Ezequiel 47
47
Yac ta loq'uel ja' ta templo
1Patil te winic la yic'on sujt'el ta yochibal templo. Tey la quil yac ta loq'uel ja' ta ye'tal yochibal yu'un te mero templo,#Is 44.3; Jl 3.18; Zac 13.1; 14.8; Jn 7.38; Ap 22.1. yac ta oquinel bael ta stojol sloq'uib c'aal te banti jilil bael te templo. Te ja'e yac ta oquinel bael ta swa'el yu'un te yochibal templo, ta stojol sur yu'un te scajtijib ta chiq'uel majt'anile. 2Tey abi, la yic'on loq'uel tey ta sq'uinalul templo, la yic'on loq'uel ta sti' ta stojol norte, la yac'bon cac' buelta ta spat c'alal ta yochibal ta stojol sloq'uib c'aal. Ay jun yocja' yac ta oquinel tey a, yac ta loq'uel tel ta sur yu'un yochibal. 3Te winic loc' bael ta stojol sloq'uib c'aal, yich'oj ta sc'ab ch'ajan yu'un p'isjibal. La sp'is jo'winic xcha'bajc' (500) metro, la yic'on c'axel tey ta yocja'. Te ja'e, c'ot c'alal ta snuc' cacan. 4Ora la xcha'p'is xan yan jo'winic xcha'bajc' (500) metro, la yic'on c'axel tey ta yocja'. Te ja'e, c'ot c'alal ta sjol cacan. La xcha'p'is xan yan jo'winic xcha'bajc' (500) metro, la yic'on c'axel tey ta yocja'. Te ja'e c'otix c'alal ta jch'ujt'. 5La xcha'p'is xan jo'winic xcha'bajc' (500) metro, te yocja' c'atp'ujix ta jun muc'ja'. Jich ma ba ju'ix c'axel, melel mero c'ubulix, ja' xanix ya xju' c'axel ta nuxel. 6Ja' yu'un la yalbon xan:
—Ila me awil ta lec te bila la awilixe —xi' te winique.
Patil la yic'on sujt'el ta sti'il te muc'ja'e. 7La quil tey ta xchebal te sti'ile, ay bayal te'etic tey a. 8C'opoj xan te winique, jich la yalbon:
—Te ja'e ya xbeen bael ta q'uinal ta stojol sloq'uib c'aal. Ya me xc'oic bael ta sti'il Jordán, tey me ya x'oquin ochel ta Mar Muerto. Teme c'ot tey ae, te ya'lel mar ya me xlecub yu'un. 9Ta bayuc ya xc'ot te ja'e, ya me xju' ya xcuxin bayal ta jchajp chambalametic, soc mero bayal me chayetic ya x'esmajic yu'un. Melel te ya'lel muc'ja' in to ya me sc'atp'un ta lequil ja' te ch'aal ja'e. Ja' yu'un ya xju' bayal bila ya xcuxinic tey a. 10Ta En-gadi c'alal ta En-eglaim ay me jtsac-chayetic, tey me ya yaq'uic ta taquejel a te stsacjibal-xchayique. Ya me x'esmaj bayal ta jchajp chayetic, ja' me pajal ya xc'ot soc te Mar Mediterráneo. 11Ja'uc me to ta pampam ja'etic ta sti'il te mare ma ba ya xc'atp'uj ta lequil ja' stuquel. Ya xjil ta ats'amil ja', yu'un ya xtuun ta sloq'uesibal ats'am. 12Ta xchebal te sti'il te muc'ja'e, ya me xch'i te'etic te ya yac' site. Ma me ayuc bi ora ya xlubaj yabenal, soc spisil me ora ay sit. Ta jujun me u ay sitic, melel ja' yac ta aq'uel ya'lel yu'un te ja' yac ta loq'uel tel ta templo. Te sitique ya me xtuun ta we'elil, te yabenalique ya me xtuun ta poxil#Ap 22.2. —xi'.
Smojonil sq'uinalic
13La yal te Cajwaltic:
—Jo'on Ajwalilon te jich ya cale: Ja' sti'il#Nm 34.1-12. te lumq'uinal ya yich'ic ac'beyel yu'uninic te lajchaychajp sts'umbal Israel. (Te José cha'sejp me ya xc'ot ta swenta stuquel.) 14Jo'on la calbey ta jamal te antiguo ats'umbalic te ya cac'bey te lumq'uinale. Pucbeya abaic ta pajal, ya me awu'uninic.
15“Te sti'il te q'uinal ta stojol norte, jajch'em ta Mar Mediterráneo, ya xc'ax ta lum Hetlón soc ta lumetic Zedad, 16Berota, soc Sibraim (ja'ic te ayic ta yolil ta sq'uinal Damasco soc ta sq'uinal Hamat), soc Hazar-haticón (te sts'acoj sba soc Haurán). 17Ja' yu'un, te sti'il ta stojol norte, ya xjajch' ta Mar Mediterráneo c'alal ta Hazar-enán, ya xjil ta norte te slum-sq'uinal Damasco soc Hamat.
18“Te sti'il ta stojol sloq'uib c'aal, ya me xjajch' bael ta jun punto te ay ta yolil Haurán soc Damasco, c'alal ta lum Tamar, slac'oj sba soc Mar Muerto, ta sjilil bael te muc'ja' Jordán, te ya xtuun swenta mojón yu'unic te slum-sq'uinal Galaad soc Israel.
19“Te sti'il ta stojol sur, ya xjajch' ta Tamar, ya xc'ax ta yaxal q'uinal yu'un Meriba-cades soc ta beja' yu'un Egipto, ya xc'ot c'alal ta Mar Mediterráneo.
20“Te sti'il ta stojol smalib c'aal, ja' me smacoj te Mar Mediterráneo, jajch'em ta smojón soc Egipto c'alal ta ti'ti'mar te elawal ay soc Hamat.
21“Ja' me te lumq'uinal te ya yich' pucbeyel te lajchaychajp sts'umbal Israel. 22Ja' me te ya yich' aq'uel awu'uninic, soc nix te jyanlumetic nainemic ta awolilic, te ay yal-snich'nabique. Jichuc me ta awo'tanic te bit'il ayinemic ta Israel. Te c'alal ya apuquic te lumq'uinal ta stojol te sts'umbal Israel, ya me yich'ic uuc. 23Te jyanlumetic tey nix me ya yich' jsejp sq'uinalic tey ta jchajp sts'umbal Israel ta banti nainemique. Jo'on Ajwalilon te jich caloje.
Currently Selected:
Ezequiel 47: TZOXCH
Highlight
Share
Copy
Want to have your highlights saved across all your devices? Sign up or sign in
Biblia en Tzeltal de Oxchuc y Tenejapa © Sociedad Bíblica de México, A.C., 2001.