ᤔᤳᤋᤡ 22
22
ᤐᤕᤶ ᤛᤠᤓᤠᤱᤈᤠᤖᤧᤴ ᤂᤧᤍᤠ᤹
(ᤗᤢᤁᤠ ᥇᥊:᥇᥋-᥈᥊)
1ᤕᤧᤛᤢᤖᤧ ᤂᤧᤴ ᤕᤜᤢᤍᤡ ᤗᤠᤶᤗᤥᤒᤠᤜᤠ᤹ ᤕᤠᤶᤔᤥ ᤂᤧᤍᤠ᤹ᤜᤠ᤹ᤀᤥ ᤀᤰᤂᤣ ᤔᤧᤳᤋᤢᤛᤡ 2“ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤈᤢᤶᤔᤡᤱᤃ ᤗᤳᤇᤠ ᤜᤠᤱᤎᤡᤰᤗᤧ ᤁᤢᤛ᤻ᤛᤠ᤺ᤸᤗᤧ ᤁᤢᤔᤣ᤺ᤰᤂᤡᤶᤔᤡᤸᤗᤧᤴ ᤛᤠᤓᤠᤱᤈᤠ ᤛᤧᤛᤢᤒᤠ ᤂᤧᤍᤠ᤹ ᤁᤢᤀᤡᤛᤡᤰ ᤆᤥᤰᤗᤥ॥ 3ᤔᤣ᤺ᤰᤂᤡᤶ ᤛᤠᤓᤠᤱᤈᤠᤖᤧᤴ ᤆᤠᤔᤢᤰ ᤌᤡᤔᤢᤰᤁᤡᤴ ᤕᤠᤖᤡᤵ ᤐᤥ᤺ᤰᤂᤧᤀᤠᤱ ᤂᤧᤴ ᤜᤠᤱᤅᤡᤸᤗᤧ ᤀᤢ᤺ᤳᤇᤡᤱ ᤁᤧᤄᤥᤒᤠᤜᤠ᤹ ᤛᤠᤓᤠᤱᤈᤠᤀᤥ ᤋᤠ᤺ᤵᤔᤠᤛᤡ ᤁᤢᤛᤧᤘᤠᤖᤥᤒᤠᤜᤠ᤹ ᤐᤠᤱᤄᤢᤛᤡ. ᤁᤖ ᤂᤧᤱᤜᤠ᤹ ᤋᤠᤔᤠ ᤔᤧᤴᤍᤧᤴᤍᤧᤴᤗᤥ॥ 4ᤜᤧᤰᤁᤣ᤺ᤸᤗᤧ ᤂᤧᤴ ᤜᤠᤱᤅᤡᤸᤗᤧ ᤁᤢᤓᤠ ᤁᤢᤛᤧᤘᤠᤖᤥᤒᤠᤜᤠ᤹ ᤀᤰᤂᤣ ᤔᤧᤳᤋᤢᤛᤡᤖ ᤐᤠᤱᤄᤢᤛᤡ. ‘ᤂᤧᤴ ᤀᤢ᤺ᤳᤇᤡᤱ ᤁᤧᤄᤥᤒᤠᤜᤠ᤹ ᤀᤰᤂᤣ ᤔᤧᤳᤋᤧᤶᤛᤡᤶᤔᤧ᤹. ᤀᤡᤱᤃᤠ᤹ ᤔᤣ᤺ᤰᤂᤡᤶ ᤛᤠᤓ᤺ᤱᤈᤠᤴ ᤕᤠᤖᤡᤵ ᤆᤥᤃᤢᤱᤅᤠᤱ ᤘᤠ᤹ᤀᤠ॥ ᤗᤢᤵᤔᤏᤠᤒᤠ ᤌᤰᤛᤠᤜᤠ᤹ ᤛᤧᤖᤢᤱᤛᤡᤱᤅᤠᤱ ᤁᤧᤖᤧᤰ ᤆᤠᤔᤠ ᤌᤢᤱᤔᤠᤴ ᤕᤠᤖᤡᤵ ᤐᤥ᤺ᤰᤂᤧᤀᤠᤱ ᤘᤠ᤹. ᤔᤣ᤺ᤰᤂᤡᤶ ᤛᤠᤓᤠᤱᤈᤠᤀᤥ ᤋᤩᤧᤶᤔᤧ᤹ᤀᤥ॥’ 5ᤁᤖ ᤂᤧᤱᤜᤠ᤹ᤖᤧ ᤂᤧᤶᤄᤧᤶ ᤔᤧᤴᤗᤠᤵᤋᤢᤴᤏᤠᤱ ᤁᤢᤓᤠᤃ ᤐᤩᤠᤱᤛᤡᤃᤧᤴ ᤀᤡᤰᤋᤠᤵᤐᤥ ᤕᤠ᤺ᤶᤒᤰ ᤆᤥ᤺ᤰᤛᤧ ᤔᤧᤒᤣ. ᤁᤢᤓᤠ ᤗᤧᤱᤜᤱ ᤆᤥ᤺ᤰᤛᤧ ᤔᤧᤒᤣ. 6ᤁᤢᤓᤠᤖᤧᤃ ᤁᤢᤛᤧᤘᤠᤖᤥᤒᤠᤜᤠ᤹ ᤔᤧᤍᤧᤶᤛᤢᤛᤡᤀᤠᤱ ᤋᤠᤵᤑᤧ᤺ᤸᤗᤡᤰ ᤔᤧᤔᤧᤳᤋᤢᤛᤡᤀᤠᤱ ᤔᤧᤛᤧᤖᤢᤛᤡᤖᤥ॥
