1 Korintus 1

Salam di Poulus

1-2Kumaa si di kosusuladanja sino poiuuntunan di tongotulun do Kinoringan sino Bandar Korintus, ikovuno kasangkat di linoou do linidangan di Kinoringan sabap kopiiso di Koristus Yisus, om mivaja nogi kasangkat do tongotulun i sinombo nopo kinoijonon i lumoou do ngaran di Yisus Koristus i Tuhan tokou, irino Tuhan diolo om i Tuhan tokou nogi.

Itino surat mantad dogo, i Poulus, i linoou do Kinoringan maja di kouvanganJo supaya sumiliu do susuuon di Koristus Yisus om mantad nogi di Sutanis i sulod tokou.

3Mokianu oku do Kinoringan i Tama tokou om i Yisus Koristus i Tuhan tokou supaya opuavang#1:3 opuavang: aandai ginavo, obintaak om obintulung mamarakat dikovu om poposondod dino ginavo muju.

Monorimakasi i Poulus di Kinoringan

4Soumur oku monorimakasi do Kinoringanku sabap dikovu, do opuavang#1:4 opuavang: aandai ginavo, obintaak om obintulung i Kinoringan do mamarakat dikovu sabap do kopiiso kou di Koristus Yisus. 5Om sabap do kopiiso kou di Koristus akaya kou di barakat do Kinoringan, irino dii do kosonsod kou mangarati kasaangkat iri oinomod om apandai monuduk kasangkat do tinangaran di oinomod. 6Do iri nopo ponudukan pasal di Koristus nga nokopigotno sino ginavo muju, 7supaya salaid#1:7 salaid: salama do mongindad kou di kointalangan di Yisus Koristus i Tuhan tokou, om au kou okurangan di sinundu i nitaak di Tatod do Kinoringan. 8Om soumur Isido nogi pogirot dikovu gosob do pongovian, om ausoi tongosala muju ontok do korikatan di Tadau Kapanalasaian di Yisus Koristus i Tuhan tokou. 9Do i Kinoringan nopo nga obuli do pangaarapan tokou, om Isidono i minongoloou dikovu pavaja diti pisompuuvan di Tanak Disido i Yisus Koristus, i Tuhan tokou.

Ponudukan do Misti Moiandai-andai

10Oou kosusuladanku, sabap kuasa do ngaran di Yisus Koristus i Tuhan tokou, mokianu oku marong dikovu supaya oiso piupakatan muju, om ada kou tumilombus moititimbai nga moiiso kouno do ginavo om pomuandaman. 11Katangaranku nopo diti dikovu, sabap kivaro gia piipiro tulun mantad di sampaganakan di Kolui do minangaabar do moiodu-odu kou sooro. 12Komoionku nopo nga irino do katangaran muju, “Ioku nopo nga i Poulus vojoon,” kaano, om, “Ioku nopo nga iOpulus vojoon,” kamuju vokon, om, “Ioku nopo nga i Koipas#1:12 Koipas: Ngaran koduvo di Pitrus. vojoon,” kaano, om kivaarono do, “Ioku nopo nga i Koristus vojoon,” kaano. 13Aui gia opiduvo i Koristus. Om okoniko ioku, i Poulus, do nakasalib mananggung di duso muju. Om okoniko i ngaranku kinopomotisan#1:13 kinopomotisan: kinopomoptoisan dikovu.

14Monorimakasi okuno do Kinoringan do ausopo vovokon nobotisanku,#1:14 nobotisan: noboptoisan duduvo iolo di Koripus om i Gayus nobotisanku, 15supaya ausoi tulun katangar do binotisan#1:15 binotisan: binoptoisan kou saralom do ngaranku. -- 16Om i Sotipanaspo bala sampaganakan do nobotisanku, nga sondiang nopo mantad diolo, auso ko kivaropo nobotisanku, ausono dii aandamanku. -- 17Aandaian oku do aui nakapamatis#1:17 nakapamatis: nakapamaptais oku, do koponuuan nopo di Koristus dogo nga papaabar di Abar do Aandai, okoniko do mamatis.#1:17 mamatis: mamaptais Om ontok do papaabar oku di Abar do Aandai diri okoniko mantad do kopiipintaro do tulun toomod mitangar, nga supaya orotijan di tongotulun om aui osia-sia i kinapatajan di Koristus siri salib do irino monuduk di kuasaJo.

