤀᤢ᤺ᤳᤋᤢᤛᤡᤀᤠᤱ ᤁᤢᤕᤠᤱᤅᤡᤴ ᤑᤥᤔᤠ ᤑᤠ᤹ᤀᤠᤱ ᤐᤡᤖᤢᤛᤡᤖᤥ॥ 15ᤂᤧᤸᤗᤧ ᤌᤡᤰᤁᤡᤴ ᤜᤧᤴᤇᤡᤱ ᤅᤠᤛᤡ#᥈᥋:᥇᥋ ᤃᤪᤡᤁ ᤐᤠ᤺ᤴᤍᤠᤱᤅᤥ “ᤋᤣᤗᤣᤴᤋ॥” ᤌᤡᤰ ᤋᤠᤗᤧᤴᤋᤧᤴ ᥉᥊ ᤁᤡᤗᤥᤃᤪᤠᤔ ᤕᤥᤖᤧ॥ (᥋.᥆᥆᥆) ᤛᤠᤶᤔᤩᤠᤱ ᤕᤠᤱᤀᤡᤳᤇᤡ. ᤘᤣ᤹ᤛᤔᤠ ᤜᤧᤴᤇᤡᤱ ᤏᤧᤳᤇᤡ (᥈.᥆᥆᥆) ᤛᤠᤶᤔᤩᤠᤱ ᤕᤠᤱᤀᤡᤳᤇᤡ. ᤜᤧᤰᤁᤩᤠᤱ ᤛᤢᤶᤛᤡᤃᤣ᤺ᤰᤐᤧᤴ ᤜᤧᤴᤇᤡᤱ ᤌᤡᤰ (᥇.᥆᥆᥆) ᤛᤠᤶᤔᤩᤠᤱ ᤕᤠᤱᤀᤡᤳᤇᤡᤴ ᤕᤠᤱ ᤁᤧᤔᤠ ᤔᤧᤗᤧᤛ᤻ᤛᤢᤒᤠ ᤁᤢᤀᤡᤛᤡᤰ ᤐᤡᤖᤢᤛᤡᤖᤥ॥ ᤜᤧᤰᤁᤩᤠᤱ ᤂᤧᤴ ᤔᤠ᤺ᤱᤄᤠ ᤗᤠᤶᤍᤡ᤺ᤰᤁᤥ ᤐᤣᤖᤥ॥ 16ᤂᤧᤴ ᤜᤧᤴᤇᤡᤱ ᤅᤠᤛᤡ ᤛᤠᤶᤔᤩᤠᤱ ᤕᤠᤱᤀᤡᤳᤇᤡ ᤁᤧᤄᤥᤒᤠ ᤛᤧᤘᤠᤖᤥᤒᤠᤴ ᤂᤡᤔᤥ ᤐᤣᤀᤠᤱ ᤂᤧᤴ ᤕᤠᤱᤅᤡᤴ ᤁᤧᤛᤢᤀᤠᤱ ᤘᤣ᤹ ᤜᤧᤴᤇᤡᤱ ᤅᤠᤛᤡ ᤛᤠᤶᤔᤩᤠᤱ ᤕᤠᤱᤀᤡᤳᤇᤡ ᤌᤃᤢᤖᤥ॥ 17ᤜᤧᤰᤁᤣᤗ᤹ᤖᤡᤰᤁᤣ ᤜᤧᤴᤇᤡᤱ ᤏᤧᤳᤇᤡ ᤛᤠᤶᤔᤩᤠᤱ ᤕᤠᤱᤀᤡᤳᤇᤡ ᤁᤧᤄᤥᤒᤧᤸᤗᤧᤀᤠᤱ ᤘᤣ᤹ ᤜᤧᤴᤇᤡᤱ ᤏᤧᤳᤇᤡ ᤛᤠᤶᤔᤩᤠᤱ ᤕᤠᤱᤀᤡᤳᤇᤡ ᤌᤃᤢ॥ 18ᤁᤖ ᤜᤧᤴᤇᤡᤱ ᤌᤡᤰᤗᤰ ᤛᤠᤶᤔᤩᤠᤱ ᤕᤠᤱᤀᤡᤳᤇᤡ ᤁᤧᤄᤥᤒᤠ ᤛᤣᤘᤠᤖᤥᤒᤠᤱᤃ ᤐᤣᤀᤠᤱ ᤂᤠᤶᤔᤡᤴ ᤋᤕᤢᤀᤠᤱ ᤁᤢᤴᤍᤠᤱᤒᤠᤸᤗᤧ ᤁᤢᤕᤠᤱᤅᤡᤴ ᤂᤧᤵᤔᤥ ᤗᤢᤵᤋᤢ ᤏᤧᤛ᤻ᤛᤢᤖᤥ॥
