1 Wakorintho 7

Makotelo ighulu ya kulola

1Ndamu kwa malagho ghalye muwandike ighulu yake. Ni kirani mundu salole. 2Ela kwa undu ghwa uzingi kukala mungi, kila mundu akale na mkwake mwenyi, na kila muke akale na mlume wake mwenyi. 3Mlume amhawe mkwake gheo hachi yake, na muke naese amhawe mlume wake gheo hachi yake. 4Muke sawesi ndighi ighulu ya muli ghwake sala mlume wake na mlume naese sawesi ndighi ighulu ya muli ghwake sala mkwake. 5Simwaimane sala mkale mwapatana kudea hung'u kwa ngelo, eri mutumie iyo ngelo kwa malombi; ela muwuilane sena, kwa ngila iyi shetani semutimagha kwa kulemo ni kukumanzira.

6Naghora agha kwa kumfunda, na si kwa kumushurutisha. 7Neshaile inyose mkale sa imi. Ela kila mumoju uwo na inosi lyake kufuma kwa Mlungu, mumoju inosi ilyi na mzima inosi lyilya.

8Ndamu kwa walye siwelole na walye wafwililo nendeghora kamba ni kirani kwawe kukala wo wenyi selyi imi nio. 9Ela ngera siwedimagha kukumanzira, ni bora walole. Kwani ni bora kulola kuchumba kuwako ni tamaa.

10Kwa walye walole nio na mlomu sighweo ghwangu, ela ni ghwa Bwana. Muke ni suti samsighe mlume wake; 11ela ilyi amusigha sauso ango apatane na mlume wake, na mlume ni suti samleghe mkwake.

12Kwa wazima nendeghora Imi mwenyi na si Bwana. Ikakala wakwetu Mkristo wana muke sedumuse, naye wadumusa kukalanya naye ni kirani samuleghe. 13Na ngera muke ungi Mkristo ausilo ni mundu sedumuse na ulya mundu wadumuse kukala naye, ni kirani samusighe. 14Kwani mlume sedumuse wadumusilo ni Mlungu kwa kuwataniso na mkwake, naye muke sedumuse wadumuso ni Mlungu kwa kuwataniso na mlume wake. Ngera si hung'u, wana wawe macha wendekala sa wandu siwemweni Mlungu, ela selyi iwo, wadumusilo ni Mlungu. 15Ela ilyi ulya sedumuse ashaya kumusigha mumbawe Mkristo, amusighe; kwa ngila iyi wakwetu mlume ango muke, sefungogho. Kwani Mlungu wanampang'ile mkale kele sere. 16Ndamu uwe muke Mkristo wamanya ije kamba sumukizagha mlume wako? Ango uwe mlume Mkristo wamanya ije kamba sumukizagha mkwako?

Mkale selyi Mlungu ampang'ile

17Kila mumoju akale kuirimana na inosi lya Bwana ahawilo na selyi eluo ngelo epang'ilo ni Mlungu. Agha nigho nifundisagha makanisa ghose. 18Ngera kuwo na mundungi apang'ilo ni Mlungu achwilo, Sakudee sachwilo. Ngera kuwo na mundu apang'ilo ni Mlungu sechilo, sachwigho. 19Kwani kuchwigho ango kulemo ni kuchwigho si kindu chingi, ela chishaike ni kuwata milomu ya Mlungu. 20Kila mumoju akale selyi eluo ngelo yepang'o ni Mlungu. 21Woluo msunyi ngelo opang'ogho ni Mlungu? Swatale agho; ela, kwaghupata ukidina, ghutumie. 22Kwani msunyi uyu apang'ilo ni Bwana ni mkidina wa Bwana; na mkidina apang'ilo ni Kristo ni msunyi wake. 23Mwanaghulilo kwa zoghori; kwa hung'u simwawuye wasunyi wa wandu. 24Kwa hung'u wana wakwetu, kila mumoju akale kele ungaro ghwa Mlungu selyi kwenyi eluo kepang'o.

Makotelo ighulu ya wake siweusilo na wafwililo

25Ndamu ighulu ya malagho gha wandu kulegha kulola ango kuuso selyi muniwandikile: siwesi mulomu ghungi ghwa Bwana, ela nendefunya maririkanyo ghangu sa mundu mdumusiliki afwililo waya ni Mlungu. 26Kwa kuirimana na wasi ghwa indakwenyi, nighelelagha ni kirani mundu kukala selyi ewo. 27Uwo na muke umusile? Swahade kusighana naye. Wanatula solole? Swahade kulola. 28Ela ilyi walola, sudeile kaung'a ingi; na mchana seusilo ilyi auso, sadeile kaung'a ingi. Ela awa welolagha wejepato ni masirimi gha urumengu, na ndeshaya nimukize na masirimi agho.

29Ilagho nighoragha wana wakwetu ni ilyi, ngelo yasigho ni njache, na kufuma indakwenyi, wandu walole wakale sa wandu siwelole, 30walye weshighiragha wakale sa wandu siwefuruse; walye wesekagha wakale sa wandu siweboelelo, walye weghulagha wakale sa walye siwewesi vindu waghulile. 31Walye wadeagha zoghori na vindu va urumengu, wakale sa wandu siwedeagha zoghori putu navo. Kwani urumengu ughu selyi ghuo indakwenyi ni ghohaita.

32Nanashaile mkale simwewo na wasi ghungi. Mundu selole wanakusirimisagha mwenyi na kazi ya Bwana, kwa kukala wanahadagha kumuboela Bwana. 33Ela mundu alole wanakusirimisagha na gha urumengu, kwa kukala wanashaile kumuboela mkwake, 34kwa hung'u wasarika gasi mbili. Muke seusilo ango seweni mlume wanakusirimisagha mwenyi na kazi ya Bwana. Kwa kukala wanashaile kukala wa kuela muli na roho, ela muke ausilo wakusirimisa na gha urumengu eri amuboele mlume wake.

35Nendeghora hung'u kwa kukala nanashaile kumwarura, si kughamba nendeshaya kumufunga. Ela nendeshaya mdee ghaloli na ghafweni, na mkufunye putu kwa utumishi ghwa Bwana kwa ngolo yose.

36Ela ngera mundu ewo na ulanga eonagha kamba seghenda kirani na ulya amkumbagha ulanga, na ngera tamaa yake ni mbwaa, na niko ikalagha, haya sadee selyi ashaile, alole na iyo si kaung'a ingi. 37Ela ilyi mundu amanya sashaile kulola, sikweo na kufunganyizilo, na ngera wakumanzira putu na uwo na ngolo yelinda muchana emusagha sikweo kumsughutila, wadea kirani kalegha kumusa. 38Kwa hung'u uyu mundu elolagha wadea kirani, na uyu selolagha udeagha kirani kuchumba.

39Muke ausilo wanafungilo ngelo yose mlume wake ewo moyo, ela mlume wake kafwa, wadima kuuso ni mlume uwo wose, ela akale Mkristo. 40Ela nionagha mabwelo kuchumba ilyi akala ukwenyi. Na namanya nio na Roho wa Mlungu.

Currently Selected:

1 Wakorintho 7: SAGALLANT

Highlight

Copy

Compare