Rom 12
12
Kuna Mapweti
1A shunun, DeeƁwe a ma gu'ti ashur fwet. Ɓurti andi, i fwalsu fahun haisu ɓa hu te ii kuna mapweti, masapai ima DeeƁwe ma ɓweti, a yis mii cwai ti afut i mwawei i rin amu wa kyel i DeeƁwe. 2Kan hu ɓwet mulwat amu u mas aɗeng ima naya moti ti masi kwa, fo i mandi, shen hun ti mute ii mumwayani ta ambe' amu. Ani ma wa kini hu mba, ɗak hu ha' aɗeng ima DeeƁwe ma ɓweti maɗesi, i ɗat si ɓwi hu ma nggya-nggyai.
3Ti mal maɗesi ima DeeƁwe fan, i ma laksu ti andek-andek, kan hu zan haisus u ɓin ngga' ima hu mata kwa, fo i mandi, mas hun mwawei si bene ti haisu, kiga' hu amba i fati mulut ima DeeƁwe fu. 4Fota ngga ima kati ɓwayai hyang na lo' amukan andek, si ti a ro musut andek kwa. 5Andi hwak, kan ɗufal ka hyang ima ka ta wii i Kristi. Ka tekan ti lo' andek ta wii i Kristi, shak a sikani ka te ii ɓwayai i lo' i ɗiyai. 6Ka mati malal akat-akat, ta ngga' ima si fakan mal maɗesi ta. Na mal i maɗufal a laki i mashit, u masti ro kiga' si fati mulut ames hai. 7Na ii masti ro, u masi, na ii kofiti u kofti, 8na ii fati ɗufal njeng na mulwat, u fas, na ii tal ti myatat i shini, u fa gilik, na ii kolti ɗufal, u fa hai si kaitati ndere, na ii gu'ti ɗufal ashur, u masi ti jakak.
Matɓwet
9Matɓwet amu a kpak u te ii mwawei. Hu nggyu ti aɗeng ima mii mafwashi, hu ka' maɗesi gbwenjeng. 10Fahun haisu si matɓwet ima hun a shunus i ɗiyai. Fahun ɗiyai ngye u ɓin ngga' ima hu fati haisu ta. 11Kan hu njwangat kwa, kukush hun, kin hun hai ti mulut andek saa ti rin amu hun masti Deembai ro. 12Jakak hun saa ti Kintiɓwi, ka' hun agung saa ti shum, fahun mulut si fwal ti DeeƁwe. 13Kaar hun ɗamam ima huti hu ɗufal i DeeƁwe ima si ti kwa. Hu mat mwalmwat ra apil.
14Kin hun som ima si kofsu ya maɗesi, kin hun yus maɗesi, kan hu kinus ɗor hai kwa. 15Jakak hun akul hu som ima si jakak, kawa hun akul hu som ima si kawa. 16Mas hun mute i cala akul ti ɗiyai. Kan hu ngye na hihai kwa, mas hun myatat hu som ima si mii fo i ɗama kwa. Kan hu zan haisu fota hu ɓin anggum i ɗufali kwa.
17Kan hu wer ɗeng mafwashi ti mafwashi kwa. Tehun mweret hu mas aɗeng ima ma kiga' ta shishat i ɗufal shak. 18Na yis wa mas, masa shak aɗeng ima ha wa masi, hu te cala hu ɗufal shak. 19A myayun, kan hu wer kwa, hon hun DeeƁwe u werui ti futut ames. Ɓurti si worong nyai, “A wer amen, i wa weri,”#12:19 Ɗing huni hwak: Muh 32:35. Deembai lak. 20Fo i mandi,
“Na ma ha' ti wei ti ha yis ti hwem,
Faha yus cwa,
na yis myaf, Faha yus ham u wo.
Ti masi andi,
ha suɓut sus
a man i mangyesh hai.”#12:20 Ɗing huni hwak: Kaa 25:21-22.
21Kan hu hon mafwashi u ɓin njeng amu kwa, fo i mandi ɓin hun njeng i mafwashi ti masti maɗesi.
Currently Selected:
Rom 12: AlisIRonNT
Highlight
Share
Compare
Copy
Want to have your highlights saved across all your devices? Sign up or sign in
© Wycliffe Bible Translators, Inc. and © The Nigeria Bible Translation Trust 2018
