ᤔᤳᤋᤡ 23
23
ᤛᤠᤶᤕᤥᤌᤡᤶ ᤗᤠᤶᤗᤥᤒᤠᤜᤠ᤹
(ᤔᤷᤁᤢ ᥇᥈:᥉᥎-᥊᥆; ᤗᤢᤁᤠ ᥇᥇:᥉᥍-᥋᥈)
1ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤵᤔᤥ ᤁᤧᤈᤢᤶᤒᤠ ᤔᤏᤠᤜᤠ᤹ ᤏᤢ ᤁᤢᤜᤢ᤹ᤛᤠᤶᤒᤠᤜᤠ᤹ ᤀᤰᤂᤣ ᤔᤧᤳᤋᤢᤛᤡ. 2“ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤏᤢ ᤑᤖᤡᤛᤡᤜᤠ᤹ᤖᤧ ᤔᤥᤛᤠᤖᤧ ᤛᤠᤵᤋᤢᤒᤠ ᤛᤠᤶᤕᤥᤌᤡᤶᤔᤡᤴ ᤐᤥᤎᤰᤔᤠ ᤕᤢᤰ ᤔᤧᤃᤳᤋᤢ᤹॥ 3ᤂᤧᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤁᤧᤶᤔᤧᤳᤋᤡ ᤁᤧᤶᤜᤢ᤹ᤖᤡᤒᤠ ᤐᤠ᤺ᤴᤏᤡᤴ ᤂᤡᤏᤡ᤹ ᤀᤡ᤺ᤵᤔᤠ ᤏᤠ᤺ᤵᤔᤠ ᤐᤥᤱ. ᤁᤖ ᤂᤧᤱᤜᤠ᤹ᤖᤧ ᤔᤧᤈᤥᤃᤢᤒᤠ ᤜᤧᤰᤁᤣ ᤔᤧᤈᤥᤃᤧᤶᤔᤡᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢᤒᤠ ᤐᤠ᤺ᤴᤜᤠ᤹ ᤁᤢᤀᤡᤛᤡ᤺ᤰᤃ ᤀᤠᤒᤠᤅᤣᤀᤠᤱ ᤔᤧᤴᤈᤥᤃᤢᤴᤗᤥ॥ 4ᤂᤧᤱᤜᤠ᤹ᤖᤧᤃ ᤁᤧᤗᤡ᤺ᤵᤐᤠ ᤁᤰ ᤜᤧᤰᤋᤱᤒᤠ ᤁᤧᤛᤠᤰᤐᤠ ᤌᤡᤶᤜᤠ᤹ ᤔᤧᤈᤥᤃᤢᤀᤠᤱ ᤔᤏᤠᤜᤠ᤹ ᤔᤧᤃᤢ᤺ᤳᤋᤢᤛᤡ᤹. ᤁᤖ ᤁᤰ ᤕᤠᤱᤕᤠᤱ ᤗ᤹ᤖ ᤑᤠ᤹ᤀᤠᤱ ᤀᤠᤒᤠᤅᤣ ᤜᤢᤰᤆᤥᤎᤡᤰᤁᤡᤸᤗᤧᤀᤠᤱ ᤔᤧᤴᤇᤢᤛ᤻ᤛᤢᤴᤗᤥ॥ 5ᤂᤧᤱᤜᤠ᤹ᤖᤧᤃ ᤏᤢᤒᤠ ᤐᤠ᤺ᤴᤜᤠ᤹ ᤔᤏᤠᤜᤠ᤹ ᤀᤥᤛᤣ᤺ᤴᤎᤠᤰᤔᤠᤛᤡ ᤑᤠ᤹ᤀᤠᤱᤗᤰ ᤔᤧᤈᤥᤃᤢᤖᤥ॥ ᤂᤧᤱᤜᤠ᤹ᤖᤧ ᤛᤠᤶᤕᤥᤌᤡᤶ ᤀᤡᤱᤈᤠᤱ ᤛᤠᤵᤔᤠ ᤕᤠᤰᤔᤏᤠᤒᤠ ᤔᤠᤰᤐᤧᤴᤇᤠᤵᤜᤠ᤹ ᤕᤶᤒᤕᤶᤒᤠ#᥈᥉:᥋ ᤕᤜᤢᤍᤡᤜᤠ᤹ᤖᤧ ᤆᤢᤰᤛᤠ ᤁᤢᤛᤢᤱᤔᤠ ᤔᤧᤈᤥᤃᤢ ᤜᤧᤰᤁᤩᤠᤱ ᤁᤢᤓᤠ ᤛᤠᤶᤕᤥᤌᤡᤶ ᤀᤡᤱᤈᤠᤱᤜᤠ᤹ ᤔᤧᤛᤠᤵᤋᤢᤀᤠᤱ ᤂᤧᤴ ᤁᤢᤛᤢᤱᤔᤠᤀᤥ ᤔᤧᤕᤠᤰᤋᤢ॥ ᤂᤧᤴ ᤁᤢᤛᤢᤱᤔᤠᤴ ᤔᤠᤰᤐᤧᤴᤇᤠᤵ ᤔᤧᤔᤧᤳᤋᤢᤖᤥ॥ ᤗᤠ ᥇᥉:᥏. ᥇᥌; ᤛᤠᤶᤕᤥ ᤀᤡᤱ ᥌:᥎. ᥇᥇:᥇᥉-᥈᥇ ᤔᤧᤈᤥᤃᤢᤀᤠᤱ ᤜᤢᤰᤁᤥ ᤏᤢ ᤋᤥᤘᤠᤒᤥ ᤔᤧᤓᤳᤇᤢ᤹. ᤜᤧᤰᤁᤩᤠᤱ ᤆᤠᤱ ᤋᤣᤳᤋᤥ ᤁᤣ᤺ᤶᤒ ᤁᤣ᤺ᤶᤒᤠ ᤐᤥᤖᤥᤰᤘᤠᤜᤠ᤹ ᤔᤧᤓᤳᤇᤢ᤹॥ 