Yezsuzyaq 5

Dij Goanz Zaznanh Mbu Dij Goanz Yixsowhleh Taeuq

1Sowh puj Yaqmoahliq yuq haenz dah Yezdanq baih tang'vaenz doak naeh ndowj naeh, daj sowh puj Zaznanh yuq haenz haij ndowj naeh, le laux hongz paenqdix ruxnyinz Yez'hoahhuah yuq doqnaj dij goanz Yixsowhleh hawj naemx dah Yezdanq kawq, taengdeg daengzle dij goanz Yixsowhleh kamj dah nauq, paenqdix zoq mbu dij goanz Yixsowhleh daengz mboq zawh haxnyaeux.

Dij Goanz Yixsowhleh Yuq Ndaw Jehzah Hoak Diauq Zauh Heh Naeh

2Zwz naeh, Yez'hoahhuah nemz Yezsuzyaq: "Mawz aeu tintitfaez chauq remz, daeuq saeh dij goanz Yixsowhleh hoak diauq zauh heh naeh." 3Yezsuzyaq zoq aeu tintitfaez chauq remz, yuq bo ux saeh dij goanz Yixsowhleh heh naeng dij noag, daeq zwz naeh maz bo naeh zoq rongx hoak Bo Naeng Dij Noag. 4-6Baenzzaqrawz Yezsuzyaq saeh dij goanz Yixsowhleh hoak diauq zauh heh naeh, zawh sowh dij goanz ni Aizjih yaq zux zowngx naeh, paenqdix naengzbaeq hoak diauq zauh heh naeh. Sowh dij goanz yuq Aizjih zowngx naeh paenqdix dauq heh yaq, gaj paenqdix mboq biak kauq Yez'hoahhuah, Yez'hoahhuah zoq haxgoak daekgoanq, hax mboq hawj paenqdix sowh puj zwz ni Aizjih naeh haeuz taeng vaenzhwnz dungzsaeuh naeh, mboq hawj paenqdix mwz dih namh gvangj, namh yawz, dih miz gaenqvan lai naeh, zoq zawh dih Yez'hoahhuah yinq puj jeq rownz paenqdix aeu hawj raeuz naeh. Baenzzaqnaeh Yez'hoahhuah hawj paenqdix yuq ndaw doanghmowz siqsip bi, yuq ndaw doanghmowz tai. 7Luglan paenqdix, zoq zawh Yez'hoahhuah aeu daeb paenqdix naeh, paenqdix daeq Aizjih goq ban goq daeuj, zoq naengz mboq miz gawz saeh paenqdix hoak diauq zauh heh naeh, gannaeh Yezsuzyaq zux saeh paenqdix heh. 8Puj zaiz Yixsowhleh heh yaq, zoq yuq dih paenqdix ndowj naeh ndowj, taeng deg baegmbaed paenqdix ndae nauq. 9Yez'hoahhuah daj Yezsuzyaq hax: "Gaenqsu yuq ndaw Aizjih zoah daenh vazkuz, najyaij. Vaenznaeh gux hawj sowh najyaij naeh ni gaenqsu." Baenzzaqnaeh zoq rongx dih naeh hoak Jehzah, taeng deg vaenzzawjraeuz. (Jehzah zawh hax: "Ni.")

Dij Goanz Yixsowhleh Gaem Jeng Gvaq

10Dij goanz Yixsowhleh yuq ndaw Jehzah ndowj. Bi gaengnaeh, ndown nduq dix vaenz sipsiq naeh, zang'haemh dix, dij goanz Yixsowhleh yuq ndaw doanghpiang Yezliqgoz chaenh naeh gaem jeng rongx hoak Jeng Gvaq naeh. 11Vaenzlaeng paenqdix jin binx mboq miz fahfaenx daj sowh kaeuj aeu qeuq naeh. Baez naeh zawh baez nduqnduq paenqdix jin kaeujpyaek dih naeh; 12Paenqdix jin kaeujpyaek dih gaengnaeh yaq, vaenzlaeng maznah zoq daeuj gah; Dij goanz Yixsowhleh zoq jin maznah gah. Daeq bi gaengnaeh mwz, paenqdix jin kaeujpyaek Zaznanh.

Yezsuzyaq Daj Laux Saeq Gvanx Boangx Bin Yez'hoahhuah Naeh

13Gau Yezsuzyaq daeq mwz zawj Yezliqgoz chaenh naeh, dix ngangh to lez, leztaen miz goanz ux yuq baihnaj dix hongj ux in, goanz naeh gaem maeg remz ux haeuz it maz yaq. Yezsuzyaq daeq bae dih dix naeh, cham dix: "Mawz zawh saeh piu rux zawh saeh sowh puj daj piu dangq baih naeh mux?" 14Goanz gaengnaeh yaeng: "Gaenqrawz goj mboq zawh, gux zawh laux saeq gvanx boangx bin Yez'hoahhuah naeh, gannaeh gux daeuj eh." Yezsuzyaq cenq gvih bae dihndin, hax: "Zaeuj koij nemz koij hoak gaeng ah?" 15Laux saeq gvanx boangx bin Yez'hoahhuah naeh hax: "Dih mawz in naeh zawh dih dij Sen, tod haiz mawz." Yezsuzyaq zoq hoakzaqnaeh hoak.

Currently Selected:

Yezsuzyaq 5: ZHN

Highlight

Copy