7“ᤂᤧᤴ ᤜᤠᤱᤅᤡᤸᤗᤧ ᤛᤠ᤹ᤖᤡᤰ ᤁᤢᤛᤡᤰ ᤐᤥᤃᤧ॥ ᤂᤢᤏᤧ᤹ ᤌᤰᤛᤢᤒᤠᤜᤠ᤹ ᤐᤠᤱᤄᤢᤛᤡᤀᤠᤱ ᤂᤧᤴ ᤔᤏᤠ ᤁᤧᤛᤧᤵᤐᤠᤜᤠ᤹ ᤁᤧᤖᤧᤰ ᤛᤧᤵᤔᤠ ᤐᤠᤱᤄᤢᤛᤡ. ᤜᤧᤰᤁᤩᤠᤱ ᤂᤢᤏᤡ᤹ ᤕᤧᤰᤕᤰᤁᤡᤴ ᤑᤢᤳᤗᤢᤶ ᤜᤠ᤺ᤴᤍᤢᤍᤣ᤺ᤛᤢ ᤐᤡᤖᤢᤛᤡᤖᤥ॥ 8ᤜᤧᤰᤁᤩᤠᤱ ᤜᤠᤱᤅᤡᤸᤗᤧ ᤁᤢᤛᤧᤘᤠᤖᤥᤒᤠᤜᤠ᤹ ᤔᤧᤳᤋᤢᤛᤡ. ‘ᤔᤣ᤺ᤰᤂᤡᤶ ᤛᤠᤓ᤺ᤱᤈᤠᤴ ᤕᤠᤖᤡᤵ ᤐᤥ᤺ᤰᤂᤧᤀᤠᤱ ᤘᤠ᤹. ᤁᤖ ᤂᤧᤵᤔᤥ ᤀᤢ᤺ᤳᤇᤡᤱ ᤁᤧᤄᤥᤒᤠᤜᤠ᤹ ᤋᤠᤔᤠ ᤛᤢᤶᤒᤥᤎᤠᤒᤠ ᤔᤧᤴᤈᤥ᤺ᤰᤏᤧᤴᤗᤥ॥ 9ᤜᤧᤰᤁᤣ᤺ᤸᤗᤧ ᤕᤧᤰᤕᤰᤁᤥᤒᤠ ᤗᤠᤶᤗᤠᤶᤔᤥ ᤐᤣᤃᤧᤶᤔᤧ᤹ᤀᤠᤱ ᤁᤧᤍᤢᤔᤢᤶᤛᤡᤶᤒᤠ ᤁᤧᤖᤧᤰ ᤔᤏᤠᤜᤠ᤹ ᤀᤢ᤺ᤳᤋᤧᤶ ᤋᤠᤖᤧᤶᤛᤡᤶᤔᤧ᤹ᤀᤥ॥’
10“ᤂᤧᤸᤗᤧᤆᤥᤃᤢᤸᤗᤧ ᤛᤧᤘᤠᤖᤥᤒᤠᤜᤠ᤹ ᤕᤧᤰᤕᤰᤁᤥ ᤔᤧᤒᤣᤀᤠᤱ ᤗᤠᤶᤗᤠᤶᤔᤥ ᤔᤧᤍᤢᤔᤢᤛᤡᤒᤠ ᤁᤧᤖᤧᤰ ᤏᤢᤒᤠ ᤏᤢ ᤋᤠᤵᤑᤧ᤺ᤶᤒᤠ ᤔᤏᤠᤜᤠ᤹ ᤔᤣ᤺ᤰᤂᤡᤶ ᤛᤠᤓᤠᤱᤈᤠᤀᤥ ᤔᤧᤀᤢ᤺ᤳᤋᤢ ᤔᤧᤍᤠᤖᤢᤛᤡᤀᤠᤱ ᤂᤧᤵᤔᤥᤒᤠ ᤕᤢᤰᤏᤠᤜᤠ᤹ ᤔᤧᤎᤡᤶᤛᤢᤖᤥ॥ 11ᤁᤖ ᤜᤠᤱᤅᤡᤴ ᤋᤖᤣ ᤋᤢᤶᤛᤧ ᤛᤡᤃᤠᤱ ᤗᤠᤛᤧᤸᤗᤧ ᤂᤧᤵᤔᤥ ᤏᤢᤒᤠ ᤋᤣᤳ ᤔᤧᤴᤈᤠᤱᤔᤏᤠᤒᤠ ᤔᤏᤠᤎᤡᤰ ᤏᤡᤛᤢᤀᤠᤱ 12ᤛᤣ᤺ᤴᤍᤥᤛᤢ. ‘ᤆᤢᤶᤔᤣ. ᤂᤧᤏᤧ᤹ ᤀᤠᤰᤂᤣᤗ᤹ᤖᤡᤰ ᤔᤣ᤺ᤰᤂᤡᤶ ᤛᤠᤓᤠᤱᤈᤠᤀᤥ. ᤔᤣ᤺ᤰᤂᤡᤶᤔᤥ ᤆᤠᤱᤔᤏᤠᤒᤠ ᤏᤢᤒᤠ ᤋᤣᤳ ᤔᤣ᤺ᤴᤏᤣ ᤁᤧᤗᤠᤛᤧᤒᤣ᥅’ ᤂᤧᤴ ᤔᤏᤠ᤺ᤸᤗᤧ ᤌᤣᤀᤠᤱ ᤐᤠ᤺ᤵᤔᤠ ᤔᤧᤛᤢᤰᤋᤢᤴᤗᤥ॥