6ᤂᤧᤱᤜᤠ᤹ ᤛᤠᤓᤠᤱᤈᤠ ᤏᤢ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥᤒᤠ ᤋᤢᤶᤔᤩᤠᤱᤜᤠᤱ ᤕᤢᤰᤏᤠᤜᤠ᤹ᤀᤥ ᤕᤢᤱᤔᤠ ᤂᤢᤏᤡ᤹ ᤛᤡᤖᤠ᤹ᤌᤠᤱᤗᤥ॥ 7ᤜᤧᤰᤁᤩᤠᤱ ᤐᤠᤱᤈᤢᤶᤔᤥ ᤔᤏᤠᤜᤠ᤹ᤖᤧ ᤛᤧᤘᤠ ᤔᤧᤔᤧᤳᤋᤢᤛᤡᤒᤠ ᤏᤢ ᤛᤡᤰᤛᤠᤶᤒᤣ ᤗ᤹ᤖᤡᤰ ᤔᤧᤔᤧᤳᤋᤢᤛᤡᤒᤠ ᤂᤢᤏᤡ᤹ ᤛᤡᤖᤠ᤹ᤌᤠᤱᤗᤥ॥ 8ᤁᤖ ᤂᤡᤏᤡ᤹ᤃ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤛᤡᤰᤛᤠᤶᤒᤣ ᤗ᤹ᤖᤡᤰ ᤁᤧᤔᤧᤶᤔᤧᤳᤋᤡᤴᤗᤖᤥ. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ᤃ ᤌᤡᤰᤗᤰ ᤛᤡᤰᤛᤠᤶᤒᤠᤴ ᤁᤧᤃᤳᤋᤢᤶᤗᤥ. ᤜᤧᤰᤁᤩᤠᤱ ᤂᤡᤏᤡ᤹ ᤁᤧᤖᤧᤰᤁ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ ᤜᤧᤰᤁᤣᤏᤡᤱᤗᤥ॥ 9ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ‘ᤐᤠᤀᤣ’ ᤗ᤹ᤖᤡᤰ ᤘᤣ᤹ ᤀᤠᤳᤋᤡᤴᤜᤠ᤹ᤀᤠᤱ ᤔᤧᤔᤧᤳᤋᤧᤶᤛᤡᤶᤔᤡᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ᤃ ᤌᤡᤰᤗᤰ ᤏᤡᤱᤘᤠ᤹ᤑᤢᤐᤠ ᤁᤧᤃᤳᤋᤢᤶᤗᤥ. ᤂᤢᤏᤧ᤹ᤃ ᤛᤠᤱᤃᤪᤠᤶᤐᤣᤍᤠᤱᤅᤥ ᤘᤠ᤹ᤖᤥ॥ 10ᤀᤠᤳᤋᤡᤴᤜᤠ᤹ᤖᤧᤀᤠᤱ ‘ᤛᤡᤰᤛᤠᤶᤒᤣ’ ᤗ᤹ᤖᤡᤰ ᤁᤧᤔᤧᤶᤔᤧᤳᤋᤡᤴᤗᤖᤥ ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ᤃ ᤌᤡᤰᤗᤰ ᤛᤡᤰᤛᤠᤶᤒᤠᤴ ᤁᤧᤃᤳᤋᤢᤶᤗᤥ. ᤂᤢᤏᤧ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤖᤥ॥ 11ᤂᤡᤏᤡ᤹ ᤗᤢᤶᤔᤥ ᤁᤧᤖᤧᤰᤏᤢ᤺ᤸᤗᤧ ᤁᤧᤕᤧᤰᤐᤠ ᤔᤏᤠᤴ ᤂᤡᤏᤡ᤹ ᤛᤧᤘᤠᤖᤥᤒᤠ ᤐᤥᤱᤔᤠ ᤐᤥᤱᤗᤥ॥ 12ᤀᤠᤳᤋᤡᤸᤗᤧ ᤕᤶᤒᤠ ᤗᤧᤱᤛᤡᤱᤔᤠ ᤁᤥ᤺ᤳᤋᤢ᤹. ᤂᤧᤱᤃ ᤆᤢᤰᤛᤠ ᤐᤥᤱᤗᤥ. ᤜᤧᤰᤁᤩᤠᤱ ᤀᤠᤳᤋᤡᤴ ᤆᤢᤰᤛᤠ ᤗᤧᤱᤛᤡᤱ ᤂᤧᤱᤃ ᤕᤶᤒᤠ ᤐᤥᤱᤗᤥ॥
