Waroma 10
10
1Wana wakwetu, lyangu nishaile na ngolo yangu ni kamba wandu wa mbari yangu wakizo. Nemi nawalombela Mlungu. 2Nemi nadima kuwashuhudia kamba wanakufunyile kwa Mlungu. Ela kukufunya kwawe sikuwo kele umanyi ghwa fulo. 3Kwani kwa kulegha kumanya hachi ifumagha kwa Mlungu wahada ngila zawe wenyi, na kwa hung'u siwakuseleze wenyi kele ngila ya Mlungu iwaikagha wandu kele hachi. 4Kwani Kristo wanaimalile Sheria, eri kila mundu edumusagha adeo kukala mhachi na Mlungu.
Ukizi ni kwa wose
5Agha nigho Musa awandike ighulu ya kukala na hachi na Mlungu kwa kuwata Sheria. “Uwo wose edeagha selyi sheria ighoragha ujekala moyo kwa iyo.” 6Ela agha nigho ghaghoriro ighulu ya kudeo mhachi na Mlungu kwa ngila ya idumusi. “Simwaghore inyo wenyi, Nani ejokagha mlunguni?” (Eri amseleze Kristo). 7“Hata simwaghore, Nani engilagha urumenguni ko mweni?” (Eri amfunye Kristo kufuma kifweni). 8Ela Mawandiko gheghoragha ije? “Ilagho lya Mlungu lyio avui newe, kele mlomu ghwako na ngoloni kwako” ilyi ni ilagho lya idumusi tilyichilagha. 9Ilyi waghora na mlomu ghwako, “Jesu ni Bwana” na wadumusa ngoloni kwako kamba Mlungu wanamzusile kufuma kifweni, ujekizo. 10Kwani kwa kudumusa ngoloni kwetu tapata hachi kwa Mlungu, taghora na milomu yetu na takizo. 11Mawandiko gha Kuela ghaghora, “Uwo wose emdumusagha sefwishikagha waya.” 12Ilyi ni kwa kila mundu, kwa kukala sikwesi machumbano kwa Wayahudi na wandu wa mbari nzima. Mlungu ni Bwana wa wose na wanawabarikiagha wose wamghora. 13Selyi Mawandiko gha Kuela ghaghoragha, “Uwo wose elombagha kwa Izina lya Bwana ujekila.”
14Ela wemughoragha ije, ngera siwemdumuse? Na wedumusagha ije, ngera siwesikile Ilagho? Na wesikilagha ije, ngera Ilagho silyechililo? 15Na Ilagho lyichilogho ije, ngera wachili siwetumilo? Selyi Mawandiko gha Kuela ghaghora, “Ni kwaloli sani kuwaona walye wechilagha Ilagho Lyaloli?” 16Ela si wandu wose welyihokeragha Ilagho Lyaloli. Kwani Isaya waghora, “Bwana nani adumuse ilagho lyetu?” 17Kwa hung'u, idumusi lyeja kwa ngila ya kusikila ilagho na ilagho lyafumanya na kumchila Kristo.
18Ela nendekotela: Ado ni fulo siwasikile ilyo ilagho? Namanya wanalyisikile; selyi Mawandiko gha Kuela gheghoragha,
“Nywaka zawe zaghenda kila andu urumenguni; malagho ghawe ghafika hata koduila urumengu.”
19Sena nendekotela: Ado wandu wa Israeli siwamanyile? Musa mwenyi ni wa hambiri kutumbulila:
“Nijemdea mkale na iziso kwa wandu siweo mbari;
Nijemdea mwasilo ni mbari ya wandu wazimu.”
20Naye Isaya waghora kiung'oni,
“Nanaonilo ni walye siweluo wekenihada;
Nanaonekane na walye siweluo wekenikotela.”
21Ela ighulu ya Israeli waghora,
“Nanaghorore mikonu yangu msenya dii kwa wandu wasikiriwe na siwesikilagha.”
Currently Selected:
Waroma 10: SAGALLANT
Highlight
Share
Copy
Want to have your highlights saved across all your devices? Sign up or sign in
(C) The Bible Society of Kenya, 1993
