1 Wakorintho 6

Wakristo kushitakiana

1Ngera mundungi akala na ilagho na Mkristo mumbawe, ughendagha ije kwa wataghanyi siwewo wa Mlungu wa fulo kibalo cheghenda kwa wandu wa Mlungu kutaghanyo? 2Ado simuweni kamba wandu wa Mlungu wejetaghanya urumengu? Ndamu ikakala mdimagha kutaghanya urumengu, mulemogho ije kutaghanya malagho machache? 3Ado simumanyagha kamba tijetaghanya wana malaika? Ndamu si kuchumba kwa isi kudima kutaghanya malagho gha ughu umana! 4Ndamu ilyi malagho sa agha gheja, mughaghenzagha ije ghataghanyo ni wandu siweo wa ikanisa? 5Naghora hung'u kwa kumufwisha waya. Namanya kamba kuwo na mundu mumojori wenyu ewo na suku kele ungaro ghwenyu, edimagha kutaghanya malagho gha wana wakwetu weo na mateto. 6Ela Mkristo wamughenza Mkristo mumbawe kele kutaghanyo na ataghanyo ni mundu hata sedumusagha.

7Kwa fulo kushitakiana ghati yenyu kwaonyeza kamba si muo karakara. Siyeluo ni bora kwenyu kukoso? Siyeluo ni bora kwenyu muiwilo? 8Ela inyo mwadeilana makosa na kusoka, mwasoka hata wana wakwenyu wenyi. 9Namanya mwamanya kamba walaghelaghe siwepatagha uzuri ghwa Mlungu. Simwakuembeembe inyo wenyi, wandu weo wazingi ango watasi sanamu ango wasusi, 10ango viting'a ango weo na choyo ango wanaruwi ango waguni, ango wavekuri, wandu sa awa siwepatagha Uzuri ghwa Mlungu. 11Wamoju wenyu weluo hung'u. Ela mwanaeleso kaung'a, mkafunyo kwa Mlungu na kupataniso na Mlungu ni Bwana Jesu Kristo na Roho wa Mlungu wetu.

Kutumia mili kwa ubwaa ghwa Mlungu

12Mundu mumoju ughoragha, “Vindu vose sivio na mrighido kwangu”. Ee, ela si vindu vose vio valoli. Vindu vose sivio na mrighido kwangu, ela sisighagha kindu chingi chinidee msunyi. 13Mundu wadima kughora, “Chakulya ni kwa kifu na kifu ni kwa chakulya.” Ee, ela Mlungu ujevihaitisa vose. Muli sighotumio kwa kuzinga, ela ni kwa kumtumikila Bwana; naye Bwana ni kwa muli. 14Mlungu wanamuzusile Bwana kufuma kifweni, naye ujetizusa natose kwa udimo ghwake.

15Ado simuweni kamba mili yenyu ni viungo va Kristo? Ndamu niuse luhande lumoju lwa Kristo niludee kukala kiungo cha kijimbo? Hata! 16Ado simuweni kamba uyu ewatanagha na kijimbo, wakala muli ghumojori naye? Kwani Mawandiko gha Kuela ghaghora, “Awo waili wekalagha muli ghumojori.” 17Ela uyu awataniso na Bwana wakala roho mojori naye.

18Kimbileni uzingi. Kaung'a zose mdamu edeagha, zio shighati ya muli ghwake, ela mundu ezingagha, wadea kaung'a ighulu ya muli ghwake. 19Ado simuweni kamba mili yenyu ni hekalu ya Roho wa Kuela, uyu akalagha amweni kwenyu na mhawilo ni Mlungu? Inyo sinyo wenyu wengi kungi, ela wa Mlungu. 20Mwanaghulilo kwa zoghori. Kwa hung'u tumieni mili yenyu kwa ubwaa ghwa Mlungu.

Currently Selected:

1 Wakorintho 6: SAGALLANT

Highlight

Copy

Compare