13“ᤜᤧᤰᤁᤩᤠᤱ ᤜᤠᤱᤅᤡᤸᤗᤧ ᤛᤧᤘᤠᤖᤥᤒᤠᤜᤠ᤹ ᤔᤧᤳᤋᤢᤛᤡ. ‘ᤁᤴ ᤔᤏᤠᤴ ᤋᤧᤶᤛᤧᤶᤔᤧ᤹ᤀᤠᤱ ᤁᤢᤗᤠᤱ ᤁᤢᤜᤢᤰᤜᤠ᤹ ᤀᤡᤄᤣ᤺ᤰᤂᤧᤶᤔᤧ᤹ ᤜᤧᤰᤁᤩᤠᤱ ᤗᤠ᤺ᤰᤁᤠᤳ ᤂᤠᤍᤠᤶᤔᤥ ᤗᤠᤵᤑᤢ᤺ᤛᤧᤶᤔᤧ᤹ᤀᤥ॥ ᤂᤧᤵᤔᤥ ᤜᤠ᤺ᤵᤔᤠᤴ ᤏᤢ ᤛᤠ᤹ᤖᤡᤰ ᤋᤢᤰᤂᤣ᤺ᤸᤗᤧ ᤜᤠᤒᤥ᤹ ᤕᤧ᤺ᤱᤔᤠᤴ ᤐᤥᤱᤗᤥ॥’ 14ᤌᤣᤀᤠᤱᤓᤧᤸᤗᤧ ᤀᤢ᤺ᤳᤇᤡᤱᤔᤠ ᤁᤧᤄᤥᤒᤠᤜᤠ᤹ ᤕᤖᤡᤰ ᤔᤧᤘᤠ᤹. ᤁᤖ ᤛᤣ᤺ᤰᤛᤡᤱᤔᤠ ᤁᤧᤄᤥᤒᤠᤜᤠ᤹ ᤁᤢᤓᤠᤖᤰ ᤔᤧᤘᤠ᤹ᤖᤥ॥”
ᤀᤣ᤺ᤱᤕᤠᤱ ᤜᤢᤱᤔᤠᤒᤡ ᤔᤣ᤺ᤶᤒᤡ
(ᤔᤷᤁᤢ ᥇᥈:᥇᥉-᥇᥍; ᤗᤢᤁᤠ ᥈᥆:᥈᥆-᥈᥌)
15ᤜᤧᤰᤁᤩᤠᤱ ᤑᤖᤡᤛᤡᤜᤠ᤹ ᤛᤥᤖᤡᤰ ᤔᤧᤈᤢᤵᤛᤧᤀᤠᤱ ᤕᤧᤛᤢᤴ ᤀᤠᤰᤂᤣᤗ᤹ᤖᤡᤰ ᤐᤠ᤺ᤴᤏᤥ ᤌᤠ᤺ᤔᤠᤒᤣ ᤑᤠ᤹ᤀᤠᤱ ᤛᤢᤰᤔᤠ ᤔᤧᤜᤣ᤺ᤰᤋᤢᤖᤥ॥ 16ᤑᤖᤡᤛᤡᤜᤠ᤹ᤖᤧ ᤂᤢᤏᤡ᤹ ᤜᤢ᤹ᤛᤠᤶᤒᤠᤜᤠ᤹ ᤜᤧᤖᤥᤍ ᤜᤠᤱᤅᤡᤸᤗᤧ ᤁᤢᤔᤏᤠᤜᤠ᤹ᤏᤢ ᤕᤧᤛᤢᤖᤥ ᤔᤧᤒᤠᤱᤄᤢᤛᤡ॥ ᤂᤧᤱᤜᤠ᤹ᤖᤧ ᤕᤧᤛᤢᤴ ᤛᤣ᤺ᤴᤔᤧᤍᤥᤛᤢ. “ᤛᤡᤰᤛᤠᤶᤒᤣ. ᤂᤧᤏᤧ᤹ᤃ ᤛᤧᤰᤂᤠ ᤐᤠ᤺ᤴᤗᤰ ᤁᤧᤒᤠ᤺ᤵᤐᤧᤴ ᤀᤠᤏᤡᤃᤣ ᤏᤡᤛᤢᤶᤒᤧᤖᤥ॥ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤠᤶᤔᤡᤴ ᤛᤧᤰᤂᤠᤀᤣ ᤁᤧᤜᤢ᤹ᤖᤢᤛᤡᤖᤥ॥ ᤂᤧᤏᤧ᤹ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤐᤠ᤺ᤴᤏᤥ ᤁᤧᤶᤒᤳᤏᤧᤴ. ᤜᤧᤰᤁᤩᤠᤱ ᤔᤏᤠᤀᤠᤱ ᤁᤧᤴᤇᤧᤴᤍᤢᤴᤇᤡᤴ॥ 17ᤜᤧᤰᤁᤣ᤺ᤸᤗᤧ ᤁᤴ ᤐᤠ᤺ᤴᤏᤡᤴ ᤀᤠᤔᤧᤳᤋᤧ᤹ᤖᤥᤔᤡ ᤐᤕᤶ ᤜᤠᤱ ᤛᤡᤈᤖᤧᤴ ᤀᤣ᤺ᤱᤕᤠᤱ ᤜᤢᤱᤔᤠ ᤀᤠᤏᤡ᤹ ᤛᤠᤶᤕᤥᤌᤡᤶᤔᤡᤸᤗᤧ ᤀᤠᤒᤡ᤹ᤒᤡ ᤀᤠᤶᤒᤡᤏᤧᤴᤒᤡ᥅”#᥈᥈:᥇᥍ ᤂᤧᤱᤜᤠ᤹ᤖᤧ ᤕᤧᤛᤢᤴ ᤁᤧᤛᤠᤰᤐᤠ ᤐᤠ᤺ᤴᤏᤥ ᤌᤠ᤺ᤔᤠ ᤔᤧᤃᤥ᤺ᤳᤋᤢᤖ ᤔᤧᤘᤕᤧ॥ ᤋᤱᤒᤣ ᤌᤵᤔᤠ ᤁᤧᤖᤧᤰ ᤔᤏᤠᤜᤠ᤹ᤖᤧ ᤖᤥᤔᤡ ᤐᤕᤶ ᤜᤠᤱ ᤛᤡᤈᤖᤧᤴ ᤀᤣ᤺ᤱᤕᤠᤱ ᤜᤢᤱᤔᤠ ᤁᤧᤒᤥᤱᤒᤠ ᤘᤕᤧ. ᤁᤖ ᤕᤜᤢᤍᤡ ᤛᤠᤶᤕᤥᤌᤡᤶᤔᤥ ᤘᤣ᤹ ᤗᤠᤈᤣ᤹ᤀᤥᤒᤠ ᤔᤏᤠᤜᤠ᤹ ᤀᤣ᤺ᤱᤕᤠᤱ ᤜᤢᤱᤔᤠ ᤔᤧᤴᤏᤢ᤹ᤔᤏᤠᤒᤠ ᤘᤕᤧ॥