13“ᤂᤡᤏᤡ᤹ ᤁᤢᤏᤡᤱᤘᤠ᤹ ᤁᤧᤈᤡ᤺ᤵᤐᤠ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤏᤢ ᤑᤖᤡᤛᤡᤛᤣ. ᤁᤧᤈᤡ᤺ᤳᤋᤡ ᤁᤧᤛᤩᤧ᤹ᤀᤡᤖᤥ᥄ ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤈᤢᤶᤔᤡᤸᤗᤧ ᤁᤢᤗᤠᤶᤔᤡᤴ ᤘᤣ᤹ ᤔᤏᤠᤜᤠ᤹ᤖᤧ ᤗᤠᤃᤡ ᤁᤧᤛᤠᤰᤋᤢᤶᤔᤠᤱ ᤁᤧᤘᤕᤡ᤹ᤖᤥ. ᤜᤧᤰᤁᤩᤠᤱ ᤀᤠᤒᤠᤅᤣᤀᤠᤱ ᤂᤧᤵᤔᤥ ᤂᤡᤏᤡ᤹ ᤁᤧᤴᤗᤠᤛᤡᤴ ᤜᤧᤰᤁᤩᤠᤱ ᤗᤠ᤺ᤵᤔᤠ ᤁᤧᤃᤥ᤺ᤵᤐᤠ ᤘᤣ᤹ ᤔᤏᤠᤜᤠ᤹ᤀᤠᤱ ᤗᤠ᤺ᤵᤔᤠ ᤁᤧᤶᤒᤠᤱᤄᤢᤶᤛᤡᤶᤔᤡᤴᤗᤥ॥ 14(ᤂᤡᤏᤡ᤹ ᤁᤢᤏᤡᤱᤘᤠ᤹ ᤁᤧᤈᤡ᤺ᤵᤐᤠ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤏᤢ ᤑᤖᤡᤛᤡᤛᤣ. ᤁᤧᤈᤡ᤺ᤳᤋᤡ ᤁᤧᤛᤩᤧ᤹ᤀᤡᤖᤥ᥄ ᤂᤡᤏᤡ᤹ᤃ ᤔᤣᤔᤣᤍᤢᤔᤠᤜᤠ᤹ ᤀᤡᤱᤃᤧᤗᤧᤰᤋᤢᤶᤛᤡᤶᤔᤠᤱ ᤂᤢᤏᤡ᤹ ᤜᤡᤶᤎᤠ᤺ᤱᤜᤠ᤹ ᤁᤧᤏᤠᤵᤋᤢᤶᤛᤡᤶ. ᤁᤖ ᤏᤢᤒᤠ ᤀᤥᤛᤣ᤺ᤴᤎᤠᤰᤛᤡᤱᤔᤠᤖᤧ ᤗᤠᤃᤡ ᤁᤣ᤺ᤶᤒ ᤁᤣ᤺ᤶᤒᤠ ᤋᤢᤘᤠ ᤁᤧᤈᤥᤃᤢᤶ॥ ᤂᤧᤸᤗᤧᤆᤥᤃᤢᤸᤗᤧ ᤂᤡᤏᤡ᤹ ᤂᤢᤶᤍᤡᤱᤅᤡᤱᤃ ᤛᤧᤰᤂᤠᤛᤠᤱ ᤛᤠ᤹ᤖᤡᤰ ᤁᤡᤵᤔᤠ ᤁᤧᤄᤢᤒᤠ ᤐᤥᤱᤗᤥ॥) 15ᤂᤡᤏᤡ᤹ ᤁᤢᤏᤡᤱᤘᤠ᤹ ᤁᤧᤈᤡ᤺ᤵᤐᤠ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤏᤢ ᤑᤖᤡᤛᤡᤛᤣ. ᤁᤧᤈᤡ᤺ᤳᤋᤡ ᤁᤧᤛᤩᤧ᤹ᤀᤡᤖᤥ᥄ ᤂᤡᤏᤡ᤹ᤃ ᤌᤡᤰ ᤔᤏᤠᤴ ᤕᤜᤢᤍᤡ ᤛᤠᤶᤕᤥᤀᤥ ᤋᤠ᤺ᤵᤔᤠ ᤑᤠ᤹ᤀᤠᤱ ᤗᤠᤈᤣ᤹ ᤏᤢ ᤘᤠᤜᤱ ᤂᤠᤖᤠᤰ ᤗᤠᤶᤍᤡᤰ ᤁᤧᤈᤥᤃᤡᤖᤥ. ᤜᤧᤰᤁᤩᤠᤱ ᤂᤧᤴ ᤔᤏᤠᤴ ᤕᤜᤢᤍᤡ ᤛᤠᤶᤕᤥᤀᤥ ᤁᤧᤍᤠ᤺ᤖᤢᤶᤔᤠᤱᤃ ᤂᤧᤴ ᤂᤡᤏᤡ᤹ᤏᤢ᤺ᤸᤗᤧᤀᤠᤱ ᤛᤠ᤹ᤖᤡᤰ ᤂᤧᤔᤠᤕᤱᤛᤱᤅᤥ ᤂᤢᤶᤍᤡᤱ ᤁᤧᤄᤥᤒᤠ ᤁᤧᤈᤥᤃᤢᤶᤗᤥ॥