19“ᤕᤖᤡᤰ ᤕᤧᤶ ᤀᤣᤃᤠᤱ ᤂᤢᤏᤡ᤹ ᤍᤠᤱᤒᤠᤴ ᤏᤢ᤺ᤰᤂᤧ ᤋᤩᤧᤀᤠᤱ ᤁᤢᤛᤧᤘᤠᤖᤥᤒᤠᤜᤠ᤹ ᤁᤢᤕᤠᤱᤅᤡᤸᤗᤧᤴ ᤂᤠᤖᤠᤳ ᤏᤠ᤺ᤰᤋᤢᤛᤡ॥ 20ᤂᤧᤴ ᤜᤧᤴᤇᤡᤱ ᤅᤠᤛᤡ ᤛᤠᤶᤔᤩᤠᤱ ᤕᤠᤱᤀᤡᤳᤇᤡ ᤁᤧᤄᤥᤒᤠ ᤛᤧᤘᤠᤖᤥᤒᤧᤸᤗᤧ ᤘᤣ᤹ ᤜᤧᤴᤇᤡᤱ ᤅᤠᤛᤡ ᤛᤠᤶᤔᤩᤠᤱ ᤕᤠᤱᤀᤡᤳᤇᤡ ᤋᤠᤖᤢᤀᤠᤱ ᤀᤰᤂᤣ ᤔᤧᤳᤋᤢ. ‘ᤀᤠᤍᤠᤱᤒᤣ. ᤜᤧᤴᤇᤡᤱ ᤅᤠᤛᤡ ᤛᤠᤶᤔᤩᤠᤱ ᤕᤠᤱᤀᤡᤳᤇᤡ ᤁᤧᤒᤡᤖᤠᤱᤅᤠᤱ ᤘᤕᤧ. ᤁᤖ ᤀᤥᤔᤧᤳᤋᤧ᤹ᤀᤥ. ᤀᤡᤱᤃᤠ᤹ ᤘᤣ᤹ ᤜᤧᤴᤇᤡᤱ ᤅᤠᤛᤡ ᤌᤃᤢᤱ ᤐᤡᤏᤧᤀᤠᤱ ᤘᤠ᤹ᤖᤥ॥’ 21ᤁᤢᤴᤍᤠᤱᤒᤠᤸᤗᤧ ᤂᤧᤴ ᤔᤧᤳᤋᤢ. ‘ᤏᤢᤒᤠ ᤏᤢ ᤏᤡᤱᤘᤠ᤹ᤀᤡᤖᤧ ᤂᤥ᤺ᤵᤋᤢᤒᤠ ᤛᤣᤘᤠᤖᤥᤒᤠᤀᤣ. ᤏᤢᤒᤠ ᤁᤧᤈᤥᤃᤢᤖᤥ᥄ ᤂᤧᤏᤧ᤹ᤃ ᤔᤡᤛᤠᤰ ᤕᤠᤱᤅᤥ ᤏᤛᤠ᤺ᤴᤛᤠᤒᤠ ᤁᤧᤒᤥ᤺ᤰᤂᤧ. ᤀᤠᤸᤗ ᤕᤖᤡᤰ ᤐᤠ᤺ᤴᤏᤥ ᤕᤢᤰ ᤐᤡᤏᤧᤖᤥ॥ ᤀᤠᤸᤗ ᤀᤠᤏᤡ᤹ ᤛᤥᤖᤡᤰ ᤛ᤺ᤳᤋᤡᤖᤥ᥄’
22“ᤜᤧᤰᤁᤩᤠᤱ ᤜᤧᤴᤇᤡᤱ ᤏᤧᤳᤇᤡ ᤛᤠᤶᤔᤩᤠᤱ ᤕᤠᤱᤀᤡᤳᤇᤡ ᤁᤧᤄᤥᤒᤠ ᤁᤢᤛᤧᤘᤠᤖᤥᤒᤧᤸᤗᤧ ᤔᤧᤳᤋᤢ. ‘ᤀᤠᤍᤠᤱᤒᤣ. ᤂᤧᤏᤧ᤹ᤃ ᤀᤡᤱᤃᤠ᤹ ᤜᤧᤴᤇᤡᤱ ᤏᤧᤳᤇᤡ ᤛᤠᤶᤔᤩᤠᤱ ᤕᤠᤱᤀᤡᤳᤇᤡ ᤁᤧᤒᤡᤖᤠᤱᤅᤠᤱ ᤘᤕᤧ. ᤁᤖ ᤀᤥᤔᤧᤳᤋᤧ᤹ᤀᤥ. ᤀᤡᤱᤃᤠ᤹ ᤘᤣ᤹ ᤜᤧᤴᤇᤡᤱ ᤏᤧᤳᤇᤡ ᤌᤃᤢᤱ ᤐᤡᤏᤧᤀᤠᤱ ᤘᤠ᤹ᤖᤥ॥’ 