18ᤁᤖ ᤕᤧᤛᤢᤖᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤑᤧᤴ ᤏᤡᤱᤘᤠ᤹ᤀᤡᤴ ᤏᤡᤱᤘᤠ᤹ ᤂᤥᤛᤢᤀᤠᤱ ᤔᤧᤳᤋᤢᤛᤡ. “ᤂᤡᤏᤡ᤹ ᤏᤡᤱᤘᤠ᤹ ᤁᤧᤈᤡ᤺ᤵᤐᤠᤛᤣ. ᤌᤣᤀᤠᤱ ᤀᤰᤂᤣᤗ᤹ᤖᤡᤰ ᤀᤡᤱᤃᤠ᤹ ᤐᤠ᤺ᤴᤏᤥ ᤋᤧᤶᤔᤠ ᤏᤡᤱᤘᤠ᤹ ᤁᤧᤀᤡ᤺ᤳᤋᤢᤶᤒᤠᤒᤣ᥅ 19ᤀᤣ᤺ᤱᤕᤠᤱ ᤜᤢᤱᤔᤠ ᤁᤧᤒᤥᤱᤒᤠ ᤖᤥᤔᤡ ᤕᤠᤱᤀᤡᤳᤇᤡᤴ ᤁᤳᤏᤠ ᤑᤧᤳᤋᤧᤶᤔᤧ᤹॥” ᤂᤧᤱᤜᤠ᤹ᤖᤧ ᤂᤢᤏᤧ᤹ᤀᤥ ᤕᤠᤱᤀᤡᤳᤇᤡᤴ ᤔᤧᤍᤠᤖᤢᤀᤠᤱ 20ᤕᤧᤛᤢᤖᤧ ᤂᤧᤱᤜᤠ᤹ ᤛᤣ᤺ᤴᤍᤥᤛᤢᤛᤡ. “ᤁᤵᤔᤥ ᤜᤠ᤺ᤳᤗᤧ ᤁᤢᤀᤡᤳᤇᤠᤵ ᤏᤢ ᤁᤢᤒᤠ᤺ᤴᤛᤠᤵ ᤐᤵᤐᤣ᥅” 21ᤂᤧᤱᤜᤠ᤹ᤖᤧ ᤏᤥᤃᤵ ᤔᤧᤒᤡᤖᤢ. “ᤛᤡᤈᤖᤧᤸᤗᤧᤴ ᤐᤳᤗᤥ॥”
ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤛᤡᤈᤖᤗᤧ ᤁᤢᤒᤠ᤺ᤴᤜᤠ᤹ ᤛᤡᤈᤖᤧᤴ ᤐᤡᤖᤧᤶᤔᤧ᤹. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤒᤠ᤺ᤴᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤣ ᤐᤡᤖᤧᤶᤔᤧ᤹ᤀᤥ॥” 22ᤂᤧᤱᤜᤠ᤹ᤖᤧ ᤁᤴ ᤏᤥᤃᤵᤐᤡᤴ ᤔᤧᤄᤧᤵᤛᤢᤀᤠᤱ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤖᤥ॥ ᤂᤧᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤂᤧᤵᤔᤥᤀᤣ ᤔᤧᤗᤧᤖᤢᤔᤧᤎᤀᤠᤱ ᤔᤧᤒᤣᤖᤥ॥