16“ᤂᤡᤏᤡ᤹ ᤔᤡᤰᤑ᤺ᤶᤒᤠ ᤗᤠᤶᤗᤥᤒᤠᤛᤣ. ᤁᤧᤈᤡ᤺ᤳᤋᤡ ᤁᤧᤛᤩᤧ᤹ᤀᤡᤖᤥ᥄ ᤀᤠᤳᤋᤡᤴ ᤔᤠᤱᤜᤡᤶᤔᤡᤸᤗᤧ ᤁᤢᤔᤡᤱᤅᤥ ᤔᤠᤱᤜᤧᤰᤛᤡᤱ ᤂᤧᤱᤃ ᤌᤣᤀᤠᤱ ᤔᤣ᤺ᤴᤗᤥ. ᤁᤖ ᤀᤠᤳᤋᤡᤴ ᤔᤠᤱᤜᤡᤶᤔᤥᤒᤠ ᤛᤠᤶᤔᤩᤠᤱᤅᤡᤸᤗᤧ ᤁᤢᤔᤡᤱᤅᤥ ᤔᤠᤱᤜᤧᤰᤛᤡᤱ ᤂᤧᤴ ᤁᤢᤒᤠ᤺ᤴᤏᤡᤸᤗᤧ ᤂᤣ᤺ᤱᤛᤡᤱᤗᤥ ᤗ᤹ᤖᤡᤰ ᤂᤡᤏᤡ᤹ ᤁᤧᤒᤠ᤺ᤳᤋᤢᤶ॥ 17ᤂᤡᤏᤡ᤹ ᤔᤡᤰᤑ᤺ᤶᤒᤠ ᤀᤍᤱᤛᤣ᥄ ᤛᤠᤶᤔᤩᤠᤱᤅᤡᤴ ᤕᤶᤒᤠᤒᤡ ᤛᤠᤶᤔᤩᤠᤱᤅᤡᤴ ᤛᤣᤛᤣ ᤁᤧᤈᤥ᤺ᤰᤐᤠ ᤔᤠᤱᤜᤡᤶᤔᤡᤴ ᤕᤶᤒᤠᤒᤡ᥅ 18ᤂᤡᤏᤡ᤹ ᤀᤰᤂᤣᤗ᤹ᤖᤡᤰᤁᤠᤱ ᤁᤧᤒᤠ᤺ᤳᤋᤢᤶ. ‘ᤀᤠᤳᤋᤡᤴ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤸᤗᤧᤴ ᤔᤠᤱᤜᤧᤰᤛᤡᤱ ᤂᤧᤴ ᤌᤣᤀᤠᤱ ᤔᤣ᤺ᤴᤗᤥ. ᤁᤖ ᤀᤠᤳᤋᤡᤴ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥᤒᤠ ᤆᤥᤑᤠ᤹ᤗᤧᤴ ᤔᤠᤱᤜᤧᤰᤛᤡᤱ ᤂᤧᤴ ᤁᤢᤒᤠ᤺ᤴᤏᤡᤸᤗᤧ ᤂᤣ᤺ᤱᤛᤡᤱᤗᤥ॥’ 19ᤂᤡᤏᤡ᤹ ᤔᤡᤰᤑ᤺ᤶᤒᤠ ᤔᤏᤠᤛᤣ. ᤆᤥᤑᤠ᤹ᤀᤡᤴ ᤕᤶᤒᤠᤒᤡ ᤆᤥᤑᤠ᤹ᤀᤡᤴ ᤛᤣᤛᤣ ᤁᤧᤈᤥ᤺ᤰᤐᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤴ ᤕᤶᤒᤠᤒᤡ᥅ 20ᤂᤧᤸᤗᤧᤆᤥᤃᤢᤸᤗᤧ ᤀᤠᤳᤋᤡᤴ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤸᤗᤧᤴ ᤔᤠᤱᤜᤧᤰᤛᤡᤱ ᤂᤧᤴ ᤂᤧᤵᤔᤥ ᤁᤧᤖᤧᤰ ᤁᤧᤏᤧᤒᤠᤸᤗᤧᤴᤏᤠᤱ ᤔᤠᤱᤜᤧᤰᤛᤡᤱᤗᤥ॥ 21ᤜᤧᤰᤁᤩᤠᤱ ᤀᤠᤳᤋᤡᤴ ᤔᤠᤱᤜᤡᤶᤔᤡᤸᤗᤧᤴ ᤔᤠᤱᤜᤧᤰᤛᤡᤱ ᤂᤧᤱᤃ ᤂᤧᤵᤔᤥ ᤁᤧᤘᤠ᤹ᤒᤠᤸᤗᤧᤴᤏᤠᤱ ᤔᤠᤱᤜᤧᤰᤛᤡᤱᤗᤥ॥ 22ᤀᤠᤳᤋᤡᤴ ᤛᤠᤱᤃᤪᤠᤶᤐᤣᤍᤠᤱᤅᤡᤸᤗᤧᤴ ᤔᤠᤱᤜᤧᤰᤛᤡᤱ ᤂᤧᤱᤃ ᤏᤡᤱᤘᤠ᤹ᤑᤢ ᤕᤢᤰᤏᤠ ᤏᤢ ᤂᤧᤵᤔᤥ ᤁᤧᤕᤢᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤴᤏᤠᤱ ᤔᤠᤱᤜᤧᤰᤛᤡᤱᤗᤥ॥