23ᤁᤢᤴᤍᤠᤱᤒᤠᤸᤗᤧ ᤂᤧᤴ ᤔᤧᤳᤋᤢ. ‘ᤏᤢᤒᤠ ᤏᤢ ᤏᤡᤱᤘᤠ᤹ᤀᤡᤖᤧ ᤂᤥ᤺ᤵᤋᤢᤒᤠ ᤛᤣᤘᤠᤖᤥᤒᤠᤀᤣ. ᤏᤢᤒᤠ ᤁᤧᤈᤥᤃᤢᤖᤥ᥄ ᤂᤧᤏᤧ᤹ᤃ ᤔᤡᤛᤠᤰ ᤕᤠᤱᤅᤥ ᤏᤛᤠ᤺ᤴᤛᤠᤒᤠ ᤁᤧᤒᤥ᤺ᤰᤂᤧ. ᤀᤠᤸᤗ ᤕᤖᤡᤰ ᤐᤠ᤺ᤴᤏᤥ ᤕᤢᤰ ᤐᤡᤏᤧᤖᤥ॥ ᤀᤠᤸᤗ ᤀᤠᤏᤡ᤹ ᤛᤥᤖᤡᤰ ᤛ᤺ᤳᤋᤡᤖᤥ᥄’
24“ᤀᤠᤸᤗ ᤜᤧᤴᤇᤡᤱ ᤌᤡᤰ ᤛᤠᤶᤔᤩᤠᤱ ᤕᤠᤱᤀᤡᤳᤇᤡ ᤁᤧᤄᤥᤒᤠ ᤛᤧᤘᤠᤖᤥᤒᤠᤸᤗᤧᤀᤠᤱ ᤔᤧᤳᤋᤢ. ‘ᤀᤠᤍᤠᤱᤒᤣ. ᤂᤧᤏᤧ᤹ᤃ ᤁᤧᤈᤡ᤺ᤵᤐᤠ ᤁᤧᤈᤥᤰ ᤑᤠ᤹ᤀᤠᤱ ᤏᤡᤛᤢᤱᤅᤠᤱ ᤘᤕᤠᤱᤗᤥ॥ ᤂᤧᤏᤧ᤹ ᤀᤠᤳᤋᤥ ᤆᤠ ᤁᤧᤴᤍᤣ᤺ᤛᤢᤴ ᤂᤧᤵᤔᤥ ᤂᤧᤏᤧ᤹ ᤆᤠ ᤁᤧᤛᤢᤵᤛᤢ᤹ᤖᤥ. ᤀᤠᤳᤋᤥ ᤆᤠ ᤁᤧᤴᤇᤧᤛᤢᤴ ᤂᤧᤵᤔᤥᤀᤣ ᤆᤠ ᤁᤧᤓᤢᤱᤗᤥ॥ 25ᤂᤧᤸᤗᤧᤆᤥᤃᤢᤸᤗᤧ ᤀᤡᤱᤃᤠ᤹ ᤁᤡᤛᤠᤱᤅᤠᤱ ᤁᤧᤕᤠᤱᤅᤡᤴ ᤋᤣ᤹ᤖᤢᤱᤅᤠᤱ ᤂᤠᤶᤔᤥ ᤆᤡᤰᤂᤢᤱ॥ ᤀᤥᤔᤧᤳᤋᤧ᤹. ᤂᤧᤏᤧ᤹ ᤁᤧᤕᤠᤱᤅᤡᤴ ᤂᤠ ᤁᤵᤔᤥ ᤘᤠ᤹ᤖᤥ॥’
26“ᤂᤧᤸᤗᤧ ᤁᤢᤴᤍᤠᤱᤒᤠᤸᤗᤧ ᤂᤧᤴ ᤏᤥᤃᤵ ᤐᤡᤖᤢ. ‘ᤂᤧᤏᤧ᤹ ᤋᤠᤰᤁᤧᤓᤧ᤹ᤒᤠ ᤏᤢ ᤁᤢᤗᤧᤶᤃᤧᤕᤢᤒᤠ ᤛᤣᤘᤠᤖᤥᤒᤠᤀᤣ᥄ ᤂᤧᤏᤧ᤹ᤃ ᤀᤡᤱᤃᤠ᤹ ᤀᤠᤳᤋᤥ ᤆᤠ ᤔᤧᤍᤣᤀᤠᤴ ᤂᤧᤵᤔᤥ ᤆᤠ ᤛᤢᤵᤛᤢᤱ. ᤀᤠᤳᤋᤥ ᤆᤠ ᤔᤧᤛᤧᤛᤢᤱᤅᤡᤴ ᤂᤧᤵᤔᤥ ᤆᤠ ᤑᤢᤰᤂᤢᤱ ᤑᤠ᤹ᤀᤠᤱ ᤁᤧᤏᤡᤛᤢᤀᤠᤱᤅᤣ ᤁᤧᤘᤕᤧᤖᤥ॥ 