ᤛᤡᤔᤧᤴᤗᤠᤶ ᤕᤠᤶᤔᤥ ᤜᤡᤱᤔᤠ
(ᤔᤷᤁᤢ ᥇᥈:᥇᥎-᥈᥍; ᤗᤢᤁᤠ ᥈᥆:᥈᥍-᥊᥆)
23ᤒᤠ ᤂᤧᤴ ᤕᤧᤴᤏᤥ ᤛᤡᤔᤧᤴᤗᤠᤶ ᤕᤠᤶᤔᤥ ᤜᤡᤱᤔᤴ ᤜᤥᤵ ᤗ᤹ᤖᤡᤰ ᤏᤛᤠᤴ ᤁᤧᤈᤥ᤺ᤰᤐᤠ ᤛᤍᤢᤁᤡᤜᤠ᤹ ᤕᤧᤛᤢᤖᤥ ᤔᤧᤍᤩᤧᤀᤠᤱ ᤛᤣ᤺ᤴᤔᤧᤍᤥᤛᤢ. 24“ᤛᤡᤰᤛᤠᤶᤒᤣ. ᤔᤥᤛᤠᤖᤧ ᤛᤠᤶᤕᤥᤌᤡᤶᤔᤥ ᤀᤰᤂᤣᤗ᤹ᤖᤡᤰ ᤛᤠᤵᤋᤢᤀᤠᤱ ᤐᤳ. ‘ᤀᤠᤳᤋᤡᤸᤗᤧ ᤁᤢᤶᤓᤢ᤹ᤀᤡᤴ ᤁᤢᤛ᤻ᤛᤠᤁᤢᤀᤣ ᤔᤧᤴᤘᤠ᤹ᤀᤣ ᤛᤡ᤹᤺. ᤂᤧᤸᤗᤧ ᤁᤢᤴᤛᤠ᤹ᤖᤧ ᤔᤣᤔᤣᤍᤢᤔᤠ ᤁᤢᤴᤏᤧ᤹ᤍᤪᤣ᤺ᤴᤏᤢ ᤔᤣ᤺ᤰᤂᤡᤶ ᤆᤥ᤺ᤰᤔᤠᤀᤣ ᤐᤥᤱ॥ ᤜᤧᤰᤁᤩᤠᤱ ᤁᤢᤶᤓᤢ᤹ᤖᤧ ᤁᤢᤗᤠᤃᤡ ᤛᤠᤃᤵᤔᤠ ᤐᤥᤱᤗᤥ॥’#ᤛᤠᤶᤕᤥ ᤀᤡᤱ ᥈᥋:᥋-᥌ 25ᤀᤠᤸᤗ ᤏᤢᤛᤡ ᤑᤢ᤹ᤏᤢᤛᤠ᤹ᤜᤠ᤹ ᤔᤧᤘᤕᤧ॥ ᤋᤢᤶᤒᤠᤸᤗᤧ ᤔᤣ᤺ᤰᤂᤡᤶ ᤆᤥᤃᤢᤀᤠᤱ ᤁᤢᤛ᤻ᤛᤠᤁᤢᤀᤣ ᤔᤧᤴᤘᤠ᤹ᤀᤣ ᤛᤩᤧ. ᤜᤧᤰᤁᤩᤠᤱ ᤁᤢᤔᤣ᤺ᤳᤋᤡᤴᤏᤢ ᤁᤢᤴᤛᤠ᤹ᤖᤧ ᤔᤣ᤺ᤰᤂᤡᤶ ᤆᤥᤃᤢ॥ 26ᤜᤧᤰᤁᤣᤗ᤹ᤖᤡᤰ ᤛᤖᤢᤶᤒᤠ. ᤕᤠᤱᤛᤖᤢᤶᤒᤠ ᤏᤢ ᤑᤥ᤹ᤒᤠ ᤌᤠᤖᤡᤰᤗᤧ ᤂᤧᤴ ᤔᤣᤔᤣᤍᤢᤔᤠᤴᤏᤢ ᤔᤣ᤺ᤰᤂᤡᤶ ᤔᤧᤈᤥᤃᤢ. ᤁᤖ ᤋᤢᤶᤒᤠᤴ ᤜᤧᤰᤁᤣᤀᤣ ᤂᤢᤏᤡ᤹ ᤛᤠ-ᤀᤣ ᤔᤧᤴᤘᤠ᤹ᤀᤣ ᤔᤧᤛᤩᤧᤖᤥ॥ 27ᤀᤠᤸᤗ ᤁᤢᤏᤢᤵᤔᤥ ᤂᤧᤴ ᤔᤧᤴᤇᤢᤔᤠ᤹ᤀᤡᤴᤏᤠᤱ ᤛᤩᤧᤖᤥ॥ 28ᤀᤠᤸᤗ ᤂᤧᤱᤜᤠ᤹ ᤛᤡᤔᤧᤴᤗᤠᤶ ᤕᤠᤶᤔᤥ ᤔᤧᤜᤡᤱᤅᤡᤸᤗᤧ ᤂᤧᤴ ᤀᤠᤳᤋᤡᤸᤗᤧ ᤁᤢᤔᤣᤳ ᤐᤥᤱᤒᤠᤒᤣ᥅ ᤌᤣᤀᤠᤱᤓᤧᤸᤗᤧ ᤂᤧᤴ ᤔᤧᤴᤇᤢᤔᤠ᤹ᤀᤡᤴᤏᤢ ᤏᤢᤛᤡ ᤑᤢ᤹ᤏᤢᤛᤠ᤹ ᤁᤧᤖᤧᤰᤗᤧ ᤔᤣ᤺ᤰᤂᤡᤶ ᤔᤧᤈᤥᤃᤢᤀᤠᤱ ᤔᤧᤘᤕᤧᤖᤥ॥”