23“ᤂᤡᤏᤡ᤹ ᤁᤢᤏᤡᤱᤘᤠ᤹ ᤁᤧᤈᤡ᤺ᤵᤐᤠ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤏᤢ ᤑᤖᤡᤛᤡᤛᤣ. ᤁᤧᤈᤡ᤺ᤳᤋᤡ ᤁᤧᤛᤩᤧ᤹ᤀᤡᤖᤥ᥄ ᤂᤡᤏᤡ᤹ ᤀᤡᤰᤋᤠᤵᤐᤥᤗᤠᤶ ᤏᤠᤶᤛᤢᤏᤠ. ᤛ᤺ᤵᤑᤠ ᤏᤢ ᤜᤡᤶᤆᤧᤶᤓᤧᤴ ᤜᤧᤰᤋᤱᤒᤠ ᤔᤠᤖᤢᤰᤜᤠ᤹ᤖᤧᤴᤏᤠᤱ ᤌᤡᤒᤥᤱᤗᤰ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤧᤒᤡᤖᤢᤶ. ᤁᤖ ᤏᤢ᤺ᤖᤡᤰᤁᤠᤱ ᤂᤠᤛᤧᤴ ᤁᤧᤴᤈᤥᤃᤢᤶᤛᤡᤶᤔᤡᤴ. ᤘᤣ᤹ ᤔᤏᤠᤜᤠ᤹ ᤗᤢᤱᤔᤠ᤹ ᤁᤧᤴᤍᤢᤰᤋᤢᤶᤛᤡᤶᤔᤡᤴ. ᤜᤧᤰᤁᤩᤠᤱ ᤏᤛᤠᤴ ᤁᤧᤴᤈᤥᤃᤢᤶᤔᤡᤴᤗᤥ॥ ᤁᤴ ᤏᤠ᤺ᤵᤔᤠᤀᤣ ᤁᤧᤒᤥᤱᤒᤠ ᤛᤠᤶᤕᤥᤌᤡᤶᤒᤠ ᤐᤠ᤺ᤴᤜᤠ᤹ ᤁᤧᤴᤏᤠ᤺ᤳᤋᤢᤶᤔᤡᤴᤗᤥ॥ ᤂᤡᤏᤡ᤹ᤃ ᤌᤡᤒᤥᤱᤗᤰ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤧᤒᤡᤖᤢᤶᤔᤡᤸᤗᤧ ᤁᤴ ᤏᤢ᤺ᤖᤡᤰᤁᤠᤱ ᤂᤠᤛᤧᤴ ᤆᤥ᤺ᤰᤔᤠ. ᤘᤣ᤹ ᤔᤏᤠᤜᤠ᤹ ᤗᤢᤱᤔᤠ᤹ ᤋᤢᤰᤔᤠᤛᤡ ᤏᤢ ᤏᤛᤠᤴ ᤆᤥ᤺ᤰᤔᤠ ᤁᤧᤗ᤹ᤒᤠ ᤛᤠᤶᤕᤥᤌᤡᤶᤔᤥᤒᤠ ᤏᤠ᤺ᤵᤔᤠᤀᤣ ᤁᤧᤒᤥᤱᤒᤠ ᤐᤠ᤺ᤴᤜᤠ᤹ᤀᤠᤱ ᤆᤥᤃᤧᤶᤔᤧ᤹ᤀᤥ॥ 24ᤂᤡᤏᤡ᤹ ᤔᤡᤰᤑ᤺ᤶᤒᤠ ᤗᤠᤶᤗᤥᤒᤠᤛᤣ. ᤂᤡᤏᤡ᤹ ᤛᤡᤰᤆᤠᤜᤠ᤹ ᤁᤧᤛᤠ᤺ᤰᤋᤢᤶ ᤁᤧᤗ᤺ᤳᤋᤢᤶᤛᤡᤶ. ᤁᤖ ᤀᤢᤔᤣ᤺ᤴ ᤁᤧᤗᤖᤢᤶᤗᤥ॥ 25ᤂᤡᤏᤡ᤹ ᤁᤢᤏᤡᤱᤘᤠ᤹ ᤁᤧᤈᤡ᤺ᤵᤐᤠ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤏᤢ ᤑᤖᤡᤛᤡᤛᤣ. ᤁᤧᤈᤡ᤺ᤳᤋᤡ ᤁᤧᤛᤩᤧ᤹ᤀᤡᤖᤥ᥄ ᤂᤡᤏᤡ᤹ᤃ ᤂᤥᤷᤕᤠᤴ ᤏᤢ ᤆᤧᤳᤌᤩᤠᤴ ᤗᤠ᤺ᤰᤁᤠᤳᤗᤰ ᤘᤠᤃᤧᤜᤵᤋᤢᤶ. ᤁᤖ ᤛᤡᤃᤠᤱᤃ ᤀᤡᤱᤃᤠ᤹ᤖᤰ ᤆᤠᤱ ᤌᤢᤅᤢᤱ ᤁᤧᤗ᤹ᤒᤠ ᤏᤡᤱᤘᤠ᤹ ᤆᤥ᤺ᤰᤔᤠᤴ ᤏᤢ ᤔᤏᤠᤜᤠ᤹ ᤁᤧᤏᤠᤵᤋᤢᤶ ᤁᤧᤍᤠᤖᤢᤶᤛᤡᤶᤒᤠ ᤐᤠ᤺ᤴᤜᤠ᤹ᤖᤧ ᤁᤧᤍᤡᤶᤛᤡᤀᤠᤱ ᤁᤧᤘᤕᤡ᤹ᤖᤥ॥ 26ᤔᤡᤰᤑ᤺ᤶᤒᤠ ᤑᤖᤡᤛᤡᤛᤣ. ᤁᤧᤖᤧᤰᤏᤢ᤺ᤸᤗᤧ ᤋᤃᤡ ᤂᤥᤷᤕᤠᤴ ᤁᤢᤛᤡᤃᤠᤱ ᤘᤠᤜᤵᤋᤧᤶᤔᤧ᤹. ᤜᤧᤰᤁᤣᤗ᤹ᤖᤡᤰ ᤗᤠ᤺ᤰᤁᤠᤳᤋᤠᤱ ᤛᤣᤛᤣ ᤐᤥᤱᤗᤥ॥