27ᤜᤧᤰᤁᤣ᤺ᤸᤗᤧ ᤀᤠᤕᤠᤱᤅᤡᤴ ᤁᤧᤍᤣ᤹ᤖᤢᤀᤠᤱ ᤛᤡᤱᤏᤠᤳ ᤁᤧᤃᤧᤒᤠᤜᤠ᤹ᤖᤥ ᤁᤧᤕᤢᤰᤂᤢᤸᤗᤧ ᤐᤥ᤺ᤰᤂᤧᤒᤠᤖᤥ॥ ᤜᤧᤰᤁᤣ ᤁᤧᤈᤥᤃᤢᤸᤗᤧ ᤀᤡᤱᤃᤠ᤹ ᤏᤢ᤺ᤰᤂᤠᤱ ᤋᤩᤠᤱᤅᤡᤸᤗᤧ ᤀᤠᤕᤠᤱᤅᤡᤸᤗᤧ ᤁᤢᤛ᤻ᤛᤠᤃ ᤂᤥᤛᤢᤱᤒᤠ ᤘᤕᤧᤖᤥ॥ 28ᤁᤴ ᤛᤧᤘᤠᤖᤥᤒᤠᤸᤗᤧ ᤁᤳᤋᤢᤒᤠ ᤕᤠᤱᤅᤡᤴ ᤏᤠᤵᤋᤧᤶᤔᤧ᤹ᤀᤠᤱ ᤌᤡᤒᤥᤱ ᤜᤧᤴᤇᤡᤱ ᤛᤠᤶᤔᤩᤠᤱ ᤕᤠᤱᤀᤡᤳᤇᤡ ᤁᤧᤃᤵᤐᤧᤴ ᤐᤡᤖᤧᤶᤔᤧ᤹ᤀᤥ॥ 29ᤌᤣᤀᤠᤱᤓᤧᤸᤗᤧ ᤁᤧᤃᤵᤐᤠᤸᤗᤧ ᤀᤠᤸᤗᤛᤠᤱ ᤕᤖᤡᤰ ᤂᤥᤛᤢᤀᤠᤱ ᤂᤧᤸᤗᤧᤴ ᤕᤖᤡᤰ ᤐᤥᤱᤗᤥ॥ ᤁᤖ ᤜᤠ᤺ᤳᤗᤧ ᤔᤧᤃᤳᤋᤢᤴ. ᤂᤧᤸᤗᤧ ᤁᤳᤋᤢᤒᤠᤴᤏᤠᤱ ᤏᤠᤵᤗᤥ॥ 30ᤀᤠᤸᤗ ᤂᤧᤴ ᤀᤡᤏᤠ᤺ᤶᤒᤠ ᤛᤧᤘᤠᤖᤥᤒᤠᤴ ᤗᤠ᤺ᤰᤁᤠᤳ ᤂᤠᤍᤠᤶᤔᤥ ᤗᤠᤵᤑᤢᤛᤧᤶᤔᤧ᤹॥ ᤂᤧᤵᤔᤥ ᤜᤠ᤺ᤵᤔᤠᤴ ᤏᤢ ᤛᤠ᤹ᤖᤡᤰ ᤋᤢᤰᤂᤣ᤺ᤸᤗᤧ ᤜᤠᤒᤥ᤹ ᤕᤧ᤺ᤱᤔᤠᤴ ᤐᤥᤱᤗᤥ॥’”
ᤁᤢᤏᤢᤵᤔᤠ ᤂᤠᤛᤧᤴ
31“ᤔᤧᤴᤇᤠᤶᤛᤠᤴ ᤁᤢᤔᤡᤔᤡᤍᤡᤱᤅᤥ ᤁᤧᤖᤧᤰ ᤁᤢᤔᤠᤱᤗᤠᤀᤡᤱᤒᤠᤜᤠ᤹ᤏᤢ ᤕᤢ᤺ᤸᤗᤧ ᤂᤢᤏᤧ᤹ ᤔᤡᤔᤡᤍᤡᤱᤃᤧᤴ ᤁᤢᤜᤠᤱᤕᤢᤰᤏᤠᤀᤥ ᤕᤢᤱᤛᤡᤱᤗᤥ॥ 32ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤂᤢᤏᤧ᤹ ᤁᤢᤍᤃᤡ ᤔᤧᤈᤢᤶᤗᤥ॥ ᤜᤧᤰᤁᤩᤠᤱ ᤔᤧᤸᤗᤢᤰ ᤁᤶᤒᤠᤸᤗᤧ ᤔᤧᤸᤗᤢᤰᤜᤠ᤹ ᤔᤧᤴᤍᤠᤰᤜᤠ᤹ᤗᤠᤶ ᤛᤧᤴᤍᤢᤛᤡᤒᤠ ᤁᤢᤀᤡᤛᤡᤰ ᤔᤏᤠᤜᤠ᤹ ᤛᤧᤴᤍᤢᤛᤡᤖᤥ॥ 33ᤁᤢᤈᤢᤵᤛᤠᤱ ᤗᤧᤵᤔᤠᤱ ᤔᤧᤸᤗᤢᤰᤜᤠ᤹ ᤏᤢ ᤁᤢᤓᤧᤴᤇᤠᤱ ᤗᤧᤵᤔᤠᤱ ᤔᤧᤴᤍᤠᤰᤜᤠ᤹ ᤛᤧᤴᤍᤢᤛᤡᤖᤥ॥ 34ᤜᤧᤰᤁᤩᤠᤱ ᤜᤠᤱᤅᤡᤸᤗᤧ ᤁᤢᤈᤢᤵᤛᤠᤱ ᤗᤧᤵᤔᤠᤱᤒᤠᤜᤠ᤹ ᤔᤧᤳᤋᤢᤛᤡ. ‘ᤐᤠᤏᤢᤍᤡᤱ ᤀᤠᤶᤒᤠᤖᤧ ᤔᤢ᤹ᤀᤡᤛᤠᤶ ᤐᤡᤖᤢᤛᤡᤒᤠᤛᤣ. ᤋᤩᤧᤶᤔᤧ᤹ᤀᤥ. ᤏᤠᤘᤠᤃᤧᤴ ᤆᤀᤡ᤺ᤳ ᤏᤧᤛ᤻ᤛᤧᤀᤠᤱᤎᤥ ᤂᤡᤏᤡ᤹ ᤗᤠᤃᤡ ᤕᤠᤖᤡᤵ ᤆᤥ᤺ᤰᤔᤏᤠᤒᤠ ᤜᤠᤱᤈᤢᤶᤔᤡᤴ ᤕᤢᤰᤋᤧᤶᤔᤧ᤹ᤀᤥ॥ 35ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤀᤠᤛᤧᤳᤗᤠ᤺ᤰᤋᤧᤀᤠᤱ ᤘᤕᤠᤱᤅᤡᤸᤗᤧ ᤀᤡᤱᤃᤠ᤹ ᤁᤢᤈᤠ ᤕᤠᤵᤔᤡ ᤀᤠᤃᤧᤒᤡᤖᤡ. ᤀᤠᤘᤠᤔᤡ᤺ᤛᤧᤀᤠᤱ ᤘᤕᤠᤱᤅᤡᤸᤗᤧ ᤆᤫᤠ᤺ᤳ ᤕᤠᤵᤔᤡ ᤀᤠᤃᤧᤒᤡᤖᤡ. ᤀᤡᤱᤃᤠ᤹ ᤘᤠ᤹ᤔᤠ ᤋᤧᤴ ᤔᤣ᤺ᤴᤏᤣ ᤗᤠᤶᤍᤡ᤺ᤰᤐᤠ ᤐᤥ᤺ᤰᤂᤠᤱᤅᤠᤱ ᤘᤕᤠᤱᤅᤡᤸᤗᤧ ᤂᤡᤏᤡ᤹ ᤜᤡᤶᤔᤥ ᤕᤠᤵᤔᤡ ᤀᤠᤃᤧᤍᤣ᤹ᤖᤡᤖᤥ॥ 