1 Korintus Kopoilaan
Kopoilaan
Ontok do minampanau i Poulus di koinduvo do mongoi popitongkop di Abar do Aandai, om nakaapit isido siri Korintus, irino bandar tagajo si Vonuvo Akaya. Akaya nopo nga iso vonuvo do porintawon di tulun do Ruum. Om Korintus nopo ontok diri nga bandar di tulun Yunani, nga norukutan do bansa do tulun mijon si bandar diri. Om nakabantug do nakamaju marong kadagango diolo, om koubasanan diolo, om norukutan do moisosondiang do ugama siri, om nogi i karaja do kalalasu siri. Oruaino duvono toun i Poulus poindada siri do monuduk di Abar do Aandai, om oguu tulun naparsaya di Yisus (antangai si Susuuon bab 18).
Iti nopo nga surat koiso di Poulus do pinokirim si tulun di aparsaya di Yisus silo Bandar Korintus. Om tinulisan nopo siti nga jawapan di piipiro pongoduatan diolo siri poiuuntunan di tulun di aparsaya i pinoingkakat di Poulus silo Korintus. Pongoduatan nopo diri nga pasal do kovivijaan om kaparsayaan di tongotulun do aparsaya di Yisus Koristus siri.
Iri nopo soromonon marong di Poulus nga pasal do auso kopiandaian di tongotulun diri aparsaya di Yisus siri, om pasal do sumbang siri poiuuntunan di tulun di aparsaya, om auso tantu kopidududunan do kusai om tongondu, om pasal kokowino, om pongoduatan pasal do kopurimanan do ginavo, om pasal oturan di aandai si poiuuntunan di tulun do aparsaya, om pasal diri sinundu do itaak di Tatod do Kinoringan, om nogi pasal do tulun di napatai om ovijau kavagu. Om maja do kopintarojo papatarang i Poulus nong potingkuro iri Abar do Aandai mantad do Kinoringan obuli mangajawap do pongoduatan diolo diri.
Si bab 13 pinatarang di Poulus nong potingkuro iri sababanar do au kojuu do irino oporlu marong mantad do onuu nopo sinundu nitaak di Kinoringan. Om bab ditino iri nakabantug marong mantad di bab vokon saralom do buuk diti.
Saralom diti Buuk
1. Kotimpuunon diti surat 1:1-9
2. Moisosompini i tulun di aparsaya si Korintus 1:10-4:21
3. Tanggungjawap di tulun Koristian do ada sumompuu do tulun diri mamaal do duso 5:1-13
4. Ponudukan pasal mangadaawa do sulod 6:1-11
5. Gaagaya di apatut do tulun Koristian 6:12-20
6. Tinulisan di Poulus pasal mikawin 7:1-40
7. Tulun di naparsaya di Yisus om i tulun kaapir 8:1-11:1
8. Gaagaya di tongondu di apatut si poiuuntunan di tulun di aparsaya 11:2-16
9. Gaagaya di apatut do sumamba do Kinoringan 11:17-34
10. I sinundu nitaak di Tatod Tolidang om gaagaya do apatut do mamakai diri sinundu nitaak Disido 12:1-14:40
11. Kinovijaan kavagu di Koristus om kovijaan kavagu di tulun do aparsaya mantad si kapatajon 15:1-58
12. Niponulung di tulun aparsaya silo Vonuvo Yudia 16:1-4
13. Kopoilaan di Poulus di sadangan disido 16:5-9
14. Pongovian diti surat 16:10-24
Nong kivaro tanda bintang (*) siri tinangaran, nga obuli iumon i komoion diri tinangaran si Kamus Kadajan.
Currently Selected:
1 Korintus Kopoilaan: LabukPKV
Highlight
Share
Copy
Want to have your highlights saved across all your devices? Sign up or sign in
© 1995, Wycliffe Bible Translators, Inc. All rights reserved.