Waroma 11
11
Mbazi ya Mlungu kwa Waisraeli
1Ndamu nendekotela: Mlungu wanawaleghile wandu wake wenyi? Hata! Imi mwenyi nimi Mwisraeli, wa kivali cha Abrahamu, wa mbari ya Benjamini. 2Mlungu sawaleghile wandu wake, awa awasaghule kufuma kudyowa. Namanya mwamanya selyi Mawandiko gha Kuela gheghoragha ighulu ya Elija kemghorera Mlungu ighulu ya Waisraeli. 3“Bwana, wamalila kuulagha wana tondolo wako na wavunja mazabahu ghako; Nimi mwenyi keng'weri nasigho, nawo wanashaile kuniulagha.” 4Ni itumbulilo muni Mlungu amtumbulile? “Nakuikila Imi mwenyi wandu elfu mfungate siwetasile Baali.” 5Niko kwenyi iwo hata ngelo ya indakwenyi: kuwo na wandu wachache walye wasaghulo ni Mlungu, kwa undu ghwa mbazi yake. 6Kusaghula kwake kondefumanya na mbazi yake, si kwa ghalye wadeile. Kwani ngera kusaghula kwa Mlungu kofumile na selyi wandu wadeagha, aho mbazi yake mango si mbazi ingi ya fulo.
7Ndamu nini? Wandu wa Israeli siwaonile agha weluo wekehada; yeluo ni walye wandu wachache wasaghulo ni Mlungu waionile; wazima wakakulisa ngolo. 8Selyi Mawandiko gha Kuela gheghoragha,
“Mlungu kawadea ngolo zawe zikale zikulile,
hata lelo siwaonagha na meso ghawe ango kusikila na masikilo ghawe.”
9Naye Daudi waghora,
“Sigheni wawato na wawatiso kele karamu zawe;
wagwe na wakwito.
10Meso ghawe ghatunguriso eri siwaone;
na wagomeka mighongo kwa
masirimi ngelo zose.”
11Ndamu nendekotela: Wayahudi waghenda wakwalo wanagwile wakahaita kamare? Hata! Kwa kukala wanadeile kaung'a, Ukizi ghukawajila wandu wa mbari nzima, aho kukadea Wayahudi wawaonele iziso. 12Kaung'a ya Wayahudi yanaletelele mubaraka urumengu, na ukiwa ghwawe ghwa kiroho ghukawaletela wandu wa mbari nzima uzuri ghwa mubaraka. Ghujekala mubaraka mubwaa sani ngelo isabu lya Wayahudi wose lyijengizo!
Ukizi ghwa mbari nzima
13Ndamu nendeghoranya nenyo wandu wa mbari nzima: Ngelo zose nio mtumo wa wandu wa mbari nzima, nijekukasa na kazi yangu. 14Ngera yadimika wandu wa mbari yangu waone iziso, na hung'u idimike kuwakiza wamoju wawe. 15Kwani waghenda walegho, wa urumengu wakadeo kukala wagheni wa Mlungu. Ndamu ikalagha ije, ilyi wadumusilo? Ikalagha wazuka kifweni!
16Ikakala kibelele cha hambiri cha mkate chahawo Mlungu, mkate ghose na ghose ni ghwake, na ikakala miriginga ya mwiti yafunyo sadaka kwa Mlungu, mbashe na zose ni zake. 17Mbashe zimoju za mzeituni ghwa mbweni zapaso na mbashe ya mzeituni ghwa isakeni yawataniso nagho. Inyo wandu wa mbari nzima ninyo karakara na mzeituni ghwa isakeni, na ndamu mwapata ndighi na kitomvu cha umana ghwa mzeituni ghwa mbweni. 18Kwa hung'u simwawamenye walye wapasilo sa mbashe. Mwadima ije kukukasa? Inyo ninyo mbashe tu, sinyo wengi mumangisagha miriginga, miriginga niyo imumangisagha.
19Ela mwadima kughora, “Mbashe yanapasilo kunihawa ulalo.” 20Agha ni gha fulo! Zanapasilo kwa kukala sizidumuse, ela inyo mwanausile ulalo ghwawe kwa kukala mwanadumuse. Ela simwakale na ngolo yekukasa kwa undu ghwa ilyo; ela mkale na wogha. 21Mlungu sadimile kuwafwila waya Wayahudi awa weo sa mbashe za fulo, udimagha ije kumfwila waya inyo? 22Aha taona selyi Mlungu ewo na mbazi na abile. Wanabile kwa walye wamalile kugwa, ela wana mbazi kwenyu inyo ilyi mwatula kele mbazi yake; ela ilyi mwalemo, nanyose mujepaso. 23Nawo Wayahudi ilyi wasigha kulegha kudumusa kwawe, wejeujo kele ghulya ulalo weluo, kwa kukala Mlungu wadima kuwauja sena. 24Nenyo wandu wa mbari nzima mondekala sa mbashe za mzeituni ghwa isakeni ghupasilo alye na kunaniso na mzeituni ghwa mbweni. Wayahudi nawo ni sa ughu mwiti ghwa mbweni, na ijekala yanawanguwe kwa Mlungu kuwatanisa izi mbashe zipasilo andu kwake kwenyi kele mwiti.
Mbazi ya Mlungu kwa wose
25Kuo na fulo ivisike, wana wakwetu nishaile muimanye, kwani ijemdea simwakuririkanyire inyo wenyi kukala walachu. Ni uku kusikiriwa kwa wandu wa Israeli kwa ngelo tu kuwadeagha wandu wa mbari nzima waketi wamujile Mlungu. 26Na ni hung'u Waisraeli wose wejekila. Mawandiko gha Kuela ghaghora,
“Mkizi ukujagha kufuma Zioni
naye ujefunya malaghelaghe ghose kufuma kele kivali
cha Jakobo.
27Nemi nijedea ilagano nawo,
ilyi nafunya kaung'a zawe.”
28Kwa undu ghwawe kulegha Ilagho Lyaloli, Wayahudi wakala wamaiza wa Mlungu kwa undu ghwenyu inyo wa mbari nzima. Ela kwa kukala ni wasaghulo wa Mlungu, wakala wagheni wake kwa undu ghwa wana akee. 29Kwani Mlungu saghalulagha maririkanyo ghake ighulu ya esaghulagha na ebarikiagha. 30Nenyo wandu wa mbari nzima, ko kale moluo simomusikilagha Mlungu, ela ndamu mwapata mbazi ya Mlungu kwa kusikiriwa kwa Wayahudi. 31Niko kwenyi ndamu, kwa kukala inyo mwapata mbazi, Wayahudi walegha kumsikila Mlungu, eri nawose ndamu wapate mbazi ya Mlungu. 32Kwani Mlungu wawadea wandu wose kukala wafungo wa kusikiriwa, eri aonyeze mbazi yake kwa wose.
Mlungu akaso
33Ni mubwaa sani uzuri na suku na kumanya kwa Mlungu! Nani edimagha kutaghanya kwake? Nani edimagha kumanya ngila zake? 34Mawandiko gha Kuela ghaghora,
“Nani aweni maghelelo gha Bwana?
Nani edimagha kumfunda?
35Nani amhawile Mlungu kindu chingi lyingi
eri amlipe?”
36Kwani vindu vose wanaviumbile, na vindu vose niye avidea vikale na vio kwa undu ghwake. Ubwaa ghukale kwake kwa kale na kale. Ameni.
Currently Selected:
Waroma 11: SAGALLANT
Highlight
Share
Compare
Copy
Want to have your highlights saved across all your devices? Sign up or sign in
(C) The Bible Society of Kenya, 1993