36ᤜᤧᤰᤁᤩᤠᤱ ᤀᤡᤱᤃᤠ᤹ ᤋᤣ᤺ᤵᤑᤢᤱ ᤔᤣ᤺ᤴᤏᤣ ᤘᤕᤠᤱᤅᤡᤸᤗᤧ ᤋᤣᤳ ᤕᤠᤵᤔᤡ ᤀᤠᤃᤧᤒᤡᤖᤡ. ᤀᤡᤱᤃᤠ᤹ ᤋᤢᤃᤠᤱᤅᤠᤱ ᤘᤕᤠᤱᤅᤡᤸᤗᤧ ᤕᤠᤵᤔᤡ ᤁᤶᤒᤪᤠᤱ ᤀᤠᤃᤧᤔᤧᤳᤋᤡ. ᤜᤧᤰᤁᤩᤠᤱ ᤐᤢᤱᤗᤠᤜᤡᤶᤔᤥ ᤔᤧᤛᤠᤰᤋᤠᤱᤅᤠᤱ ᤕᤠᤃᤠᤱᤅᤡᤸᤗᤧ ᤕᤠᤵᤔᤡ ᤀᤠᤃᤧᤛᤠ᤹ᤖᤡᤖᤥ॥’ 37ᤜᤧᤰᤁᤩᤠᤱ ᤂᤧᤴ ᤛᤠᤶᤕᤥᤒᤠᤜᤠ᤹ᤖᤧ ᤂᤢᤏᤧ᤹ ᤏᤥᤃᤵ ᤔᤧᤒᤡᤖᤢ. ‘ᤍᤠᤱᤒᤣ. ᤀᤠᤵᤑᤠᤸᤗᤧ ᤂᤧᤏᤧ᤹ ᤛᤠᤰᤔᤧᤴᤈᤠ ᤏᤡᤀᤠᤛᤡᤃᤧᤀᤠᤱ ᤁᤢᤈᤠ ᤐᤡᤀᤠᤛᤡᤃᤧᤒᤣ᥅ ᤁᤧᤘᤠᤔᤡᤛᤧᤒᤠ ᤏᤡᤀᤠᤛᤡᤃᤧᤀᤠᤱ ᤆᤫᤠ᤺ᤳ ᤌᤢᤱᤔᤠ ᤐᤡ᤹ᤀᤠᤛᤡᤃᤧᤒᤣ᥅ 38ᤜᤡᤶᤎᤠ᤺ᤱ ᤔᤣ᤺ᤴᤏᤣ ᤗᤠᤶᤍᤡ᤺ᤰᤐᤠ ᤁᤧᤒᤥ᤺ᤰᤂᤧᤒᤠ ᤏᤡᤀᤠᤛᤡᤃᤧᤀᤠᤱ ᤜᤡᤶᤔᤥ ᤋᤣ᤹ᤀᤠᤛᤡᤃᤧᤒᤣ᥅ ᤀᤠᤵᤑᤠᤸᤗᤧ ᤋᤣᤳ ᤔᤣ᤺ᤴᤏᤣ ᤏᤡᤀᤠᤛᤡᤃᤧᤀᤠᤱ ᤋᤣᤳ ᤐᤡ᤹ᤀᤠᤛᤡᤃᤧᤒᤣ᥅ 39ᤀᤠᤵᤑᤠᤸᤗᤧ ᤂᤧᤏᤧ᤹ ᤁᤧᤍᤢᤃᤧᤒᤠ ᤏᤢ ᤐᤢᤱᤗᤠᤜᤡᤶᤔᤥ ᤁᤧᤕᤠᤃᤧᤒᤠ ᤏᤡᤀᤠᤛᤡᤃᤧᤀᤠᤱ ᤛᤠ᤹ᤀᤠᤛᤡᤃᤧᤒᤣ᥅’ 40ᤜᤧᤰᤁᤩᤠᤱ ᤜᤠᤱᤅᤡᤸᤗᤧ ᤂᤧᤱᤜᤠ᤹ ᤔᤧᤳᤋᤢᤛᤡ ‘ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤁᤱᤜᤠ᤹ᤀᤥ ᤁᤧᤘᤠ᤹ᤒᤠ ᤀᤠᤶᤓᤢ᤹ ᤀᤠᤴᤛᤠ᤹ᤛᤡᤀᤥ ᤗᤳᤇᤠ ᤆᤢᤰᤐᤠᤎᤡᤰ ᤆᤩᤠ ᤁᤧᤔᤧᤳᤋᤢᤶ. ᤂᤧᤴ ᤀᤡᤱᤃᤠ᤹ᤀᤣ ᤕᤠᤵᤔᤡ ᤀᤠᤃᤧᤔᤧᤳᤋᤡᤒᤠᤖᤥ॥’ 