I Koristusno i Nontodon do Kuasa om i Kopintaro mantad di Kinoringan

18Do iri nopo ponudukan pasal do kinapatajan di Koristus siri salib nga pokobuduon di tongotulun di obinasa. Nga itokou nopo do kaanu do kovijaan, oilaan tokou do iri ponudukan pasal diri kinapatajan di Koristus siri salib nga pakajon di Kinoringan do pointalang di kuasaJo. 19Do kivarono nokotulis si Kitab do ka,

“I kopintaro nopo do tulun di opintar nga rusakonKu,

om i kotoromo do ginavo di tulun di ongotarom i ginavo nga ingaralan om lijotonKu,”

kadi Kinoringan.#Antangai Yasaya 29:14.

20Nong irad dino, isaipo dii tulun diri opintar? Om isaipo dii monunuduk di Undang-undang Ugama do Joudi? Om isaipo dii moilo moiupakat siti vonuvo? Nga nokotudukno di Kinoringan do kopintaro nopo di tulun siti vonuvo nga sumiliu noopo do kobuduvan. 21Irad nopo diri, sabap do kivaro kopintaro di Kinoringan nga inaturJo laaid do au kotutun i tulun siti vonuvo Disido mantad di kopintaro diolo kondiri. Om kouvangan nopo do Kinoringan nga momijau do tulun nong aparsaya iolo diri Abar do Aandai iri iabar tokou. Nga soromonon do tulun daa do kobudu iri Abar do Aandai diri. 22Do tulun nopo do Joudi nga siontong diri pongintutunan, om tulun nopo do Gorik nga mogium do kopintaro. 23Nga itokou nopo om papaabar do i Koristus nopo nga napatai siri salib, om ponudukan nopo diri nga pokoruol do ginavo di tongotulun Joudi om pokobuduon diri tulun di okonko bansa Joudi. 24Nga tikid-tikid di tulun do linoou di Kinoringan, irino tulun Joudi do tulun di okonko bansa Joudi, nga kaaratii mantad di kinosoliban di Koristus do pinointalang do Kinoringan i ginirot di kuasaJo om i kopintaroJo. 25Irad nopo diri, iri nopo ponguranan di tongotulun do, “Kobuduvan do Kinoringan,” ka, maka irino opintar mantad diri kopintaro di tongotulun. Om iri nopo ponguranan di tongotulun do, “Koluajan do Kinoringan,” ka, maka iri nogi do ogirot mantad diri ginirot di tongotulun.

26Oou kosusuladanku, soromono muju pogi nong potingkukuro kou ontok diri linoou kou di Kinoringan. Do ontok diri koguuan nopo dikovu nga tulun tomod noopo, do okoniko oguu kou tulun do opintar pangantangan do tulun, om okoniko oguu kou do kikuasa, om okoniko oguu kou do kingaran do agajo. 27Nga tinomod do Kinoringan momili i tobudu kaantangan do tulun siti vonuvo supaya popoikum-ikum Isido di tulun do opintar, om pinili Disido i oluoi siti vonuvo supaya popoikum-ikum di tulun do ongogirot. 28Om pinili nogi di Kinoringan isaai nopo iri pinoinsuribak, om iri au podulionon, om iri auso ngaran-ngaran siti vonuvo do nokoouso diri narajou#1:28 narajou: noompod do aandai siti vonuvo 29supaya auso tulun do misinggagajo si di Kinoringan. 30Do Isidono i nontodon do kopiisaan muju si di Koristus om siniliu do Kinoringan Isido do nontodon do kopintaran tokou. Om i Koristusno vagu dii do papabanar daton#1:30 daton: ditokou si di Kinoringan, om Isidono pinopolidang daton si di Kinoringan, om Isidono i minongolukat daton mantad di kuasa do duso. 31Om irad diri orikatani i nokotulis siri Kitab do ka, “Isaai nopo i misinggagajo om aandai do papagajo isido diri vinaal do Tuhan,” ka.#Antangai Yoromia 9:24.

Currently Selected:

1 Korintus 1: LabukPKV

Highlight

Copy