27“ᤂᤡᤏᤡ᤹ ᤁᤢᤏᤡᤱᤘᤠ᤹ ᤁᤧᤈᤡ᤺ᤵᤐᤠ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤏᤢ ᤑᤖᤡᤛᤡᤛᤣ. ᤁᤧᤈᤡ᤺ᤳᤋᤡ ᤁᤧᤛᤩᤧ᤹ᤀᤡᤖᤥ᥄ ᤂᤡᤏᤡ᤹ᤃ ᤆᤢᤏᤡ ᤂᤠᤶᤔᤡᤸᤗᤧ ᤗᤧᤱᤔᤏᤠᤒᤠ ᤀᤡ᤺ᤵᤐᤢᤱ ᤁᤢᤀᤡᤛᤡᤰ ᤁᤧᤈᤥᤃᤡ᤹ᤖᤥ. ᤌᤣᤀᤠᤱᤓᤧᤸᤗᤧ ᤂᤧᤴ ᤀᤥᤔᤧᤵᤔᤠᤸᤗᤧ ᤗᤠ᤺ᤰᤁᤠᤳᤗᤠᤶ ᤏᤢᤒᤠ ᤌᤠ᤺ᤵᤛᤠᤱ ᤛᤡᤃᤠᤱᤃ ᤁᤧᤛᤡᤒᤠ ᤔᤏᤠ᤺ᤸᤗᤧ ᤁᤢᤕᤧᤵ ᤏᤢ ᤁᤧᤈᤡ᤺ᤶᤒᤠ ᤐᤠ᤺ᤴᤏᤡᤸᤗᤧ ᤁᤢᤎᤡᤶ ᤆᤥᤰᤗᤥ॥ 28ᤜᤧᤰᤁᤣᤗ᤹ᤖᤡᤰ ᤂᤡᤏᤡ᤹ ᤔᤏᤠᤜᤠ᤹ᤏᤢ ᤗᤠ᤺ᤰᤁᤠᤳᤗᤠᤶ ᤛᤠᤶᤕᤥᤒᤠ ᤁᤧᤎᤠᤒᤡᤛᤠᤱ ᤛᤡᤃᤠᤱᤃ ᤏᤡᤱᤘᤠ᤹ ᤁᤧᤈᤡ᤺ᤵᤐᤠ ᤏᤢ ᤋᤠᤵᤑᤧ᤺ᤶᤒᤠ ᤁᤧᤈᤥᤃᤡ᤹ᤖᤥ॥ 29ᤂᤡᤏᤡ᤹ ᤁᤢᤏᤡᤱᤘᤠ᤹ ᤁᤧᤈᤡ᤺ᤵᤐᤠ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤏᤢ ᤑᤖᤡᤛᤡᤛᤣ. ᤁᤧᤈᤡ᤺ᤳᤋᤡ ᤁᤧᤛᤩᤧ᤹ᤀᤡᤖᤥ᥄ ᤂᤡᤏᤡ᤹ ᤛᤢᤎᤧᤒᤠ ᤋᤠᤰᤌᤧᤒᤠᤜᤠ᤹ᤖᤧ ᤔᤧᤛᤧᤖᤢᤛᤡᤒᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤂᤢᤏᤡ᤹ ᤀᤡ᤺ᤵᤐᤢᤱᤅᤡᤴ ᤁᤧᤈᤥᤃᤢᤶ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤔᤧᤗᤢ᤺ᤴᤍᤢᤛᤡᤒᤠ ᤛᤠᤶᤕᤥᤒᤠ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤀᤡ᤺ᤵᤐᤢᤱᤅᤡᤴ ᤁᤧᤛᤠ᤺ᤰᤋᤢᤶ ᤁᤧᤈᤥᤃᤢᤶᤗᤥ॥#᥈᥉:᥈᥏ ᤃᤪᤡᤁ ᤐᤠ᤺ᤴᤍᤠᤱᤅᤥ “ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤂᤢᤏᤡ᤹ ᤀᤡ᤺ᤵᤐᤢᤱᤅᤡᤴ ᤂᤡᤏᤡ᤹ ᤁᤧᤛᤧᤳᤋᤢᤶ—ᤁᤧᤈᤥᤃᤢᤶ ᤜᤧᤰᤁᤩᤠᤱ ᤛᤠᤶᤕᤥᤒᤠ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤀᤡ᤺ᤵᤐᤢᤱᤅᤡᤴ ᤁᤧᤛᤠ᤺ᤰᤋᤢᤶ-ᤁᤧᤈᤥᤃᤢᤶᤗᤥ॥” 30ᤜᤧᤰᤁᤩᤠᤱ ᤁᤧᤒᤠ᤺ᤳᤋᤢᤶ. ‘ᤀᤠᤏᤡᤃᤣ ᤛᤢᤎᤧᤒᤠ ᤋᤠᤰᤌᤧᤒᤠᤜᤠ᤹ᤖᤧ ᤂᤢᤏᤡ᤹ ᤕᤧᤶᤔᤥ ᤀᤠᤏᤡᤃᤣ ᤘᤕᤡᤃᤧᤸᤗᤧᤃ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ ᤛᤧᤵᤔᤠᤛᤡ ᤆᤢᤶ ᤔᤧᤔᤧᤳᤋᤢᤶᤛᤡᤶᤒᤧᤶᤒᤠ ᤘᤕᤧᤖᤥ॥’ 