41ᤜᤧᤰᤁᤩᤠᤱ ᤜᤠᤱᤅᤡᤸᤗᤧ ᤁᤢᤓᤧᤴᤇᤠᤱ ᤗᤧᤵᤔᤠᤱᤒᤠᤜᤠ᤹ ᤔᤧᤳᤋᤢᤛᤡ. ‘ᤂᤡᤏᤡ᤹ ᤏᤡᤱᤘᤠ᤹ᤑᤢ ᤛᤠᤰᤔᤢᤖᤠ᤺ᤸᤗᤧ ᤁᤧᤍᤧᤳᤋᤡᤒᤠᤛᤣ. ᤂᤡᤏᤡ᤹ ᤀᤡᤱᤃᤠ᤹ᤀᤥᤗᤠᤶ ᤐᤣᤃᤧᤶᤔᤧ᤹ᤀᤥ॥ ᤂᤡᤏᤡ᤹ᤃ ᤔᤠᤑᤧᤴᤛᤠᤶᤔᤡᤴ ᤏᤢ ᤂᤢᤏᤧ᤹ ᤁᤢᤔᤠᤱᤗᤠᤀᤡᤱᤒᤠᤜᤠ᤹ ᤁᤣ᤺ᤵᤔᤠᤛᤡ ᤑᤠ᤹ᤀᤠᤱ ᤕᤠᤖᤡᤵ ᤆᤥᤃᤢᤒᤠ ᤀᤠᤵᤑᤠᤸᤗᤧᤀᤠᤱ ᤔᤧᤴᤇᤡ᤺ᤶᤏᤠ ᤔᤡ ᤁᤧᤍᤡ᤺ᤵᤐᤠ ᤂᤧᤔᤠᤕᤱᤛᤱᤅᤥ ᤐᤣᤃᤧᤶᤔᤧ᤹ᤀᤥ॥ 42ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤀᤠᤛᤧᤳᤗᤠ᤺ᤰᤋᤧᤀᤠᤱ ᤘᤕᤠᤱᤅᤡᤸᤗᤧ ᤀᤡᤱᤃᤠ᤹ ᤁᤢᤈᤠ ᤕᤠᤵᤔᤡ ᤀᤠᤃᤧᤶᤒᤡᤖᤡᤴ. ᤀᤠᤘᤠᤔᤡᤛᤧᤀᤠᤱ ᤘᤕᤠᤱᤅᤡᤸᤗᤧ ᤆᤫᤠ᤺ᤳ ᤌᤢᤱᤔᤠ ᤕᤠᤵᤔᤡ ᤀᤠᤃᤧᤶᤒᤡᤖᤡᤴ. 43ᤀᤡᤱᤃᤠ᤹ ᤘᤠ᤹ᤔᤠ ᤋᤧᤴ ᤔᤣ᤺ᤴᤏᤣ ᤗᤠᤶᤍᤡ᤺ᤰᤐᤠ ᤐᤥ᤺ᤰᤂᤠᤱᤅᤠᤱ ᤘᤕᤠᤱᤅᤡᤸᤗᤧ ᤂᤡᤏᤡ᤹ ᤜᤡᤶᤔᤥ ᤕᤠᤵᤔᤡ ᤀᤠᤃᤧᤴᤍᤣ᤹ᤖᤡᤴ. ᤀᤡᤱᤃᤠ᤹ ᤋᤣ᤺ᤵᤑᤢᤱ ᤔᤣ᤺ᤴᤏᤣ ᤘᤕᤠᤱᤅᤡᤸᤗᤧ ᤋᤣᤳ ᤕᤠᤵᤔᤡ ᤀᤠᤃᤧᤶᤒᤡᤖᤡᤴ. ᤜᤧᤰᤁᤩᤠᤱ ᤀᤡᤱᤃᤠ᤹ ᤋᤢᤃᤠᤱ ᤜᤧᤰᤁᤩᤠᤱ ᤐᤢᤱᤗᤠᤜᤡᤶᤔᤥ ᤛᤠᤰᤋᤠᤱᤅᤠᤱ ᤕᤠᤃᤠᤱᤅᤡᤸᤗᤧ ᤕᤠᤵᤔᤡ ᤀᤠᤃᤧᤴᤇᤠ᤹ᤖᤡᤴᤗᤥ॥’
