1 Wakorintho 2

Uvoro ghwa Kristo awambilo

1Wana wakwetu, ngelo nejile kwenyu kuchila fulo ya Mlungu ivisike situmie malagho ghakulile na gha kumanya kubwaa. 2Kwani ngelo tekezanye, seshaile kumanya kindu chingi kwenyu sala Jesu Kristo na kifwa chake kele msalaba. 3Kwa hung'u nighenda nija kwenyu, neluo mnyonge na nikegaganika kwa wogha, 4na mafundiso ghangu na machilo sigheluo gha malagho ghasingile gha suku za kidamu, ela gheluo ghengila kwa ndighi za Roho wa Mlungu. 5Eri idumusi lyenyu silyakale kele suku za kidamu, sala kele ndighi ya Mlungu.

Suku ya Mlungu

6Ela hata hung'u, tanaghoragha kwa suku kwa walye wazeguwe kiroho. Ela si kwa suku za urumengu ughu ango za ndighi zideagha nguma urumenguni izi ziduwagha. 7Suku nighoragha ni suku ivisike ya Mlungu, yevisike kwa wadamu, ela yeikilo kwa undu ghwa ubwaa ghwetu kufuma kuumbo urumengu. 8Sikowesi ungi wa watawala wa ughu urumengu eweni suku iyi. Ngera wemanyile, kumacha siwemwambile Bwana wa ubwaa. 9Selyi Mawandiko gha Kuela gheghoragha,

“agha mundungi seonile ango sesikile;

agha mundungi seghelele ghekalagha,

nigho ghenyi Mlungu aikilile walye wamushaile.”

10Ela yeluo ni kwa undu ghwetu amanyise viviso vake kwa ngila ya Roho. Kwani Roho yanahadagha kila kindu, hata vivisike va Mlungu. 11Nani edimagha kumanya maririkanyo gha mundu sala roho iwo amweni kwa uyo mundu! Niko kwenyi iwo, Roho ya Mlungu niyo imanyagha ghose gha Mlungu. 12Isi sitipatile roho ya urumengu, ela tanapatile Roho atumilo ni Mlungu eri timanye ghose Mlungu atihawile.

13Kwa hung'u, sitighoragha malagho tifundiso kwa suku za kidamu, ela kwa malagho tifundiso ni Roho, ngelo tighoragha hachi za kiroho kwa walye weo na Roho. 14Mundu uwo wose sewo na Roho sedimagha kupata manosi kufuma kwa Roho wa Mlungu. Mundu sa uyo sighemutambukilagha, ghendekala ni sa uzimu kwake, kwa kukala ghatambuka kwa kufunukulo ni Roho. 15Mundu uwo wose ewo na Roho wadima kutambula kila kindu chaloli, ela iye sataghanyogho ni mundungi. 16Selyi Mawandiko gha Kuela ghaghora,

“Nani aweni akili ya Bwana?

Nani edimagha kumfunda?

Ela isi tio na akili za Kristo.”

Currently Selected:

1 Wakorintho 2: SAGALLANT

Highlight

Copy

Compare