Waroma 9

Mlungu na wandu wake awasaghule

1Agha nighoragha ni gha fulo; Imi nimi wa Kristo na si ndimi ingi nighoragha. Ngolo yangu iwo iketawalo ni Roho wa Kuela, nayo iwo ikenishuhudia sighoragha ndimi. 2Nio na furuse mbwaa na kuhariso ngoloni kwangu kwa undu ghwa wandu wangu, muli ghwangu na bighati yangu. 3Kwani kwa undu ghwawe neshaile kumacho imi mwenyi nawanyizo ni Mlungu na kutaghanyo kufuma kwa Kristo. 4Wo ni Waisraeli wasaghulo ni Mlungu; naye wanawadeile kukala wana na wandu wa ngaro ya ubwaa ghwake; wanadeile malagano nawo na kawahawa Sheria; weo na utasi ghwa fulo; nawo wanamalile kupata malagano gha Mlungu; 5wo ni kivali chana ake na Kristo sa mdamu ni mbari yawe. Mlungu uyu ahasisagha kila kindu akaso kwa kale na kale. Ameni.

6Si kughamba nendeghora ati ilagano lya Mlungu lyavunjika kwa kukala si wandu wose wa Israeli weo wasaghulo wa Mlungu. 7Hata si kivali chose cha Abrahamu chio wana wa Mlungu. Kwani Mlungu omuzile Abrahamu, “Kivalo cha Isaki chijetalo kukala chako.” 8Hung'u ni kughamba kamba wana wavelo kidamu si wana wa Mlungu kungi; ela wana wavelo kwa ilagano lya Mlungu watalika kukala wana wake wa fulo. 9Kwani ilagano lya Mlungu lyanadeilo kwa malagho agha: “Kwa ngelo ifweni nijeja na Sara upatagha mwana wa kialume.”

10Na si hung'u tu. Kwani wana wa Rabeka weluo na tatie mumojori, ake Isaki. 11Ela eri kamba usaghulo ghwa mwana mumojori ghukatise ghalye Mlungu ashaile, 12Mlungu kamuza Rabeka, “Mubwaa ujemtumikila mchache.” Mlungu kaghora agha hambiri siwevelo na hambiri siwedeile ghengi ghaloli ango ghawase; kwa hung'u usaghulo gholuo selyi epangile na si ighulu ya ghalye wadea. 13Mawandiko gha Kuela ghaghora, “Nemshaile Jakobo, ela Esau nemumenyile.”

14Ndamu tighore ije? Tighore Mlungu sawesi hachi? Hata! 15Kwani wanamuuzile Musa, “Nijemfwila waya kila mundu nimshaile.” 16Kwa hung'u, siitegemea kushaya kwa mundu ango chadi chake, ela ni mbazi ya Mlungu. 17Kwani Mawandiko gha Kuela ghaghora kwa Farao, “Nanakudeile ukale Mzuri kwa undu ughu, eri nikutumie kuonyeza ndighi zangu, na kudea Izina lyangu lyimanyo ni wandu wose urumenguni.” 18Kwa hung'u wanamfwilagha waya uyu amshaya, na wanakulisagha ngolo ya uyu amshaya.

Hare na mbazi ya Mlungu

19Ela mumoju wenyu ujeniuza, “Ikakala niko hung'u, Mlungu uonagha ije makosa gha mundu? Nani edimagha kukala kinyume cha mashayo gha Mlungu?” 20Ela uwe nuwe ani mdamu, hata umtumbulile Mlungu? Nyungu siimkotelagha uyu aiumbile, “Kudani uniumbile hung'u?” 21Kwani mundu aumbagha nyungu wana hachi yetumia udongo selyi ashaile, wadima kudea nyungu mbili kufuma kele itonge lyilya lyenyi, moju kwa matumizi ngelo mbwaa na moju kutumio ngelo zose.

22Na hung'u niko lyio kwa Mlungu. Oshaile kuonyeza hare yake na kuimanyisa ndighi yake. Kwa hung'u wanarumaghianye na walye weluo wa hare yake, awa weluo wa kuhaitiso. 23Na sena oshaile kufunukula uzuri ghwa ubwaa ghwake, ughu ghutililo kwetu isi tio wa mbazi yake, isi walye atiikile kirani kupata ubwaa ghwake. 24Kwani ni isi atipang'ile, si kufuma kwa Wayahudi keng'weri, ela na kufuma kwa mbari nzima. 25Ni selyi aghoragha kele chuo cha Hosea,

“Wandu walye siweluo wangu,

Nijewaita ‘wandu wangu’

Na mbari ilya neluo seishaile,

Nijeiita ‘mshayo wangu.’

26Na alye andu kwenyi wauzilo,

‘Inyo sinyo wandu wangu,’

ni anyalye wejeito wana wa Mlungu ewo moyo.”

27Naye Isaya kwa kushinika kaghora ighulu ya Israeli, “Hata ngera sani Waisraeli ni wengi sa msanzaghala ghwa baharini, ela ni wachache wawe tu wejekizo. 28Kwani Bwana ujetaghanya shashowa wandu wa urumengu.” 29Ni selyi Isaya aghorire ko hambiri, “Ngera Bwana wa Majeshi setisighilile wana wamoju, ni kumacho tikalile sa Sodomu, ni kumacho tikalile sa Gomora.”

Malombi gha Paulo kwa undu ghwa Waisraeli

30Ndamu tighore ije? Tighore hung'u: wandu wa mbari nzima siweluo weketima kukala na hachi na Mlungu wanadeilo kukala na hachi naye kwa ngila ya idumusi; 31ela wandu wa Israeli, awa weluo wekeirima Sheria ilya idimagha kuwadea wakale na hachi na Mlungu, siwaionile. 32Na ni kudani? Ni kwa kukala agha weluo wekedea sigheluo gha idumusi ela gha kazi. Nawo wakakwalo ni iwe lyekwala. 33Selyi Mawandiko gha Kuela gheghoragha,

“Lola, naika iwe Zioni

Lyideagha wandu wakwalo;

Lwala luwadeagha wagwe,

Ela uwo wose emdumusagha iye,

sejefwishika waya.”

Currently Selected:

Waroma 9: SAGALLANT

Highlight

Copy