31ᤜᤧᤰᤁᤣᤗ᤹ᤖᤡᤰ ᤁᤧᤒᤠ᤺ᤳᤋᤢᤶᤔᤡᤸᤗᤧ ᤂᤡᤏᤡ᤹ ᤀᤠᤒᤠᤅᤣ ᤀᤠᤏᤡᤃᤧᤃ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ ᤁᤧᤛᤧᤵᤐᤠᤜᤠ᤹ᤖᤧ ᤂᤢᤏᤡ᤹ ᤌᤠ᤺ᤰᤔᤧᤴᤇᤠ᤹ᤛᤡᤃᤧ ᤑᤠ᤹ᤀᤠᤱ ᤋᤥ᤺ᤴᤍᤡ ᤁᤧᤒᤡᤖᤢᤶᤗᤥ॥ 32ᤜᤧᤰᤁᤣᤗ᤹ᤖᤡᤰ ᤂᤡᤏᤡ᤹ ᤌᤠ᤺ᤰᤌᤧᤒᤠᤜᤠ᤹ᤖᤧ ᤔᤧᤜᤣ᤺ᤰᤋᤢᤒᤠ ᤗᤠᤕᤥᤴ ᤂᤡᤏᤡ᤹ ᤁᤧᤳᤋᤧᤶ ᤛᤢᤖᤧᤶᤔᤧ᤹ᤀᤥ᥄ 33ᤀᤛᤣ᤺ᤰᤐᤠᤛᤣ. ᤂᤡᤏᤡ᤹ ᤋᤠᤱᤒᤢ ᤀᤛᤣ᤺ᤰᤁᤡᤸᤗᤧ ᤁᤢᤛ᤻ᤛᤠᤛᤣ. ᤀᤠᤰᤂᤣᤗ᤹ᤖᤡᤰ ᤂᤧᤔᤠᤕᤱᤛᤱᤅᤥᤒᤠ ᤂᤢᤶᤍᤡᤱᤗᤠᤶ ᤁᤧᤒᤡᤴᤍᤡᤒᤠᤒᤣ᥅ 34ᤜᤧᤰᤁᤣ᤺ᤸᤗᤧ ᤏᤢᤖᤡᤰᤁᤠᤱ ᤂᤧᤵᤛᤧᤶᤔᤧ᤹ᤀᤥ. ᤋᤠ᤺ᤴᤍᤡ ᤂᤡᤏᤡ᤹ᤀᤥ ᤀᤡᤱᤃᤠ᤹ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹. ᤛᤡᤰᤁᤢᤶᤛᤠᤒᤠ ᤔᤏᤠᤜᤠ᤹ ᤏᤢ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤐᤠᤱᤄᤢᤱᤛᤡᤱᤗᤥ॥ ᤂᤧᤱᤜᤠ᤹ᤀᤥ ᤁᤢᤓᤠ ᤂᤡᤏᤡ᤹ ᤁᤧᤛᤧᤖᤢᤶᤛᤡᤶ. ᤁᤢᤓᤠ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤁᤧᤓᤥ᤺ᤴᤍᤢᤶᤛᤡᤶ. ᤜᤧᤰᤁᤩᤠᤱ ᤁᤢᤓᤠᤃ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥ ᤋᤧ᤺ᤶᤓᤢᤰ ᤁᤧᤕᤠᤰᤋᤢᤶᤛᤡᤶᤔᤠᤱ ᤕᤧᤰᤕᤰ ᤌᤵᤔᤠ ᤏᤡᤱᤄᤢᤶ ᤁᤧᤔᤧᤳᤋᤢᤶᤛᤡᤶᤗᤥ॥ 35ᤜᤧᤰᤁᤣᤗ᤹ᤖᤡᤰ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤔᤧᤛᤧᤖᤢᤛᤡᤒᤠ ᤁᤧᤖᤧᤰ ᤛᤠᤶᤕᤥᤒᤠ ᤔᤏᤠᤜᤠ᤹ ᤜᤠᤒᤡᤗᤧᤴᤏᤠᤱᤎᤥ ᤔᤠᤱᤜᤡᤶ ᤏᤢ ᤗᤧᤳᤋᤡ ᤋᤥ᤺ᤶᤔᤠᤍᤧᤴ ᤗᤢᤶᤔᤥ ᤁᤧᤛᤧᤖᤢᤶᤒᤠ ᤒᤣᤖᤣᤁᤩᤠᤜᤗᤧ ᤁᤢᤛ᤻ᤛᤠ ᤈᤁᤖᤡᤕᤠ ᤌᤠᤖᤡᤰᤐᤠ ᤂᤢᤏᤡ᤹ ᤔᤠᤰᤂᤡ᤹ᤀᤡᤸᤗᤧ ᤂᤡᤏᤡ᤹ ᤁᤧᤍᤧᤳᤋᤡᤖᤥ॥