1 Wakorintho 5

Uzingi kele Ikanisa

1Kwa fulo kwaghoro kamba kuo na uzingi ghati yenyu, na ni uzingi ghuwase kuchumba ghwa wandu siwemweni Mlungu wa fulo. Nasikila kamba mundu mumoju wanalalagha na muke wa tatie! 2Ndamu nini mukukasilagha? Macha mwafurusa na kumufunya kele ungaro ghwenyu ulya adeile hung'u. 3Kwani hata ngera sani nio kulele kwa muli, nio nenyo kiroho, na kwa kukala nendekala sa kuzo nio aho, namtaghanya uyo mundu adeile malagho agho ghawase. 4Kwa izina lya Bwana Jesu ngelo mukoghanagha, na roho yangu ikoghanagha nenyo, kwa undu ghwa ndighi za Bwana wetu Jesu uyu ewo nesi, 5mujemuhawa shetani uyu mundu eri muli ghwake ghuhaitiso, kamba roho yake ikile kele Ijua lya Bwana.

6Kukukasa kwenyu si kwaloli kungi! Mwamanya selyi kughorogho, “Chachu njache yadea itonge lyose lya unga lyichachuke.” 7Ni suti mufunye chachu ya kale ya kaung'a eri mkale mwelile putu. Nao mkale sa itonge iwishi lya unga silyewesi chachu, selyi namumanya fulo muo. Kwani karamu yetu ya Pasaka yaiko kirani, Kristo, ng'onzi yetu ya Pasaka wafunyo kizangauna. 8Kwa hung'u tilye karamu ya Pasaka, si kwa chachu ya kale ya kaung'a na ulaghelaghe, ela kwa mkate sighowesi chachu, mkate ghuelile na ghwa fulo.

9Kele barua yangu nanamwandikile simwawatane na wandu wezinga. 10Aho seluo nikeghora ighulu ya wandu siwemweni Mlungu awa weo wazingi, ango weo na choyo, ango viting'a, ango watasi sanamu. Kwani yekalagha ni kufuma aha urumenguni eri simwakale nawo. 11Ela nanamwandikile simwawatane na mundungi ekuitagha mwenyi Mkristo na ewo mzingi ango ewo na choyo, ango etasagha sanamu, ango mghori laghelaghe ango munaruwi ango kiting'a. Hata simwalyanye na mundu sa uyu.

12-13Kwani kuo na faida muni imi kuwataghanya wandu wa shighati? Mlungu niye ewataghanyagha walye weo shighati. Ela inyo taghanyeni wandu wa ungaro ghwenyu. Selyi Mawandiko gha Kuela ghaghora, “Mfunyeni mundu wa laghelaghe ghati yenyu.”

Currently Selected:

1 Wakorintho 5: SAGALLANT

Highlight

Copy

Compare