29ᤕᤧᤛᤢᤖᤧ ᤏᤥᤃᤵ ᤐᤡᤖᤢᤛᤡ. “ᤂᤡᤏᤡ᤹ᤃ ᤐᤡᤷᤒᤣ᤺ᤶᤒᤥ ᤁᤧᤎᤩᤧ᤹ᤀᤡᤀᤠᤱ ᤁᤧᤘᤕᤡ᤹ᤖᤥ. ᤌᤣᤀᤠᤱᤓᤧᤸᤗᤧ ᤛᤠᤶᤕᤥᤛᤠᤵᤗᤠᤴ ᤁᤢᤛᤡᤱ ᤔᤧᤴᤏᤡ᤺ᤳᤋᤣ ᤁᤧᤘᤕᤡ. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤢᤰᤛᤠᤶᤔᤡᤴᤏᤠᤱ ᤁᤢᤛᤡᤱ ᤔᤧᤴᤏᤡ᤺ᤳᤋᤣ ᤁᤧᤘᤕᤡ᤹ᤖᤥ॥ 30ᤌᤣᤀᤠᤱᤓᤧᤸᤗᤧ ᤛᤡᤔᤧᤴᤗᤠᤶ ᤕᤠᤶᤔᤥ ᤔᤧᤜᤡᤱᤅᤡᤸᤗᤧᤃ ᤔᤏᤠᤜᤠ᤹ ᤔᤣ᤺ᤰᤂᤡᤶ ᤔᤧᤴᤈᤥ᤺ᤰᤏᤧᤴᤗᤥ. ᤁᤖ ᤂᤧᤱᤜᤠ᤹ᤃ ᤛᤠᤱᤃᤪᤠᤶᤐᤣᤍᤠᤱᤅᤥᤒᤠ ᤔᤠᤱᤗᤠᤀᤡᤱᤒᤠ ᤁᤢᤀᤡᤛᤡ᤺ᤰᤏᤧ ᤔᤧᤒᤥᤱᤗᤥ॥ 31ᤁᤖ ᤛᤡᤔᤧᤴᤗᤠᤶ ᤕᤠᤶᤔᤥ ᤜᤡᤱᤔᤠᤸᤗᤧ ᤁᤢᤕᤠ᤺ᤶᤒᤣᤀᤥᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣᤗ᤹ᤖᤡᤰ ᤐᤠ᤺ᤳᤋᤢᤒᤠᤴ ᤔᤧᤴᤏᤡ᤺ᤳᤋᤣ ᤁᤧᤘᤕᤡ᤹ᤒᤡ᥅ 32‘ᤀᤡᤱᤃᤠ᤹ᤃ ᤀᤒᤪᤠᤜᤠᤔ. ᤀᤡᤛᤜᤠᤁ ᤏᤢ ᤕᤠᤁᤢᤒᤖᤧ ᤂᤢᤏᤡ᤹ ᤏᤡᤱᤘᤠ᤹ᤑᤢᤔᤠᤱᤀᤠᤖᤥ॥’#ᤗᤠ ᥉:᥌ ᤂᤧᤸᤗᤧᤆᤥᤃᤢᤸᤗᤧ ᤂᤢᤏᤧ᤹ᤃ ᤁᤢᤛᤡᤘᤧᤳᤜᤠ᤹ᤖᤧᤴ ᤔᤣ᤺ᤴ. ᤁᤖ ᤁᤢᤜᤡᤱᤘᤧᤳᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ᤑᤢᤔᤠᤱᤗᤥ॥”
33ᤂᤧᤴ ᤁᤧᤈᤢᤶᤒᤠ ᤔᤏᤠᤜᤠ᤹ᤖᤧ ᤁᤴ ᤐᤠ᤺ᤴᤏᤡᤴ ᤔᤧᤄᤧᤵᤛᤢᤸᤗᤧ ᤁᤢᤏᤡᤛᤠᤶᤔᤥ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤖᤥ॥
ᤁᤧᤖᤧᤰᤏᤢ᤺ᤸᤗᤧ ᤁᤧᤕᤧᤰᤐᤠ ᤀᤡᤱᤈᤠᤱ
(ᤔᤷᤁᤢ ᥇᥈:᥈᥎-᥉᥊; ᤗᤢᤁᤠ ᥇᥆:᥈᥋-᥈᥎)