44“ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧᤀᤠᤱ ᤏᤥᤃᤵ ᤔᤧᤒᤡᤖᤢ. ‘ᤍᤠᤱᤒᤣ. ᤀᤠᤵᤑᤠᤸᤗᤧ ᤀᤠᤏᤡᤃᤣ ᤂᤧᤏᤧ᤹ ᤁᤧᤛᤧᤳᤗᤠ᤺ᤰᤋᤧᤒᤠ ᤏᤢ ᤁᤧᤘᤠᤔᤡᤛᤧᤒᤠ ᤜᤧᤰᤁᤩᤠᤱ ᤘᤠ᤹ᤔᤠ ᤋᤧᤴ ᤔᤣ᤺ᤴᤏᤣ ᤏᤢ ᤋᤣ᤺ᤵᤑᤢᤱ ᤆᤠᤜᤠᤒᤠ ᤁᤧᤈᤥᤃᤧᤒᤠ. ᤁᤧᤍᤢᤃᤧᤒᤠ ᤏᤢ ᤐᤢᤱᤗᤠᤜᤡᤶᤔᤥ ᤁᤧᤕᤠᤃᤧᤒᤠ ᤏᤡᤛᤢᤶᤒᤧᤀᤠᤱ ᤁᤢᤓᤠ᤹ ᤔᤧᤒᤡᤀᤠᤛᤡᤃᤧᤴᤒᤣ᥅’ 45ᤂᤧᤴ ᤕᤧᤶᤔᤥ ᤂᤢᤏᤧ᤹ ᤏᤥᤃᤵ ᤐᤡᤖᤢᤛᤡ. ‘ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤁᤴ ᤀᤠᤶᤓᤢ᤹ ᤀᤠᤴᤛᤠ᤹ᤛᤡᤀᤥ ᤀᤠᤳᤋᤡᤴ ᤗᤳᤇᤠ ᤆᤢᤰᤛᤠᤎᤡᤰ ᤜᤧᤰᤁᤣ ᤁᤧᤶᤔᤧᤳᤋᤢᤶᤔᤡᤴ. ᤂᤧᤴ ᤀᤡᤱᤃᤠ᤹ᤀᤣ ᤕᤠᤵᤔᤡ ᤀᤠᤃᤧᤶᤔᤧᤳᤋᤡᤶᤒᤠᤖᤥ॥’ 46ᤜᤧᤰᤁᤩᤠᤱ ᤂᤧᤱᤜᤠ᤹ᤃ ᤔᤧᤴᤏᤢᤵᤔᤏᤠᤒᤠ ᤂᤢᤶᤍᤡᤱᤅᤥ ᤔᤧᤒᤣ᤺ᤰᤗᤥ. ᤁᤖ ᤛᤠᤶᤕᤥᤒᤠᤜᤠ᤹ᤃ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴᤏᤥ ᤔᤧᤒᤣ᤺ᤰᤗᤥ॥”
© 2009, 2023, Wycliffe Bible Translators, Inc. All rights reserved.