#᥈᥉:᥉᥋ ᤜᤡᤒᤪᤢ ᤛᤢᤘᤠᤱᤛᤔᤠ ᤛᤠᤶᤕᤥᤛᤠᤵᤗᤠᤀᤥ ᤁᤧᤖᤧᤰᤏᤢ᤺ᤸᤗᤧ ᤋᤃᤡ ᤔᤧᤛᤧᤖᤢᤒᤠ ᤔᤏᤠᤴ ᤜᤠᤒᤡᤗ ᤘᤕᤧ (ᤋᤥᤗᤡᤱ ᥊:᥎). ᤜᤧᤰᤁᤩᤠᤱ ᤁᤢᤏᤢᤵᤔᤥ ᤔᤧᤛᤧᤖᤢᤒᤠ ᤔᤏᤠᤴ ᤈᤁᤖᤡᤕᤠ ᤘᤕᤧ (᥈ ᤛᤠᤵᤔᤢ ᥈᥊:᥈᥆-᥈᥈) 36ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤁᤴ ᤁᤧᤖᤧᤰ ᤐᤠ᤺ᤴᤏᤡᤸᤗᤧᤴ ᤀᤠᤵᤋᤡᤰᤁᤡᤴ ᤁᤴ ᤕᤧᤶᤔᤥᤒᤠ ᤔᤏᤠᤜᤠ᤹ ᤛᤶᤍᤠᤱ ᤌᤠᤖᤥ॥”
ᤕᤧᤛᤢᤖᤧ ᤕᤖᤢᤛᤗᤧᤶᤔᤡᤴ ᤗᤢᤱᤔᤠ᤹ ᤋᤢᤰᤋᤢ᤹
(ᤗᤢᤁᤠ ᥇᥉:᥉᥊-᥉᥋)
37“ᤕᤖᤢᤛᤗᤧᤶᤔᤥᤒᤠ ᤔᤏᤠᤛᤣ. ᤕᤖᤢᤛᤗᤧᤶᤔᤥᤒᤠ ᤔᤏᤠᤛᤣ. ᤂᤡᤏᤡ᤹ᤃ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ ᤁᤧᤛᤧᤖᤢᤶᤛᤡᤶ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ᤀᤥ ᤐᤠᤱᤄᤢᤛᤡᤒᤠ ᤀᤡᤱᤛᤠᤒᤠᤜᤠ᤹ ᤗᤢᤱᤅᤡᤸᤗᤧ ᤁᤧᤒ᤺ᤳᤋᤢᤶᤛᤡᤶᤗᤥ॥ ᤀᤠᤰᤂᤧᤴᤗᤧᤱ ᤂᤡᤏᤡ᤹ ᤔᤢ᤹ᤀᤡᤍᤠᤱᤛᤠᤜᤠ᤹ ᤘᤠᤔᤠ᤺ᤵᤔᤠᤸᤗᤧ ᤘᤠᤈᤩᤠ᤺ᤰᤜᤠ᤹ ᤁᤢᤵᤋᤢᤛᤡᤒᤠ ᤁᤢᤀᤡᤛᤡᤰ ᤂᤡᤏᤡ᤹ ᤛᤠ᤺ᤜᤠ᤹ ᤛᤢᤶᤔᤠᤛᤡ ᤏᤡᤱᤘᤠ᤹ ᤆᤥᤃᤢᤱ. ᤁᤖ ᤂᤡᤏᤡ᤹ ᤁᤧᤴᤍᤧᤴᤍᤡᤴᤗᤥ॥ 38ᤀᤥᤔᤧᤳᤋᤧᤶᤔᤧ᤹ᤀᤥ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤜᤡᤶᤔᤡᤴ#᥈᥉:᥉᥎ “ᤂᤡᤏᤡ᤹ ᤜᤡᤶᤔᤡᤴ” ᤗ᤹ᤖᤡᤰ ᤛᤠᤵᤋᤧᤒᤠᤴ ᤔᤠᤱᤜᤡᤶ ᤑᤠ᤹ᤀᤠᤱ ᤁᤢᤛᤡᤱ ᤏᤡ᤺ᤵᤔᤠ ᤐᤥᤱᤗᤥ॥ ᤔᤏᤠᤔᤧ᤺ᤴᤏᤣ ᤗᤠᤶᤎᤣ᤺ᤵ ᤆᤡᤀᤧᤳ ᤀᤧᤳᤋᤢ᤹ᤖᤥ॥ 39ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ‘ᤍᤠᤱᤒᤠᤸᤗᤧ ᤁᤢᤔᤡᤱᤅᤥ ᤁᤧᤍᤠᤒᤠᤴ ᤔᤢ᤹ᤀᤡᤛᤠᤒᤠᤖᤥ’#ᤏᤡᤱ ᤛᤢᤶ ᥇᥇᥎:᥈᥌ ᤗ᤹ᤖᤡᤰ ᤁᤧᤶᤒᤠ᤺ᤳᤋᤢᤶᤔᤡᤴᤗ ᤌᤠᤖᤡᤰ ᤕᤠᤶᤔᤥ ᤕᤠᤵᤔᤡ ᤁᤧᤴᤏᤡᤛᤡᤴᤗᤥ॥”
© 2009, 2023, Wycliffe Bible Translators, Inc. All rights reserved.