Waroma 12

Kukala kele utumishi ghwa Mlungu

1Kwa hung'u wana wakwetu, kwa kukala Mbazi ya Mlungu ni mbwaa kwetu, namlomba: Mkufunye inyo wenyi kwa Mlungu sa sadaka, iwo moyo ielile na imuboelagha Mlungu. Ughu nigho utasi ghumfweni kumtasa Mlungu. 2Simwairime gha urumengu ughu, ela mghalulo ni Mlungu komweni kwa ngila yeghalula maghelelo ghenyu. Nao ima mdime kumanya mashayo gha Mlungu, na ilyo lyio lyaloli lyemuboela na lyiketi.

3Na kwa undu ghwa mbazi nihawilo ni Mlungu, ndemuza inyose: simwakuririkanyile inyo wenyi kukala wabwaa kuchumba selyi imfweni. Ela maririkanyo ghenyu ghakale ghafweni, na kila mumoju apime mwenyi idumusi ilyi ahawilo ni Mlungu. 4Kwani mili yetu iwo na viungo vingi na kila kimoju chio na kazi yake. 5Ni hung'u kwenyi nesi hata ngera sani nisi wengi, nisi muli ghumojori ghuwataniso na Kristo na itose tanawataniso sa viungo kele muli ghumojori. 6Kwa hung'u titumie manosi ghetu sighefwanane, kwa kuirimana na mbazi ilya Mlungu atihawile. Ngera inosi lyetu ni kughora ilagho lya Mlungu, tighore kuirimana na lyilya idumusi tihawilo. 7Ngera ni kutumika, ni suti titumike. Ngera ni kufundisa ni suti tifundise. 8Ngera ni kuwakumba ngolo wazima ni suti tidee hung'o. Uyo wose esaragha na wazima ichi ewo nacho, ni suti asare kwa ishima: Uyu wose ewo na nguma ni suti akale na chadi kele kazi yake, uyo wose ewo na mbazi ni suti adee kwa kuboelo.

9Mashayo ni suti ghakale ghaketi putu putu. Mumenye ghalye ghawase na mwatane na ghaloli. 10Mshayane hachi yenyi sa wana wakwetu kele Kristo na kila mumoju amhawe mumbawe ishima. 11Mkale na chadi kazini na simwakale waghadi. Mumtumikile Bwana kwa ngolo yekukufunya. 12Mkoseree kwa maboelo, mrumaghie kwa matiriro na kulomba ngelo zose. 13Wahaweni wandu wa Mlungu ivi washaile na nyumba kwenyu muwakaribishe wagheni.

14Mulombe Mlungu awabarikie awa wemutiriragha mumlombe awabarikie, simwawawanyize. 15Boeloni na awa weo na kuboelo na mulile na awa welilagha. 16Wadeileni wandu wose karakara. Hata simwakukase, ela mukufwananise na wandu wa isi. Simwakuone inyo wenyi kukala walachu kuchumba.

17Ngera mundungi amdeile laghelaghe, simwalwanile. Timeni kudea agha wandu wose weonagha ni ghaloli. 18Mdee selyi mdimagha kukala na sere na wandu wose. 19Simwalwanile wagheni wangu, ela msighe hare ya Mlungu idee kazi. Kwani Mawandiko gha Kuela gheghoragha, “Imi nijelwanila, imi nijelipa, aghora Bwana.” 20Ela kibalo chake, Mawandiko gha Kuela ghaghora, “Ngera mumaiza wako ewo na njala, mlyise, ngera ewo na kau mhawe chenwa; kwani kwa ngila iyi ujemufwisha waya sa kumtukisa makala gha moto kele chongo chake.” 21Simwasimo ni ulaghelaghe, ela ghusimeni ulaghelaghe kwa kudea ghaloli.

Currently Selected:

Waroma 12: SAGALLANT

Highlight

Compare

Copy