34ᤕᤧᤛᤢᤖᤧ ᤛᤍᤢᤁᤡᤜᤠ᤹ᤖᤧ ᤂᤢᤏᤡ᤹ ᤔᤢᤖᤠᤴ ᤛᤢᤒᤢ ᤐᤡᤖᤢᤛᤡ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤑᤖᤡᤛᤡᤜᤠ᤹ᤖᤧ ᤔᤧᤄᤧᤵᤛᤢ ᤜᤧᤰᤁᤩᤠᤱ ᤀᤡᤱᤔᤧᤍᤱᤛᤡᤱᤅᤠᤱ ᤕᤧᤛᤢᤖᤥ ᤔᤧᤍᤩᤧᤖᤥ॥ 35ᤂᤧᤱᤜᤠ᤹ᤀᤥ ᤛᤠᤶᤕᤥᤛᤠᤵᤗᤠ ᤛᤠ᤹ᤖᤡᤰ ᤁᤧᤗᤧᤒᤠᤎᤡᤰᤗᤧ ᤕᤧᤛᤢᤴ ᤀᤰᤂᤣᤗ᤹ᤖᤡᤰ ᤁᤢᤏᤡᤱᤘᤠ᤹ ᤛᤠ᤹ᤖᤢᤖ ᤛᤣ᤺ᤴᤗᤠᤵᤋᤢ. 36“ᤛᤡᤰᤛᤠᤶᤒᤣ. ᤛᤠᤶᤕᤥᤌᤡᤶᤔᤥ ᤀᤡ᤺ᤵᤔᤠ ᤏᤠ᤺ᤵᤔᤠᤀᤣ ᤁᤧᤒᤥᤱᤒᤠ ᤁᤧᤖᤧᤰᤏᤢ᤺ᤸᤗᤧ ᤕᤶᤒᤠ ᤀᤡᤱᤈᤠᤱᤅᤡᤴ ᤀᤠᤳᤋᤡᤱᤃ᥅”
37ᤕᤧᤛᤢᤖᤧ ᤏᤥᤃᤵ ᤐᤡᤖᤢ. “‘ᤁᤧᤴᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤧᤖᤧᤰ ᤁᤧᤛᤡᤰᤗᤢᤱᤔᤠᤸᤗᤧ. ᤁᤧᤖᤧᤰ ᤁᤧᤛᤰᤔᤠ ᤛᤠᤶᤔᤡᤸᤗᤧ. ᤜᤧᤰᤁᤩᤠᤱ ᤁᤧᤖᤧᤰ ᤁᤧᤏᤡᤱᤘᤠ᤹ᤀᤡᤸᤗᤧ ᤔᤡ᤺ᤶᤈᤡ ᤔᤧᤳᤋᤧ᤹ᤀᤥ॥’#ᤛᤠᤶᤕᤥ ᤀᤡᤱ ᥌:᥋ 38ᤁᤱᤃ ᤌᤡᤰᤛᤡᤃᤣᤰᤐᤠ ᤏᤢ ᤁᤧᤖᤧᤰᤏᤢ᤺ᤸᤗᤧ ᤁᤧᤕᤧᤰᤐᤠ ᤀᤡᤱᤈᤠᤱᤗᤥ॥ 39ᤜᤧᤰᤁᤣᤗ᤹ᤖᤡᤰ ᤏᤡᤛᤡᤃᤣᤰᤐᤠ ᤁᤧᤕᤧᤰᤐᤠ ᤀᤡᤱᤈᤠᤱᤅᤡᤱᤃ ᤒᤠ ᤁᤴᤗᤥ. ‘ᤀᤠᤵᤑᤣᤰ ᤗᤢᤱᤔᤠ᤹ ᤁᤧᤍᤢᤰᤛᤡᤱᤒᤠ ᤁᤢᤀᤡᤛᤡ᤺ᤰᤁᤣ ᤁᤧᤒᤠᤱᤓᤣ᤹ᤛᤠᤒᤠᤜᤠ᤹ᤀᤠᤱ ᤗᤢᤱᤔᤠ᤹ ᤋᤢᤰᤋᤧᤛᤧ᤹ᤀᤥ॥’#ᤗᤧᤒᤡ ᥇᥏:᥇᥎
40“ᤁᤧᤖᤧᤰ ᤛᤠᤶᤕᤥᤌᤡᤶ ᤏᤢ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤂᤢᤏᤡ᤹ ᤏᤡᤛᤠᤶᤔᤡᤴ ᤁᤴ ᤏᤧᤳᤇᤡ ᤀᤡᤱᤈᤠᤱᤗᤠᤶ ᤋᤩᤧᤒᤠᤖᤥ॥”
ᤂᤪᤡᤛ᤻ᤋᤧᤴ ᤜᤠ᤺ᤳᤗᤧ ᤁᤢᤛ᤻ᤛᤠᤒᤣ᥅
(ᤔᤷᤁᤢ ᥇᥈:᥉᥋-᥉᥍; ᤗᤢᤁᤠ ᥈᥆:᥊᥇-᥊᥊)
