1 Wakorintho 8

Makotelo ighulu ya vakulya vifunyilo kwa milungu

1Ndamu kwa malagho gha chakulya chifunyilo sadaka kwa sanamu. “Tamanya kamba itose tio na akili.” Izo akili zadea wandu wakukase, ela mashayo ghawaghala. 2Ilyi mundungi aririkanya kamba wanaweni kindu, kwa fulo zenyi saweni selyi ifweni amanye. 3Ela ilyi mundu amushaya Mlungu, iye wamanyo ni Mlungu.

4Kwa hung'u chakulya chifunyilo kwa milungu tamanya “ni kughora ni kwa milungu siyewo,” kwani tamanya kuo na Mlungu Mumojori tu. 5Hata ngera sani walye waitogho milungu weo mlunguni ango isangeni, hata ngera sani awa ni “milungu” na “mabwana” wengi, 6ela kwetu kuwo na Mlungu mumojori, Aba, uyu aumbile vindu vose, na atiikagha moyo; na kuo na Bwana mumojori, Jesu Kristo, uyu kwa undu ghwake vindu vose vanaumbilo na vanakalagha moyo.

7Ela si kila mundu aweni uhachi ughu. Kwani wandu wamoju wanailise kutasa milungu, hata lelo wakalya nyama sa iyo, wendeghelela kamba ni nyama ya milungu na kwa kukala maririkanyo ghawe ni manyonge waghelela wakwaliso ni chilya chakulya. 8Chakulya sichidimagha kutidea kukala wandu wafweni kwa Mlungu. Sitijesowa kindu chingi ilyi talemo ni kulya hata sitipatagha kindu chingi ilyi talya.

9Ela kulindeni kamba ughu uhuru ghwenyu sighojewadea walye wanyonge wa idumusi kungila kele kaung'a. 10Kwani mundu ewo na maririkanyo manyonge ilyi akuona uwe mundu wa akili kwelya kele hekalu ya milungu; ado sejepata ngolo yelya chakulya chifunyilo kwa milungu? 11Kwa hung'u kwa kumanya kwako, wakwenyu afwililo ni Kristo, ujehaita! 12Kwa hung'u ilyi wamdeila wakwenyu kaung'a na kuiharisa ngolo yake iyo mnyonge, wamdeila kaung'a Kristo. 13Kwa hung'u ngera chakulya chimdeagha wakwetu angile kele kaung'a, silyighagha nyama sena, sejemdea wakwetu angile kaung'eni.

Currently Selected:

1 Wakorintho 8: SAGALLANT

Highlight

Copy

Compare