41ᤜᤧᤰᤁᤩᤠᤱ ᤑᤖᤡᤛᤡᤜᤠ᤹ ᤌᤡᤰᤍᤧᤴᤏᤥ ᤛᤥᤖᤡᤰ ᤔᤧᤈᤢᤵᤛᤧᤀᤠᤱ ᤔᤧᤘᤕᤧᤸᤗᤧ ᤕᤧᤛᤢᤖᤧ ᤂᤧᤱᤜᤠ᤹ ᤛᤣ᤺ᤴᤍᤥᤛᤢᤛᤡ. 42“ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤖᤧ ᤁᤢᤕᤠ᤺ᤶᤒᤣᤀᤥ ᤂᤡᤏᤡ᤹ ᤌᤣ ᤁᤧᤀᤡ᤺ᤳᤋᤢᤶᤒᤣ᥅ ᤂᤢᤏᤧ᤹ ᤜᤠ᤺ᤳᤗᤧ ᤁᤢᤛ᤻ᤛᤠ ᤑᤠ᤹ᤀᤠᤱ ᤂᤡᤏᤡ᤹ ᤏᤡᤱᤘᤠ᤹ ᤁᤧᤀᤡ᤺ᤳᤋᤢᤶᤒᤣ᥅”
ᤂᤧᤱᤜᤠ᤹ᤖᤧ ᤏᤥᤃᤵ ᤔᤧᤒᤡᤖᤢ. “ᤂᤢᤏᤧ᤹ᤃ ᤍᤠᤀᤢᤍ ᤜᤠᤱᤅᤡᤸᤗᤧ ᤁᤢᤛ᤻ᤛᤠᤖᤥ॥”
43ᤕᤧᤛᤢᤖᤧ ᤂᤧᤱᤜᤠ᤹ ᤕᤠᤶᤔᤥ ᤛᤣ᤺ᤴᤍᤥᤛᤢᤛᤡ. “ᤜᤧᤰᤁᤣᤏᤧ ᤑᤠ᤹ᤃᤪ ᤛᤣᤛᤣᤔᤠᤱᤗᤠᤶ ᤍᤠᤀᤢᤍᤖᤧ ᤀᤠᤰᤂᤣᤗ᤹ᤖᤡᤰ ᤀᤠᤍᤠᤱᤒᤣ ᤑᤠ᤹ᤀᤠᤱ ᤔᤧᤳᤋᤢᤒᤠᤒᤣ᥅ ᤌᤣᤀᤠᤱᤓᤧᤸᤗᤧ ᤍᤠᤀᤢᤍ ᤜᤠᤱᤅᤡᤸᤗᤧ ᤏᤡᤱᤘᤠ᤹ᤑᤢ ᤛᤠᤶᤗᤥᤛᤢᤶᤔᤥ ᤐᤠ᤺ᤳᤋᤢ.
44“‘ᤕᤜᤘᤣ ᤍᤠᤱᤒᤠᤸᤗᤧ ᤀᤡᤱᤃᤠ᤹ ᤀᤠᤴᤍᤠᤱᤒᤠᤴ ᤀᤰᤂᤣ ᤔᤧᤳᤋᤢ.
ᤁᤧᤏᤡᤱᤔᤡᤜᤠ᤹ ᤁᤧᤕᤢᤰᤁᤥ ᤀᤡᤱᤃᤠ᤹ ᤔᤧᤴᤍᤠ᤺ᤳᤇᤡᤱᤅᤣ ᤌᤠᤖᤡᤰ
ᤀᤠᤈᤢᤵᤛᤠᤱ ᤗᤧᤵᤔᤠᤱ ᤂᤧᤏᤧ᤹ ᤕᤢᤅᤧ᤹ᤀᤥ॥’#ᤏᤡᤱ ᤛᤢᤶ ᥇᥇᥆:᥇
45“ᤍᤠᤀᤢᤍ ᤜᤠᤱᤅᤡᤸᤗᤧᤀᤣ ᤂᤢᤏᤧ᤹ ᤀᤠᤍᤠᤱᤒᤣ ᤗ᤹ᤖᤡᤰ ᤔᤧᤳᤋᤢᤏᤧ ᤑᤠ᤹ᤃᤪ ᤀᤠᤰᤂᤣᤗ᤹ᤖᤡᤰ ᤂᤪᤡᤛ᤻ᤋᤧᤴ ᤍᤠᤀᤢᤍᤖᤧ ᤁᤢᤛ᤻ᤛᤠ ᤐᤥᤱᤒᤠᤒᤣ᥅” 46ᤀᤠᤳᤋᤡᤴᤜᤠ᤹ᤖᤧᤀᤠᤱ ᤐᤠ᤺ᤴᤛᤢᤳᤗᤠᤎᤡᤰ ᤏᤥᤃᤵ ᤐᤡᤔᤠ ᤔᤧᤴᤇᤢᤰᤋᤢᤴ. ᤜᤧᤰᤁᤩᤠᤱ ᤂᤧᤴ ᤕᤧᤴᤏᤠᤱᤎᤥ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤂᤢᤏᤧ᤹ ᤐᤠᤴ ᤛᤣ᤺ᤴᤍᤥᤔᤠ ᤀᤠ᤺ᤴᤇᤡᤱᤔᤠᤀᤠᤱ ᤔᤧᤴᤇᤢᤰᤋᤢᤴᤗᤥ॥
© 2009, 2023, Wycliffe Bible Translators, Inc. All rights reserved.